|
في الرياض أفضل شي روحي صيدلية مركز الحبيب أو الحزيمي أو كنوز الصحة أو النهدي أو المتحدة وأكيد بتلاقينه عند واحده منهم ولازلت مستعد للمساعدة اذا ماقدرتي ولا أبغي منك غير الدعاء الله يجزاكِ الجنة... آمين |
توني واصله من الرياض حصلته في صيدلية مجمع المملكة
ويعطيك العافيه والله اخجل من كرمك معي ودعواتي لك بالتوفيق وتسهيل امورك كلها |
شدعوة أختي زنبقة؟ والله ماأتعامل معك الا مثل ماإعامل اختي وماسويت لك الا واجب ارفعي راسك انتي سعودية خخخخ أثركم كنتو الرياض؟ وانا أقول فيه نور مخلوط مع نور ابو متعب تحياتي لك ولأسرتك والحمد لله على سلامة الوصول |
ههههههه النور نورك يا خوي
ويعلم الله انا كمان اعتبر لك اخ عزيز لكن الي ما يشكر الناس لا يشكر الله جا على بالي احي لك في المستشفى خخخخ او ازورك اشوف التوأم الجميل ابشرك صارت معاملتي مع زوجي افضل بكثير والحمد لله ورجت الرياض معاه لحالنا زيارة الطبيب انفعت كثير حتى انا تشجعت وقدرت اصارحه بامور كثير وحسيت انه تفهمني فلوناكسول سره باااتع ههههه |
هههههههههه حلوه سره باتع بس والله من جد لو مجتمعاتنا غير معقدة كان تشرفنا باستضافتكم في بيتنا انتي وزوجك وتتعرفي على ام مشاري وتشوفي التوائم لكن يالله .. المودة في القلوب الله يسعدك مع زوجك وابنائك اختي العزيزة |
شو قاتلني الا عاداتنا الي مال امها داعي. حطينا الاسلام بجنب. وتمسكنا بعاداتنا..... !!!!!!
المهم احب اخبرك ولله الحمد الذي لا احمد غيره ولا اشكر غيره ثم اشكرك اني كلي يوم احس اني افضل بكثير وامارس حياتي بشكل طبيعي ،الخوف الي كنت اعيشه من امور كثيره خف كثييييير صرت اشوف الامور بمنظور ثاني واكثر ايجابيه صرت استمتع بامور كثيره صرت اصرف نظر عن الحزن الداخلي واتجاهله مع اني اشعر به الا ان تجاهله افضل الحمد لله رب العالمين باقي اخذ علاج طبيعي بسبب الدسك ظهري وعرق النسا الي كنت اخرته لما تتحسن حالتي تخيل اني اتحمل الم عرفة النسا والدسك الفضيع. ولا اتحمل التعب النفسي :) |
كيف حال زنبقتنا الغالية؟
كأني قرأت انك تعبانه بس ماأدري وين خير؟ عسى خير ان شاء الله؟ ايش تغير عليكِ؟ |
يا هلا دكتور الحمد لله على كل شيء
شنو تغير علي؟؟؟ والله ما ادري احس الاحباطات محاوطتني من كل جهة بصراحه لما افكر .. ايش فيني ؟؟ ما القى جواب يمكن هذا الاسبوع كان مرهق جدا جدا جسديا ونفسيا لما ذاك اليوم طلعت من الطبيب وقالي انتي شفيتي وانا ما اعتبرك مريضه حسيت اني ابغى اطيييير واخبر العالم كله اني طبت خلاص لكنها كانت فرحة وقتية آنية يومين او يمكن اربع ايام ورجعت مثل اول ويمكن اكثر تعبانه نعبانه تعبانه حاسه داخلي شي فاااارغ مع ان الكل حاس بتغيري قبل اسبوع...ساعات اقول اتوهم انا بخير علشان اقنع نفسي رجعت ما احب اقرا الكتب الي كانت تمتعني النت كرهته شغل البيت صرت اسويه غصب عني لاني اشوفه شي ضروري شنو السبب والله ما اعرف... احباط احباط .... قبل ثلاث ايام هسترت زوجي كالعاده قام يقولي انتي ما تشتغلين مثل اول صرتي كسلانه مع اني والله افتر بالبيت ليل ونها وموفقه بين البيت والكلية والتطبيق انام ثلاث ساعات بس قمت اصرخ واضرب بنفسي وانتبهت لنفسي ورحت غرفتي وقمت اصيح اصيح لما نمت وجلست الصباح ما رحت الكلية صرت اشتغل بالبيت من الفجر لما صحى حسيت انه زعلان لكني سويت نفسي ولا كانه شي حاصل اسولف واضحك ومضت السالفه نفسي احد يفسر لي حالتي او يقول لي شنو وضعي وليه التقلبات المزاجية تعبانه يا دكتور |
أختي العزيزة لايوجد ثبات على حال، والتقلبات اصلا هي طبيعة الانسان الصحيح فكيف بالمريض؟ انتي فعلا أفضل من الأول لكنك مو قادرة تصدقي لأنك مارجعتي زي ماكنتي خالية البال قبل المرض وهذا اللي مو مطمنك لكن ناظري للحال بصورة مختلفة وقولي ماأبغى ارجع زي أول أبغى أكون انسانة جديدة انسانة تعاني وتصمد .. أبغى اكون اقوى من الاول وفي الواقع هذا هاجس في نفسك وفي نفس كل من مر في الاكتآب، وهو انه يطمع للأكثر وخايف من عدم الثبات عموما أنا حريص على اني اقول لك انتي بس محتاجة تطمئني بأنك على المسار الصحيح، ولا تخافي بالنسبة للفلوناكسول قد يسبب درجة من التبلد العاطفي بحيث يشعر اللي ياخذه باللامبالاة نقصي الجرعة الى نصف ملجم مساءا |
تطورات خطيره لكني مثل ماقلت اصبت بتبلد احساس
زوجي كان بيضرب بنتي الي عمرها 18 و وقف اخوها وانا بوجه قام عصب علينا ويصرخ وقفل علينا البيبان وخلانا برا بالسور خارج البيت جا ولد الثاني وفتح لي ... وانا اضحك اقول ما بقى فيه عقل\ وطردني من الغرفه قالي شيلي اغراضك.. لاني وهو يصرخ قمت اصرخ واقول خلاص تعبنا فكنا قال بفكك مني ..!! وانا عاااااااااااادي جدا قلت له يصير خير ساعة وتروق وانا اضحك حسيت اني عديمة الاحساس |
كوابيس كوابيس ... اسبوعين عايشه في دوامة الكوابيس اجلس من النوم مزعووووجه وتعبانه متوتره
قطعت مشاهدة الاخبار لكن مازالت الكوابيس مستمره |
ابغى نصيحت اخ اكثر من طبيب
فكرت الانفصال تراودني كثيرا ليس من اجل الموقف الاخير لكن قلبي مكسور على اولادي ما ابيهم يكرهونه اكثر مع اني اعرف الابناء لا يكرهون ابائهم وبصراحة لا اجد قدرة عندي لتحمل تبعات الطلاق وحربه الشعواء لكني تعبت تعبت ولا تقولي الصبر 20 سنه صابره واهنت نفسي بما فيه الكفايه وانا لست نبي او رسول صبري له حدود هو من يخاف مواجهة الناس يخاف من الناس اكثر من اي احد يحسب لهم حساب كبير ومستعد يشوه سمعتي علشان يطلع مظلوم وكل هذا مستعده له وموطنه نفسي عليه بقول لك شي من زمان اتمناه او اتخيله علشان ارتاح بدون مشاكل ان يصيبني مرض اقضي فيه ايامي بالمستشفى سرطان او اي مرض >>> استغفر الله علشان اتركه تخيل وين وصل تفكيري واتكلم جد والله وربي اتمناه لكني اخاف على اولادي تفكير مشوش وانفعالات ملخبطه لكن فكر لي بطريقه اتركه وما ااثر على اولادي اكثر اشخاص متاذين معاي اهله ماراح ينفعوني بيكونون بصفه لانه يخافون منه وجربتها كم مره اهلي على قد حالهم جد جد واكثر ناس كاسرين ظهري امي وابوي ومتحمله على شانهم افكر فيهم اكثر من اعيالي ما ابي بعد هذا العمر يصير فيهم شي بسببي خاصه امي سريعة التاثر ممكن تروح فيها ياربي وين الحل تكفى د رعد فكر معاي ما احد يدري عني او يعرف عذاباتي الي امر فيها ما كملت دراستي الا لشان اقدر اساعد نفسي لو صار ما صار لكن قدرتي على التحمل تنخفض يوم بعد يوم يمكن يتوهم لي ويمكن اثر الخلاف الاخير لكننا بمعدل 10 مشاكل تحدث لنا كل شهر ولا هو مبالغ فيه هل ممكن هذه العيشه تستمر على هذا الشكل |
أولادك وبناتك رتبيهم لي بالأكبر ثم الأصغر يعني كذا مثلا:
ولد 8 بنت 6 بنت 4 وكم باقي لك على التخرج؟ |
اولادي خمسة ثلاث اولاد وبنتين
الاول ولد 20 سنه سنه ثانية جامعه وعنده سيارة بنت 18 ولد 17 ولد 11 بنت 8 انا بالسنة الثالثة السمستر الثاني اتخرج بعد سنة باذن الله |
ماشاء الله تبارك الله
الله يحفظهم لك ويوفقهم يعني المشكلة هي في الاثنين الصغار والا الباقيين ماعليهم خوف في حال الطلاق طيب هل عندك استعداد تصمدي الين تتخرجي وتتوظفي؟ يعني تاخذي القرار الحين لكن تنفيذه بعد سنة وبدون مايدري مخلوق عن هالقرار أنا والله مادري ايش أقول لك مادامت النفس طابت واحترم وجهة نظرك بالنسبة لوضع ابنائك لكن الاثنين الصغار راح يكونو معاه فهل ماعليهم خوف؟ |
لا لا لا العيال كلهم عندي
خاصة الصغار تتوقع بعاند وياخذهم لا ممكن نتفاهم معاه في هذه النقطة مو خوفي ياخذ العيال لا خوفي المشكلة الي بتصير ويمكن احتمال كبير يجي ويعتذر مثل كل مره تكبر فيه المشكلة واضطر اخضع او الكلام الي راح يقوله عني ممكن يقول اي شي لو ماسويته علشان يطل مظلوم وكمان هذا عامله حسابه علشان نفسيتي |
طيب أختي
اذا النفس طابت وعيالك ماعليهم ضرر وبيت أهلك يوسعكم وممكن تعملي بعد التخرج وتقومي بعيالك ليش ماتاخذي قرار بالطلاق في المستقبل بعد سنة وخبي هالقرار في نفسك ولا تلمحي عليه مجرد تلميح وشوفي نفسيتك اذا ارتاحت خلال هالسنة مع هالقرار المخبأ فاستخيري الله ونفذيه واذا ماإرتحتي نقدر نبحث عن حلول أخرى ايش رايك؟ |
سنه ؟؟؟ مستحيل
قراري متخذته من فتره طويلة وكل هوشه اقول معلش تحملي اخري القرار لكن اعيالي كسروا ظهري كبار وينطقون كل مرة بهذا الشكل ما اقدر اسمحلي وهو صغار ما قدرت ادافع عنهم يظربهم لما يقطع وجيهم ويسيل دمهم الحين كبار واشوفهم تنمسح نفسيتهم لا لا ابي اعيال صالحين وسويين نفسيين خسرت دراستهم بسببه ما ابي اخسرهم اكثر |
كلمت احد من اخرته من عنده قدره لتفهم حالتنا وعنده علم سابق بحياتنا
وقلت له قراري وشرحت له الوضع الي حنا فيه تعتذر مني وقال ما ادري ايش اسوي لك صراحه ما اقدر اكلمه لانه بيعصب عليكم وجوده معاكم. وحنا نكلمه خطر عليكم حاولي معاه وتركي عنك التسرع واجلي قرارك قلت له قراري من سنوات طويله كل مشكله ااجله لان العشره ما تهون علي وعلشان العيال وابوي واني احسب احساب الكل لكن ما احد يعيش عيشتنا. بعدني اعزه واحترمه لكن هذا ما يكفي اخاف اوصل لمرحله واسوي بنفسي شي علشان ارتاح الانسان له قدره محدوده للصبر. عنطني حل... قلبي موقفكم صعب تحمليه او خلي ولده الكبير يكلمه رجل لرجل. يطلع معاه كوفي ويحاول يفهمه ان الوضع هذا مستحيل اذا بيعصب خليه يوقف ويقوله خلاص اصرف نظر عن الموضوع وشوفي شيصير وحنا تحت امرك في اي قرار بعدها بسوي اخر محاوله الي قالها لي هو يحب ولده الكبير اخر مشكله انا وبنتي ما يكلمنا للحين لكنه مع ولدي الكبير بحاول يجره لصوبه ويستلطفه نظره ذكوريه ... الولد اهم لا حول ولا قوة الا يالله |
والله يازنبقه ان الوضع صعب
قطعتي قلبي والله لكن مفتاح الحل عند أهلك لازم واحد من أهلك يدعمك ويوقف معاكي وبعدها تطلقي أما الطرق اللي قلتي عنها ماأعتقد انها فعالة وبتثير غضبه عليكم وتسلطه أكثر |
سلامتك من الشر يا خوي انا متعوده مو جديد الوضع علي
انا الحين بيت اهلي. دايم اقول انا ما بطلع هو الي يطلع بس فكرت انا ليه متمسكه بالبيت هو ما راح يطلع منه مستحيل و وجود ما راح يغير شي فكرت اروح بيت اهلي يمكن تكون له فركة اذن وتشوف شنو يصير بعدين يعرف اني مو ساكته وراضخه لاوامره واهاناته الحمد لله مرتاحه جدا لقراري جيت وحسيت ذهني صااافي جدا بعد ثلاث ايام من التعب والقلق ولدي ااكبير تازم واحد وتضايق تعب وهو يقولي يمه قعدي لا تكبرينها قعدت معاه وفهت وشرحت له الوضع كله قام يصيح عور قلبي. بس بهم الوضع قال قرارك صحيح بس خايف من ابوي قلت له انا حاطه كل الاحتمالات وعندي قدره للمواجهه وربي يسهل ? |
يعني الحين العيال عنده؟
وانتي عند اهلك؟ مو مشكلة خلي الوضع كذا شوي |
لا انا والعيال بيت اهلي
طلعت ورسلت له مسج اخبره مع انه ما يكلمني بس ماجا من قلبي يدخل البيت ويرتاع ما يشوفنا بعدي مسويه له حساب. مع المفروض. اخرعه. ويعرف اني زعلانه جد بس صار الي صار |
ههههههه والله انك بنت أصول
طيب واذا طلب العيال يرجعون البيت ويش بتقولين وكيف تمنعينه ياخذهم بالقوة؟ أحد من أهلك واقف معاكِ؟ |
مافكرتي في الطلاق التكتيكي؟
يعني طلقة واحدة وماترجعي له الا بنشاف الريق وبعد مايعرف من الله حق ويتقي الله فيك وفي عيالك قصدي مايكون هدفك الطلاق النهائي يمكن الله يصلح الحال ترى انا أكلمك عن مشكلة صارت بين والدي ووالدتي ورحت للطائف وأخذت امي عندي في الرياض بناء على رغبة ابوي وكان قد طلقها الطلقة الثانية وبعدين تقابلوا بترتيب من أختي وبكو مع بعض وتصافت نفوسهم ورجعوا مع بعض مو 100% بس يعني 70% ووضعهم مقبول جدا وأفضل من الانفصال النهائي والدي ماصار يغلط عليها ويضربها ولا يدقق زي زمان وهدأ كثير |
اه ما ادري شقول
انا جا على بالي ما ارجع الا لما تتنفذ مطالبي >>> ثورة ثورة :) واطلب منه يحط في حسابي 10 او 20 الف الريال >>> انا مو ماديه والله لكنه حرييييص ومبهدلنا هو بخير وحنا حالتنا لله نتحسر على نفسنا لما نشوف الناس شنو تلبس و وين يروحون بالفلوس اقدر امسكه من اليد الي تعوره >>> والله اني اقول هذا الكلام وقلبي يعورني مو جاي من قلبي بس شسوي هو الي حدني لهتصرف بس فكرتك ممتازه بس تتوقع انا الضعيف اقدر اسويها لاني اقول طيب قلت له شروطي وقال لي بينفذها وبيرضينا وبيسوي كلشي بيهدأ كم يوم او بالكثير شهر بعدين بيرجع لطبعه وانا اقول الانفصال هو الحل لكن اقولها بس بقدر اتحمل تبعاتها لانه مو هين والله يفضحنا علشان يطلع نفسه بريئ اه اه ما ادري شنو بيصير بعدين والى متى هذا الحال بيت اهلي صغير وانا ما عندي فلوس والذهب الي عندي قليل جدا وابوي على قد حاله جيت انا واعيالي زياده عليه احس اني بستمرض تعبانه لولا السيبرالكس وفلوناكسول كان جنيت او سويت بنفسي شي لاني احس تجيني ساعات لا مباله قوية فلوناكسول قطعته من يومين ؟؟؟؟ ربي يعين وربي يصبرني ويقويني |
اصبري اختي
لا زال الصبر هو أقوى سلاح ومثل ماقلت لك طولي عليه هالمرة مو شهر ولا شهرين، اذا قدرتي 6 شهور الين يفقد الأمل.. الين يبكي ويصحى صدقيني هذا أفضل من الانفصال الدايم و6 شهور تتدبر، ولا اعتقد انها مرهقة جدا ماديا |
وانت جبتها 6 شهور حريه
ابي اعيش بأمن بعد الخوف والتوتر الي كنت اعيشه ربي عالم بالحال خوفي عيالي يملون امس كنت اقوى من اليوم امس بالمره مرتاحه من قراري وحسيت جو بيت اهلي نظيف والدنيا صافيه لازم اقوي نفسي واصبرها وربي معاااي |
مساء الخيرات كيفك اختي العزيزة؟ كيف صبحتي ؟ وايش آخر الاخبار؟ |
ـ مساء الخيرات اخي د رعد
ـ الحمد لله على كل حال من الله بخير ـ قبل كم يوم كنت مرتاحه لكني ايوم افكر كثير ـوخايفه ل تحدث معاه مقابله طبعا انا ماراح اتصل عليه ابدا ـ بس لو حصلت اشلون بقدر اكلمه وهو بيجي معصب ـ تصدق اني قعدت مع نفسي افكر شنو مطالبي الي لازم ينفذها لو يبيني ارجع له ـ ما قدرت اكتب الا انه م يضرب الاولاد لانهم كبار خلاص ـ وانه عطيني مصروف هري ادبر اموري فيه ـ وبهدين شنو اطلب شنو ابغي ما ادري مخي مشوش ما ابيه يكلمني او يشوفني الا بعد مده طويله يمكن يصير له درس لكني اعرفه شديد ما ينكسر وكمان متسرع وما عنده صبر ـ اكثر شي مخوفني ان اعيالي يملون ويصرون يرجعون البيت ـ لانهم قالوا لي يعني كم بنطول بيت اهلي قلت لهم حسبوا احسابكم شهر او شهرين تفاجأوا وقالوا ليه فكرنا اسبوع بس ـ قلت لهم اًا ذا بترجعون روحوا لحالكم انتوا كبار ما تحتاجوني بس ماعليكم مني ولا تضغطون علي خلوني بحالي لكني ما اضمنهم ـ معدتي احس بتتقطع من الالم بالليل ما انام واذا نمت اشوي احلم بكوابيس مزعجه احس اني ضااايعه بس ما ابي احد يكلمني بالموضوع ابي اريح يكفي عقلي مشغول وتعرف الوضع دامي بيت اهلي الكل بيتكلم بالموضوع نفسي اروح محل لحالي انا واولادي فيه ونعيش مثل الناس بلا هم بلا تفكير وهذا مستحيل الخطوه الي سويتها لاني. ما ابيه يلوي يدي. بعت ذهبي وسويت لي حساب ببنك علشان ما احتاج لاحد وبسوي لي بطاقة احوال مدنيه علشان احس باستقلاليتي ? |
ولدي الكبير هو الوحيد الي ينام بالبيت مع ابوه
لكن يقول اخاف اروح وهو موجود ينتظره ينام ويروم البيت يقول دايم معصب وله يوم تعبان وكل وقت يجيب لي اخباره وانا ودي اقوله لا تقول شي ما ابي اسمع عنه شي خلني ارتاح بس خايفه يتضايق هذا مهما كان ابوه |
مهم جدا انك تصبري وتتحملي لاتطاوعيه بسرعة مهما كانت الضغوط اذا العيال بيرجعوا خليهم يرجعوا، وانتي لا ترجعي لا بتحقيق مطالب ولا بغيره ، قصدي ان مطالبك شي ورجعتك للبيت شي ثاني يعني كفاية من المطالب انه يبطل عصبيته اللي مالها داعي أما رجعتك بكيفك انتي اذا تطمنتي له حتى لو قالك مابعصب ولا أضرب قولي بس باقي انا ماتطمنت ولا تطمني الين يبكي صدقيني اقسى الرجال يبكون لو كانو صادقين ولو مابكى قدامك لا تصدقيه تراها حيله يتحايل عليكِ |
ما ادري شقول يا دكتور
لي اربع ايام لا ارسل مصروف ولا سال عن اعياله ربي يعين ويصبرنا ويقوينا رحمتك يا رحمن يارحيم |
آمين
اصبروا وربنا يفرجها |
الحين الوضع. هادي جدا
المشكلة اذا عرفوا اخوانه هنا بيعصب. لانه ما يرضا احد يدخل ولازم بيدخلون وفي الخير بيجون يلحون علي ارجع. غصب علشان. يكفون شره عني لانها صارت قبل عندي السيناريو. كامل بس انامقرره مابقابل احد منهم .. ربي قدرني ويقويني |
صمود
مقاومة ثورة ثورة دار دار.. زنقه زنقه.. شبر شبر |
هالحين أبغى افهم أخوانه ايش دخلهم؟
بعدين انتي ، عندك أخوان؟ |
عندي اكبر واحد اصغر مني بسنتين
مهما قلت ما بتعرف زوجي اقولك هو اصغر واحد فيهم وكلهم يخافون منه لانه ما يحشم احد وهلي طيبين بزياده ويخافون الهواش وزوجي شغلته الهواش بصراحه انا مو معتمده علي احد غير نفسي وعزيمتي واتكالي. على الله. خير معين |
لا معليش يازنبقه
أخوكي هذا لازم يتدخل ويوقف معاكي هالمرة اطلبيه ، انتخيه، قولي لي له ادعمني هالمرة بس أخ بس لو اني اخوكي من جد، كان تشوفي وش اسوي اللي مايحشم ماله حشمه وبيني وبينه شرع الله ليه اخوكي هذا؟ ايش ناقصه؟ مايقدر يقول كلمة حق؟ مايقدر يوقف معاكي فترة مؤقته؟ مو كثير 6 شهور لا ماديا ولا معنويا كلميه من جد ، ابكي عنده |
اخوي مو هين ومايقصر بس زوجي يخوف ما يحشم احد
في مره غلط علي اخوي لما خل دموعه تنزل وخوي خايف علي وابوي قاله خلاص اسكت لانه ما يبي يكبرها سكت وهو ميت قهر لما فرت الدموع من عينه ليه اجل انا ساكته طول هذا العمر وبالعتها جمره هذي المره اخوي حالته الماديه تحسنت اول ليله جيت فيها. حط بيدي فلؤس وقالي لا تترددين اذا ناقصك شي وانا امس بعت اشوي من ذهبي علشان افتح لي حساب بالبنك اكتفي ذاتيا وما انتظر من احد معونه وعلشان ما تصير في موقف ضعف ويلوي يدي الحين حسيت بالستقلاليه لكن الفلوس ما تدوم وما تكفي لشهر جدام لكن ربي يسهلها ليتك اخوي :) >>> حسيت بالنصر والفوز :) |
| الساعة الآن 09:23 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا