وهم كل المواعيد وهم / اول مشاركه
 

السلام عليكم ورحمة الله وبركاته مساء لخير عليكم جميعاً ،انا عضو جديد بينكم ، جميعنا صابرين لان اعضم اجر هو اجر الصبر على البلاء بدخل معكم بالموضوع على طول اولا عندي قناعه ان الالم يقود الى البحث عن الحقيقه ومقتنع ان ماكبدين الآم تعدو بالعلم الاطباء بمراحل ، بخصوص موضوعي انا اعاني من الام جسديه عجيبه كتف بطن كتمه الخ .. هاذي الاعراض كالعاده اي طبيب يقول قولون او جرثومه وبعدها يقول خفف شطه ودسم ، يعني هو درس عشان يقول خفف شطه على العموم على قولة احد الزعماء العرب احب اقول للاطباء من انتم !! . الاعراض هاذي يا احبه شهر بعد شهر وسنه بعد سنه تجعل الانسان اللي مايشكي لاحد يحتار وينعزل تقريبا عن الناس والام يجعله شارد الذهن والمزاج ويبتسم لاحبته لكي لايحزنو ويبتسم لعدوه لكي لايفرح يبغى يعود ويعرف السبب والعلاج ، انا لم اتناول اي دواء نفسي ،، ابي استفيد من خبراتكم وتجاربكم ونصائحكم والله قادر في طرفة عين يشفينا وان شاء الله سنُشفى جميعاً ،، دمتم بود .

اضافه لما كتبت انا لا اعاني من نوبات الخفقان (الهلع)لكن جتني اكثر من مره بداية دخولي هاذا التعب والا تجيني كتمه على مراحل والام بالكتف والبطن وبروده وطبعا سوء هظم والبطن كل يوم له عرض جديد .

وعليكم السلام

انت قلت لا تعاني من اي شي نفسي لا خوف ولا هلع ولا هالامور كلها

معناها معاناتك عضويه ومتعبتك جدا لدرجه قد تدخل بمرحله نفسيه ولكن يجب قطع الشك باليقين ومادام شكواك كتمه وضعف عام بالعضلات وبروده وغيرها

فيجب الكشف عن طريق طبيب عضوي

اخوي هل لجأت للطبيب الصحيح او لا ؟ اقصد فقط لجأت لطبيب باطني ؟ او كان طبيب عام؟

وايضا هل تشعر بأنك تتعب بسرعه وانك تشعر بضعف ويجيك صداع مرات وعدم ارتياح؟ وسؤال ايضا مهم،،، عند الاستيقاظ هل تكون طبيعي لا كتمه ولا الم ولا شي وتعيش عادي

يعني بنهار رمضان هل كل شي طبيعي جدا وبالليل بعد الفطور تجيك عالامور؟

فحصت فحوصات للاعضاء الداخليه والجهاز الهضمي كلها سليمه والقلب ايضاً وراجعت اكثر من دكتور واستشاري قالو هذا قولون عصبي لكن قبل ما يصيبني القولون كنت في نفسيه سيئه مادري هو اللي سبب النفسيه السيئه والا النفسيه السيئه سببته ، بالنسبه لاسألتك التعب مرات احس اني نشيط ومرات خمول والوضع تقريباً بعض الاكلات تزيده زي الدهون والشيشه احياناً واحياناً ماتأثر ابداً بخصوص اذا صحيت من النوم وافطرت فطور ديم اتعب غالباً واحس ان الاكل مايهضم وانتفاخ والم بالكتوف يجلس ساعه ويروح وطبعا تغيرات في الاخراج كرمت لكن السؤال هل مشكلتي في المزاح المنخفض هو اللي سبب هاذي الاعراض والمشاكل ؟ والله يعطيك الف عافيه يالحبيب ، سؤال اخير هل فيه امكانيه للتواصل معك في غير الموقع ؟

والله اخوي الاداره مانعه التواصل لتعم الفائده للجميع

لكن بس سؤال ما جاوبت عليه وهو مهم جدا ،، هل فترة الصيام عندك عادي نشيط ولا في مشاكل وبعد الافطار تبدا مشاكلك؟

تقريبا في الشبعه غالبا انغث وفي الجوع في النص بين الجوع والشبع ارتاح قليلا وتخف الاعراض

بس فتره الصيام هي المهمه عندي ميف وضعها اخوي؟ اقصد النهار كامل وضعك طبيعي؟

شوف لو اكل تمر ومويه الاعراض ماتحي معناه ان الصيام ماتجي الاعراض تقريبا

اخوي مو مشكله

انا بس اقصد انت لما تصوم رمضان

فترة الصيام لين قبل الفطور في اعرض او لا؟

اضن فيه اعراض بس خفيفه جدا اخف من بعد الاكل

تمام

طيب اخوي معليش خلك صبور معاي وباحس هالاسئله سخيفه بس عاد تحملني


1- هل مرات تجوع بسرعه مع انك ماكل من وقت قصير؟
2 - هل مرات تطري على راسك فجأه انك تبي مارس سنيكرس بيبسي تويكس وطبعا تطري عليك يعني شهوه حالا ابيها فجأه كذا ابيها ؟
3 - هل وزنك زايد او تغير خلال ست شهور مضت؟
4- تحس مرات بجوع شديد فجأه وترتجف من الجوع؟
5 - هل تتعرق مرات فجأه كذا وعيونك تغبش وتروح بعدين لحالها؟


معليش جاوبني وان شاء الله بناءا غلى جوابك يا ان الي ببالي صحيح او خطأ

لا حلا ما اشتهي احياناً اجوع بسرعه ولازم اكل حالاً وزني مازاد ولا نفص لكن قبل ثلاث سنين كان اكثر بكم كيلو 4يمكن ايه احياناً احس ان راسي ثقيل ومغبش كذا واحس اني بردان طبعاً قد قالو لي جرثومه معده وخذت علاجها ولا فرق شي تقريبا

الله يكرمك يجيني اسهال احيناً بعد الفطور واحس اني تنفست بعد ماقضي حاجتي ، وبالعكس انا اللي اشكرك على صبرك واهتمامك اخي

تمام ،، وطبعا عندك اصوات ببطنك مثير اكيد ولما تجوع تاكل سندويشه او شي من هالقبيل

وانا متأكد ان وقت الصيام ما تحس بهالجوع كثر وانت مفطر

وايضا اعتقد اخيان نومك يتقطع يعني انام الساعه عشره بالمثير الساعه وحده تصحى فجأه لكن ترجع تنام

واحيان تصحى على كوابيس اخر الليل، هل هذا صحيح او ان استنتاجي خاطئ؟ لانه بيفرق اذا صحيح ويفرق اذا خاطئ

لا النوم احياناً انام 8ساعات متواصله واحيان انام واصحى ، بخصوص الاصوات بطني كله غازات كرمت خصوصا اول ما اصحى من النوم كوابيس تقريبا تجي لكن مو دايم

بالضبط

فعلا اعتقد ان مشكلتك الغذاء فقط

هذي اعراضك كلها بالضبط هي نفسها اعراض ( الانخفاض الارتكاسي او التفاعلي )

هذي اخوي اعراض تجي اذا كان اكلت سكريات بسيطه مقل الخبز الرز المكرونه والحلويات بشكل عام ف تعملك انخفاض للسكر بس مو انخفاض خطير بل انخفاض متوسط ولما تنخفض تجيك الاعراض هذي كلها.

طبعا هذي علامة من جسمك انك انت قاعد تطور مرض السكري اخوي ف لازم تغير نظام اكلك على الاقل ست شهور لين ما الجسم يتعدل.

هذا اخوي اعتقد الي فيك، موضوع بسيط لكنه غثيث جدا وتقدر تقرأ عن هالموضوع وبتشوف ان الاعراض كلها مطابقه اسمه الانخفاض التفاعلي


واذا عندك لغه يكون افضل لان الغرب اعتمدوه ك حاله بينما عندنا لسه فير معتمد ولا معترف فيه اصلا

اسمه reactive hypoglycemia

باتباع نظام يناسبك ،، خمس ايام بالكثير وتروح كل اعراضك .... اما لو باقيه ف يجب عليك الذهاب الي طبيب سكري وغدد صماء لان هذا هو المناسب لحالتك

وانت مافيك مرض نفسي ولا شي الحمد لله

ياخوي نصيحة اخ لاخوه

اذا ماعندك
اكتئاب
قلق وتوتر
رهاب
وساوس
خوف

فأنت سليم نفسيا

ولاتدخل بمتاهات الامراض النفسية وتقرأ عنها

لانها بتوسوس فيك وممكن تأثر على نفسيتك

وممكن كثرة القراءة عن الامراض والاعراض

بالنهاية يصيبك المرض

اعراضك عضويه انت وين والمرض النفسي وين احس الي بتسوي فيك غصب حاله نفسيه 😁

يامندوزا

وشهو الانخفاض الارتكاسي..؟

لان اغلب الاسئله اللي سألتها للاخ مستنياك موجوده عندي فقط اضف اليها ان شخصيتي قلقه انفعاليه

واضف عرض مهم جدا بل هو الاخطر والاهم..وهو حالات اختلال النبض وهو مستمر ويقلقني واحيانا لخبطه قوية وتوقف للقلب لكن حالات نادره

طبعا سويت كل الفحوصات واثبتت سلامة القلب والشرايين..لكن هناك جرثومة معده مرتفعه جداااا مع التهابات مريء ومعده

اسمه ارتكاسي او تفاعلي

هذا مشكلته بالعادات الغذائيه اخوي يعني تاكل اكل يرفع السكر بدمك والبنكرياس تحط انسولين زياده عشان تنزل السكر بشكل سريع ف تجي الاعراض وعاده تجي بعد الاكل بساعه او ساعتين وبكذا تبقى تعبان وتحس بنعس طول الوقت وهكذا ... وطبعا مع الوقت تحي الاعراض ذي لان مع الوقت السكر ينخفض اكثر من المعتاد والكظريه تشغل الادرينالين والمبد يسوي سكر ويرسله للدم عشان يرفعه ... وهكذا يبقى يومك ملخبط كله ومع الوقت تزيد عليك لين تبدا تطلعلك كرشه ثم جوانبك تزيد والبنكرياس يتعب مع الوقت ويقولك سلام عليكم صرف حالك ويجيك السكر .

ماندوو ما قصرر .. مالي في المشاكل العضويه ..

شفاك الله اخووي مستنياك

طيب مندوزا علاجه ذا ان الواحد مايجوع بل ياكل وجبات صغيره متقطعه

طيب وين نودي الحكمه اللي تقول لا نأكل حتى نجوع..وان من اسباب الاسقام اكل الطعام على الطعام

؟

هذا اخوي العاده السيئه للغذاء

الشخص عطب السستم الطبيعي للجسم ولازم يعدله وهذي طريقة تعديل الانسولين من جديد ،، لان وضعك خرب من الاساس وهذا علاجه لمدة شهر اعتقد او اكثر حسب وقت البنكرياس. ولو كان الشخص متبع الحكمه من البدايه كان ما صار الي صارله ف الاسقام جت من العاده السيئه. ف وين الشخص عن هذي الحكمه قبل ما يصاب بالتفاعلي.

شوف ، زيادة الانسولين هي سبب الشحوم، والشحوم ما رح تروح لو تركض من هنا الى باكستان. الحل تقليل السكريات بشكل عام والاعتماد ع الخضار والدهون الصحيه واللحوم. وقتها البنكرياس بيتعدل بس يبيله وقت. ولما يتعدل يقل الانسولين. تقليل الانسولين معناها تقليل الهبوط الي كان يحدث بسبب الارتفاع سابقا والي الانسولين ياخذ السكريات هذي ويخزنها على شكل شحوم. المشكله الي تصير ان الشحوم ما تنحرق لان الشحص الي غذائه منتهي جسمه يعتمد على السكريات. وتتعب وتجيك الاعراض هذي لان ببساطه المخ جوعان للسكر. المخ ما يخزن السكر وهو يحتاج 25٪‏ من مجموع السكر بالجسم واذا نقص تجيك الاعراض. ولان الانسولين اصلا زايد عندك ف انزيم الكبد الي يكسر الشحوم ويحولها سكر متوقف عن العمل. ويبيله وقت يشتغل بطريقه تخفيف السكريات طبعا بشكل كبير وبمجرد الانسولين يخف، الكبد يصحصح ويبدا يكسر الشحوم.

السكريات الي اقصدها، هي الخبز والرز والمكرونه البطاطس والمعجنات هذي كلها سكريات تتكسر بسرعه ومصدر طاقه سريع وجسمك يقول انت فله وتعجبني والكبد يوقف الانزيم حق التكسير لان كل الي محتاجه انت الهضم بس والباقي ستخزن. عرفت ليش لو تركض الى باكستان ما بينزل وزنك. وهذي هي القضيه

ف وجب التقيد بالحكمه بالبدايه مو عند المصيبه.

وهذي على فكره طريقه خسارة الوزن الصحيحه

السالفه بالانسولين بس وطريقة الاكل الي هي سكريات بسيطه غير معقده والي موجوده بكل مكان ،، شاورما و بيتزا والبرجر .... الخ من السكريات البسيطه

أخي صاحب الموضوع ،
ممكن تخبرني كيف فحصت الجهاز الهضمي ؟!!
واترك عنك الناس الي تشخص بالاسئله وعلى طول يعطيك التشخيص ، سلامات