لا تسوون مثل ما سويت وتروحون فيها،إياكم اياكم اياكم
 

السلام عليكم
يا اخوان لا تقعوا في الخطأ الذي وقعت فيه وكلفني 12 سنه خلف القضبان.اني لكم ناصح ومشفق،إياكم اياكم اياكم أن تهملوا أنفسكم وتتركوها هكذا بدون رقيه أو علاج نفسي اياكم اياكم اياكم. انا كنت تعبان بالمره على الحديده وبيني وبين الجنون شعره،رحت لشيخ ورقاني وصرعت عنده ورحت لثاني ونفس الحكايه،داومت على الرقيه وتعبت أكثر وبعدها كانت الكارثه، الطامه الكبرى،اني تركت نفسي لا رقيه ولا علاج نفسي،نعم انا كنت ادري واحس اني بحاجه للعلاج ولكن اليأس اللي تمكن مني والقنوط من نتيجة الأدوية النفسيه تمكن مني مع الاسف بحجة أن اللي في مس وقد يكون بسبب سحر أو عين وأنه للعلاج النفسي ولا غيره بيعالجني،ومع الأسف والله مع الاسف أهملت نفسي 12 سنه حتى وقعت في مصيبة السجن 12 سنه ثانيه، يعني 24 سنه راحت كذا كلمح البصر،ولكن للأمانه بعد ما دخلت السجن ومن ورا خشمي طلبت الطب النفسي وبديت اتعالج وكان أول علاج هو التربتزول ومع الوقت بديت انام

استمريت على التربتزول سنوات وبعدين دخل البروزاك وغيره من الأدوية،بصراحه وانا مسؤول عن كلامي أمام الله عز وجل أنني بديت اتحسن نفسيا وراح تعب كثير ولله الحمد، ولو أن التحسن ما يستمر بعض الأحيان ولكن ارحم مليار مره من الوضع اللي كنت فيه قبل الأدوية،وحتى بعد خروجي من السجن انا مستمر على الأدوية وراح استمر حتى القا الله رب العالمين،لن أكرر الخطأ مره ثانيه بإذن الله،اعتبروا مني يا ناس،لا تهملوا أنفسكم،ترى العلاج النفسي يخفف من آثار السحر أو العين وحتى المس على المصاب،هذي خذوها مني،لاني بعد العلاج خفت أشياء كثيره.والله يا اخوان أن المرض النفسي كان هو السبب في دخولي السجن،هو السبب،والمصيبه الثانيه وهي ايضا طامه ارتكبتها بحق نفسي انه بما اني تعبان وبحكم المريض النفسي كان المفترض اني أقل شي اسويه حتى لو ما بغيت العلاج طز في العلاج بس أقل شيء طلعت تقرير طبي يثبت مرضي حماية لي في المستقبل لو وقعت في مشكله،مع الاسف لا تعالجت ولا طلعت تقرير. بعد ما دخلت السجن قلت للقاضي انا رجال تعبان فاقد للعقل وكذلك قلت لإدارة السجن فقالوا هات ما يثبت وكذلك قالوا لأهلي هاتوا ما يثبت.شفتم كيف الكارثه. لا حول ولا قوة الا بالله

يا اخوان خذوها مني،إن قالوا فيك ملك العفاريت أو نص الكره الارضيه عطوك عين حسدوك،أو أن اللي فيك سحر، لا تلتفت لهم واسحب عليهم ورح للطب النفسي،لا تروح ضحيه مثلي،انا شخصت حالتي من الرقاه بسحر مع مس،والحمدلله الجني اللي معاي نايم اربع وعشرين ساعه هههههههه والأدوية اللي اخذتها هجدته تهجيد ههههههه،وحتى السحر المعمول لي هجد بعد الأدوية ولله الحمد والمنة.صحيح بعض الأحيان اتعب بس مو على طول زي اول، اول كنت تعبان على مدار الساعة، أما الحين لا ولله الحمد.لذا يا اخوان اياكم واليأس.
يا اخوان انا لاحظت بعد العلاج أشياء غريبه على نفسي. مثلا
(في مره من المرات تعبت في السجن وجاني صرع واخذوني لطبيب صرع وعمل على اشعه على المخ فقال لي عندك زياده في كهرباء المخ واعطاني علاج الصرع ايبنتوين واستخدمته. بصراحه كان تأثيره عجيب على. لأني قبل استخدامه كنت اي مشكله أقع فيها انهار ما اتحمل نفسي وبعد اخذ ايبنتوين صرت أقوى على التحمل النفسي،انا استنتجت أن ملعون الوالدين اللي معي شغلته كهرباء المخ ماسكها ابن الكلب اربع وعشرين ساعه، بس بعد ايبنتوين الحمدلله تحسنت.

يا اخوان لا تنسون التقارير الطبيه،اللي فيكم تعبان وله سنوات يطلع تقرير بحالته النفسيه،أقل شيء يحمي نفسه لا قدر الله لو حصل شيء في المستقبل. انتبهوا لهذي النقطه،تراها مهمه جدا خاصه للمرضى،وإن كان المريض ما يقدر فكلموا أهله انهم يطلعون له تقرير. وبإذن الله لن يحصل إلا الخير ولكن الاحتياط واجب.
فيه أمر آخر مهم ساعدني في التحسن ولله الحمد، وهو اني شلت من راسي شى اسمه سحر عين أو مس، شلتها بالمره وصار شغلي الشاغل العلاج.وعلى فكره ترى إن كان اللي فيك عين أو جن أو سحر ترى كلهم يتسابقون للمخ علشان يسيطرون عليه، فأنت إن كان فيك اكتئاب ابحث عن الأدوية اللي ترفع السيروتونين، يعني لا تسلم لا لجن ولا لعين ولا غيره. كل الامراض النفسيه منشأها المخ (الجهاز العصبي المركزي)
فلا تستسلم، والله يا اخوان اني يوم كنت أخوض في سوالف السحر والعين والجن كنت تعبان مره ولكن لما بدأت بالعلاج وشلت من راسي السوالف هذي حسيت بنتيجة العلاج ولله الحمد.
وفق الله الجميع.

جزاك الله خير

خارج من الشر و الغبينه و الله يجيب العواقب سليمه

ما حنا مسوين مثلك و شكرا لك ع النصيحه :)

التقرير مهم لتقييم الحاله بس الدكتور فضحني فيه وش أسوي بعمره ودي أقصبه يعني تقرير فيه الفضيحه وين أولّي وجهي عن العالم الله المستعان و هو خير المعين

أشكرك جدا :)

بس ترى و الله قويه 24 سنة سجن يا شيخ لو انك ذابح لك واحد

ما عليه مزحة يا صاحب تجربة ودي أصدق بس قويه قويه :)الله يسعدك دايم الدوم

شكرا جزيلا على النصيحة الذهبية
هناك لبس على الناس في التفريق بين الامراض الروحية و العقلية
وبعض الرقاة او معضمهم يستغلون في المرضى عن قصد او لجهلهم الانسان يرقي نفسه بنفسه اذا لم يرى نتيجة يذهب مباشرة للطبيب
سيعوضك الله على ما فاتك لا تحزن اخي

السلام عليكم
اخي الكريم انا مكثت في السجن 12 سنه فقط. أما التقرير لازم لازم تطلعه، ضروري مره، انا الحين مطلع تقرير من مستشفى النفسيه وحافظه عندي.

الله يفك العوق و يفرج الهم :)

لاتحزن .. اخي الرسوم المتحركه كيف اقدر اتواصل معك ..

هلا بك يا رجل و الله مالي في التواصل حتى مع أقرب الأقربين إسمح لي

سوف أرسلك الفيس بوك عن طريق الإدارة

تويتر او انستقرام لان ماعندي حساب فيس بوك

للأسف عندي فيس بوك أفتح لك جي ميل و إبشر بالسعد

فك الله عوق الجميع.
من تجربتي لا أحد يقلل من قيمة الطب النفسي. أنا أعرف ناس من قرابتي والله تعبانين وحاولت فيهم أكثر من مرة يروحو للطب النفسي ولكن ما فيه فايده. خاصة أن واحد منهم يعرف ولكن رافض. ناس غريبه

بعض الناس و الله ما تدري انهم مرضى صادق في هذا يا صاحبي

يحسب انه هو الصح و غيره هو الغلط و هم لما تآخذ معهم كذا جلسة تتقرف من معاملتهم تقول مرضى و هم صدق مرضى لكن الله عماهم ع العلاج و لو تطري أي مشكلة عندهم عابوه و قالوا يالنفسيه إما صراحة و الا بالهمز و اللممز

مساكين و الله

أخي اقسم بالله العظيم الذي أنزل الكتاب بالحق أن العلاج النفسي كان فتحا بالنسبه لي، وكل يوم اندب حظي ليش ما طرقت باب العلاج النفسي منذ البداية، ليش أهملت نفسي، يا اخي وربي فيه كثير من المشاكل والمصائب كان من الممكن اتجاوزها أو حتى من الأساس ما أقع فيها لو اني تعالجت من البدايه، ولكن الحمد لله وقدر الله وما شاء فعل، لكن نصيحه لله لا تهملوا أنفسكم. دعني اذكر لك مثال :
قبل دخولي في السجن كنت اصلا داخل بمشاكل مع زملائي في العمل، ولا اطلع من مشكله حتى ادخل في أخرى، وفي الاخير زملائي اشتكوا على ونقلوني إلى مكان أسوأ من اللي كنت فيه،ولما أخذت العلاج ورجعت لي نفسي عرفت أن اصلا اللي صار بيني وبين زملائي ما يوصل حتى لاسم مشاكل واني انا اللي كبرت الموضوع وأن المشكله في انا، وهذا غير مشاكلي في البيت ومع الجيران يعني حاله مزريه كئيبه.
بس انتبهوا تكفون ترى بيجيكم من يقول ترى انت ممسوس أو معيون أو مسحور، قولو لهم طيب وبعدين، عرفت أن في كذا وكذا وبعدين، وبعدها اسحب عليهم وتعالج بالطب النفسي ولا ترد عليهم، ترى فكرة الاصابه بالأمراض الروحية سيطرت على سنوات وهي السبب في كل اللي حصل لي. حتى سهل الله لي العلاج النفسي وتخلصت منها، وحتى لو كان في مس أو سحر أو عين ما راح اقعد زي ما قعدت اول وانتظر متى الجني يطلع طلعت روحه أو القى السحر أو اللي أصابني بالعين، لا ما راح اسلم لهم، راح اتعالج واستعن بالله واسحب على كل المعوقات.

دخولي السجن كان سبب في اخذي للعلاج ولو ما دخلته كان الحين هايم على وجهي في الشوارع، لاني بصراحه قبل دخولي كانت حالتي مره مزريه، كنت اقول لو ما لقيت اللي أصابني بالعين أو السحر أو طلعت المس اني خلاص باقعد تعبان حتى الموت، ولكن بعد العلاج اتضح لي أن فكرتي هذي غلط بغلط من جد، كنت ما انام وصرت انام كنت زي الاهبل قرارت ارتجاليه متهوره والحين اوزن كل شيء بوزنه، الحمدلله، والله يا اخوان مريت بمآسي بسبب المرض النفسي، ونادم إلى هاللحظه ليش ما أخذت العلاج من البدايه. نعم بعض الأحيان اتعب نعم اتعب ولكن أقل شيء اتعب وعقلي معي مو زي اول، ومن شدة فرحي بالعلاج تمنيت ناس كثير اعرفهم ياخذونه لكن رافضين مع الأسف. واحد اعرفه مسحور وتعبان إلى هذه اللحظة وحاولت فيه ولا نفع.يقول الدواء النفسي يدمر المخ هههههههه يعني انت باقي عندك مخ تخاف عليه هههههههه والله من جد. واحد تعبان مره رايح فيها وش باقي تخاف عليه.
صدقوني يا اخوان اني اصرح باخذي للعلاج عند القاصي والداني ولا على من أحد، لأن اللي اسويه هو الصح واللي يسوونه الناس غلط. بيقولو مجنون يقولو طز فيهم، انا ما سألت عنهم وانا تعبان باسالهم عنهم وانا احسن من اول هههههه.

الله يطمن قلبك أخوي إي و الله و طزين على ما قال صدام الله يرحمه

اللهم أفتح لنا أبوابا نراها قد غلقت و لا رجا و لا ملجا إلا منك و إليك

اشكرك صاحب تجربة مواضيعك حلوة الله يحلي ايامك الباقيه و الجاية و المقبلة عليك ... اشكرك جدا بس حاول يا أخي الغالي تتفنن بكتابة الموضوع لان صراحة البعض لا يقدر أن يكمل ثلاث اسطر و أنا منهم فاعذروني جميع ودي بالموضوع يكون فرش طازه فيه التفنن بالمفردات و الجمل و مختصر و لا مانع من الإطناب غير الممل و لا بالإيجاز غير المخل :)