|
اختي هيييا
اكيد تحفيظ القرآن بيكون بين ناس وبنات ليش ماتخذين التحفيظ ورحوتج له كخطوه للتحسن منها انتي رايحه لطاعة الله وعبادته ومنها رايحه عشان تحاولين تطلعين من الجو والضيقه اللي انت دخلتي نفسج فيها ادري انه يمكن يكون صعب بس صدقيني اهم شي انج تقنعين رووحج بالفكره وتحاولين ماتفكرين بالاشيا السلبيه كلش انسيها نهائيا وقولي في قلبج انا اقدر انا قويه انا استطيح وتمي استغفري وشجعي نفسج بالهعبارات وصدقيني وانا اقولج عن تجربه بتتغلبين شوي شووي على مخاوفج واتمنى لج كل الرحه والسعاده يارب |
اختي سمييره ليش تعتبرينها تعاطف
ما اللي فيج فيني احنا هني عشان نقوي من عزيمة بعض ونشد على بعض واللي عنده اي فكره تخلصنا وتحررنا شوي من قيد الاوهام اللي احنا فيها يقولنا ومايقصر واختي سمييره بانتظار تلخييصج للكتاب ودمتي يارب براحه وسعاده |
في اول خطوه للتغير طلعت امس ورحت بيت صديقة امي
وقعدت صح ماسولفت بس قعدت وابتسم واعلق شوي بس اول مارجعت البيت قعدت اتذكر القعده وكرهت نفسي حيييل وبديت اصيح =( احس اني خبله اكره غبائي بس مو مهم انشالله بكون احسن وبطوور نفسي |
بصفتنا رهابيين فمن المؤكد أنه يوجد لدينا عناصر مشتركة
بيننا جميعا منها : * وقت الفراغ : فبحكم أننا لا نختلط بالمجتمع كثيرا وأن مشاركاتنا محدودة جدا فبالتأكيد يوجد لدينا وقت فراغ كبير فهيا نشغل أنفسنا بأي عمل خير أو زيارة أقارب أو أصدقاء أو ممارسة هواية معينه حتى نتخلص من وقت الفراغ فهو من المعوقات الرئيسيه التي تمنعنا من التخلص من الرهاب. * الأفكار الخاطئه: الإنسان بطبعه اجتماعي يستأنس بمن حوله فالأفكار الخاطئه التي تختزن بعقولنا تعوق إختلاطنا بمجتمعنا فهيا نتخلص منها ونحل محلها أفكار إيجابيه. _ نصائح عامة : . فكر فيما ينفعك ولا تفكر فيما لا ينفعك . بحكم أننا لا نعبر عن ما بداخلنا من غضب أو أي شعور آخر فتبقى المشاعر مكبوتة بداخلنا وتؤثر على تفكيرنا, لكي نتخلص من الشحنات التي بداخلنا علينا أن نحضر مجموعه من الأوراق ونقوم بتقطيعها ( يعني نحط حرتنا فيها) حتى تخف الشحنات التي بداخلنا |
_ عزيزي الرهابي: * سامح نفسك: إعتدر لنفسك عن عدم إحترامك لها بالشكل الأمثل, فكل منا قد يقسو على نفسه من خلال نقد الدات بلا رحمة * كن مسئولا عن مشاعرك: إن التحدى الدي يواجهك هو أن تتأكد من قدرتك على التحكم في حالتك العقليه خلال اليوم, فإدا شعرت بالضغط أو القلق أو الخوف فلتسارع نحو تغيير الحالة بالتركيز على شي مختلف. *خطط للنجاح: ضع برنامجا لغاياتك وأولوياتك وطموحاتك المتفائل كثير التخطيط, خد الحكمة( إدا فشلت في التخطيط فإنك قد خططت للفشل) خطط حتى ولو لم تنفد كامل المخطط إبدأ بالصغير ثم الأكبر فالأكبر وتمرحل تدريجيا بالعلو وكن طموحا. * إهتم بنفسك : إسمح لنفسك أن تشعر بما حولك, هل ترى كيف يفرح الطفل بالأشياء ويتعمق فيها؟! راقب بعين الطفل, تنفس بعمق, إلمس بيد الأم الحنون, إسمع بطريقة الأدن العاقلة, لا تحقر نفسك ولا مواهبك, حداري من أن تقول: لا أحفظ, لا أعرف, لا أستطيع, حظي سيء, مستحيل, صعب, بل عمر وقوي الثقة في نفسك. * ( دلع نفسك): إهتم بملابسك وهندامك جرب الراحة (البريك) لو تزاحم العمل, تمتع بحياتك أكثر , كل ما تشتهي نفسك, تعلم كيف تلمس جسدك بحنان,إدهنه من الرأس حتى أصابع الرجل, نم في وسط الغطاء الدافيء في الغرفة الباردة، إلزم الرياضه أو المشي البسيط. |
جزآآآآك الله كل خيير على مجهوودك اخووي ثاامر
وعجبتني طريقة الورق |
قرأت هذه الحلول للرهاب واردت مشاركتكم بهاا
طريقه للمعالجه بالقرآن 1ـ حاولوا ان تقرأوا سورة " طه في الصباح وسورة " الحشر " ، في الظهر وفي المساء سورة " يس " 2 ـ في اليوم الثاني : قراءة سورة " النجم " واية الكرسي . 3 ـ في اليوم الثالث : بعد صلاة الظهر قراءة سورة " الكهف " و في العصر اية الكرسي و في العشاء سورة الناس . وهذه الطريقة تعتمد على مدى ايمان الشخص الذي يمارسها . يقولون انها مجرب وانها تؤدي للشفاء |
اقتباس:
ما ادري بس شكلي ما عرفت اعبر تدرين من قلة الكلام صرت ما اعرف اتكلم انا احس اني مرتاحة واعبر عن الي بداخلي معاكم دايما بدي اتكلم وما القى حد يسمعني بعد ماقلت راح اتكلم عن الكتاب جاني احساس بالخوف ان يكون اسلوبي مواضح وما عرف اعبر ........... وطبقت شي مني الي بالكتاب وحسيت بالراحه والي هو ان الاحساس بالخوف ناتج من افكارك عن نفسك انك ما تقدر وما تعرف فيجي كتنيه لك لما راح تسوي شي مخالف لقدر تك حسب افكارك لذلك تعامل معه كصديق وليس كعدو وقل لخوفك انا اعلم انك تريد ان تحميني وانا سعيد انك تريد مساعدتي واشكرك على ذلك ولو خفت من احد الاماكن ممكن تتخيله انه بستان فيه ورد او شلال واوبحر المكان الي يناسبك ممكن بالاول لان نفسك ما تعودت تتعامل معاها بلطف مراح تنفع معك بس مع التكرار بدها تنفع وانشاء الله اني بحط كل فترة بعض من افكار الكتاب هني |
أحم أحم أنا رجعت
جربت طريقه وكانت نافعه ما اقول لكم حيل وأنها توب وخلتني طبيعيه بس من جد كانت حلوه كان ياما كان الخميس هذا عندي مناسبه فبيت عمااني وش سويت يوم الأربعاء؟؟؟ سويت بروووووووووفه دخلت غرفتي شفت وش راح ألبس ولبسته وطبعا لابد نكون مرتاحين بملابسنا عشان تنعكس على نفسيتنا ولاتنسون أهمية الألوان عدلت نفسي وتخيلت أني بجد عندهم تخيلت الناس من حولي تخيلت أني توني واصله وطريقة السلام وعبارات الود وحرصت أنها تكون قصيره وماتحتاج لرد مثل (( هلا وغلا / منوره / وش هالقمر )) طبعا بهالحال أنا اللي باكلهم ^_^ وتخيلت أحاديث قصيره ومرحه بيني وبين وحده أو ثنتين بالكثير أو حتى مجموعه رتبت المواضيع الي تهمني ويهمني أطرحها ورتبت أفكاري فيها وآرائي نمت وأنا مرتاحه ويوم صحيت الخميس حسيت ببعض التوتر رعشة أيدي بس حاولت أردد عبارات تشجيعيه وأنظ التنفس عندي كانت مشكلتي أول مارحت مرة ولد عمي تغار مني بشكل مو طبيعي ويوم سلمت عليها قالت وهي تضحك بسخريه وماسكه يدي وش هالرجفه أنتي دوم كذا مريضه ؟؟ مدري شلون طالعتها باستحقار وثقه وسحبت يدي من يدها بقرف وصديت عنها بكبرياااااااااااااااااء دار فبالي تفكير سريع لو أستسلم للربكه راح تفرح عشان كذا ونكاية فيها بكون أفضل وخلها تموت قهر شفنو أحيانا الشر ينفع خخخخخخخخخخخ سلمت ع اللي بعدها وابتسامتي شاقه فمي خخخخخخخ بس الرعشه مستمره تحاشيت الكلام عشان اهدى شوي واتعود ع الجو خاصه فيه ناس كثير مانعرفهم وأول مره نشوفهم على فكره الكل يقول عني مغروره لاني احب اراقب الاوضاع من بعيد مقدر اندمج بسرعه وطبعا تدرون ليه عشان كذا الكل يقول مغروره ومتكبره وتطالع الناس من طرف خشمها ^_^ ومرت الأمسيه بسلاااااااام الحمد الله لأني حضرت لها مسبقا وماقهرني الا مرة ولد عمي المشكله من زين رجلها عشان تغار عليه ماتدري انه بيموت بترابي بس انا مابيه والله انها شريره <<<<<<< معليه تحملوني حالت غضب وتنفيس واللي يزيد الطين بله أني قلت لمي عنها قالت وأنتي ليه ترتجفين أركدي يمه والله أني راكده بس غصب أووووووووووووووووووووووووووووووووووووووف من قلب أوف |
هايدي
وربي ماتدرين شكثر استانست احلى شي الثقه ايه ياعم رووحي واحرقي قلبوهم خخخخ لابجد حلوه طريقة التحضيير وانا مثلك لو رحت مكاان لازم ابقى ساكت بس اشجع نفسي اقول يلا لين متى بسكت يلا عيب علي ومن هالكلام الين انطق =) اهم شي انج استانستي وبجرب حركة اني احظر مسبقا للكلام |
ياحبي لك يامعانده
عززي الشر شوي وصدقيني بتضبط معك حبتين ونص مو حيل يعني ^_* وبالنسبه للكلام ياقلب أختك حاولي لوت عليق بسط وصغير حتى لو مايسمعك الا اللي بجنبك وتابعي الموضوع باهتمام وحاولي تركزين وصدقيني تعليقك بيطلع أحيانا تلقائي وحاولي تتجاهلين تعليقك لاني عارفه لو تتذكرينه وتعدين وتزيدين فيه بتبدين بمسألة جلد الذات وهذا الشي السئ فينا وبالنسبه للتحضير حلو حتى التحضير الذهني حلو وعساها دوم هالوناسه مو يوم يارب |
السلام عليكم ورحمه الله وبركاته
دكتور سليمان أناطالبه في أحد الجامعات في ماليزيا وأدرس الان اللغه الانجليزيه وأريد أن اختص بعد اللغة الانجليزية في مجال علم النفس اي اريد أن أكون أخصائية نفسية وليست عندي معلومات كافية عن كيفية التسجيل في هذا المجال أو الكلية التي تدرس هذا المجال باللغة العربية فأنا لا أشعر بطعم علم النفس باللغة الانجليزية مع احترامي لدارسين في هذا المجال باللغة الانجليزية ارجوك أريد ردكم في أسرع وقت فأنا بحاجة ماسه لهذا الرد شاكرة حسن تعاملكم أختكم أم عبدالرحمان |
مهم للمستقبل
مساء الخير دكتور سليمان
أعتذر على الازعاجك أريد أن أسألك عن دراسة مجال علم النفس فأنا أريد أن أصبح بإذن الله تعالى أخصائية نفسية وليست عندي اي فكرة عن أختيار الكليات في دول الخليج لدارسة التخصص وأريد ان أدرس التخصص باللغة العربية علما بأن دارسته باللغة الانجليزية لا يشعرني بطعمه كاللغة العربية مع فائق إحترامي لدارسين التخصص باللغة الانجليزية وأشكرك جزيل الشكر أختكم ام عبدالرحمان |
السلام عليكم ورحمة الله وبركاته
احس اليوم جاني اكتئاب مو طبيعي طلعت وشفت الناس وسالفت بعد احس بالم كبير داخل نفسي ودي ابكي كثيييييييييير ما ادري متى بفتك من هالحالة |
سميرة هدي اعصااابج , روحي صلي ركعتين وصيحي بترتاحين صدقيني دوام الحال من المحال وبتفتكبن من هالحاله كلها فترة بسيطه وهالاعراض بترووح بس داومي ع الدواء واتبعي نصايح الدكتور والله يبعد عنج كل شر |
إلى الأخوات
سميرة : مشكورة على الأفكار الحلوة وإن شاء الله يجي اليوم اللي تقولين فيه كاااان عندي رهاب وتكونين متخلصه منه وتقعدين تضحكين بينك وبين نفسك على تصرفاتك الرهابيه الساااابقه هاااايدي : ماشاء الله خطوة إيجابيه بس شدي حيلك شوي وقولي هانت |
القواعد الخمس لبرمجة عقلك الباطن :
1. يجب أن تكون رسالتك واضحه ومحدده ومعلومه 2. يجب أن تكون رسالتك إيجابيه 3. يجب أن تدل الرسالة على الوقت الحاضر ( لا الماضي ولا المستقبل) 4. يجب أن يصاحب رسالتك الإحساس القوي بمضمونها حتى يتقبلها العقل الباطن ويبرمجها. 5. يجب أن تكرر الرسالة عدة مرات صباحا ومساء إلى أن تتم برمجتها تماما. والآن لديك الخطه حتى يكون كلامك مع داتك قوي وإيجابي: 1. اكتب على الأقل خمس رسائل داتيه سلبيه, كان لها تأثير سلبي عليك, مثل : أنا إنسان خجول, أنا داكرتي ضعيفه, أنا لا أستطيع الوقوف أمام الآخرين والتحدث معهم, أنا عصبي المزاج, أنا متوتر,,,,, قم الآن بتمزيق هده الورقة التي كتبت عليها السلبيات, في شكل قطع صغيرة جدا وإلقها بعيدا عنك. 2. اكتب خمس رسائل إيجابيه داتيه تعطيك قوة وحماس إبدأ دائما بكلمة (( أنا )) مثل : أنا أحب التحدث إلى الناس, أنا داكرتي قوية, أنا إنسان ممتاز, أنا نشيط وأتمتع بطاقة عالية, إبدأ بأول رسالة وخد نفسا عميقا طاردا أي توتر في جسمك واقرأها 10 مرات........ |
أختي سميرة :
واضح إنك مكتئبه وشايله الدنيا فوق راسك وتحسبين نفسك ماراح تطلعين من هالحالة بس خلي أملك بالله كبير وفكري بالأفضل وحاولي تغيرين روتينك اليومي. مرت علي حالة أصعب من حالتك تخيلي رهاب إجتماعي وإكتئاب وقولون عصبي طبعا الثقة بالنفس كانت معدووووومه لا أصدقاء ولا أسولف مع أحد يعني اللي يشوفني يقول مجنون مو صاحي ولا اعرف اتكلم عدل يعني حتى الطفل ابو خمس سنوات يتكلم احسن مني وانا ايامها كان عمري 20 او 21 كنت مااحب اشوف الشمس ابد, حتى الشباك دايما اسكرة وأغطيه بالستارة, قسم بالله كنت لو اشوف الشمس ودي أبكي من كثر الإكتئاب, اقعد بيني وبين نفسي واقول ياربي باكر شلون اتوظف شلون بتمشي حياتي, شلون وشلون وشلون..... كان ليلي نهار ونهاري ليل, الصبح لما اسمع أخواني الصغار وهم يمرون من غرفتي ويتكلمون وهم رايحين للمدرسة احط الوسادة فوق راسي ماابي اسمعهم, واسولف مع نفسي شلون يروحون للمدرسة معقولة ماعندهم مثل ماعندي من اكتئاب, طبعا جلسات العائله دايما ماني معهم, أحيان بالصدفة أمر أسمعهم يسولفون ويضحكون, أتكلم مع نفسي ياترى مايتكلمون عني وش يقولون عني مريض وإلا مغرور وإلا عصبي كنت موسوس لأبعد الحدود ...... مرة كان عندنا ضيف وجالس معه أنا وأبوي, صدفة دق التلفون رد أبوي وقالي واحد يبيك, إستغربت منو يسأل عني لأن مو بالعادة أحد يسأل عني رديت وإلا واحد من أصدقائي من زمااااااااااااااااااااان ماكلمته تعال شووف الإرتباك بس أنا من غير شي لما أتكلم بالتلفون أرتبك وهالمرة موجود أبوي والضيف, اما شكلي وقتها كان نكته لا ترحيب مثل الناس ولا سلام مثل الناس ووجهي ألوان ألوان حتى أبوي والضيف توقعوا إن فيه شي مع إن والله ماكان إلا الرهاب والإكتئاب...... حتى إخواني الصغار صار عندهم أصدقاء وانا ماعندي كنت أجي أجلس احيان شوي عندهم أشوفهم يحترموني حيل وكل من يحاول يعدل نفسه وقعدته أتكلم بيني وبين نفسي أقول والله لو تدرون فيني وتعرفوني عدل كان ماسويتو كل هالإحترام لي.... كنت محطم نفسي حيييييييييييل ومعنوياتي صفر بس الحين الحمدلله فيه فرق كبيييييير عن قبل هالكلام عشان الإخت سميرة تقتنع إن كل شي له حل |
اقتباس:
تقبلي تحياتي |
سميرة
فديت قلبك يالغاليه .. أبكي ياقلب أختك والله ترتاحين غيرك يتمنى يبكي ومو قادر وربي أني أتمنى الدمعه بس الي بقلبي أكبر من الدموع صارت الروح تبكي مو العين ثامر ماتدري شكثر عطيتني أمل بكلامك يعطيك العافيه متألق كالعاده |
امممممممم راح اقول لكم شي ومن تجربه شخصيه
مدري من وين أبدأ أحس أفكار مشتته عشان كذا تحملوني إذا طلعتو بمكان عام أو مناسبه اجتماعيه حتى لو كانت مصغره لاتحاولون تكونون نايس وطيوبين وحبوبين لأني عارفه الي مثلي يسوون كذا لااااااااا مو شرط الكل يشوفكم حبوبين حطو فبالكم ( هدوء / إتزان / أسمع وأستوعب بعدين أبدي رأيي إذا طلب مني طبعا ) تذكرو الكبرياء والشموخ الي بداخلكم وترفعو عن الناس تذكر عيوب الناس وأخطائهم وأنكم أطهر وأنقى بكذا راح تترفعون وخلو شعاركم (( واثق الخطوه يمشي ملكا )) وامشو مثل الطاووس بتصعب عليكم في البدايه أدري بس مع البروفات والتخيل بعدها يكون التعود وللبنوتات جربو مشية القطه ^_^ ياعمي حتى لو يقولون مغرورين (( فالطقااااااق عطوهم أكبر طااااف )) جربتها وربي وناجحه جدا والنتيجه . . . . الكل حاسدني على هدوئي وأتزاني وثقتي و ...789 أتمنى أكون وصلت تجربتي بشكل جيد |
حياتك من صنع أفكارك , فالأفكار التي تستثمرها وتفكر فيها وتعيشها هي التي تؤثر في حياتك , سواء كانت في سعاده أو شقاوه . |
لتعلموا أن الصعاب كالكلب العقور, إن رآك خفت منه نبحك وعدا وراءك, وإن رآك تهزأ به ولا تعيره إهتماما وتبرق له عينيك أفسح لك الطريق وإنكمش في جلده منك |
هاايدي
والله اليوم بطييقت اطبق كلامج وقمت اعطي الناس نظرات خخخخخ <<< مشكله اللي يفهم السالفه غلط بس معااج حق في نقطة الشر ذي عشان الناس تهاابج شووي والحين في هالزمن مايقولون فلانه طيبه يقولون فلانه خبله |
سميييره
اختي لييش مكتئبه لانج واجهتي االنااس معلييش خطوه بخطووه وانشالله تقدرين تتعودين صح انج مو مرتااحه وتدورين راحتج بالعزله بس لين متى؟ انتي لازم تواجهين مخاووفج واحنا كلنا وياج نساندج هاي شغله الشغله الثانيه شعورج بالاكتئاب لانج سولفتي عادي هالحاله تجيني بعد لارحت بيت ناس ما اعرفهم ولا سولفت مع احد ما اعرفه اتضااايق خاصه عاد لا سويت نفسي خفيفة دم وكل هذا مثل ماقالت اختي هايدي جلد للنفس يعني بجذي بدل ماتشجعيين نفسج تساعدينها انها تنكمش وما تختلط بالنااس بدلي افكاارج السلبيه لواحه من الافكار الايجابيه انا ما اطلب منج تتغيرين 180 درجه مره وحده خطووه بخطوووه وكلنا معااج وطمنينا عليييج |
اخووي ثاامر
والله كلامك مؤثرر وهاذي السوالف اللي تعطي الوااحد الامل والحمدالله يارب انك رجعت احسن من قبل يارب داايم جي بس اخووي بغيت اسئلك شلوون تخلصت من الرهاب ؟ بالادويه ولا ؟ دمت بخييير وربي يسعدك |
السلام عليكم ورحمة الله وبركاته
اخواني واخواتي لكم لكم مني خالص عبارات الشكر والتقدير على على وقوفكم معي ومساندتي بجد احرجتوني امس والي قبله كنت احس نفسي تعبانه بس اليوم افضل كثير اختي الدنيا حلوة لو بديت ابكي ما وقفت لمدة سنة وانا الان مراجع اي دكتور وبالتالي لا ادوية اخوي ثامر والله اتمنى يجي هاليوم من طول عمري انطوائية وما اتخلط باحد ابد قليل جدا الي اقدر اعبر عن نفسي معاهم وفي ناس يقولن مغرورة ومتكبرة عشان اني ما اقدراسلم على احد ولا اكلم احد مبين انك كنت عم تعاني كثير بس الحمد لله انك الحين افضل وقدرت تتجاوزت مشكلتك اختي هايدي والله البكي يتعب مشكلتي لو بديت ابد مراح اتوقف الله يساعدك خيتو وترتاحين |
اختي معاندة
والله اني لما اقعد مع الناس كاني باموت ما قدر ارتاح ولا اقدر ركز على كلامي ودايما احس انهم مو متقبليني او ماخذين مني موقف شعوري بالاكتئاب ينتج لما احس الاطفال يتكلمون احسن مني لما احس اني ما احد يحترمني حتى الاطفال لما احس ما عندي قدرة على التعبير بالمره اشكرك عزيزتي على اهتمامك وانا الحين بخير الحمد لله |
الحين خلونا بالمهم الافكار كقطرة المطر فكرة واحدة كقطرة واحدة لاتساوي شيئا و عند تكرر الافكار تتشكل بقعة رطبة ثم بحرة صغيره ثم بركة وبعدها بحيره ثم بحر واخيرا محيط فاي محيط تشكلون اهو ملوث ومسموم ومن النوع الخطر الذي يكون خطيرا وضع اصبع فيه ام محيط نقي من الكرستال ويجذب لتمتع بالمياه المنعشة |
يجب ان نكون لكثر ليونة وطيبة مع انفسنا فلا تنتقد نفسك
او تلومها على ما حصل انما قل هذا كل ما استطعت ان افعله حينها فنحن جميعا بشر ولسنا الهه نخطئ ونصيب وعند محلولة ان نكون كاملين فان ذلك يؤثر علينا بضغط شديد كي لانخطى وعندما نخطئ ننتقد انفسنا بشدة وذلك يمنعنا من التعرف على شخصيتنا المميزة عن الاخرين فكلا له دوره بالحياة وعندما ننتقد انفسنا فان ميزاتنا تتراجع وتصبح غير واضحة |
إختي معانده:
الله يسمع منك ونتشافى كلنا يارب,, للحين أعاني من الرهاب بس يمكن خف شوي مو مثل قبل,,, لكن خلونا نجيب أفكار ونشجع بعض أكثر لين كلنا نفتك من الرهاب ونرتااااااااااااااااااااااااح إختي سميرة: مشكورة على الأفكار الحلوة والله لا يحرمنا من المناقشات المفيدة,,, ولا تتعبين نفسك وتوسوسين زيادة ترى والله كل الكلام اللي قلتيه عانيت منه وللحين بس أخف من قبل إن شاء الله مع الأيام كل شي يروح وتكونين مثل ماانتي تبين |
السلام عليكم
تسلم اخي أ.محمد سليمان على طرح هذا الموضوع بدخل في الموضوع على طووول ... انا وايد اخاف من الاصوااااات العاليه والضوضااء والازعاااج ..هالشي وايد يوترني واحسه يرفع ضغطـــي ...دقاااات قلبي تزيد بشكل مب طبيعي احس بها ... واحس دمي يفووور بس من الاصوات العاليه ...مثل الكلام بصوت عالي ، الصراخ وفي البيت في وايد مشاكل من هالنوع تقريبا بشكل يومي واحسه اثر فيني صرت اشوف اي اثنين يتكلمون بصوت شوي عالي يو يتناقشون اتحسبهم يتضاربون... دوم يوم اسمع اصوات لو من غرف ثانيه لو ضحك اتحسبها ضرابه او صرااخ .. وبس مادري يمكن ماعرفت كيف اوضح ... |
يقول أحد المفكرين ( قد تجد أشخاصا يستصعبون التغيير
والأسوأ أن منهم من يفضل الموت على التغيير) بالتأكيد نحن لسنا منهم فنحن نتغير إلى الأفضل والأحسن لكي نرضي ربنا ثم نرضي أنفسنا وطموحاتنا ونرتقي بمجتمعاتنا |
السلام عليكم ورحمة الله وبركاته
اخوي ثامر العفو ما سويت شي ولا تحرمنا مشاركاتك والله هذا احاول ما تعب نفسي اقولها عادي تكلمي واغلطي وخربطي خذي راحتك كل الناس يغلطون بس ما اقدر اوقف نبضات قلبي دايما ينبض عند كل موقف حتى حتى وانا بدخل المنتدى ومن كذا ابدي اخربط ويقل التركيز وانسى كل شي والله يعين انشاء الله كلنا نتخلص من هذا المرض قريباااااااااااااا جدااااااااااا طبعا كل الافكار الي عم اطرحها من الكتاب الي قلت راح اتكلم عنه تمـــــــــــــرين خذوا ورقة بيضاء وسجلوا قائمة بكل ما هو سلبي مما قاله اهلكم عنكم ماذا كانوا يقولون عن علاقاتكم حول بالمال ؟ ماذا كانوا يقولون بخصوص جسمكم ؟ عن الحب والعلاقات المتبادلة حول الناس؟ عن مواهبكم ؟ وقولوا لانفسكم الا ن عرفت من اين جاءتني هذه الافكار خذوا ورقة اخرى وتابعوا ماذا كنتم تسمعون من اراء سلبية عنكم من الاقارب ؟الاساتذة ؟ الاصدقاء؟ اثناء الكتابة لاحظوا كيف ستشعرون بانفسكم ورقتان تمثلان الافكار السلبية التي تمنعكم من الحياة وعليكم التخلص منها تمريــــــــــــــــــــــــن اخر (انا اريد ان اتغير) كرروا هذه الجملة قدر استطاعتكم وفي اثناء ذلك لامسوا حلقكم لانه مركز الطاقة اللازمة للتغيير |
تصدقون أول ما أفتح المنتدى تطيح عيني على شريط الإهداءات أشوف بعض الرسايل ويضيق خلقي بس وربي أول ما أدخل هنا أحس شي راح ( وش هالشي مدري هههههههه )
|
اممممممممم اتذكر يوم كنت بالأبتدائي تقريبا خامس كانت اختي بوقتها في الجامعه وكان عندها مشكله وطبعا اختي شخصيتها قويه ومستقله ومعتمده على نفسها طبعا كانت ومازالت قدوتي المهم أنو كان عندها مشكله في الجامعه وكانت ناويه تغيب بزعم مالها خلق للمشاكل انت بوقت هالقرار جالسه ع السرير وما أنتبهت ألا هي ناطه وتجهز ملابسها وبحزم مبين فملامحها قالت كلمه خالده كتبتها في قلبي بماء الذهب ^_* الحل ليس الهروب من المشكله الحل في مواجهتها تراني هلاليه بس عشان الكلمه بماء الذهب كتبتها باليلو طبعا أنا هيييييييييييييه هيييييييييييييه من جد وربي من داخل قلبي فرحت بشجاعتها برغم أني بوقتها ماكنت أدري وش تعني شجاعه وقدره ع المواجهه فديت قلبها هي وكلمة ماء الذهب ^_^ بناء على ماسبق قررنا نحن هايدي التالي : (قررت قرار خطير وحبيت أبلغكم يمكن أحد فيكم يقرر معاي) قررت أتطوع في جمعية الأطفال المعاقين للأسباب التاليه : 1/ أنهم أطفال وأنا أستمتع بوجودي بين الأطفال وحتى لو كانت المهام الي بستلمها بعيده عنهم راح اكون مستمتعه لأن هم الأساس 2/ أن لي قريبه معاقه وأعرف كيف أتعامل معاها برغم أنها كبر مني جسما وعمرا يعني ماراح يكون الموضوع صعب علي حيل 3/ راح تكون صدقه والصدقه تطفئ غضب الرب والرسول يقول فيما معنى الحديث ( داوو مرضاكم بالصدقات ) 4/ هذا المستخدم <<<<<<<< عاطل عن العمل يعني فااااااااااااااااااااضيه 5/ أبي أحتك بالمجتمع يعني بحاول ماراح أجلس بالبيت وحط يدي على خدي عاد الله أكبر يهالناس الي أحنا خايفين منهم كلهم عيوب وأخطاء ومافيه أحد معصوم ومثل ماقالت سميره بخطأ وبحوس وبخبص في النهايه وش راحيصير ماراح أدخل النار وماراح أرجم بحجر الي عاجبه أهلا وسهلا والي مو عاجبه ( فالطقاااااااااق ) وبس وما أدري أقدر أحط الرابط ولا لا ؟؟؟ ودعواتكم يقبلوني يارب ياحبيبي لاتخيبني أنا وكل متابع ومشارك في هالموضوع والسامعين يقولون آآآآآآآآآمين خخخخخخخخخخخ محد بيقول آمين لان محد يسمع عذرا لذائقتكم ... طبعا هالألوان الي مدري وش تبي بس والله طالع على بالي أسوي لوحة ألوان قوس قزح أس سبعه أعذروني على غثاثتي ^_^ . . . |
نتمنى وجود الأستاد محمد سليمان بيننا
وطرح الأفكار والحلول |
أنا دائما معكم واطالع مشاركاتكم وافكاركم وان شاء الله ساتواصل معكم في النقاش
|
اقتباس:
ثــامر نفس شعووورك فيني اكتئاب وقوووولون عصبي ونفسيتي الحين صصصصفر والحين اشوف الناس شلون عايشه بدون اكتئاب شلون وشلون وشلون اخوي .. انت تعالجت من الاكتئاب صح؟؟ شلون واستخدمت اي نوع من الحبوب؟؟ وكم كانت مدة العلاج !لاني تشافيييت وايد عن قبل لدرررررجه اني خلاص ايقنت اني شفيت تماما من الاكتئاب ومابقا لي الا مشوار قصير جدا جدا وصار شي حطم كل معنوياتي.. http://www.s77.com/3DSmile/51/7zn_093.gif على قولة الدكتور: رجع الاكتئاب من جذووووره.. وبرجع اصبر واتحمل المشاوير اللي قطعتها مرررررة ثانيه.. آآآآآآآآآآآآه والسبب دكتور وصف لي حبوب مضاد حق الجيوب الانفيه واللوز.. لاني لو ماخذت هالحبوب احس بصداااااااااااااااااااااع مو طبيعي لدرجه اني اطيح ويودوني الطواااري !! لكن المصيبه من خذت هالحبوب.. وانا اصييييييح بشكل مستمر بلا توقف طلعت الحبوب تتعارض مع حبوب الاكتئاب واصلا تسبب اكتئاب وقلق .. فما بالكم اكتئاب فوق اكتئاب !!!! رررررجعت للصفر مرة ثانيه http://www.s77.com/3DSmile/28/MSN-008.gif هالمرة اكتئاب حااااااد + صداع ماقدر استحمله ولا اقدر حتى استخدم الحبوب ومن امس الصبح مب نايمه !! عذاب عذاب عذاب ! http://www.s77.com/3DSmile/20/Sad-047.gif http://www.s77.com/3DSmile/20/Sad-047.gif http://www.s77.com/3DSmile/20/Sad-047.gif |
أختي الدنيا حلوة
بصراحة لما أمر على الملتقيات الموجودة بالمنتدى وأشوف مشاركاتج أقول يابخت هالبنت إجتماعية ومرحة لأبعد الحدود,,, (اللهم لا حسد) والحين تشتكين من الإكتئاب والقولون, شوفي إختي ترى والله الصلاة بآخر الليل تريح النفس وتحسسك بالأمان والسكينه وتشوفين الدنيا كلها ولا شي, وأهم شي الدعاء والتفاؤل بالإجابه, ريحي نفسج وأعصابج لأن مافيه شي يسوى كل هالتفكير وترى والله لو تتعبين بالأشياء اللي تطلعج من هالجو أريح من التفكير والوساويس اللي مالها معنى ماغير تحطم وتكسر المعنويات,, إشغلي نفسك تحركي لا تقعدين, سوي أي شي, قبل كانت فيه مواقف أو حالات مانعرف نتصرف فيها والحين لما صارت عندنا شوية خبرة بالحياة صرنا نضحك على تصرفاتنا قبل, صدقيني نفس الشي الحين راح يجي اليوم اللي نطلع فيه من هالحالة وننتقد تصرفاتنا,, أختي الدنيا حلوة أكيد لما كنتي تاكلين الحبوب كانت حالتج تتحسن شوي,, تخيلي ديك اللحظات وعيشي حياتج بسعادة, ترى والله كل شي نوصله بس خطوة خطوة وإن شاء الله نتشافى وياج وباقي الأخوة والأخوات, أطلب من الإستاد/ محمد سليمان شرح طريقة أو أسلوب ( المرساة) أكيد عنده معلومات وافية عنه بحكم إختصاصه,, وأتمنى إنها تفيد الأخت الدنيا حلوة وباقي الأعضاء |
| الساعة الآن 02:53 AM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا