|
خليكي متفائلة أختي وربي يوفقك
اللي كاتبه ربنا بيصير ولا تستسلمي للافكار السلبية واستبدليها بأفكار وعبارات ايجابية صدقيني الكلام اللي تقوليه يأثر في نفسيتك قولي انا بخير وراح تصيري بخير، ردديها وحاولي ان تقنعي نفسك بأنك بخير وراح تحسي مزاجك تغير ربي يكون بعونك |
انا طيبة انا مافي شي وصحتي طيبة
حاكرر الكلام وربي يستجيب تحياتي دكتور |
السلام عليكم دكتور
قريت عن شركة ارمال فيها علاجات عشبية للقلق ايش رايك اجربها ولا لا بالذات في ناس يمدحوها |
جربيها،، ماعندي فكرة بصراحة عنها لكن أشك انها فعالة
والا كان اشتهرت عموما لا تجربي شي اذا حملتي مهما قالوا لك انه آمن |
اه متى يجي الحمل يمكن لو سار اتعافى
|
السلام عليكم
كيفك دكتور كل عام وانت بخير دكتور لاحظت شي مهم لمن اكون مرتاحة في النوم واخدت قسط كافي اقوم ماعندي ولا مشاكل ولا قلق ولا شي دكتور قريت عن حبة دوا تستخدم قبل المناسبة ولا الخروج بساعة تودي الخوف والقلق مؤقتا ايش هو دا الدوا وايش اثاره وهل بجد يريح مؤقتا |
اقتباس:
وعليكم السلام ورحمة الله بخير ياطيبة،،، وانتي ومن يعز عليكي بألف خير، الله يبلغك صيامه وقيامه ويكتب أجرك آمــين النوم طبعا مهم جدا في الصحة النفسية، ويشحن الجسم بطاقة إيجابية، لكن أكيد ماهو كل شي الحبة هذي هي دوا انديرال وهو مهديء للأعراض البدنية للقلق: كتسارع ضربات القلب والرعشة وسرعة التنفس والتعرق ، وهو أكيد يريح في حالة الخوف الاجتماعي لكنه لا يصلح أبدا للي عنده ربو أو حساسية بالصدر، أو اللي عنده هبوط في الضغط عموما تقدري تجربيه بجرعة 10 ملجم، ولكن الجرعة الفعالة على القلق هي 20 ملجم على الاقل واذا عندك حساسية الربو لا تستخدميه أبدا |
امين يارب وانت وكل من يعز عليك
يعني دكتور ماله اعراض تانية دوخة تعرق الم معده ولا زي البندول مؤقت مفعوله بدون اضرار |
يمكن لو أخذتيه على معدة فاضية يسبب لك حرقان بسيط لكن بشكل عام ماله أعراض وزي البانادول،، خفيف جدا |
السلام عليكم دكتور
عندي جمعة بنات السبت من اول ماعرفت صراحة جاتني الحالة خفت كيف اواجه خوفي |
جربتي انديرال والا ماجربتيه؟ وهل تاخذي دوا نفسي والا من ذاك الوقت قاطعتها؟
|
ماجربته خايفة من العلاجات باخد موتيفال
خايفة تتعبني العلاجات وانا ضغطي نازل ايش الحل |
طيب أختي، مادام تاخذي موتيفال فلا تخافي
وبعدين لو الضغط عندك فوق 100 والنبض فوق 70 فلا تخافي، ممكن تاخذي حبة او حبتين قوة 10 ملجم |
يعطيك العافية يارب
كفاية افضفض معاك ومع الرهابين ارتاح |
الله يريح بالك ويخفف عنك ويكتب لك الخير وين ماكان
في طريقة علاجية شبيهة بالتنويم المغناطيسي واسمها التفكير المغناطيسي فكرتها هي انك تقدري تعدلي من نفسك وتكتسبي صفات جيدة وتتخلصي من صفات سيئة فقط عن طريق التخيل وباختصار يقول لك استرخي قبل نومك كل يوم واسرحي بخيالك وتخيلي حالك في الحال الذي تتمنينه مثلا تتخيلي نفسك مطمئنة وواثقة من نفسك ولقائك بصديقاتك كان هاديء وكان الجو ودي وكنتي هادئة ومستمتعة بالجلوس معهم وكان لكِ احترامك وتقديرك ونصيب من الاعجاب والمودة فقط تخيلي ذلك وحاولي ان تشعري بالأحاسيس السعيدة المصاحبة، وعلى فكرة مش لازم تشعري بنشوة وروقان،، لا،، فقط احساس بأن كل شيء كان على مايرام تقول صاحبة هذا النوع من العلاج النفسي واسمها أوروسولا مارخام في كتابها "التفكير المغناطيسي" تقول بأن مانتخيله هو مانكون عليه، وسينجح خيالك في صنع واقعك شخصيا جربّت هذه الطريقة أيام الجامعة وقت تقديم عروض البوربوينت كنت اطبقها ليلتين قبل اليوم الموعود وكنت أبدّع وكانت تجيب معي نتيجة حلوة،،، جربيها |
سبحان الله تعرف دكتور لي فترة اسوي التمرين دا بدون ما اعرف ليش بارتاح فيه واحب مرحلة قبل النوم لاني اروق فيها جدا واتخيل نفسي في سفرة حلوة في مكان ممطر وخضار واجواء رومانسية
واحس نفسي مرتاحة جدا انا اتحاشى الجمعات دي لسبب واحدكلهم صديقات الجامعة بالاصح زميلات اتزوجو بعدي وخلفو وحياتهم كلها محورها اطفالهم فلمن اجلس معاهم اضغط على نفسي وابتسم واجامل بالرغم من اني واثقة من نفسي جدا جدا وعارفة نظرتهم لي نظرة اعجاب بسبب وضع اهلي المادي والاجتماعي وممكن كمان نظرة غيرة ودا الشي طبعا يفرح اي امرأة لكن نقطة اني اجامل واسكت ولا اضحك في موضوع الاطفال تسببلي ضيقة مو في الجلسة لا بعد ماتنتهي الاقي نفسيتي في البيت لاسابيع سيئة واحس انهم افضل مني يمكن لو مشكلتي غير الحمل مو مشكلة مفضوحة لكل الناس كان ما اهتميت يعني انا عارفة انه في منهم مو مرتاحين مع ازواجهم وما يحبوهم عكسي ولله الحمد الله لايحرمني من زوجي يارب بس مشكلتهم مستورة لكن انا كل الناس عارفة وتحزن علي ودا الشي مسببلي ضيقة من كللللللل اهلي لاني الوحيدة في كل الجيل الجديد مو مخلفة ودائما نظرة الحزن في عيونهم وانا اساسا متربية على درجة عالية من الكبرياء النفسي على نفسي مو على الناس فمو عارفة الحل اللي يريحني اشوف زوجي مكبر دماغه يقولي مايهموني الناس يمكن لانه مو زي اشوف الحرمةمن حملها لولادتها لحد ما الطفل يكبر وتجيب غيره |
فعلا أختي والله حالة صعبة وماتنلامي فيها لكن أبغى أقول لك شيء كل اللي أعرفهم من رجال أأو نساء ممن مارزقهم الله بأطفال يعانو نفس معاناتك يعني العيب مو منك (أو منهم) العيب هو من الوضع هذا والناس ترى غصبا عنهم يحزنوا ويتلخبطوا لما يتكلمو مع اللي محروم من الخلفة ويكون كلامهم فيه تحفظ ودرجة من التعقيد والتوتر. وانتي وكل اللي ماأراد الله لهم الخلفة، غصبا عنكم تصيروا حساسين وتشعروا بانقباض لما تتعاملوا في كل مايخص الخلفة والأطفال وعلى فكرة، لو كانوا خمسة بنات كلهم مايخلفوا قاعدات في جلسة ومعهم واحدة عندها أطفال ترى اللي عندها أطفال تتوتر وتتلخبط، ونفس الشيء لو جلسوا خمسة بكم وصم ومعاهم واحد يسمع ويتكلم ، بتلاقي اللي يسمع ويتكلم متلخبط ومو على بعضه هذا شي طبيعي ، لأنه الانسان لما يشعر بأنه مختلف عن اللي حوله ماراح يكون منسجم معهم في مثال يمكن يكون أوضح ولاحظته مع بعض الزملاء، لما يجلس واحد عسكري مع مجموعة مدرسين، كل سواليفهم في المدرسة والمدير والطلاب والمنهج، وانظمة الوزارة وهو قاعد وسطهم زي الأطرش في الزفة، من جد غصبا عنه يحس بغربة بينهم رغم انه ممكن يكون ظابط محترم لكن الوضع دائما يفرض نفسه تخيلي نفسك انك مو أقل منهم لكن هم مختلفين وفي شي يجمع بينهم وماهو عندك، ولا تنظري له من باب انه تقليل لكبريائك،، لا،، حاولي تبعدي مسألة الكبرياء عن هذا الموضوع عندنا جارة ماتخلف، وتموت في الأطفال وكل ماجاراتها راحوا السوق أو صار عندهم ظرف تقول لهم جيبوا اولادكم عندي ومسوية بيتها زي الحضانة وتشعر بإشباع لرغبتها في الاطفال بحب الاطفال أعرف بتقولي فيه ناس ممكن ينظروا للي ماتخلف ان عينها قوية وممكن تكون حسودة وحقودة على اللي يخلفوا ووو......الخ،،، لكن صدقيني هذولا قلة ولكن الغالب انهم متعاطفين معك والتعاطف ابدا عمره ماينقص الكبرياء انظري له أنه زيادة مودة منهم ورغبة في ان يخففوا من معاناتك وربي يكون بعونك ويرزقك الخير وين ماكان وتذكري ((وعسى ان تكرهوا شيئا وهو خير لكم)) ،، مو كل من خلّف مرتاح، والله في ناس يتمنى انه ماخلف ولا كان عنده ابناء،،، وماتدري وين ربي كاتب لك الخير |
كلامك صحيح ومفهوم جدا دكتور
لكن الاحساس لو بيدنا كان اتحكمنا فيه ولا احتجنا طب نفسي استخرت كتير وقررت ما اروح لكن رحت خرجة تانية ماقدرت اروح للجمعة في بالي مية سؤال واعتراض كلامهم كله راح يكون عن السوق والاطفال والعيد ووو وانا في مرحلة من حياتي مو متحمله الضغط وماصدقت الموتيفال روقني شوية بالنسبة للتكبر ما اقصد اني اتكبر على الناس او اشوف نفسي افضل بالعكس من اكتر الاشياء اللي مخلية الناس تحبني تواضعي وضحكي مع كل الفئات العمرية والاجتماعية بس اقصد عزة النفس عالية عندي جدا جدا لدرجة انها تضايقني لاني احرم نفسي من اشياء كتير وانا صغيرة لو احد اعطاني حلاوة ارفضها ما احب احد يتفضل علي بالرغم من اني ما كنت اعرف ايش التصرف دا فتخيل اجلس مع الناس قد ايش احس بالذل لمجرد احساسهم بالشفقة والحزن علي وعلى فكرة دكتور الناس فيهم تناقض فاجأني من جهة يحزنو علي جدا عشان الخلفة ومن جهة للاسف اقرب الناس يحسدوني على جوزي والله اسمعها بادني جوزها يحبها جوزها ما يخرج من البيت عشانها انتي باين انك مرتاحة عشان جوزك يحبك بالرغم من انك ماخلفتي مجتمع ما اعرف ايش يبغى قبل سنتين كنت مكبرة دماغي مررررررررة من الناس لكن السنتين دي سرت اخاف من حسدهم ما عندي الا صحتي وجوزي ودراستي نقو على صحتي ودراستي جابوني الارض سرت اتحاشى اتكلم عن علاقتي وعن حياتي مع زوجي وابين اني بالعكس زي زي كل الناس |
الله يعينك أختي وترى أنا ماقصدت انك متكبرة، لا، قصدت الكبرياء اللي هو عزة النفس في النهاية يا أخت رجاء يظل أهم شيء هو انك منتبهة لمسألة انك غريبة بينهم من ناحية ان سواليفهم عن الأطفال غصبا عنهم لأنه عامل مشترك بينهم وخليكي مكبرة دماغك ع الآخر حتى لو وجد أكثر من حسود أو حقود لا يهموكي بشيء صدقيني ، طنّشي وتعلمي كيف تطنشي لمجرد التطنيش مش علشان تغيضيهم لا، فقط تطنيش ولا كإنك سمعتي شي منهم |
بالنسبة للكبرياء انافهمت غلط
في شي تاني مضايقني ومسبباي ازمة نفسية لو تصدق اكتر من الخلفة قولت لحضرتك اول انه اهلي الحمدلله عندهم اموال واملاك ومن اغنى اهل المنطقة ومعروفين قبل اربعة سنوات دخلو في مشروع كلف للان ملايين الملايين وعشان المشروع دا اصبح الدخل السنوي يقل واغلب ايجارات الاملاك التانية والعقارات تروح للمشروع المشروع قرب ينتهي لكن اللي حصل انه احنا عائلة كبيرة ومترابطين جدا في الكم السنة بسبب المشروع دا وقلة الدخل اصبحت الاوضاع صعبة وكمان المعيشة غليت اللي حصل انه نفسيات العيلة كلها اتغيرت والله اني اجلس بالساعات افكر ليش نفسياتهم سارت كدا معقول الفلوس تغير النفوس الاملاك كلها بيد كبير العيلة وهو متحكم في البيع والشراء المشكلة مو عارفة ايش اللي بيسويه الكل يطالبه يبيع اراضي او عماير مؤقتا لحد ما المشروع الكبير يبدء يشتغل ويرجع الدخل لكن هو رافض ويتحجج ويطير الزباين والله يادكتور عندنا اراضي تجيب 70مليون واقل يعني كلها ملايين لو باع وحدة نفسيات العيلة تتصلح لكن اسلوبه مخبلنا كلنا مو عارفين ليش بيتصرف كدا ايش تفسيرك النفسي للي بيسويه وتفسيرك لتغير العيلة اللي انقلبت على بعض حتى الاخوان والاخوات انقلبو |
اقتباس:
لكن الغالب انه غلطان ، لأنه مهم الاهتمام بنفسيات العيلة |
ما اعرف هل هو عشان بيتعب وكبر الثروة سار عنده حب تملك مع انه كريم جدا واهم شي عنده يجمعنا حولينه
بس صراحة تعبنا كم سنة واحنا نستنى منه يتصرف في شي ما بيتصرف ودائما يسوي اللي في راسه |
على الرغم من أني أراه مخطيء ومن المفروض أن يهتم بنفسيات العائلة
إلا أني أشم رائحة خير كثير سيطالكم أنتم وأبنائكم من بعد الصبر ومن الجائز أن أقول تحملوه قليلا وحالكم ليس بالسوء الذي تتخيلونه فمادامت مستورة معكم من ناحية الضروريات فالحمد لله، غيركم مو لاقيها |
ان شاءالله حيجينا خير واحنا عارفين لانه مشروع ضخم فندق عند الحرم مو شي بسيط تكلفته ضخمة جدا
بس كرهناه من قبل مانعرفه بس الله يستر عالنفسيات اللي اتعدمت هل حتتصلح بعد ما يرجع الحال زي اول واحسن ولا لا الله العالم |
ماشاء الله تبارك الله،،، مشروع أروع من الروعة
الصبر ياأختي وان شاء الله كله يتصلح |
الله يسمع منك
دكتور لي اسبوع باخد موتيفال حبة في اليوم الحمدلله ارتحت مرة وسرت اخرج بدون خوف وتعب بس كمان باشرب حبوب كالسيوم مع ماغنيسيوم وزنك وفيتامين دال الحبة فيها كل دا والحمدلله حاسة جسمي اتحسن وشهيتي اتحسنت بس دكتور خايفة يسير حمل وانا باخد موتيفال مافي شي بعيد عن ربنا ايش في دوا خفيف جدا زيه بدون تاثير عالجسم والحمل وخفيف زي الموتيفال مايتعبني الحمدلله حبة وحدة مريحتني في اليوم ومحسنة نفسيتي بس خايفة يرفع الحليب كمان ابغى دوا خفيف عالمعدة زيه اعصر مخك دكتور ارجوك و,,2/232R4اعطيني دوا زي الموتيفال والدوجماتيل ممتازين جدا والحمدلله مرة بيحسنو مزاجي بس مشكلتهم الحمل |
للأسف أختي رجاء لا يوجد دواء آمن تماما في الحمل الا أن بعض الادوية يقال انها اظهرت مشاكل عند الاجنة في حيوانات المختبر وعند جرعات عالية ولا تتوفر دراسات ولم يثبت لا أمانها ولا خطرها على الانسان وهناك تصنيف للأدوية من ناحية الحمل كالآتي: A هي أدوية آمنة على الحمل تماما B هي أدوية آمنه ولكن يفضل تجنبها ان لم يكن لها ضرورة C هي أدوية لم يثبت أمانها ولا خطرها على الانسان ولكن هناك شواهد خطر على الحيوان عند الجرعات العالية D هي أدوية ثبت ضررها على الانسان ولو انه نادر E هي أدوية خطيرة على الحمل ولا ينبغي ان تستخدم وكل الأدوية من فصيلة موتيفال او الشبيهة بمفعوله هي من نوع C والتوصيات الطبية هي بتجنب أخذها مع الحمل الا اذا ثبت ان مخاطر عدم اخذها على الام هي اشد من مخاطر اخذها ولا يستطيع طبيب ان ينصحك الا بتجنبها في الثلاثة شهور الأولى وأخذها بجرعات صغيرة وغير متواصلة ، ومع ذلك لا يمكن التأكد بأنها آمنة تماما وانا انصحك ان لا تهتمي لأخذ دواء اثناء الحمل فالحامل يعطيها الله قدرة عجيبة على التحمل ،، وهي في جهاد الى ان تولد وستظهر لك مشكلات مع الحمل تجعلك تلتهي عن التعب النفسي، مثل الوحم ولخبطة الاملاح وحرقان المعدة وغيرها من المشاكل الغير خطيرة ولكنها فعلا تشغلك عن تعبك النفسي ولا يزال الموتيفال به مادتين علاجيتين وهما نورتريبتالين وهذا له بديل عند الحمل هو انافرانيل والثانية هي فلوفينازين وهذه اعتقد المادة التي تناسبك في موتيفال وتحسن مزاجك ولكنها مثل ماأخبرتك لا توجد عليها اثباتات امان على الانسان ودراسات الحيوان تقول انها غير آمنة فأنصحك بدواء انافرانيل ، جربيه الآن قبل تحملي ، والله دوا ممتاز ويعالج التوتر وضيقة الصدر اذكر انك استخدمتيه قبل كذا وقلتي انه مزعج،،، طيب خذي منه جرعة 10 ملجم وخذيها يوميا مدة اسبوعين مع موتيفال تراها خفيفة جدا، وبعد الاسبوعين نزودها الى 25 ملجم ونوقف موتيفال ايش رايك تجربي وتشوفي؟ |
شرح وافي جدا الله يعطيك الف عافية
طيب في الحالة دي باذن الله ابدء اجربه بعدرمضان ودحين استمر على موتيفال للعيد بس لانه في حال تعبني انافرانيل اتحمله في الفطار لكن اخاف اجازف في رمضان ايش رايك |
أوكي،،، فكرة جيدة،،، توكلي على الله وربي يوفقك |
يعطيك العافية
|
السلام عليكم دكتور رعد
كيف الحال يارب بخير وعيد سعيد قبل الزحمة دكتور انا عندي دوخة مستمرة وللان مااحد من الدكاترة فادني كل كلامهم طبيعية مع العلم عندي خشونة رقبة ومشكله في نص الضهر الفقرات راكبه المهم لمن اخدت الموتيفال جلست تقريبا اسبوع الحمدلله ما باحس لا بالحر ولا الدوخة قلت تمام يعني السبب نفسي المهم قبل يومين رجعت الحاله تاني مع العلم اني باخد الموتيفال برضه بس الدورة قرب موعدها وقبل ماتجيني بكم يوم تعملي ازعاج قوي ايش رايك الموضوع نفسي ولا عضوي eqdx342 |
أختي رجاء: أهم شي في موضوع الدوخة هو ضغط الدم ومرض السكر وفقر الدم فلو ثبت ان الضغط عندك جيد وليس عندك سكر ولا فقر دم فلا تخافي فالغالب هو ان الدوخة عامل نفسي قد يكون للدورة علاقة فهي تسبب اعراض عامة مزعجة ومنها الدوخة لا تخافي اختي، طنشي ولا تفكري فيها وبتكوني بخير ان شاء الله،،، وكل عام وانتي بألف خير،،، قبل الزحمة كمان :) |
الله يعطيك العافية
الضغط متغير طبعا وفقر الدم موجود بشكل متقطع سالت دكتورة نسا وولادة عن اعراض ماقبل الدورة ومن ضمنها الدوخة وعدم تحمل الحر قالتلي علاجك عندي هو هرمون حبوب تتاخد في اليوم ال16من الدورة راح ابداها معاكي بعد اسبوعين دكتور تصدق امس شفت منظر لليوم بابكي منه ولد في سن الزهور معاق يده ورجله اليمين فيهم عيب خلقي ربي حطه قدامي كنت باستنى في السيارة والولد ماشي لحاله هو اسمر وصغير ويادوب قادر يمشي وكان يبغى يقطع الشارع وجلس يتنى لحد ما السيارات خفت وقطع وبعدين وقف عالرصيف ياشر للسيارات يبغى واحد بس يوصله للمحطة وربي يادكتور كنت حاموت قهر ولا احد وقفله وجوزي مو في السيارة ولا كنت وصلته المهم كل ماتطنشه سيارة يطالع فيها لحد ماتروح وعيونه كلها حزن قطعلي قلبي لحد ما جا واحد ابن حلال اخده مسكين سار يمشي بسرعة من الفرحة دعيتلهم الاتنين بس المنظر مو قتدرة انساه احس اول مرة اتاثر لدي الدرجة مو عارفة ليه يمكن عشان اخويا قده وحسيت قد ايش احنا في نعمة وهو محروم الصحة تاج تاج نسيت الخوف والاوهام والحمل وووو استوعبت نعمة ربي بس اتمنى اني ما انساها بعد فترة وارجع للحزن |
اقتباس:
صادقة والله ياأختي،،، والله احنا في نعمة كبيرة مانعرف قيمتها الين نشوف المحرومين منها |
الموقف للان مو راضي يروح من بالي الولدحزني جدا الله يوفقه ويسعده ويساعده في حياته
|
السلام عليكم دكتور
مبروك شكل المنتدى سار كانه حلاوة زوجي مسافر للرياض حيجلس مع ابوه اسبوعين لانه مريض وشغالتي راحت اجازة والبيت فضي علي وبجد نفسيتي في الحضيض ولا حتى خرجت من النكد حبيت اسالك دكتور صاحبتي الحمدلله مبسوطة جدا في حياتها ماعندها مشاكل لكن بحكم انها ام لاربعه ماشاءالله والبنت الي امها تعتمد عليها في كل شي حاسة بضغط كبيررررررر في الفترة الاخيرة وطفشت وحابة تاخد بروزاك يروقها فايش رايك كيف تبدء الجرعات وهل هو مناسب لحالتها |
اقتباس:
ممكن اختي ،، بشرط ماتكون عندها طفل يرضع، لأنه ينزل في حليب الأم وتبدأ بـ 20 ملجم يوميا مدة اسبوعين، وتزيد الجرعة الى 40 ملجم مرة واحدة يوميا وتستمر عليها مدة 3 شهور على الأقل،،، وبالتوفيق |
لا ماعندها طفل ترضعه
باذن الله اقولها على الوصفة |
السلام عليكم دكتور رعد
كيف الحال بعد الغيبة دي بعد ماطفشتك باسالتي اكتشفت سبب تغير مزاجي وحالتي النفسية هو الدوستنكس خلص الدوا وجبته من شركة تانية في الوصفة كاتبين يسبب اكتئاب بالفعل اخدت حبة قبل عشرة ايام للان مزاجي سيئ جدا وطبعا لا اباخرج ولا لي نفس اشوف احدوبس نايمة وتعبانة وجسمي مكسر والدوخة ماتفارقني حاليا باقدر اشرب مهدئات بس لمن ربي يكرمني بالحمل والله مو عارفة ايش اسوي |
اقتباس:
وعليكم السلام والرحمة ياهلا بك اختي رجاء،،، فعلا طولتي الغيبة فعلا الدوستنكس قد يسبب اكتآب ولازلت أقول لك لاتخافي جربي انافرانيل وممكن تاخذي معاه لارجاكتيل بجرعة 25 ملجم مساءا، فهذا يغنيكِ عن موتيفال ان شاء الله ويساعدك |
| الساعة الآن 08:10 AM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا