وضروي جداً تفحصي فيتامين د لانه والله له علاقه بالوسواس ونوبات الهلع هو صح ماله علاقة مباشره ممكن انتي شخصيتك كذا نفس حالتي لكن له دور كبير

شوفي انا في استشاري نصحني اوقف العلاج النفسي وابدا اعالج فيتامين د لانه طلع جداً جداً ناقص عندي وصل 3 وقال نبدا نعالج هذا النقص وراح تحسين بتحسن ملاحظ بصحتك ونفسيتك لان نقصه سبحان الله يأثر على كل الجسم ف انا بدأت اخذ فيتامين د قوته 50 الف حبه بالاسبوع والحمد لله الله يجعله سبب للشفاء يارب مايمنع ان الواحد يبذل الاسباب كلها ويتوكل على الله اول خطوه تسوينها الحين تروحين تفحصين فيتاميناتك وتاخذين الناقص منها + اشغلي نفسك كثير لاتخلين مجال للشيطان يسيطر عليك واذا جاتك فكره لاتسترسلين معاها اقطعيها على طول ادري الكلام سهل وانا مجربه بس حاولي صدقيني مره عن مره تحسين نفسك اقوى وثقتك بنفسك اكبر وان هذي بس افكار غبيه مالها اساس من الصحة وعادي تجي ايام نستسلم فيها ونيأس بس نحاول مره ومرتين وثلاث ودايماً واجهي مخاوفك لاتهربين منها يعني دخلتي مكان وقلتي عندي احساس غريب اكيد بيصير شي قولي عادي حتى لو صار شي وادخلي بالمكان الي انتي خايفه منه عندك انا مثال بسيط بس عشان اوضحلك الفكره انا اذا دخلت مصعد او اصنصير مدري وش تسمونه المهم كنت اخاف اطلع فيه الحالي اخاف يقفل بس قلت خلاص انا اخاف لازم اواجه هذا الخوف وفعلاً الحمد لله واجته اول مره كنت راح اموت من الخوف والمره الثانيه والثالثه وهكذا لين قدرت اتغلب على خوفي وادري اني كنت ابالغ هذا بس مثال بسيط ذكرته لك وجاتني فتره مستحيل اطلع لمول او مكان فيه ناس احس بموت وتجيني كتمة قلت راح اتحدى نفسي واروح وتحديت نفسي ماقولك اول مره كيف مت من الخوف وطنشت اقولك هذا الكلام قبل العلاج والحمد لله يارب كثير امور تحديت نفسي فيها في منها فشلت ومنها نجحت وحسيت بشعور الانجاز واني تحديت نفسي وواجهتها وواجهت مخاوفي كان شعور مره حلوو ومازلت جالسه اواجه نفسي بكل شي اخاف لين اتغلب على كل مخاوفي باذن الله حتى الي فشلت فيهم يارب يكون كلامي واضح ويفيدك لو بنسبة بسيطة لاني صاحبة تجربة واقولك هذا الكلام وانا مجربة شعورك وخوفك

السلام عليكم

أسأل الله أن يعجل بشفائك


لا تزعلين يا أختي لما أقول لك إني إبتسمت عند كثير من الجمل في موضوعك ، ما في سبب إلا إنها مرت علي سابقا 😅


كنت أكره أشوف وجهي بالمراية ، كان وجهي ميت بكل ما تحمله الكلمة من معنى و أحيانا أقول بيني و بين نفسي اييييه راحت عليك ، راحت أيام العز ، كنت أنظر لنفسي إني مسكين و إن حياتي إنتهت لأني جسد منهك بروح مضطربة تتخطفها الوسواس و الأفكار السلبية


لما عرفت إن عندي وسواس و إن فيه ناس كثير تعيش نفس الشعور بدأت بداية متخبطة في البحث و محاولة إستيعاب ما يجري


بدأت ألقى أجوبة للآلام الجسدية و الأفكار السلبية اللي تمر علي ، آلام الصدر اللي كل ما فتحت قوقل قال لي ذبحة صدرية و جلطة و أنواع السرطانات ، قرأت كثير من الكتابات لناس مجهولين و وقتها أحاول أربط الأمور و أبحث عن دراسات عربية أو أجنبية تكون منطقية


أول شيء تبادر لذهني ليش أغلبية مرضى الوسواس و نوبات الهلع يعانون من مشاكل هضمية ، ليش عندهم نقص فيتامين دال و ب12 ، مع إننا شباب و نأكل مصادر الفيتامينات هذي

لقيت وقتها دراسات تثبت إن المشكلة في الإمتصاص و ليس في التغذية ، احنا أكثر شعب يأكل لحوم و لما رحت فحصت لقيته ناقص !! رغم إن الكبد بإمكانها تخزن ب12 حق سنة قدام

طالما توجد مشكلة بالجهاز الهضمي فالإمتصاص لن يكون بشكل طبيعي ، المؤثرات كثيرة من متلازمة القولون العصبي أو إنتشار بكتيريا ضارة في الجهاز الهضمي سواء في المعدة أو الأمعاء أو نقص في الفلو ا و هي البكتيريا النافعة اللي لها دور كبير في إمتصاص الفيتامينات و المعادن

كذلك دراسات أثبتت إنه ما دام هناك مشكلة في الجهاز الهضمي أو تلبك معوي فإنتاج هرمون السيروتونين (السعادة) سيقل عن الطبيعي ، حيث أن 90% من الهرمون يتم إنتاجه في الأمعاء و هو مهم لحالة الإنسان المزاجية

مجرد ما يفهم الشخص ايش اللي صاير معه يبدأ يتجاوز الوسواس حبة حبة ، يعني إرتجاع مريء ( الإرتجاع الصامت
) ممكن يوسوس فيني سنة لو ما عرفته ، كثير دكاترة أشكي لهم ألم كبير في منتصف الصدر يحط السماعة و إذا مرة مرة سوا تخطيط ثم قال ما فيك إلا العافية و حولني على دكتور عظام يعطيني فيتامين دال

وكان حله سهل ، لا تأكل و تنسدح أو ترتكي على جنب ، لا تملأ بطنك بالأكل إبتعد عن السبايسي و الهيل و الزنجبيل و الثوم ، لا تشرب الحليب ، وجبة العشاء قبل النوم بثلاث ساعات ، نام على جنبك الأيسر من شان تسكر المعدة و أرفع راسك بمخدة كبيرة أو مخدتين العادية


أشغل يومك بدنيا و فكريا ، حاول ترجع نفسك للأشياء اللي تحبها لو فلم أو مسلسل تتابعه لين تطيح على خشمك و تنام دون تفكير 😅

لا تطفي المقطع الصوتي أو الفيديو اللي تتابعه

العبادات يا أختي ضعفت فيها وقت المرض ، كنت أكره نفسي وقتها ، لكن الله أعلم بمعاناتنا ذيك الأيام


تأكدي إن الوسواس ما راح يستمر معك للأبد ، هي مرحلة راح تعدي بعد أسبوع أو ثلاث سنين ، على قد فهمك للمشكلة راح تتجاوزينها أسرع ، أهم شيء وقتها راح تفهمين إنك ما تصغطين على نفسك و تاخذين وقتك في مرحلة الإستشفاء و تجاوز الترسبات اللي راح تأخذ وقت مو بسيط على حسب ظروفك


ملايين في العالم تراودهم نفس الأفكار و اليوميات اللي تمر عليك الآن و فيه اليوم واحد أو إثنين أو عشرين يعتبر هذا أول يوم في شفائهم ، و الدور جايك بإذن الله 👌🏼😅


و الله كنت داخل بدعي لك و بقول باكر أرد 🤣🤣 إسترسلت بالكتابة رغم إني وسط زحمة 😅

الله كلامك جاء بوقته الله يجزاك خير المشكله مع الوساوس ماعاد تعرف اذا فعلاً فيك عله او هو مجرد تفكير ووسوسه نفسها نفس المرات الي قبلها انا عادي اتعايش مع الوسواس مع الاكتئاب بس نوبات الهلع هذي هي الي ماقدرت اتجاوزها تجيني فجأه بدون مقدمات ولا فكرت بشي وانا عندي قولون وارتجاع مدري اذا هي تسبب نوبات هلع او مالها علاقه بسألك انت اخذت ادويه نفسيه او كيف عالجتها والله يجزاك خير وهل كانت تجيك نوبات هلع ؟؟