السلام عليكم,,

انا عضو جديد معاكم في المنتدى.. وحبيت اعطي رايي في الموضوع..

اولا الموضوع هذا جدا حساس والمفروض اخوي لانك مريت بهالشي تراعي شعور الناس.. يعني هو صج مفيد بس لو قلتلهم قبل عشان مثلا محد يدش الموضوع او يعني نوع من التحذير او انتباه.. المهم ماعلينا اللي صار صار.. وربك كريم.. واتمنى انه محد تأثر وايد من الموضوع..

مرض الهلع يحتاج بيئه تساعد المريض على الشفاء.. يعني يحتاج ناس تساعده من كل النواحي.. لانه البيئه السلبيه راح تاثر ع المريض بزياده.. وراح اعطيكم ابسط مثال ع اللي اقصده.. اللي هو اذا طلب المريض الذهاب الى مستشفى الامراض النفسيه.. الرد راح يكون ليش مجنون او مجنونه؟؟ ثاني شي.. للاسف لحين عندنا في الخليج بالذات الردود الاستفزازيه.. يعني مسكينه رفيجتي.. تقول امي وايد متعبتني كل ما اقولها اني تعبانه تقولي انتي مافيج شي كله دلع بس.. في هالاجواء مستحيل تتشافى..

الهلع هو صحيح وسواس بس مب سهل.. لانه وسواس عن موضوع صعب,, واي شي ممكن يأثر فينا احنه المرضى.. واذا لاحظتوا انه يحاول يسيطر على اكثر شي او اكبر هدف عند الانسان.. يعني مثلا الدراسه او الزواج او الوظيفه.. الخ
ولانه يسيطر على اهم اهداف الانسان.. الواحد هنيه يفقد الامل ويصبح انسان يا~س من حياته ويعزل نفسه مما يؤدي الى الكتمان والانفراد حيث تصبح حال المريض اصعب..

احدى الحلول والاهم منها هي الكلام مع الناس اللي ممكن تثق فيها.. لانه المرض هذا واااااايد منتشر في جيلنا سبحان الله.. بس هذا الحل مب سهل..
الطريقه او احدى الحلول الاخري هي كتابة مفكره يوميه .. ونكتب فيها كل شي نفكر فيه وكل شي مضايقنا.. ونخليه حق نفسنا..
الحل الثالث.. نكتب قائمتين.. الاولى الاشياء الايجابيه فينا والثانيه اهدافنا في الحياة عشان نركز فيها ونحققه بكل نجاح ان شاء الله..

في شي ماعجبني في العديد من الردود.. وهو اللي ذكر ان الانسان المصاب يعني ضعيف الايمان.. وانا راح اسألهم سؤال.. اذا هذا هو ضعف الايمان عيل اللي صادهم الهلع بعد ما تابوا من المعاصي,, شنو نسميهم؟؟
الهلع مو ضعف ايمان ولا قوه ايمان.. هو مرض لازم نشوف له حل.. وربي ان شاء الله بيشافينا جميعا..

والشي الثاني اللي ذكروا انه عقاب من رب العالمين لانه لجا الى كل شي الا الله؟؟ المريض يكون في حالة صعبة بحيث الافكار تكون مشوشه عنده او عندها.. ف احنه مالنا حق نقول انه اللي فيه عقاب من رب العالمين لانه انتي مش ربه.. وهذا غلط واسمحيلي ع التعليق اختي بس مالج حق..

وهذا رايي في الموضوع وعسى الله يشافي الكل..

وجزاكم الله خير