|
ماشاء الله تبارك الله احلى الأسماء ربي يحفظ فاطمة لابو فاطمة و ام فاطمة و يجعلها من المباركات الطيبات
|
|
اقتباس:
صدقتي و الله في قولك : و كأن كل عزيز له هالة تنير المكان سبحان الله إي و الله هذي الهالة عجيبة تسوي العجب العجاب بالنفس و مجيء العزيز تشتعل هذي الهالة و عند غيابه تنطفئ و ترسم مراسم الحزن على النفس و الوجه و الله قبل ثلاث أو أربع أيام ليت الجوال معي لكني قاطه بالبيت كنت أمشي قدام البيت و 8 بساس حولي تمشي معي و إذا توقفت وقفت و ربضت ليت الجوال معي و أصورهم فيديو و وريته إياك . يآلله راحت علي الإهتمام بهذي المخلوقات و خصوصا القطط تبين رحمة الإنسان من عدمها أحس هي الجوهر التي تبين وجود الرحمة في الإنسان من إتصافه بالظلم و العدوان و عدمان الرحمة و اللطف تابعي هذا الفيديو : https://www.youtube.com/watch?v=MZZkf4nnauw |
هذا هو
عاش معي اربع سنوات انولد ببيتنا أمه جابته تحت سريري و بعد ولادته بفترة بسيطة التهبت وحدة من عيونه قعدت اعالجها بالقطرات لكن ماش تلفت و ما صار يشوف بها . بس مكانته الغالية ما هو عشان انولد ببيتنا و عشرة عمر لا كان متعلق فيني، من يوم أقبل عليهم يسبقهم باتجاهي اعزي نفسي اني في الجنة القاهم بإذن الكريم لأن مافي بالجنة مستحيل و اطلب اشوفهم و يعيشون معي هناك و اسألهم وش كان شعوركم تجاه العيشة معي و وش قصرت عليكم فيه و وش كان ودكم تحاكوني فيه لكن ما كنتوا تنطقون بالدنيا و وش ذكرياتكم معي و أكثر شي اثر فيكم يارب يجعلنا وياكم من أصحاب الفردوس الأعلى و أحبابنا و موتانا و موتى المسلمين اللهم امين |
اقتباس:
الله يعوضك خير يا بسمة أكيد هي اللي ماتت و الله يا بسمة كثير أسنتر بالمطعم الهندي و تجيني كالعادة هذيك البسة و واحد جاني و الله العظيم ما يستحي تدرين وش قاللي ، قال تراها تفضحك .. المهم رديت عليه و قام يسوي يصرف الموضوع و عرفت إنه زلابه يقيس الفضيحة بشيء غير معقول . بس وش تسوين بناس سلب الرحمة و اللطف من قلوبهم |
ايه هو اللي مات حبيبي
شفت الفيديو رائع ، فعلا ما يرحمهم الا رحيم و ما يبغضهم الا بغيض مقياس المعدن الأصيل من عدمه هو الإحسان إلى أضعف خلق الله من عدمه تدري من حزني على قطط الشارع الجائعة اني ما اقدر اخرج في أوقات تواجدها لعجزي عن إطعام الجميع لذلك اخرج قبل الظهر و بعد الظهر ، الفترة اللي ما يتواجدون فيها حتى ما ينحرق قلبي عليهم و اقعد اهوجس لعدة أيام و اعاف الحياة فوق ماني عايفتها |
اقتباس:
صادقة القطة اللي تتلبب فيك تكون أكثر محبة في قلبك من غيرها أنا مخشتني بسة مسويه نفسها أليفة و مخشتها للحين أثرها بيدي ههههه المشكلة واحد يرعاها و يعطيها أكلها و لا يلمسها بس يلاعبها و وده يلمسها بس تخمشه و خمشتها تجرح و تدمي . هي من النوع اللي ما تخاف من البشر و لا تهرب منهم بس فيها عيب إن إذا لمسها واحد حتى اللي يوكلها و يرعاها ما تستطيع تقاوم إلا و تخمشه الظاهر فيها هرمون غريب هذي البسة أتذكرها و هي صغيرة و كانت وحيدة و كان فيها عافية و نشاط من يوم إنها صغيرة سبحان الله و بحمده |
و هذا اللي تقول تراه منزوعة منه حاجتين : الرحمة و العقل
لذلك مغبون ، مغبون من كذا جهة ، مغبون منك حاسدك على الخير و مغبون لأنه ما ذاق لذة الإحسان لاضعف الخلق محروم ما يدري ان فيه ناس تستمتع بالعطاء أكثر من استمتاعها بالأخذ |
شوف العض و الخمش عندهم يدل على حاجتين : تعبير عن حبهم و اللعب ، انا حرفيا كلي صايرة خريطة العالم أنواع المخوش و العض و باستمرار كل ما غسلت بالماء تلسعني حرارة الجروح
خلاص تعودت صرت اسميها بصمة المحبة اللي بدونها ما تتأكد المحبة فقط ادعي ان ربي يسلم عويناتي ما يقربونها و الا كل شي غيرها فدوة لذيك الأظافر و السنينات |
اقتباس:
الله يعينك ع فراقه صادقة في مقياس المعدن الأصيل فيه اثنين كبار عند بيتنا واحد منهم أسميه ميقالو . المهم دايم يتهاوشون و أجي أفرع بينهم ههههه واحد منهم ما يخاف مني يعني أليف و لونه بني بس ميقالو يخاف مني مو أليف . و الله يا كثر هوشاتهم اللي لونه بني ما أدري وش بلاه له يومين كل ظهرية يماوي بالحاله . حنيت عليه يوم و عطيته أكل و سكت . جاء اليوم الثاني يماوي قلت و الله ما عاد فيني يا حبيبي و أنا صادق ما بالبيت شيء يآكله |
وش صار على البسة الصغيرة الوحيدة اللي تقول؟
انا يحز في خاطري القطط اللي قدام بابنا يظلون يعسكرون قدام الباب كل عصرية اعطيهم اللي ربي قاسمه لكن ما يطولون فترة بسيطة و ينقطعون و اقعد افكر فيهم و وش اللي جرى لهم ، و الف سيناريو و سيناريو ينسجه خيالي المرهق المجروح من البشر و إيذاء البشر و يتكدر خاطري و يزيد حزني لين استودعهم اللي خلقهم تخيل خاصة اللي يظل يداوم شهر شهرين ثم يختفي هذا اللي يكوي قلبي كي و اقلق عليه |
شوف انت تقدر تجيب اكل رخيص و بنفس الوقت كثير يكفيهم شهر شهرين
هذا الدراي فود الجاف يجي من ١٥ كيلو لخمس و عشرين كيلو خيشة كبيرة حطها ببرميل كبير نظيف له غطاء في مكان مظلل و اغرف لهم منه سعره حدود ١٣٠ إلى ١٥٠ تبغاني احط لك صوره حطيت |
اقتباس:
الله يجملنا بعقولنا و يجعل ما غرسنا من رحمة في أضعف خلقه إنه يرحمنا برحمته الواسعة بسمة و الله حزنت على فقد البسة اللي تذكرينها أم عين صفرا و عين زرقاء . العفراء هذيك .. أحس فاقدها حيل و الله العظيم بس الله يآخذ هالبيت الكئيب اللي مو راضي يدخله بسوس و الله ودي أروح بكرة سوق الخميس بالقطيف أسلي خاطري بالسوق هو سوق حيوانات و حراج و يمكن أشوف شيء يعجبني و أشتريه خصوصا إذا شفته يسليني و الله ما أدري أروح له أو ما أروح حقرة بقرة قلي عمي يعد العشرة |
شوف لا تشري قطط لأن شراءها و بيعها محرم و غير انك تشجع التجار المستغلين يستغلونهم و يبعدونهم عن أمهاتهم و يحرمونهم و في النهاية الناس تلعب بهم شوي ثم ترميهم بالشوارع
إذا وضعك يسمح تبنى من الشارع على الأقل يعرفونك و تعرفهم ما راح يستاحشون منك و يقلقون اما ذيك العفراء ربي الشاهد كل فترة تطري على بالي حتى القط مالك اضطريت اعرضه تبني و أخذته وحدة كل فترة اكلمها تطمني عليه و ترسل له صور و مقاطع اضطريت اعرضه تبني عشان القطط اللي عندي ما تقبلته و أنواع الضرب مسكين لدرجة صار مخشوش تحت الدولاب ما يطلع من الخوف منهم و حسيت اني استوثمت فيه و عرضته تبني طيب هل صاحب عفراء طمنك عليها هل تدل بيته |
اقتباس:
هي ذي اللي تخمش وحيدة ما تحتك بالبسوس الثانية مرة قررت أعطي قطوتي اللي بالمطعم الهندي أكل ، و جت عندي ذي اللي تخمش و صرت أراقبها ما تقرب طعام القطوة حقتي و صارت ما غير تراقب لأني قهران منها ليه تخمش |
حرام تراها ما تفهم و تخمش لأنها تحبك تبي تلفت نظرك
اعرف حركاتهم لكن الناس يقيسون حركاتهم و تصرفاتهم على البشر الخمش و العض دلالة محبة و ميانة و لعب و البشر يفسرونها عدوانية و قلة اصل شفت الفرق حتى ردات فعلهم عند الخوف العكس تماما البشر إذا خافوا احجموا و القطط اذا خافت هجمت و الناس تفكر ان هجومها تسلط و عدوانية و هم ميتين من الخوف مساكين شفت ليش القطط تنصدم و تندعس تحت السيارات لأن يوم تقبل السيارة عليها من الخوف ترتبك و تهجم باتجاه سيارة الموت بدال تبعد عنها من يوم قرأت ذي المعلومة و انا ماني بخير و كرهت السيارات تحس كل شي في بيئتنا ضدهم سبحان الله |
ايه كله كوم و خوفهم من بعضهم كوم آخر
شي فظيع أعوذ بالله يا شفت من الأهوال لين عفت من ناحية الخوف من بعضهم هذي يتألف فيها كتب فيه قطط لا يمكن تعيش و تستقر و تاكل و تشرب لو فيه قطط بجانبها يا رجل ممكن تموت جوع و عطش و الأكل و الماء قدامها لكن من خوفهم من بعضهم ما يقربونه هذا يرجع لطبيعتها و فطرتها لأنها ما تعيش في قطيع زي باقي الحيوانات الحيوانات الباقية تقدر تعيش مع بعضها في حظائر و اسطبلات الا القطط ممكن حتى يصيبها الاكتئاب و تموت جوع و عطش لو ما لقت منفذ تهرب منه يا رجل ممكن تهرب عن أطفالها الرضع و تترك البيت كله إذا عاشت مع قطط أخرى داخل البيت مساكين أنواع قرادة الحظ في ذي الحياة يعانون منها |
اقتباس:
بعد فيه وحدة كانت حول البيت صغيرة كان فيها جرح عند وركها جرح غاير و وديتها للبيطري و خذيت بخاخ و و دواء أعيطها بفمها بالسرنج طبعا و طابت و كبرت شوي إلا ما عاد ألقاها و حدسي و ظني يقول واحد شالها كنت مآخذ شهر في تنويم الأمل بعد ما طلعت على طول و وقفت عند البيت إلا تجيني مرحبة و مهلية و كأنها تقول لي عادك عايش يا هذا ههههه بعد مدة ما عاد لقيتها أبدا ما على قلبك كدر يا بسمة بسمة كيف حالك أخوك اللي تقولي لي عنه عنده تأخر أو تخلف في العقل |
اقتباس:
بس هل البلدية تآكلهم هذيك المرة كنت أعطيها البسة العفراء و وحدة بلدية جت و عطيتها اياه ما أكلته و الله خطة ودنا نكسب أجر و رحمة إيه شفت صور الأكل بقوقل |
اقتباس:
بس هالقطط فيها اللي مستوردة يعني هي هي ما راح تعيش لو فكيتها بالحارة خصوصا في البلاد العربية و أكلهم يكون مخصوص زي اللي قلتي عنه داري فود لأنهم ما يأكلون الدجاج و لا يرقون الزبايل الخضراء مثل ما القطط البلدية ترقى مرة لقيت شيرازية و أكيد هاربة من بيت أو مطرودة و لقيت يهاوشها البس البني اللي يتهاوش دايم مع ميقالو و حاولت كثير أتقرب منها و آخذها و أعرضها للتبني خصوصا إن فيها طوق بحلقها بس يا حسافة تهرب مني مع إني حاولت معها و البني ما خلاها بحالها يهاوشها و يلاحقها و تهرب منه و آخر شيء ما أدري وين ديارها بخصوص اللي تبنى عفراء لا و الله ما عاد أتواصل معه خذاها و على وجهها الله يكتب لها التوفيق في حياتها ياليت و الله ما فرطت فيها لكن وش اسوي مجبور ما شاء الله تتواصلين معها زين تتطمنين على أولادك عسى الله يسر قلبك دايم الدوم |
تصدقين فيه قناة بالتلفزيون إسمها أنيمال بلانت
أنا أتفرج عليها خصوصا لما تجي حلقة أهل القطط و مشاكلهم مع القطط و مشاكل القطط فيما بينها عند أصحابها و يجي واحد خبير يزورهم و يحل مشاكلهم هذي شعار القناة مرة حلوة تصلح لك https://j.top4top.io/p_1764syinx3.jpg |
يا جعل الكدر ما تشوفه عينك و لا أحبابك يارب
اخوي الله يعافيه ما زالت حالته لأن التأخر الذهني ما له علاج لكن استجد طارئ على صحته العام زي ذا الوقت الضعيف الله يكتب أجره و يشفيه صابه شلل فجائي للان يعاني منه فوق السنة فجأة ارتفعت درجة حرارته و يوم بغيت اوديه المستشفى و ناولته الثوب و هو منسدح على سريره بغيته يقوم ما قدر يقوم شلل من من المنتصف إلى الأقدام لدرجة ما يقدر ينقلب على الجنبين و لا يزم نفسه فقط يحرك يديه و راسه تنوم ثلاث شهور على الفاضي ما خلوا و لا بقوا أشعة و تحاليل و بالاخير قالوا ما ندري وش السبب و بغيت انقله لمستشفى ثاني الا جات كورونا و خفنا عليه اما الدراي فود ٩٨ بالمية من قطط الشارع اللي اعطيهم ياكلونه ماشاء الله تبارك الله يحدهم عليه الجوع ضعوف ما يلقون في الحاويات الله يكرمك غير الخضار و الخبز و الرز و هذي بالأساس ما ياكلونها لأنهم بالأساس لاحمة تتغذى على اللحوم ، و الدراي فود اللي يجذبهم له نكهة الدجاج و الاسماك و الا ما اقربوه غير أن الامانة صاورا يفرغون الحاويات ثلاث مرات يوميا ، يعني ما يمديهم ضعوف يقربون منها إلا فرغوها |
اقتباس:
من تعاملي مع القطط من يومني صغير ما لقيت وحدة تخمش مثلها حتى اللي تبي تخمش و هي أليفة ما تخمش ودها تخمش بس سبحان الله فيها وازع ما تبي تأذي من يرعاها حتى تحط فكها بين أصابعك و ما تعضك مع إنها مفطورة على حماية نفسها و على الهواش مع بقية القطط اللي تهاوشها و فيها شراسة بس بسبب وازعها الأليف مع من يرعاها أبدا ما تأذيه بأي شكل من الأشكال حلو تحليك ما شاء الله و سبحانك يا ربي ما أبدع خلقك بسمة ما يجيك تخيل يعني تتخيلين هذي البسة كأنها نمر هذي كأنها أسد هذي كأنها فهد من أشكال وجيههم و ملامحها . أنا تجيني هالحالة |
الله يلقي عفراء كل خير و يلقي كل ضعيف من خلقه
ابشوف القناة أن شاء الله و انت ماشاء الله تبارك الله طالما توظفت اسأل الله ان يثبتك في الوظيفة و ترتاح فيها و يعلى مراتبك تقدر تستقل مع الوقت بذاتك لو تستاجر لك غرفتين جنب اهلك و شوي شوي ترزق ببنت الحلال اللي تسرك و الذرية الصالحة اللي تكون قرة عينك يا كريم |
اصلا القطط من فصيلة السنوريات اللي من ضمنها الفهود و النمور و الأسود
عشان كذا يشتركون في الملامح و انهم ما يعيشون في قطيع لا يمكن لكن الفرق ان القطط أصغر في الحجم و اليفة بالنسبة لاطباعهم حتى لو ما عجبني طبع في أحدهم لا يمكن احاسبه عليه و انفر منه لسببين اول سبب لأنهم ما يعقلون ، ثاني شي المحبة تجب كل شي ، مثل ولدك لو فيه مليون طبع سيء لا يمكن تكرهه أو تعافه كيف هؤلاء مساكين اجتمع فيهم الضعف بجميع أنواعه ضعف عقلي على ضعف جسدي على ضعف نفسي بسبب الخوف المسيطر عليهم يا رجل فيه مثلا كم واحد منهم لابد يغدرون بي بلحظة و القاهم و انت بكرامة ناثرين بولهم على فراشي هل استطيع الومهم أو انبذهم لاني كمان قرأت عن هذي الحالة انهم بسبب خوفهم من بعضهم يحط الواحد له بصمة و حد قريب من صاحبه اللي هو انا لأن كل واحد فيهم يشوفني مصدر الأمان له و يخاف احد يشاركه فيني لذلك عذرتهم اخرتها احذف الفراش في الغسالة و احط غيره |
بسيطة تهون و أعلمك زين بعد لا تقول شعليا
|
بالنسبة لرسم الحدود عن طريق نثر ابوالهم و انت بكرامة على الأماكن هذي تستخدمها السنوريات الأسود و الفهود و النمور بحيث يمنعون بعضهم من الاقتراب من هذي الأماكن اللي كل واحد يعتبرها ملكية خاصة فيه تشعره بالأمان
يعني مو فقط من أجل اجتذاب الأنثى في فصل طلب التزاوج سبحان الله |
يآلله يا أخوك يا بسمة يآلله يآلله
لا حول و لا قوة إلا بالله يا رب يلطف بحاله يا رب ألطف و حن عليه يا رب يا رب الله يكتب أجرك و لا يضيع تعبك و يشفيه الشفاء العاجل بعد قلبي و روحي المسكين الله يقويه و يقومه بالسلامة طيب هو يتكلم أو لأ ؟ |
حلو إن شاء الله بشتري داري فود من النوع الكبير و أحط لهم بالبرحة الأرضية اللي قدام بيتنا
تصدقين كثرت البسوس عند بيتنا و السبب الجيران الله يجزاهم خير ما فيه سور ( سؤر ) من أكلهم إلا يحطونه لهم حتى الحمام كثر و حاطين لهم ماي مو إحنا بس اللي نبي الأجر حتى هم سباقين الحمدلله جيرانا ما هم جيرانكم يا بسمة هههههه |
اللهم امين
الله يجزاك خير ربي يشفيه و يشفي جميع مرضى المسلمين ايه يتكلم الحمدلله التأخر مو مرة شديد يعني تفكيره تفكير طفل بعمر ست سنوات تقريبا تحس انه نفس الأطفال و براءتهم كان يرافقني بكل مكان يوم نجيب أغراض البيت و أحيان امشيه الان توحدت من دونه زي الجنية لحالي، بالقوة اجيب الأغراض يوم تنتهي تماما من البيت اضطر اخرج و بسرعة ارجع و تبنيت عشانه وحدة مشلولة و اثنين عميان عشان رحمة بهم و عشان اوريه أن الدنيا ما هي كاملة و يحمد ربه على كل حال |
ماشاء الله تبارك الله اسأل الله ان يبارك فيكم و في جيرانكم
مو جيران السوء اللي ربي بلاهم فيهم الحسودين حتى خيشة الدراي فود ادخلها بيتنا بالدس كله لأجل لا يحقدون عليهم و يوذونهم حسبنا الله ونعم الوكيل فيهم تدري ان من ضمن دعائي اليومي و الأساس هذي الصيغة : يارب أبدلنا بذا المنزل منزل مبارك و جيران مباركين رحومين لأن حرفيا تلفت اعصابي بسببهم ربي هو الحسيب ما لنا غيره |
اقتباس:
ردوها علي تهيء تهئ الله يسمع دعواتك لي بهالوظيفة عسى ربي يهونها علي و الله اثنين من الموظفين قالوا لي أنت حساس قلت لواحد منهم قلت مو حساس و بس إلا حساس بزيادة و الثاني منهم أحس عصب علي و كتبت له ورقة إعتذار ب أنك ما تنلام يا غالي و لما جيت أبعطيها اياه قال وش هذي قلت له اقراها . قال لا كلمني وش فيه و سكت . خلاص ماني متكلم خلوني ساكت أحسن ما إستحملت و كتبت فضفضة في قروب العايلة و مسحت فضفضتي إلا لقطوها ثنتين من أخواتي و نصحوني بغيت أغادر من القروب و أنا صادق الكل متهني بعمله حتى لو هو صعب إلا أنا طيب صحيح إنا خلقنا الإنسان في كبد بس شقائهم يلقون فيه راحة سواء في نهايته مثل الراتب أو الإحتكاك مع الموظفين الآخرين و سواليفهم و عملهم بحيث يحسون إن الفراغ يقتلهم أما أنا فالشغل يقتلني و الفراغ يقتلني و لا مهرب بس عسى الله يغير الأحوال أنا يا بسمة المفروض لي بيت ببلاش لأن أبوي عنده عمارات و أخواني لقوا وظايفهم فور تخرجهم أما أنا ما لقيته إلا بعد ما زاد التعب تعبين و أتعاب و حالتي خاصة حتى أخواني اللي هم طرمان ما لحقهم اللي لحقني المهم أبوي قاعد يتصل فيني و أنا من القهر ما أرد عليه ما صار يكلمني إلا لما توظفت البيت تغيرت نظرتهم لي ما عدا أخوي الكبير بس بعد إيش تغيرت نظرتهم بعد ما لقيت الأمرين و كل يوم أروح العمل أقول راح أنهي عقدي بنفسي من الهول اللي أحسه . حتى إني أبكي مرات بحمام الدوام ! بس راح أقاوم و أحاول الصمود و ربي يعين الجميع |
هذا واحد من العميان اللي تبنيت
حبيبي ما يشوف ابد كان صغير ماشاء الله تبارك الله و كبر https://i.top4top.io/p_1764vd2h10.jpg |
طيب انت ما عندك رقم اللي اخذ عفراء
كان على الأقل احتفظت برقمه لأن حتى لو طبيت في حساب التبني اللي بالانستجرام ما راح تستفيد لأن اللي تبناها ما راح يحط رقمه فقط اللي أعلن هو اللي يحط رقمه ، و انت اللي أعلنت ، كان لازم احتفظت برقمه و كذلك عرفت مكان بيته بحيث لو ضاع رقمه تكون فاكر بيته و الله قهر انا بصراحة لا يمكن ، لازم اعرف بيتهم و اطلب منهم يصورون و يطمنوني لأنهم أمانة مساكين ما ودي استوثم فيهم و غير قلبي ما يطاوعني ما اعرف مصيرهم و اتطمن عليهم اما بالنسبة لوظيفتك عض عليها بالنواجذ و اعتبر نفسك في جهاد الله يعينك و كلها فترة و يطرأ عليها تحسينات و تتقبلها أكثر لين تحس ما تقدر تعيش من دونها تراك مو بالساهل لقيتها اضغط على نفسك تكفى و اطلب ربك الثبات و المعونة |
اقتباس:
إيه علمتيني عنه قبل بخصوص براءته ما ودي أقول ما يستاهل أعوذ بالله يا رب بسمة تبنيتي أيتام أوادم أو بسوس ؟ جعل ما تبنيتيه أيا يكون رحمة لك يا لسند و يبعد عنكم الوحشة و الوحدة و يبعث الأنس و الراحة لقلوبكم ما على قلوبكم شر و كدر و ضيم يا رب |
اقتباس:
الله يبارك بعمرك يا غالية |
ايه ما كمل حبيبي سنة عندي
تبنيته و عمره شهرين و الحين تقريبا عشر شهور صحيح انه ما يشوف بس ماشاء الله تبارك الله إذا حس اني مقبلة يسبقهم علي ، و عليه عضة تذبح ، لو باغتني و لقط يدي قل عليا السلام ، عنده استعداد يفصل اصبعي عن كفى من زود المحبة ههههه تبنيت بسوس اوادم ما يخلونن لازم عايلة زوج و زوجة و الا لو بكيفي كان تبنيت رضيعة مجهولة النسب و اكسب أجرها |
اقتباس:
الله يعين يا خيه فعلا ما لنا إلا الصبر . وش أقول غير رحمتك يا رب . بسمة ليتني خذيت رقمه و أقوله رجعها لي ههههه و الله لا اقولها له و ما علي من أهلي خصوصا واحد من أخوياي قال لي يا غبي هذي تنباع ب 15 ألف و عشرين و ثلاثين ألف عشان عيونها ههههه يا رب ألقاها بكرة بسوق الخميس هههههه |
حرام عليك يعني بترجعها عشان الفلوس
و انا اللي كنت أظن و اظن و خاب ظني وجه مصدوم فكرتك قلقان و خايف عليها حتى احترت كيف اساعدك |
شوف بالنسبة للعيون ما هو عشان عيونها
لأن أغلب المستوردة كذا عيونها و تراه بالغ كثير في الرقم تدري ما عمري نظرت لاشكالهم مساكين لأن كلهم يشتركون في الضعف و الضياع بالعكس حتى اشفق على المستورد أكثر لأنه ما يتحمل بيئتنا الحارقة و اسفلت الشوارع الناري غير انهم يبيعون و يشترون فيهم زي الألعاب و الجمادات غير أن اصلا بيع القطط و الكلاب محرم شرعا و راح ابحث عن الفتاوى و احطها الله لا يدخل على مسلم قرش حرام جاى من ورا تعذيب روح ضعيفة |
| الساعة الآن 12:08 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا