|
انافرانيل
ايش اعراضه الجانبية عندي اهم شي الاثار ما تطيحني زي السروكسات وشلته |
لا لاتخافي السيروكسات يسبب خمول وتجهم بالوجه ونشفان بالفم ونعاس ويؤثر على الحياة الزوجية الانافرانيل بجرعة 25 ملجم أخف بكثير وتقريبا ماتحسي بأي أعراض مزعجة |
طيب تم ان شاءالله حاجيبه بس تنصحني اكمل عالموتيفال لحد ما اخلص اختبار وابدء في انافرانيل احسن ولا الاتنين زي بعض ينومو لانه الموتيفال برضه بينوم
|
ايوه انصحك لاتغيري الين تخلصي الامتحان
وتأثيرهم من ناحية النوم الانافرانيل أقل من الموتيفال خلصي امتحاناتك وغيري العلاج بعدها |
خلاص ان شاءالله استمر عليه
|
السلام عليكم دكتوراليوم في الصبح اكلت حار الحار دا عدمني مشى بطني بس دخلت الحمام اكرمك الله مرة وحدة لكن مرررررررة حسيت بجسمي تعب والله كاني جريت الف كيلو وخفقان في القلب وتعرق وحرارة في الراس مع العلم اني يوميا اشرب سنت رم فيتامين واخد كمان زيت كبد الحوت وكمان حبة حديد لكن لي يومين ما اخدت حديد ولا كبدالحوت وحسيت جسمي في خمول وتعب واحس اني حيغمى علي ليش الاعراض دي هي زادت بعد الاسهال اللي استمر 3اسابيع بعدها جسمي سار من اقل شي يتعب
ايش الحل ما ابغى الحالة تستمر على الاختبارات الاسبوع الجي ان شاءالله |
اختي ريري البوتاسيوم ينقص مع الاسهال (الله يكرمك) ويسبب حالة ارهاق وخمول وتحسي جسمك مهدود البوتاسيوم متوفر في الفواكه وخاصة الموز والبرتقال وملح البوتاسيوم موجود في السوبرماركتات والصيدليات ولا يرفع الضغط ويقوي الجسم ومهم تشيكي على هرمون الكورتيزون اذا كان فيه مشكلة يسبب خمول وكسل واوجاع |
شكرا دكتور ايش الكورتيزون تحليل يعني وكيف اعرف انه ناقص
|
والله اختي ريري انا أشك واعتقد شكي في غير محله لأن الكورتيزون لو كان ناقص كان صار عندك هبوط بالدورة الدموية والضغط واغماء وتضخم الغدة النخامية عندك من النوع اللي أصاب هرمون الحليب والتضخم انواع وبالعادة ماتيجي مختلطة، يعني مافي تضخم يأثر على هرمون الحليب والكورتيزون مع بعض، المفروض ياهرمون الحليب ياالكورتيزون عموما هو تحليل في اي مختبر طبي ، تقولي ابغى احلل هرمون الكورتيزون واعمليه للإطمئنان ،لأن الغالب عندك هو نقص البوتاسيوم. وبالمناسبة حتى البوتاسيوم تقدري تحلليه وممكن تاكلي فواكه او ملح بوتاسيوم ويتصلح بسرعة مستواه في الدم ويطلع التحليل سليم أهم شيء لازم يوميا تاخذي كمية جيدة من البوتاسيوم خاصة لو استمر الاسهال أو كان عندك استفراغ |
الحمدلله مافي اسهال بس انا مستغربة تجيني اهتزازات احس بماس في جسمي لكن بدون الم اهتزما اعرف ليه بس لاحظته خف بعدالموتيفال لكن رجع لي يومين مع لخبطة النوم وتفكيري بالاختبارات
|
هذي الاهتزازات اللي توصفيها تيجي مع الانقطاع الفجائي
عن مضادات الاكتآب لكن برضه كلي فواكه أو عصير برتقال طازج علشان البوتاسيوم |
طيب ان شاالله اشربها
|
السلام عليكم دكتور
اليوم مدري ايشبي مدري خوف ولا بجد تعب صحيت طيبة شوية سرت احس بنفاضة وزكمة خفيفة ودوخة مع العلم امس اخدت الدوستنكس مدري منه ولا خوف نفسي لمن افتكر بكرة اختبار ادووووخ واحس باغماء |
وبعدين ريري؟ مو كل حاجه نقول نفسيه، تقولي زكمه ونفاضه يمكن مريضة بنزلة برد وطبيعي معاها تكوني تعبانة ودايخة وبعدين شدي حيلك ولا تخلي الامتحانات تعذبك يعني بالله لو خفتي بيجي الامتحان سهل والا بنجحوكي؟ ماراح يتغير شي بالخوف خليكي قوية غصبا عن الامتحانات ولا تخليها تعذبك صدقيني اللي يروح الامتحان وهو قوي ولامبالي يبدع اكثر من اللي يروح وهو خايف وشايل هم يعني ايش ؟ راح تموتك الامتحانات؟ مع احترامي لكل الامتحانات قولي لها طز ولا تعذبي نفسك عشانها نصيبك اللي مكتوب لك راح تاخذيه كافي ووافي |
صحيح والله درر كلامك
يادكتور المشكلة الكبيرة عندي دححين انه القلق ساير زي الملقوف في كل شي يتدخل يعني اتعب ازكم اقلق اختبر اقلق اخرج اقلق مع اني امس جاتني الحالة قبل ما روح لخالتي ماشاءالله رحت لاول مرة من فترة لاحظت اني ما انزعجت من الناس ولا جاتني احاسيس الدوخة والاغماء بس المشكلة انهم كانو مزكمين هههه وخفت انعدي عشان الامتحانات دي اللي مو راضية تنتهي وبالفعل قمت مدروخة جبت الانافرانيل ايش رايك اخد حبة دحين ولا اخد موتيفال بس خايفة يجيبولي النوم |
السلام عليكم دكتور
اليوم اعطيك ملخص اليوم دخلت استنيت قبل الاختبار ولقيت 4 طالبات 3ولادة ووحدة حامل ةانا مالي اي داعي ههه المهم وانا جالسة كل ماتجي وحدة توتري يزيد مو عارفه ليه مو بسبب الحمل لا في العموم باتضايق من الناس دخلت الاختباراول نص ساعة عرقت مع انه القاعة تلججججج ارجف دايخة مو قادرة اركز مع العلم اني لاول مرة ما اهتم بالنتايج لكن خوفف من اني اطيح فجاة لقيت الخوف طار كملت الحمدلله وخرجت عادي مو خايفة من شي وبكرة ان شاءالله مدري ايش وضعي بس ان شاءالله احسن |
لا، ماشاء الله انا شايف فيه تقدم بعدين اتفقنا نخلي الانافرانيل بعد الامتحانات وموتيفال يجيب النوم لكن تصحي عاديه مو نعسانة واذا خلصتي الامتحانات نبدأ انافرانيل وعلى فكرة ممكن تاخذيهم مع بعض لكن بيصير عندك جفاف شديد بالفم، فانصحك تاخذي واحد منهم بس |
صحيح الحمدلله بدات بخطوات بسيطة وان شاءالله اسيطر عليه يمكن عارفة اسيطر عليه لانه قبل كدا جاني وسواس الصلاة والطهارة الحمدلله سيطرت عليه بعد سنين عشان كدا مو حابة الرهاب يسيطر علي برضه سنين لكن بجد متعب جدا جدا اصعب من وسواس الصلاة
بالنسبة لجفاف الفم مو عارفة ليه لي يومين بس اشرب موية كاني سمكة |
السلام عليكم
ملخص اليوم الحمدلله كان الخوف مستمر بالذات بسبب قلة النوم لكن قرات البقرة اتحممت وبدات اراجع قبل الامتحان بطلت اراجع ريحت طلعت الجامعة لحاالي بدون شغالتي جلست مع بنات ما اعرفهم الحمدلله كنت هادية جدا الامتحان اخدت الورقة جاتني دوخة بسيطة طردتها وبدات احل الحمدلله اسئلة سهلة عقبال الباقي يارب |
آمين يارب ملخص رائع وأداء جيد واصلي على كذا الين نهاية الامتحانات وربي يوفقك |
السلام عليكم
ملخص اليوم الحمدطول اليوم امس كنت مرتاحة اخدت الموتيفال قبل ما انامالساعة 12الضهر صحيت رايقة مع انه اصعب مادة فطرت الصبح الساعة 7بعد قرات البقرة الحمدلله وشربت حبة حديد وفنجان قهوة تركي حبيبة قلبي اللي باشربها دحين على الساعة 8ونص بدات احس بقرصة شديدة في معدتي كانها جوع بس مو جوع المهم رحت الاختبار بدات احس قبل الدخول بعدم توازن ودوخة مو خوف لا شي عضوي كاني مو اكله في الاختبار اول عشرة دقايق دخت طلبت اغير مكاني لمكان في هوا لاني لابسة تقيل والقاعة عادة تكيفها تلج اليوم لا عادي مع انه جو المدينة اليوم باردجدا وانا من بداية مرضي ما سرت اتحمل الحر مو عارفة ليه وادوخ منه المهم غيرت مكاني فسخت البوت والشراب اكلت حلاوة سكر الحمدلله ارتحت شوية بس كنت كل ما اقرء سؤال اخاف خوف لانها مادة عملية تحتاج تركيز احس بدوخة واحساس كاني حانصرع الحمدلله حليت الاربعين سؤال لكن دحين حاسة بشوية خوف مو كتير من باقي الامتحانات الخوف من الحالة دي اللي تتكرر في كل امتحانات اكون اكله ووضعي تمام لكن اجوع وادوخ مو عارفة ليه وسرت ارتجف ومعرقة وفجاة سرت بردااااااانة جدا صراحة شي مخبلني ليش ما باقدر اتحمل الحر وايش الحل في جونا اللي كله حررر |
امتحان وحر وقلق الله يعينك بس برضه أدائك جيد وهانت ، باقي يومين، صح؟ الله يعينك ويوفقك بغيت أسأل، متى آخر مرة راجعتي فيها طبيب الغدد؟ أو عملتي فيها فحص للهرمونات؟ لأن هرمون الدرقية إذا زاد يسبب زيادة تعرق وعدم تحمل الحر ليه ماتعملي تشييك على كل الهرمونات اللي لها علاقة بالغدة النخامية؟ فحوص روتينية يعني من باب الاطمئنان؟ |
قبل شهر ومستنيةاخلص امتحانواعيد التحاليل لانه لازم كل شهر اعيدها
طيب ايش العمل شوية طالعة الجامعة ان شاءالله وحاسة الخوف متملكني اخدت موتيفال الساعة 2 ارجع اخد تاني ولا لا دحين |
ممكن تاخذي موتيفال الى حد 4 حبات في اليوم كحد أقصى
ولا تزيدي عن كذا وأفضل تقسميها جرعتين صباحا ومساءا |
اخدت حبة قبل الامتحان بساعتين مو عارفة ليش فجاة سرت مضطربة الحمدلله مفعولها بدء في الامتحان
|
السلام عليكم
عرفت سبب الازمة النفسية طلعت الدورة الشهرية مقدمة عن موعدها من يوم اخدت العلاج سارت تقدم المفروض انها تجي الاسبوع الجي لكن قدمت المهم سؤالي ليش اعرق في الدورة واحر هل هو طبيعي ثاانيا باشرب حديد لكن اليوم 3من الدورة مررررة جسمي يتعب اسير كاني اسفنجة خفيفة ومو قادرة امشي باخد حديد وسينت رم وزيت كبد الحوت الحمدلله الشهر اللي فات خف التعب عن اول لكن برضه باتعب مع العلم انزف كتير صراحة اول 3ايام |
عادي اختي ريري ثلاثة أرباع النساء بيتعبوا من الدورة والأصل هو ان المفروض كلهم يتعبو، لكن بعضهم محضوضات يمكن مرات تكون أشد من غيرها، لكن الله يعينكم يابنات حوا، هذا قدركم خذي مسكنات للمغص زي بسكوبان ومسكن الم زي فولتارين، عند اللزوم طبعا مو على طول وربي يعينك |
الله يعيننا اخدت مهدئات للدورة بجد عذاب الحمدلله
|
السلام عليكم دكتور
حبيت اسالك عن الغدة عادة الدرقية او النخامية متى عادة تظبط تحتاج كم شهر تقريبا حتى ارجع طبيعية بالذات للدرقية ثانيا انا لي تقريبا 3اشهر باشرب سينت رم وزيت كبد الحوت شهرين والحديد بشكل متفرق تقريبا بشكل يوميا وكذلك الدوستنكس والموتيفال برايك ايش الاضرار اللي باحد نفسي فيها وهل الكبد عندي حيتضرر لاقدر الله |
اقتباس:
ماعندي فكرة والله اختي رجاء اطباء الغدد والاستشاريين الخبراء هم اللي يقدرو يجاوبوكي وهناك فروق فردية ربما لها علاقة بنوع التضخم ومكانه في الغدة والخلايا التي اصابها، فكل مريض حالته تختلف عن غيره ياليت تسألي طبيبك اللي يعالجك أكيد هو أدرى بالنسبة للأدوية لاتخافي أغلبها مكملات غذائية وليست مواد كيماوية ، والكبد تتحمل أدوية كثيرة وأعرف ناس عندهم القلب والسكر والضغط والروماتيزم وياكلو في اليوم الى حد 10 انواع ادوية وماعندهم مشاكل فيه ادوية معينة معروف انها ثقيلة على الكبد ويتم التحذير من استخدامها (قصدي استخدامها بحذر) وعادة ينخاف من استعمال دوائين كلاهما ثقيل على الكبد |
جزاك الله خير دكتور انا سالت الدكتورة ما اعطتني جواب للاسف خلال فترة علاجي السنة دي اكتشفت اغلب الدكاترة عندهم سوء تعامل لانهم يستقبلو مرضى كتير على حساب وقتهم ولا يكون عندهم استعداد يتفاهمو لمن سالت الدكتورة عن الاهتزاز والم العضلات هل هو من الغدة قالتلي لالا ما اعرفش مش تخصصي روحي لاعصاب رحت لاعصاب دفعت 1000ريال عالفاضي لو اشتريت بيها شنطة كان احسن والله قالي لالا خشونة الرقبة والضهر مايعملوش كدا انتي مشكلتك نفسية مع اني لمن كنت اتعالجت في العيادة عشان ضهري ورقبتي قالتلي الدكتورة اعراض الخشونة تسبب تعب للاعصاب وشدلدرجة البكلة في الراس حتتعبك وانا رحت لدكتور الاعصاب ولا استفدت
|
ههههههههههه
عجبتني فكرة شراء الشنطه وكمان هههههههههههه طيب روحي لدكتوره غيرها وخذي تقرير مفصل من عندها وكل تحاليلك وأشعاتك ، أكيد في دكاترة امناء اسألي وان شاء الله تلاقي |
هههههه
انا قررت اطلع جدة للدكتور مجدي الشيخ ان شاءالله كخطوة اولى للحقن المجهري لاني تجيني اوقات اتخنق فيها نفسي اضم طفلي مني انا مو اطفال الناس نفسي بطفل لمن يبكي يجيني مايروح لامه ولمن يبغى شي يجيني لاني امه مو احبهم ووقت الجد لامهم وانا ولا احد مهتم بي يسير ان شاءالله اعطيه التقارير يحدد حالتي واذا ينفع ابدء |
دكتور انا خايفة يكون معايا السكر كيف اقدر اعرف قريت الاعراض بقيت بعضها في بس في نفس الوقت مو عارفة لانياساسا اكلي ضعيف بس خايفة مرررة يكون عندي سكر مع العلم اني انجرحت قبل يومين والحمدلله الجرح التئم بسرعة
|
ملاحظه العطش زايد عندي بس عموما باشرب سوائل كتيرر لاني مو حابة الاكل معدتي تعورني قبل كدا سويت تحاليل سكر طلع نازل بس كنت في عز التهاب المعدة لكن الحمدلله يكون طبيعي او نازل لكم مو طالع
مرررررررررررررررررررة خايفة |
والله ياعزيزتي ان الخوف على الصحة مشروع ولكن باعتدال
كنا ايام الدراسة في الكلية كل ماقرينا عن مرض نشك انه فينا لتقارب الاعراض ونطلع في النهاية مجرد موسوسين اختي لا تطاوعي الوساوس والمخاوف لأنه حتى التحاليل ماراح تطمنك. العطش وكثرة التبول (اكرمك الله) والدوخة موجودة عند أغلب الناس بدون مايكون عندهم سكر اذا مافقدتي الوعي تماما وعملوا لك تحليل وطلع عندك خلل في السكر (وأكرر مع فقدان الوعي) والا فلا تخافي ولتطمئني صومي 8 ساعات مساءا ثم حللي السكر في الصباح قبل ان تأكلي واطمئني بعد ذلك |
مرررررررررة شكرا دكتور كلامك صحيح والله ماكنت افكر انه معايا ولا مرض لكن لخبطة الغدد خبلتني نفسيا وعضويا خلتني افكر باشياء مو عندي الله يشفي عقلي وجسمي
الاحظ وقت الدورة بدون صلاة المزاج يسير معدوم والوساوس تكتر وتجيني افكار غريبة بزيادة |
السلام عليكم
للاسف بسبب الاجازة امس اخرولي اخر امتحان في الكم اليوم دي وقفت الموتيفال عشان الحليب طبعا لاحظت نوبات الهلع رجعتلي اخدت حبة من الدوا الجديد اجرب اتعب منه ولا لا وان شاءالله مااتعب لاني امس خرجت لخالتي دخت وتعبت وعرقت ورجعت البيت متوترة نمت وفي النوم ما ارتحت |
أختي ريري:
ليش ماتراجعي طبيب او طبيبة يعطيكي زاناكس فترة قصيرة اسبوعين مثلا، لأن دوا انافرانيل يحتاج وقت مدته اسبوعين حتى يعطي نتايج؟ هذا رأيي وان شاء الله ينفعك بالنسبة لموتيفال سبب لك رفع هرمون الحليب؟ |
لا الموتيفال ماسببلي ارتفاع بس احتياط مو مشكلة استنى عالعلا حتى لونتتجته اسبوعين مو مستعجله
|
| الساعة الآن 08:22 AM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا