|
دكتور هل سيروكسات يسبب سيولة الدم؟ لأني قرأت ممنوع يؤخذ معاه الوارفارين الي هو مانع للتخثر فهل معناته إن السيروكسات يسيل الدم ؟
لأن عندي بكرا جراحة قص لثة محيطة بالضرس وقد جربتها قبل ينزل فيها كمية دم ماأقولك مهولة لكنها ليست بالسهلة .. فهل يمدي أسويها وأنا لي 4 أيام عالسيروكسات؟ وبعدها يمدي أكمل علاجي عادي؟ لأن بيعطيني مضاد حيوي ومسكنات وبرضه بروفين لكن البروفين مايصلح مع السيروكسات والله مشكلة أحس تبهذلت :( ! |
مادام تقولي في خمول حتى لو بسيط معناه ممكن ننتظر على النص وما نستعجل برفع الجرعة
قصدت اوفّر لك الدوا يعني اجيبه من المستشفى وارسله لك ولا تقلقي من موضوع السيولة، هالادوية تتعارض مع ادوية السيوله مثل وارفارين لكن مادام اصلا انتي ماتاخذي مسيل للدم، فماراح يأثر العلاج بشي في موضوع السيولة والف لا باس عليكي، فديت اللثة والضروس ضرس ضرس ومافي تعارضات مع المسكنات او المضاد، تطمني |
اقتباس:
والحمدلله كنت شايله هم الموضوع هذا حق الأسنان طاح همه بالنسبة للعلاج هي المشكلة مش مادية بحتة بالنسبة لي المشكلة إن محد يعرف إني أتعالج إلا أختي وأنا مقدر أطلع من البيت إلا معاها فلما أقولها بغير علاجي راح ترفض وتقول تروحين طبيبة على ايش إذا بتعالجين من راسك , فمالي إلا أشوف السيروكسات إن رفعته لحبة وماتعبت كملت عليه لأن من كلامك فهمت إنه جيد ولايقل عن السيبراليكس بشيء اللهم السيبراليكس أخف أعراض عند الأكثرية وليس الكل ولا ؟ ولا والله ماتقصر الله يجزاك بالخير يارب .. أنا أبي أستشيرك بشغلة الحين الأخصائية النفسية ماعلمتني بالخطة العلاجية أبد كل الي أعرفه إنها تبدا بنوبات الهلع وأنا مو متفقة معها صحيح النوبات الي تجيني قوية جدا وغالبا تنتهي بالطوارئ لكن تظل قليلة مقارنة بغيري الي يشكون بس من نوبات هلع .. أنا كان ودي أحد يبدأ يشيل القلق الي جواتي مانعني عن أشياء كثير بحياتي والوساوس الي تجيني هي الي تعذبني أكثر , لكن الأخصائية بدت بعلاج الهلع وماأعجبتني للأمانة أبد خاصة إنها أجنبية وجديدة وأغلب الأجانب مايفهمون طبيعتنا وتفكيرنا ولايحرصون علينا صراحة لذيك الدرجة , فمحتارة هل أكمل معها بما إن لي جلستين معها وعرفت شكواي مضبوط أو أغيرها لوحدة ثانية سعودية ولها سمعتها إنها متميزة ومخلصة لكن أبدا معها من أول وجديد .. وهل لي حق أتناقش معاهم بايش يبدون يعالجون أم المريض لايملك حق في هالنقطة؟ وهل تأخير أو تقديم جرعة الدواء 3 ساعات تقريبا عادي ؟ والقهوة تتعارض مع العلاج بشيء؟ لأني مسرفة في شربها. عوفيت |
أخيرا بس استفسار سريع لايخصني بل يخص ابن أختي ..
قريبي عمره 15 سنة تقريبا من كان صغير سنتين يمكن وهو عنده حالة يركض بالغرفة كثيير ويصفق ويسوي أحيانا حركات بوجهه وشوي ماعنده خبرة اجتماعية يعني بالأكل والكلام شوي يخبط وينحرج من الناس ماعنده ثقة مرة .. يكتم الحركات هذي عن الناس لكن عند أهله يسويها بس ينحرج لما أحد يدخل عليه وهو يجري بغرفته مثلا أو يصفق .. مع العلم الولد ماشاء الله ذكي جدا جدا الأول على مدرسته ونبيييه .. أهله كشفوا عليه لما كان عمره 6 سنوات خافوا عنده توحد بس ودوه لطبيبة وحدة وشافت إنه ذكي وقالت لا ماعنده شيء أبد ومن بعدها ماعاد راجعو أهله بس حركاته للحين مستمرة ومطيحة من قدره عند أخوانه كثيير هو يسويها غصب عنه .. أنا كنت أفكر يمكن متلازمة توريت لكن الولد يقدر يمسك نفسه عند الناس , أمه تعبانة مرة من حالته تخاف تستمر أعراضه لما يكبر , هل هذا طيف من التوحد أو ايش ممكن يكون ويحتاج علاج؟ ومين تنصح بها المجال من الدكاترة؟ الله يجزاك كل خير قل آمين |
اقتباس:
وصحيح مافي فرق في القوة، بس الاعراض الجانبية قليلة جدا مع سيبراليكس ايوة غيّريها ومن حقك تتناقشي معها انا فهمت ان الأخت سارة الحربي ماعندها عيادات الحين وسألت قالولي في واحدة مرة ممتازة ومدحوها على مستوى الرياض سعودية اسمها هنادي، وتشتغل في عيادات ميدي كير اللي في التخصصي تقريبا مقابل يورومارشيه تأخير او تقديم الجرعة 3 ساعات وحتى 4 ساعات مايأثر كثير بس حاولي ان الوقت يكون اقل من كذا يعني تأخير او تقديم ساعتين والمنبهات ماتأثر ولا فيه تداخلات هامة مع ادوية اخرى بالنسبة لولد اختك فعلا في احتمال كبير يكون عنده توحد كمان انصحكم تعرضوه على الدكتور عبدالله السبيعي في ميدي كير، وبيعطيكم من الآخر الله يوفقك اختي امل ويسعدك ويطمن قلبك اكتبي لي حبيبتي كل يوم لو يناسبك،، يعني سميها يوميات امل هههه او حتى لو عشرة مرات في اليوم وانا متابع معاكي |
اقتباس:
طيب ايش رايك بأخصائية هيا السويلم هل قد سمعت عنها ؟ وبحاول أشوف أخصائية هنادي هذي بحول الله . الولد هذا مو ولد أختي سالفة ولد أختي كتبتها ومسحتها مابي أوسوس فيها بس بعيدها لك .. ولد أختي عمره 3 شهور تقريبا وأغلب وقته معصب مرة ومعقد حواجبه ويناظر الناس حوله بطريقة عجيبة يفتح عيونه بقووة وأحيانا كثيرة يتعمد مايشوفهم .. ودايم مضطرب ويبكي ومافيه سبب عضوي سوا نقص فيتامين د نقص شدييييد وعنده ضعف بعضلات الحلق بس اضطرابه قوي جدا جدا وأختي موسوسة فيه تبي تسوي له أشعة رنين عالراس أو تعرضه ع استشاري نفسية خايفة يكون عنده توحد أو شيء لأن أخوانه الـ 2 الي قبله ماكانوا كذا أبد وأنا أطمنها إن التوحد مايبان إلا في سن سنة ونص أو سنتين أول أعراضه بس هي خايفة .. أما الولد الي ذكرته أول مو ولد أختي .. بس المشكلة الدكتور السبيعي مواعيده بعييييدة جدا .. لكن لو عرضت عليه الحالة تتوقع يميزها؟ الولد قدام الناس يمسك نفسه وثقل وذكي ومثقف والأول على منطقته دراسيا ويعني تسأله عن أشياء يعرف يصف لك كلام مايقوله إلا كبار ويقوله .. لكن حركاته هذي هي الي متعبته ومتعبة من حوله وماعنده ثقة بنفسه مرة تجيه حالات تنهز ثقته جداااا .. الله لايحرمك الأجر وإذا الكتاكيت الي بالصورة أولادك لله يحميهم ويقر عينك بهم يارب.. دكتور بس سؤال الله يرضى عليك .. أنا ذاكرتي صايره عددددددددم ماأذكر شيء ولاعندي تركيز مدري من متى بادي هالشيء بس معاي له فترة مدري هل له علاج ؟ حتى أحيانا يتكلمون أهلي عن موقف وكلهم يتذكرونه إلا أنا مذكر إنه حصل أصلا .. هالشيء مخوفني مرررة هل له حل ؟ وايش سببه ؟ وخايفة الدواء يزيدني فيه سلبا :( الآن موعد جراحة أسناني وقولوني من الخوف يكاد ينفجر , ياميسر .. |
أكرررره بنج الأسنان أكرهه أكرهه طول الجراحة وأنا ع أعصابي وماأمداه يخلص إلا وأطيح عليهم مغمى علي بالعيادة ..
السبب إني مخليته يشتغل بعد ماعطاني 5 إبر ولسه أحس بألم وماعلمته حتى مايعطيني بنج زيادة قص لثتي وشال جزء من عظم الفك وأنا أحس بألم القص وماقلت فيه ألم بس يهون عند شكة إبرة البنج هههههه الحمدلله والله يعدي هاليومين على خير تعبااانة =( |
هههه ،، ياقلبي عليكي ي ريم
طهور ان شاالله والف لاباس عليكي وربي يسعدك على دعواتك لي ولأولادي ، وعقبال عندك بأولاد احلى منهم بالنسبة لولد اختك ابو 3 شهور كلامك صحيح لا التوحد يبين في هالسن ولا اللي وصفتيه توحد الاطفال اصلا يكون عندهم طول نظر ولا يميزوا الاشياء القريبة الا عند سن 4 او 5 سنوات وفي هالفترة يصيروا يحاولوا يركزو النظر وفعلا يعقدو حواجبهم والبكا عادي ماهو بشي، والاطفال يختلفوا في الطبايع حتى لو اخوان وحتى لو في سن مبكر الولد الثاني الكبير لازال في احتمال التوحد لكن مع تفوقه يخلينا نقول احتمال ضعيف بس اكيد فيه عنده سمات تدل على مشكلة في الشخصية وهذي ماراح تعيقه، لكن اكيد بينزعج منها الآخرين هيا ماأعرف عنها لكن هنادي مدحوها بشكل كبير وكمان ماأعرفها بس سمعت عنها |
نسيت اقول اعتذر على التأخر في الرد
ونسيت اعلّق على مشكلة الذاكرة اللي قلتيها وتعليقي هو لاتشكي لي ولا ابكي لك هههه لأن نفس مشكلتك انا اعاني منها خخخخ ولا تخافي اختي، هذي يسمّوها الذاكرة الانتقائية وتصيب اغلب الناس المتفوقين وتزداد حدتها مع التعب النفسي لأن اهتمام الشخص يصير قليل بالاشياء الاجتماعية العادية ويصير اهتمامه في امور اكبر وتخص راحته النفسية ولا تنسي بعد مشكلة قلة النوم لازلت اقول لك لا تقلقي كله بيروح وبتصيرين بخير بأمر الله ربي يسعدك ويوفقك ويطمّن قلبك ياطيبة |
مساء الخير ..
أمس كان معاي صدااع وجفن عيني مع الحاجب الأيسر يرتعشون طول اليوم على فترات متقطعة << هذا أمس اليوم جاني قلق مفاجئ وخوووف غير محدد وبكاء مفاجئ !! من ايش هذا معقولة من الدواء ؟ أخذته أسبوع كامل 10 مجم وبعد يومين عندي موعد واحتمال ترفع لي الجرعة .. أوقفه؟ :( |
ايوة ي أمل،، غالبا هو من الدوا،، رغم ان الدكتورة راح تقول لك لا، هو من ضمن التعب النفسي
في كل الاحوال هو راح يروح مع الوقت، وتقدري تطلبي من الدكتورة تكتب لك شي مهديء او بالاصح مضاد للقلق تستخدميه مدة اسبوعي وبعدها بيروح مفعول القلق |
تحسنت حالتي كم يوم وانبسطت الدكتورة انبسطت .. مادري وش جاني هاليومين انعفست عفسة ماقد شفتها بحياتي ..
لي يومين منمت إلا ساعتين بس أرق وضييييقة وقلق شعور مدري كيف أوصفه شيء كذا من جواتي يتحرك يحسسني بقلق وجلست أبكي .. وهاليومين مدري وش جايني ينخفض ضغطي ونبضات قلبي وأحس بدووخة .. ودي أروح أسوي إيكو للقلب حاسة قلبي فيه شيء :( اليوم بآخذ آخر نص سيروكسات ومن بكرا أرفع لحبة كاملة .. بس وش هالضيقة لاحول ولاقوة إلا بالله العلي العظيم |
الف لا باس عليكي
لا زلت اقول لك عادي، وهذا من ضمن المفعول الأولي للدوا واللي علشانه ينصح كثير من الاطباء بأخذ مضاد قلق في بداية العلاج بل شركات الادوية كلها اللي من نوع ssri يكتبو في النشرة الداخلية تحذير بأنه ممكن يزيد الاكتئاب والتفكير بالانتحار اصبري حبيبتي ، كله بيروح،، ولازلت اقول لك خلي دكتورتك تكتب لك ليكسوتانيل، مضاد للقلق وخفيف ع الجسم |
اقتباس:
يمدي أوقف الدواء ؟ بنفجر ولاحد حاس فيني .. صايره ماداوم ولاعاد لي رغبة بشيء بهالدنيا |
لا أختي، حرام عليكي توقفيه
تقدري اكيد، بس ليه؟ انتي قطعتي شوط جيد وباقي شوي وتبدئي تحصلي على النتائج طيب اعطيكي حل سريع، انتي في الرياض؟ |
اقتباس:
نعم في الرياض .. |
روحي أختي لصيدلية "زينة" في طريق العروبة وانتي متجهة غرب جاية من طريق الملك عبدالعزيز ورايحة باتجاه المملكة
على يمينك بتيجي صيدلية اسمها "زينة" تلقي عندهم فلوناكسول نص ملجم فلوناكسول بجرعات كبيرة هو مضاد ذهان، لكن بالجرعات اللي اقل من 4 ملجم يستخدم طبيا كمضاد اكتئاب ومضاد قلق وهذا استخدام مثبت طبيا مش راي شخصي لأطباء او مجربين انا شخصيا جربته على نفسي وعلى ناس كثيرين ومفعوله جدا حلو على الحالة اللي توصفيها القلق وعدم الرغبة بعمل اي شيء والاحساس باعتصار القلب والرغبة بالبقاء على طول في الفراش خذي حبة واحدة ابو نص ملجم، او حبتين، يعني المجموع 1 ملجم مرة واحدة يوميا ولا تزيدي عليها وبيروح اللي تحسين فيه خلال يوم يومين بالكثير، وخبريني عن اي مستجدات ان احتجتي تكلميني اختي ولا يهمك، هذا تلفوني 0564499910 اخاف اتأخر عليكي ولا ادخل المنتدى لأني مشغول هاليومين اكتبي لي لو واتس آب وان شاالله اني ارد عليكي بأسرع وقت |
طيب مو موجود إلا بها الصيدلية ؟ بعيييييد الوصف علي جدا والطلعة مو بيدي ..
ومايحتاج وصفة طبية؟ من شوي رفعت الجرعة خذيت حبة كاملة 20 ... يارب يسر يارب يسر الله يجزاك خير :( |
مايحتاج وصفة
وممكن يكون موجود بصيدليات ثانية، ماأدري طيب قولي لي الله يسعدك كيف اوصله لك او لصيدلية قريبة منك وانا حاضر او لوحده تثقي فيها؟ |
قريبة مني صيدليات ثانية بحاول دوره فيها ..
والله العظيم إني أرحم نفسي مايدري إني أعالج إلا أختي وهي الي فيها كافيها وماأبين لها شيء بس قلبي يعتصر وفيني شعور إني بغص حتى لما آكل أحس بصعوبة بالبلع وخااايفة طول الوقت ومكتومة .. حتى أمي كلمتني تطمن علي وصرفتها ماقدرت أكمل المكالمة من الضيقة بس أدوية الذهان دايم sedative وتأثر عالذاكرة وأعراضها الجانبية قوية .. لكن من كلامك إن هذا نص مل فعال وإن شاء الله ماله أعراض جانبية ؟ فإذا كان كذا بدوره بالصيدليات القريبة مني لأن والله القلق وشعور الضيقة ذا بيذبحني .. طيب قبل اقترحت علي ليكسوتانيل بس أظن هذا يبي له وصفة طبية ولا؟ , وأنا بعد بكرا رايحة مشوار جمب العيادة بالضبط يعني يمدي أدخل عالدكتورة أقولها توصفه لي بس مدري توافق أو لا .. وش تنصحني ؟ :( ومن نفسي هي صارفة لي 10 مجم اندرال مرة باليوم بس لي يومين رفعتها من نفسي لـ 20 هل هو عادي؟ مع إنها قالت بس 10 وبتقطعينه قريب بس قمت رفعته :( |
والله يجزاك بالخير ويفتح لك أبواب الرزق ويقر عينك بذريتك ويصلحهم ماقصرت معاي الله لايحرمك الأجر
سامحوني على كلامي الكثير |
ولا يهمك أختي،، انتي اللي سامحيني ع التأخير
فلوناكسول بجرعة صغيرة ليس مضاد ذهان، وبالتالي ليس sedative بل على العكس يوصى بأخذه بهذه الجرعة الصغيرة في النهار لأن له أثر منشط ويجعل النوم صعب نعم ليكسوتانيل يحتاج وصفة، وممكن دكتورتك تصرفه، مافيها شي. قولي لها ان عندك قلق وخوف ومابتقصر معاكي انديرال ممكن ينأخذ الى حد 80 ملجم 4 مرات في اليوم، لكن المهم لا ترفعي الجرعة كثير فجأة ورفعها من 10 الى 20 او حتى 30 مو كثير، فلا تخافي لازلت اقول آمريني أختي وأنا حاضر، لو ع الأقل اقربها لصيدلية تقدري توصلي لها واقول للصيدلي بيجيك أحد يطلب هالأدوية بالإسم الفلاني مافيها شي ترى |
اقتباس:
ماكانت الدكتورة موجودة فتركت الاستشارة عندهم بخصوص إن السيروكسات ضاعف القلق وبيردون علي إذا بتصرف لي شيء أو لا , في حالة ماصرفت شيء بدور الفلوناكسول بالصيدليات القريبة لو ماحصلته قلت لك الله لايحرمك الأجر .. بخصوص موضوع الوسواس الي عندي الأخصائية طلبت أروح أكشف حتى أتأكد إني فعلا سليمة وبالتالي يروح وسواسي بس أنا متخوفة مرررة ورافضة هالشيء .. أنت دكتور وش تشوف؟ |
طيب أختي اتمنى لك كل التوفيق وان شاالله يارب يطمن قلبك
بالنسبة لموضوع الوسواس بصراحة فيها قولان: يقال ان وجود وسواس من نوع التوهم قد يستفيد من البرهان اليقيني بشكل كامل وقد لا يستفيد اطلاقا فلا استطيع ان اؤكد لك انك ستستفيدي او لن تستفيدي في كل الاحوال لن تخسري شيء، افحصي وشوفي لربما يفيدك ذلك كثيرا ويختصر عليك خطوات كثيرة |
خرجت من الجامعة ماقدرت أكمل المحاضرات دخلت أول محاضرة وانا قلقة ومافهمت شيء بس مشغولة بقلقي والمحاضرة الثانية جتني نوبة هلع فظييعة وطلعت خلاص ماكملت باقي محاضراتي .. وغدا لن أذهب حتى لاتأتيني الأعراض .. والطبيبة الجشعة ترفض الرد على الاستشارات الدوائية لاهي رحمت ولاهي خلت رحمة ربي تنزل .. ولاحول ولاقوة إلا بالله هو حسبي انقطعت بي السبل .
|
الله يسعدك أختي أمل، اعطيني فرصة اساعدك :(
والله مو هاين علي انك تعبانة واقدر اساعدك وقاعد اتفرج !!! طيب ارفعي جرعة الانديرال الى 40 ملجم خذيها قبل ماتروحي الكلية بساعة |
اقتباس:
المشكلة حتى راسي مو ثابت اليوم بالمحاضرة طول الوقت يهتز من نفسه .. وكلمت عالاستشارة الدوائية عند المركز تقول لسه الدكتورة ماجت بنوصل استشارتك بكرا بس عموما هذا طبيعي عادي تحملي!! أقولها خليها تكتب لي شيء عشان بس أقدر أداوم تقول ميحتاج بس بكرا بقولها مع إنها بتقول عادي ومايحتاج :( !! حسبي الله ونعم الوكيل فيهم بلاهم ماجربوا !!! مع العلم بإني أمس الليل تركت الاندرال ماأخذته قلت يمكن الكتمة الي تجيني منه وماصارت منه , بس عموما هي قايلة 10 وأنا من نفسي رفعت لـ 20 ومو فايد .. |
لازلت اقول لك ارفعي جرعة انديرال الى 40، بتساعدك حتى على احساس الاهتزاز اللي تحسيه في الراس
ولا زلت اقول انتي بحاجة لمضاد قلق طيب روحي لعثمان الحاج في مركز الحبيب الطبي او فهد المنصور في ميدي كير |
خذيت تو 4 حبات انديرال يعني 40 مجم لأن الحين يعلم ربي أكتب وأنا أرتعش وقلبي ينبض بحلقي..
بعطي نفسي فرصة لبكرا .. إن لاسمح الله ماحصل تحسن جبت فلوناكسول لأن اللوكستانيل بوصفة وهي شكلها ماراح تشوف شكواي أصلا .. عندي بكرا برزنتيشن ومع الوضع هذا قررت أتغيب عنه وأجيب أي عذر طبي .. أقسم بالله إن حالتي السابقى على سوئها إلا إنها أحسن قبل الدواء وبدأت أعظ أصابع الندم |
والله أختي لو تجيبي فلوناكسول غير يتحول ندمك الى فرحة بإنك اخذتي دوا
لاتحكمي اختي من مرحلة عابرة معروفة في بداية العلاج لاتاخذي جرعة اليوم من سيروكسات وخذي انديرال 40 الصباح وأحضري وقدمي البرزنتيشن ولا تخافي، ماراح يجيكي شي |
ممكن تكتبي لي ع الواتس آب، نفسي اساعدك ي أمل :(
|
دكتور هل لديك حساب بـ تويتر ؟ أو kik
فأنا لا أملك واتس آب حاليا |
آسف ي أمل ماشفت كتابتك الا الحين
عندي حساب بتويتر بس ماأعرف كيف الخاص أو الشات :( طيب فيس بوك؟ raad.alghamdi على جيميل أو سكايب raadalghamdi |
تويتر لازم إضافة بين الطرفين حتى ينفتح الخاص يعني تضيف الشخص ويضيفك ..
أنا لا أملك سوا تويتر للأسف :( |
الحمدلله فرررق بين حالتي الحين والصباح مستقرة نفسيا الآن بس الخوف من بكرا :(
|
اذا ماأخذتي جرعة اليوم فلا تخافي بكرة روحي وانتي واثقة مع انديرال 40 ساعة قبل البرزنتيشن وادعيلي
طيب تويتر حسابي فيه هو raad.alghamdi على جيميل بس والله من زمان ماغردت ولا دخلت هناك خخخ |
أخذتها للأسف خفت احس بأعراض انسحاب أو شيء بس الاندرال بخليه 40 للصباح زي ماقلت إن شاء الله ..
أختي جلست معي جلسة صراحة وأنا أحل تكليف للأخصائية بصراحة اكتشفت إني فعلا مكتئبة والي حولي ملاحظين .. صايره باردة جدا في التعامل مع الناس وبالطقاق أنا ونفسي والي حولي ماعاد أهتم بشيء .. وأمي الله يهديها للحين وأنا شايله بقلبي عليها ليه إنها واحنا صغار كانت تفرق بالمعاملة حتى الآن والله المستعان بس .. صايره والله إنسانة أحس بالتغرب عن الذات وكأني ضيعت نفسي وأحاول ألقاها من جديد .. باختصار أحس إني صايره "مخدرة" وهالشيء معاي من شهور والله المستعان بس .. والله صايرة الحياة عندي بلا هدف مع إني الحمدلله قريبة من الله .. |
عملت لك فولو لكن تحتاج تعمل لي فولو أنا ?r_alkhaldiah
جعله الله في ميزان حسناتك |
تغيبت اليوم وسافرت أهلي بجلس عندهم اليوم وأرجع لدوام بكرا إن شاء الله ..
الحمدلله على كل حال أغلب نوبات الهلع تأتيني بالكلية لأن أول نوبة هلع جتني فيها فشكلي صايرة أربط .. مشكلة :( ! |
الف لاباس عليكي أختي
لا تشيلي هم، كله بيروح، طيب ماقلتي لي اخذتي جرعة اليوم؟ لاتقطعيها على طول، انا قكان قصدي بس تقطعيها يوم، اذا تبغي القلق يخف كثير، بس ارجعي استمري عليها عملت لك فولو على تويتر بس يقولي لي الطلب تحت المعالجة، لأنك عاملة خصوصية بانتظارك |
| الساعة الآن 08:42 AM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا