|
مشكور بس تعبني لساني ينشف كانه شربت شي حار كذا
وطعم في فمي غريب يخليني ما اكل تعبت وربي |
اقتباس:
في العديد من المسببات لنشفان الريق، لازم تروحي عن دكتور يعملك فحص للغدة الدرقية وصورة كاملة للدم وايضاً فحص للسكر في الدم وكمان اذا عندك حموضة وارتجاع في الحمض ممكن يكون احد الاسباب حتى يتم استبعاد اي مسبب عضوي اذا كلها ان شاءالله سليمه فهنا انصحك بحلويات المص زي حلاوة سكر النبات تتباع عند العطارين ومره تساعد لحل هذي المشكلة شافاكي الله وعافاكي |
انشاااء الله
ومشكورesad |
النصيحة الثالثه عشر وعنوانها: طبيعة الحياة
الحياة عبارة عن طلوع ونزول وضيق وتساهيل، وعسر يتبعه يسرين. الي يقول غير كدا شخص لايفقه شي والي يتوقع ان الحياة كلها افراح و انها مكان للراحة والاستمتاع هذا اكبر شخص واهم!! الحياة لو كانت حتصفو لاحد كانت صفت لسيدنا محمد صلى الله عليه وسلم!! طيب ليش هذا كله؟ الاجابه بكل سهولة ذكرت في القرآن (ليبلوكم) نعم اخي واختي الكريمة، لازم تعرف ان الحياة هذي اختبار طيب من هذا المنطلق نجي لموضوع ظروف هذي الحياة، فلو جينا لبيوت الناس وعرفنا اسرارها لشاب راسنا من المشاكل والهموم نعم ف جارك الي يمتلك سيارة اخر موديل اصيب مؤخراً بالسكر، و قريبك الي اتولى منصب كبير مات له اعز اولاده وهكذا! مافي احد مرتاح بالعربي كلو بيعاني وحتى الشخص الي مؤقتاً ماعنده ولا مشكله ومعاه فلوس وسيارات وطيارات وغيرو، هل عندو اكثر من ال 24 ساعه الي عندك؟ هل معدته تتحمل طعام اكثر من معدتك؟ هل لو عمل مجهود بدني التعب مايجيه؟ هل هوا قادر على النوم اخر الليل براحة وبدون اي هموم؟ الاجابه على هذي الاسئله الحياتيه حتبين لك ان الحياة ماصفيت ولا حتصفو لاحد واعيد واكرر ماهي مكان للمثالية ابدن بس استنى لحظة من اكثر المخلوقات الي خلقها ربنا تعقيداً هوا انت وانا وباقي البشر!! خلقنا وعندنا القدرة على التكيف! كيف؟ ايوه التكيف مع اي ظرف انت مارر فيه، فقدت وظيفه؟ مانجحت في دراسه؟ زوجتك ماتطبخ!! اي مشكله كبيره في نظرك تقدر تتكيف معاها وتحولها لنعمة بدل ماتندب حظك!! راح اضرب مثال بسيط وقيس عليه، احياناً تلاقي مجموعة من النمل ماشيين في حال سبيلهم وانت تجي ببرود دم ترش عليهم موية عشان تتخلص منهم النمل حتلاقيه عمل نفسه ميت عشان لاتزيد عليه بس تعال بعدها بكم دقيقه حتلاقي الشعب حط رجله وانت ماتدري!! ايش السالفة وكيف ومتى؟ حاقولك ببساطه لان النمل هنا ماستسلم للواقع الي هوا فيه، اتاقلم معاه ومثل انه ميت، ولما راح الخطر قام ونفض ثوبه ومشي!! بالله لو في نملة مكتئبه ومهلوعة ايش حتسوي؟ ماظن انو حتكون معاهم اصلاً لانها في بيتها ماتبي تخرج! او تلاقيها غرقت نفسها في الموية بدل من انها تنقذ نفسها! هنا اخي المهلوع او القلق درس انو الظروف من حولك ماحد قال ماهي صعبه والحياة بطبيعتها فيها تعب ومشقه ومع جونا الحار عاد لا احكيكم انتو عارفين التفاصيل!! لاتتصور انك حتتخلص من مرضك وانت جالس في بيتك مخافة الخروج وانو حيسيرلك شي! لا تظن انو ربي حيغيرلك حياتك وانت ماتحركت ولاسويت اي مجهود!! اكثر شي راح يخليك تتخلى عن الدواء النفسي هوا تغييرك لنمط حياتك! ومو تركه بالتدريج وانت جالس في بيتك بدون اي تغيير اكبر خطأ اشوف اخواني المهلوعين يسووه هوا ترك الدواء وهوا لسا ماغير شي في حياته، وكل شي عالق!! الدواء نعمة واستغل فترة اخذه بالانجاز حتفشل حتطفش حتمل حتنقهر كلها اعراض جانبيه لبداية النجاح وبداية الطريق الصح مرضك هذا جا نتيجة ضغوطات كثيرة، هون على نفسك وخد كل شي بالتدريج، عصيت الله يوم استغفر وتوب وماعليك من الي يقولك ربي ماراح يغفرلك مهما سويت او فعلت، بالعكس ربي يحب التوابين ويحب المستغفرين ذكر الله في قصة سيدنا يونس مثال عظيم قصد بيه تعليمنا نحن معاشر المؤمنين، القصة تعرفوها وهيا بلع الحوت لسيدنا يونس ايش عمل النبي الكريم صلوات الله عليه، قال لا اله الا انت سبحانك اني كنت من الظالمين!! ماقعد مكتوف الايدي دعا الله وهوا في مكان هلاكه فيه 100٪ فايش قال الله (فنجيناه) ياسلام طيب يابش مهندس دا الكلا بس لسيدنا يونس ايش دخلنا نحن!! لا دخلك ياحبيبي ايش قال بعدها (وكذلك ننجي المؤمنين) !!! اذن الشغلة هنا مو بس معونة الهية لنبي كريم لا، انت وانا كمان قد نكون داخل هم وغم اشبه بجوف الحوت! لاكن هل الله يصعب عليه انو ينجيك! لا ابدنً بس اذكره بقلب وقوله يارب عصيت وظلمت نفسي فسامحني واخرجني من حلق الضيق وادعي بدعاء سيدنا يونس ففيه الخير كله اعاننا الله واياكم على مشوار الحياة وتذكر ان الحياة مكان اختبار |
روعه الله يجزاك الف خير ويجعلها في موازين حسناتك
|
النصيحة الرابعة عشر وعنوانها: المصير النهائي (جنة ام نار)
الموت حق على كل كائن حي، مسلم او كافر، انسان او حيوان او جن، ولاشئ باقي الا وجهه الكريم. اكثر مايؤرق المصابين بالهلع هوا ذكر الموت او اعراضه وسكراته وهنا لازم نبين حقيقته بدون افراط او تفريط. اولاً الموت والحياة ماجعلت الا ليبلونا الله اينا احسن عملا، اذاً في سبب من خلقنا وفي غاية نطمح لها وهيا رضا الرحمن والجنة صح؟ وطبعاً بنستعيذ من غضب الله وعقابه والنار طيب ليش برايكم هذا الموضوع ماله تاثير علينا تاثير يجعل في حياتنا تغيير؟ وفي نفوسنا استقرار ويقين؟ انا اقولكم ببساطه هوا نقص في الايمان! حتقولي كيف؟ اقولك انو الموت علينا حق كلنا وجميعنا حنموت يوماً ما واعراض الموت لا هي توهم ولا هي نوبه هلع، اعراض مختلفة تماماً، لازم نتفقه فيها ولو باخذ معلومات عامة عنها. ذكر عن الرسول صلى الله عليه وسلم حديث الذي رواه الإمام مسلم في صحيحه: «أن رجلا سأل رسول الله - صلى الله عليه وسلم - متى تقوم الساعة؟ - وعنده غلام من الأنصار يقال له محمد - فقال رسول الله صلى الله عليه وسلم: إن يعش هذا الغلام، فعسى أن لا يدركه الهرم حتى تقوم الساعة». الحديث هذا عجيب! قال الرسول صلى الله عليه وسلم لمن سألوه ان الساعه ستقوم في مدة اقصاها هرم هذا الغلام الصغير بمعنى مدة لاتتجاوز عشرات السنين قد تكون 40 او 50 لا احد يدري كان مقصد الرسول صلى الله عليه وسلم هوا قيام الساعه الصغرى للاشخاص الي سألوه وان بمجرد انتهاء عمرهم تقوم عليهم الساعه الصغرى فقد حدد الله لكل شخص مدة يعيش فيها ولكل امة مدة كذلك ولا احد قادر ان يتجاوز جزء من الثانيه بعد هذه المدة المحددة واذا انتهت هذه المدة قامت القيامة الصغرى على هذا الانسان ووقتها مافي رجعه ابداً لهذه الدنيا طيب ليش بتنكد علينا ياعم احنا ناقصين! اقولك ابداً هذا المفروض يربط هذي الحياة ومشاكلها وهمومها بقلبك ويخليها اصغر من الذرة لعظم الشئ القادم لو استشعرنا عظم مانحن مقدمين عليه لتركنا كل السلبيات الي بنفكر فيها وكان تركيزنا على شئ واحد وهو المصير النهائي جنة او نار عن ابى ذر رضى الله عنه قال:قال رسول الله صلى الله عليه وسلم (انى ارى ما لا ترون واسمع ما لا تسمعون ؛اطت السماء وحق لها ان تئط ؛ما فيها موضع اربع اصابع الا وملك واضع جبهته ساجدا لله .والله لو تعلمون ما اعلم لضحكتم قليلا ,ولبكيتم كثيرا , وما تلذذتم بالنساء على الفرش , ولخرجتم الى الصعدات تجأرون الى الله .لوددت انى شجره تعضد) صدق رسول الله صلى الله عليه وسلم نحن في هذه الدنيا زوار ووصانا رسولنا الكريم صلوات الله عليه ان نكون كعابري سبيل في هذه الدنيا ولانتشبت بها كثيراً، لازم يكون عندنا ايمان ان المرض لايقدم ولايؤخر من الموت والخوف كذلك وان علينا استشعار المصير النهائي في كل وقت لنحسن العمل، فهذا اكبر درس سلوكي ممكن الاستفادة منه لتقويم حياتنا مقصر في الصلاة؟ تشرب خمر؟ تزني؟ تمارس عادات سيئه؟ تبغا تترك كل هذا ادلك على شئ عظيم ذكرته ستنا عائشه ودرس سلوكي عظيم ورائع لتقويم النفوس وهوا نزول القرآن الكريم، فقد نزل اولاً بمكة وكل آياته تدعو الى التوحيد والمصير النهائي الجنة او النار، بعدما ثبت في قلوب من آمن هذا اليقين والايمان بالله وبالمصير نزلت الاحكام بالمدينة! هل في شي غريب هنا؟ ايوه في الغريب انو تنفق امريكا المليارات عشان تمنع شرب الخمر الين استسلمت في عام 1932م وسمحت بيه لان الناس سارو يصنعوه بالبيت ومن مواد كانت تقتلهم! والمسلمين بمجرد نزول ايه تحريم الخمر يرمي انس بن مالك رضي الله عنه آنيه الخمر الي كان يضيف بها الصحابه ويرمي الصحابه الكؤوس وحتى بعضهم يستفرغ ماشرب عجيييب، ليش كان هذا تصرفهم؟ اقولك لانه ببساطه ثبت في قلوبهم الايمان وبالمصير النهائي وبالجنة والنار فلم يكن الا ان اتبعو الامر طيب هنا نستفيد درس وهوا لن تتغير قناعاتنا عن الهلع والقلق والحياة بشكل عام الا اذا عرفنا النهاية وايش حيصير ومافي مصير حتمي علينا الا الموت وبعدها حساب وبعدها جنة او نار! الشي اعيد واكرر هدفه تثبيت الايمان بالله وباليوم الآخر في قلوبنا وتثبيت الرضا بالقضاء والقدر وان كل شئ كتب وانتهى الموضوع وخوفك ماراح يقدم ولايأخر وان قدامك طريق طويل يجب ان تحسن العمل لتنجو في نهايته لاتنسوا اننا مقبلين على شهر الرحمات والخيرات، علقوا آمالكم بالله وادعوه ان يجعل ذكر الاخرة في قلوبكم ويبعد عنا وعنكم الغفلة والي هيا السبب في اغلب مشاكلنا حتى ظننا اننا مخلدين في هذه الارض! |
| الساعة الآن 04:42 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا