تبهذلت تعالوا واكسبوا فيني اجر ! نسال الله العافية لي ولكم
 

السلام عليكم

يعلم الله قد ايش تبهذلت لين لقيت واحد اعراضه مشابهة لاعراضي و قمت بالرد على موضوعه و يبدو انه مشغول


ما بطول بالمقدمات كلنا المرض اتعبنا

قبل 5 شهور كنت تمام و كل شي و انا شخص رياضي و امارس الرياضة يوميا
فجاة جاني شد بالرقبة و بعده بيومين شد بالراس " كانه شد بفروة الراس " و من خوفي
قمت اقرا بالنت ! وودتني لين حالة الورم بالدماغ و العياذ بالله ! و من بعدها انقلبت حياتي عقبا على عقب
و اعترف انه ممكن كان اكتئاب من قوة الخوف
الام بالعضلات و رعشات في الجسم زي النفضات
كل يوم مكان جديد لكن اكثر مكان هو الظهر و تحت الراس و تحن الرقبة !
و احيانا دوخة و عدم اتزان و هز بالراس و صوت الكهرباء بالراس الي هو ازيز !
تقلبات المعدة مرة امساك و مرة مافي امساك


رحت ل3 دكاترة عظام شافو x-ray و قالولي مافيك شي
سويت اشعة مقطعية ووريتهم قالولي مافيك شي
و سويت مقطعية للمخ و قالولي مافيك شي ،، ماصدقتهم وديتها لطبيب اخر و قلي مافيك شي
استغربت طيب الصداع و الدوخة و عدم الاتزان ؟
رحت ل4 انف و اذن وحنجرة و كلهم يقولولي مافيك شي
طالبتهم باختبارات السمع و الاتزان و الحمدلله سليم
قلت شكله شي ضاغط بالجمجمة او ورم ومو عارفين يشخصوه
رحت لعيون و سوا فحص للعين وضغطها و قلي مافيك شي و نظرك تحسن و غير نظارتك !
رحت باطنية و سويت فحص لكل شييييي ! الحمدلله سليم و نقص بفيتامين د ! و طبعا كل الدكاترة يقولولي دكتور نفسي لانه لو لاقدر الله ورم
كان ماحسيت و ان حسيت بالالام فهذا معناته اني بالمرحلة الاخيرة و التشخيص بيكون مافي اسهل منه

رحت لواحد نفسي كاني بسلك حق روحي يقلي معاك قلق و شد اعصاب كتبلي سيبراليكس

اخواني المشكلة

يجي الم بالظهر تختفي الدوخة و عدم الاتزان
تروح الام الجسم تجيني الدوخة و عدم الاتزان وبعد الالام بالاذن
وكلهم يقولولي سليم !! انا ما وصلت لمرحلة الهذيان
لكن عندي اعراض عضوية وربي
لو نفسية طز انا اعرف اطنش و امشي و اخرج

صوت الازيز يشتغل بنص اليوم
اول ما اصحى يكون مافي !

العضلات نفضات و الام اسفل الكتف غريب !

والله تعبت ياخوان ،، الله يشفيكم و يشفينا و يشفي مرضانا
والله الصحة نعمة مافي احلى منها والحمدلله على كل حال فكل بلاء هو اجر

العضو الي مشابهة اعراضه لي اسمه :
بين يوم وليلة
بساله هذه الاسئلة :
وش اكتشافاتك ؟ ايش حسيت الدواء المريح ؟ ايش الاسلوب المريح ؟
انا احس يوم انام زين و اصحى تخف كثييير و ترجع بنص اليوم
و ايش نوع الطنين حقك اخوي ؟ ازيز صح ؟
فضفضلي الله يرضالي عليك والله تعبت و ما صدقت لقيتك


انا ماني مريض نفسي وربي
عندي فوبيا من الطيران و كم شي بس مو لدرجة مرض نفسي !


بالنسبة للاخوان و الاخوات :

تعرفون احد مثلي او قد صارلكم مثلي ؟


اشكر وقتكم الثمين

والله يشفينا و يعافينا

طمنوني حبايبي والله تعبت

اللهم اليك اشكو ضعفي وقلة حيلتي

المرض النفسي له اعراض جسديه وحقيقيه ليست وهم

يعني الدوخه مثلا مو وهم هي حقيقه ومحسوسه وليست خيال من اختراعنا

لكن الالم هذا منشأه نفسي وليس عضوي

انت ما شاء الله عملت كل التحاليل العضويه وكانت سليمه والحمد لله

واذا ما رح تقتنع ان منشأ الامور ذي نفسيه رح تبقى بنفس الدوامه هذي

ان شاء الله يجي اخونا الي انت طلبته بالاسم ويرد عليك ويوجهك للعلاج المناسب سواء نفسي او شعبي اوعضوي او ليا كان العلاج

قدامك العافيه

الله يسعدك يامندوزا و يوفقك

يعني تنصحني ابدا بالسيبراليكس ؟

ما انصحك بدواء معين هذا فقط الطبيب الي يقدر

لكن اذا وصفه لك اخوي اي نعم خذه ف انت تحت اشراف طبيب ولا تخاف

شوف انا بديت علاجي وانا عند الطبيب النفسي وكنت فعلا بالم جسدي رجفه وعرق وضربات قلب وكتمه وضغط ع الصدر ودوخه وكلها اعراض مريت فيها وعملت التحاليل كلها واضافه لهذا تنومت يومين بالمستشفى وسونار ومناظير يا رجل ما بقى شي ما سويته

والان بعد علاجي النفسي مافي اعراض جسديه ابد خلاص وتجي اذا اشتد القلق بس

ف انت انتظر اخونا بين يوم وليله لانك تقول انه مثلك

واحتمال يفيدك اكثر مني اخوي

الله يجزاااك خييير

اذا كان عندك الم متنقل مجهول السبب فعليك بالرقيه لانها قد تكون عين

اسال الله لي ولك الشفاء العاجل

جزاكي الله الف خير يا ام سما

الواحد مهما فعل فهو مقصر بالدين ،، لكنني ولله الحمد من المحافظين على الاذكار بعد الصلاة الاولى " الفجر "

لكن باذن الله اكمل

الله يشفيك و يشفيني و يعافي مرضانا و مرضى المسلمين

قبل تبدا بالعلاج الدوائي جرب الحجامه على الراس والرقيه

باذن الله حبيبي


اسال الله ان يشفيك و يشفيني و يشفى مرضانا و مرضى المسلمين

اخوي خل اخر حل الادويه النفسيه

هل سويت فحوصات للمعده والقالون ؟!!

انا كنت لاوقفت ادوخ ولاجلست تمام واحس بجسمي كهرباء
وكان عندي التهاب بالمعده والحمدلله تشافيت

هلا اخوي كامري

ماشاء الله تبارك الله ،، اسال الله ان يديم عليك الصحة يارب

اخوي انا استبعد المعدة لنها مو معقول تطول باكثر من 5 شهور

غير كذا انا سويت فحوصات كاملة قبل 3 شهور
و سويت فحص قبل شهر شامل للوظيفة و شمل تحليل شامل بالمختبر مع اخذ العينات
اتوقع لو في شي كان ظهر

نسال الله ان يمتعنا بالصحة والعافية ياارب

شكرا على مشاعرك و مرورك

لاتستبعدها اذ ماعلجتها تجلس طول عمرك والالتهاب موجود
لازم علاج لها بس اول شي نعرف ان هل المعده سليمه او لا .
طيب بما انك سويت فحوصات هل الاوراق عندك ؟
وهل سويت فحوصات للفيتامينات ؟ وهل اخذو منك براز للفحص ؟

نعم اخوي

سويت كل الفحوصات

من فيتامينات و براز - وانتم بكرامة - و غدة و دم .. الخ و اجريت مقطعية للراس و الرقبة
والحمدلله سليم

النتائج نقص بفيتامين د و اتوقع كل السعوديين او الخليجيين عندهم نقص

حلو ..
اغلب سبب نقص الفيتامين هي جرثومه المعده
لازم تسوي لها فحص عن طريق البراز ، والفحص الي سويته حق البراز مايشمل الجرثومه
لازم تطلبه انت
واذا تمر بحاله نفسيه ف اجل الجرثومه سببت التهاب المعده
اول شي شوف الجرثومه فيه او لا

حاضر اخوي

باذن الله هل يومين اسويها

تسلم حبيبي

الله يسلمك ، بس حبيت اعرف بما انك مسوي فحوصات
هل طلع عندك ارتفاع في كريات الدم البيضاء؟ تحديدًا اللمفاويات
ياليت تفيدني ، وانتضر فحصك

وأسال الله رب العرش العظيم ان يشفي جميع مرضى المسلمين

هلا اخوي

للاسف الفجص بتاخر فيه شوي لاني بنتظر تفعيل تاميني من الشركة و ما ودي اسويه باي مستوصف ودي بمستشفى ممتازة

بخصوص الفحص حق الدم كانت نسبة الكريات البيضاء 11 الف
و الحمدلله الغدد و الترسيب تمام

حلو ،

اول شي سو فحص للجرثومه المعده عن طريق البراز واذا طلعت موجوده
سو منظار للمعده ، عندك مرتفعه شوي كريات الدم
واذا كانت اللمفاويات هذا يدل على بكتريا موجوده بالجسم وجالسه تحاربها
والبكتريا هذه هي الجرثومه والجرثومه تسبب التهاب بالمعده والقالون
واهم شي حميه غذائيه وابعد عن المنبهات فتره العلاج
وعلاج المعده اذا طلع عندك التهاب يبيله وقت وصبر
والله يشافيك

حبيبي ابشرك الامساك و الاسهال تخلصت منهم مع الدوجمانتيل سريعا
و انا للان انتظر شركتي عشان افحص
استبعد المعدة ام لا ؟
وما علاقة المعدة بصوت ازيز بالراس و الاذن اخوي؟

شكرا هلى طولت بالك

الله يسعدك و يوفقك لكن تعرف الواحد يحب يتكلم و يفضفض و يناقش

طيب عالج فيتامين دال لانه يسبب هذه الاعراض عند البعض واحسن علاج له هو التعرض للشمس بدون واقي

باخذ شراب فيتامين د

لكن صوت الازيز او الكهرباء بالاذن مقلقققق

للرفع ياغاليين

طيب مين مر بطنين او ازيز الاذن ؟ وايش وضعه؟
والله شي يقلق و يرعب

عليك بالحجامه في منتصف رأسك و4كيات نار بظهرك وأيضاً احجم ظهرك وتعال اخبرنى بانك بلغت العافية صديقي هاهنا

امين وياك

العلاقه بالزبط مادري والله

بس اول جاتني حاله مثل الكهرباء احس جسمي فيه كهرباء زياده وبس دايخ

وطلع عندي التهاب بالمعده

ما تشوف شر ي اخي الواد السلطاني

انا عندي نفس مشكلتك زي الازيز اسفل الرأس من الخلف واحس بالصوت ينزل ع الرقبة من الخلف
بعض الاحيان تشعر بالأزيز كأنه صوت ماء يصب من خلف رأسك
واتضح لي بعد الرقية بحمد الله ان سبب المشكلة مرض روحي .

اقولك شي انا نفس حالتك

الموضوع نفسي بحت

تعالج بالقران وحبه حبه راح تعرف ان اللي تمر فيه كله اوهام

والدواء لاباس به لكن انا استعملت العلاج فترة سنه تقريبا

جميل ويساعدك لكن لازم انت تقتنع انك ماعندك مشكله طبيه

هي نوبات هلع اللي تسبب لك الاعراض .. ونصيحه لاتفحص شي

ليش ؟؟ لان لو عندك مشكلة ورم راح توضح بكل التحاليل يا حبيبي

مو لازم تحليل دقيق ..

روح دكتور نفسي وارقي نفسك .. وارجع لي بعد شهر بشرني

وشكرا

وبالنسبه للازيز حق الاذن طبيعي .. عشان اعصابك مشدوده

ثق بالله ..

الله يسعدكم و يطمنكم ويريح قلوبكم و يشفيكم و يعافيكم يارب

تسلمون على مروركم الي اسال الله ان يجعله في ميزان حسناتكم

و الموضوع مفتوح للجميع ،، اتمنى رد كل من قد مر بهالحالة او يمر فيها

-

اخوي خالد
هل هناك الام بالكتف لديك او شي من هذا القبيل ؟
الدكتور كتبلي سيبراليكس و مرررة ما ودي اخش للادوية
الاعراض خفت كثيييير الحمدلله
بقي عندي :
دوخة و دوار
ازيز الاذن اليسرى تقريبا او ازيز الراس
الام متقطعة في الاكتاف

اهلين اخوي وآسف علئ التأخير مادخلت المنتدئ لي فترة

آنا فاهمك ومريت باللي تمر فيه بالظبط

آنا راح اكلم الادارة علشان نتواصل مع بعض

وابشر باللي يرضيك

الله اكبرر

يسعدك ربي اخوي و يوفقك

منتظرك من فترررة

خذ راحتك اخوي

الله لا يوريك مكروه و يحفظك

شوف حبيبي .. الله ماخلق داء الا له دواء
والنفس تمرض كما انا الجسم يمرض
ولكل مرض أعراض
....
وعشان أجاوبك .. نعم يجي الم بالكتف ويروح لرأسي
وينزل أسفل ظهري كل يوم او يومين له بمكان ..
غير كذا لما اخاف من شي اتلعثم وأحس أني ماني قادر ابلع ريقي
طبعا تحس انك انكتمت .. طبعا لا انكتمت ولا شي .. انت حي وطبيعي
لكن الروح تعبانه :) .. لو شاء الله امرضك ولو شاء عافاك ..
وربما ان مرضنا تخفيف من ذنوبنا .. ورحمة منه ..
...
بالنسبة للعلاج بيعطيك كل يوم نسبة 0،5 تحسن
وانا اكلمك وانا كنت اعمل ممرض بمصحة نفسيه واعرف الادويه
وعلى فكره السبرام وشلته سوى ثورة في عالم الدواء في التسيعنات
عمل شغل على قولتهم ،، الجميل في السبراليكس انه مافي أعراض جانبيه
لو تستخدمة عشرين سنه باْذن الله بالعكس يعالج اشياء ثانيه
يستخدمونه الناس لعلاج سرعة القذف وتعديل المزاج .. وفي ناس يقولون يزيد الوزن
هو ما يزيد الوزن .. هو لما تتحسن تنفتح نفسك وتقعد تاكل من النعمه
هنا يزيد وزنك .. طبعا خذه عن طريق طبيب نفسي ولاتسوي مثلي يوم تركته بدون استشاره
خليك مع الطبيب مثل ما يقول لك اعمل .. ولاتصدق الناس الجاهله
ويقولون لك ادمان .. ترى انا فكيته وما أدمنت ..

اخيراً ما تعانيه وهم خذ مني .. السبب الله اعلم فيه .. قد يكون عين قد يكون مشكله عصبيه
المهم احنا الحين نبي نعالج وضعنا

وسلامتك

وصلك الايميل اخوي

انا ارسلته للادارة

اخواني :

خالد السلمان

بين يوم وليلة

اسال الله ان يسعدك و يوفقكم و يمتعكم بالعافية و كل اعضاء نفساني و جميع المسلمين
اثريتم الموضوع بمروركم الكريم و افدتوني كثيرا جدا

ساعمل بنصائحك اخي خالد

و اخي بين يوم وليلة
تمت مراسلتك

شكرا جزيلا لكم
وننتظر مروركم و مرور بقية الاخوة

مع الرقية اخوي .. لأتهمل اذا حسّيت بتحسن ..

اليوم باذن الله انام على الرقية و اتركها شغالة
امس قرات و سمعت الرقية المبسطة ( 14 دقيقة فقط )

لله الحمد والفضل صحيح ان الشخص مهما فعل فهو مقصر لدينه الا انني محافظ على اذكار الصباح و المساء دائما مع صلواتي
لكن القرآن مهما كان هو مريح و مهدئ للنفس بغض النظر عن انه كان عين او تعب روحي

--

و بحاول اخلي الموضوع هذا مثل يومياتي :

الان لي يومين احاول اطنش و اتجاهل الاعراض وبحكم اني مسافر للعمل فما اترك مجال لنفسي للخوف على الرغم من حرصي الشديد على المرور
هنا والبحث عن الاعراض فهذا معناه انه لازال هناك خوف في العقل الباطني لكني باذن الله ما بترك لنفسي مجال و طول الوقت اطلع و اشغل نفسي بالدوام وباذن الله احاول ترويض خوفي ،، اليوم خف كثيييير الازيز معي الحمدلله

وساواصل العلاج القرآني ( للراحة و الطمانينة ) و النفسي و الاسترخائي


نسال الله لنا و لكم السلامة و الشفاء


-

اخوي خالد اشكرك جزيييل الشكر على اهتمامك و تواصلك

واتمنى تفضفضلنا باللي قالقك لعل وعسى نقدر نفيدك

الله لايوريك مكروه

اخي حاول قراءة سورة البقره لو مجزئه يعني خلال اليوم كل مافضيت اقرى كم صفحه وانصحك برقية نفسك بالفاتحه مع النفث والمسح على جسمك لي كم يوم اطبق هالشي والحمدلله احس براحه رغم اني قبل يومين كنت منهاره تماما

انا قصتي مشابهه لقصتك .. لاحقا بكتبها لك ان شاء الله ..
لي ملاحظه بسيطه .. الأفكار والتفكير بسلبيه ماتقدر تمنعه لانه غصب عنك
واللي ما مر بهالحاله ما راح يستوعب حجم المعاناه .. لا التفكير السلبي موجود
ونعلم انه كلام فاضي ويسبب لنا هالقلق والخوف الشديد .. فقط يجب ان نعلم اننا نعاني من مشكله نفسيه وما يحتاج اروح لطبيب يشوف قلبي وإلا راسي وإلا كتفي الموضوع كذا يكون اكثر صدقا مع نفسك ..

كم لك بديت بالعلاج وايش حجم الجرعه

باذن الله ام سما ،، الله يجزاكي خير و يعافيكي

-

اخوي خالد ابدا ما بديت بالعلاج الدوائي باستثناء الدوجماتيل اخذ حبة مساءا و استمريت 3 ايام ووقفت

اليوم الثالث او الرابع

الحمدلله الخوف قل بشكل كبييييير الحمدلله اولا و اخيرا
الازيز خف كثيرا جدا و يروح و يجي بشكل قليييل جدا
اللهم لك الحمد

الاهم هو التطنيش

و بالنسبة للاخوة المشابهين لحالاتنا :

انصحكم بمنقاشة الاعضاء ؛ بين يوم وليلة و خالد السلمان

ماشاء الله عليهم كلامهم مقنع و مريح و يعطونك مربط لبداية السيطرة هلى نفسك

ما اعرف اي يوم وصلت

لكن لله الحمد و الفضل و المنه ،، افضل بكثييييييييير الحمدلله ماشاء الله
الحمدلله سبحانه و كل الشكر للاخ بين يوم وليلة الي كان السبب بعد الله في تقوية همتي