|
دموع على خد العيد من مذكرات "رهابي"
السلام عليكم ورحمة الله وبركاته
وكل عام وانتم بخير اليوم اول يوم من ايام عيد الفطر و الذي يسمونه "سعيد" وبالنسة لي انا هو حرفياً جحيم مستطير وجهنم على ارض الحياة الدنيا اكتب كلماتي هذه وانا اقبع وحيدا في احد زوايا البيت وحيداً حزيناً منكسراً لا صديق يواسي ولا قريب يخفف عني مصابي بعد ان ذهب الجميع للقيام بواجباتهم في جو من البهجة والسعادة …من زاويتي المظلمة كنت استرق النظر اليهم وهم يلبسون اجمل ما لديهم من ثياب وزحاجات العطر تدور بينهم استعداداً للقاء الاهل والاحباب اما انا فابدوا في حالة شرود عن الواقع استمع لدقات قلبي باهتمام وكأن قلبي ساعة منبه ستوقضني مما انا فيه …. … حقيقة اشعر اني خارج الزمان والمكان لا تعنيني عقارب ساعاتهم ولا الهواء الذي يتنفسونه بل ان وجودي كعدمه … نعم انا مجرد شبح تمر عليه الثواني والدقائق كالشهور وسنين …. بالتأكيد لا اعلم مالذي ينتظرني بعد نهاية معاناتي وفناء كل شئ وجفاف عروفي وتساقط اخر اوراق عمري لكن اشعر بأنها حتماً ستكون افضل من كل هذا العذاب ((اللهم أحيني ما كانت الحياة خيرا لي، وتوفني إذا كانت الوفاة خيرا لي)) |
بريستيك 50 مل صدقني تنسى الرهاب بأذن الله أستشير طبيبك عنه
|
ماهو انت لحالك ياخوي وحيد الحمدلله على كل شي غيرنا بمستشفيات النقاهه مفتح عيونه بس ولايدري له ١٠ و٢٠ سنه وربما يحس بالالم ولايقدر يتكلم يتعب جسده من وضعيه مايقدر يقول حىكوني يااااارب لك الحمد والله اننا في نعمه عند هؤلاء بل انهم يتمنون رهابنا ويتمنون قلقنا على الاقل فيه امل لكن هم وش يقولهم الطبيب مافي امل للأسف .. الا بقدر الله والله القادر حنا تزين يوم وتشين يومين ومره تزين يومين وتشين يوم لكن غيرنا تعبان على مدار اليوم والشهور والسنين ..
واذا صار رهاب اها وش صار انطبقت السماء على الارض الحمدلله لايكلف الله نفسا الا وسعها خلني ماروح اعيد مع الناس الحمدللهمادام اني اكل بيدي واقضي حاجتي بيدي ماحد يكشف عورتي ولاحد يتضايق من خدمتي الحمدلله اولا واخر والله ياخوي وحيد ان لي ٢٠ سنه كل صباح عيد بالبيت لحالي ودي اطلع مع الناس ودي اعيد معهم لكن ودي احضر اجتماعات العايله احس بتأنيب الضمير لكن الحمدلله لاذكرت ان هذي اعظم مصايبي اقول الحمدلله خلهم يقولون وينه ليه مايجي خلني ارتبك قدامهم وبعدين؟ دنياك هذي ماتجي لك على الكيف مافيه شخصٍ بالخلايق صفت له والله ياخوي ان لي ٣ سنوات الان ماطلع لاحد ولا اجي منعزل تماما عن الناء ولو رحت لاحد ابي اطلع بسرعه رهاب توتر تلعثم احراج الخ طيب وبعدين الحمدلله مازلت اكرر دامني آكل بيدي فأنا بنعمه دامني اتحرك واقوم واقعد هذي نعمه تبي شكر تصدق اني قايم من النوم وشعوى الخوف لاعب فيني وقلق مستمر وبس اتحرك وشوي يروح وشوي يجي ولكن نقول اللهم لك الحمد ولك الشكر مازلنا في نعمه .. لو يجيك انفلونزا او رهاب شديد وقلق شديد قلت لو ارجع لوضعي الحالي راضي راضي .. عموما ان شاءالله اننا على اجر وسع صدرك والكمال لله تعالى والرهاب ماهو مرض مزمن ماهو سرطان ولاهو شلل اعرف كثير قصوا علينا قصصهم والان يعتلون المنابر خطباء ومقدمين .. |
السلام عليكم ورحمة الله وبركاته
حياك الله اخونا و كل عام انتم بخير كأنك تتكلم عنا انا و امي و اخوي مريض الفصام محجورين من أكثر من عشر سنين تدري الوحيد اللي شغال جوالي ،. بينما جوال امي و اخوي كل ست شهور يرسلون شركة الاتصالات يهددون برسالة اشحنوا الجوال لان له ست شهور ما انشحن و الا بينفصل .. جوالاتهم فقط زينة عشان منصة ابشر و انا جوالي شغال عشان تسديد الفواتير و رسوم الإيجار و التعامل مع مناديب التوصيل و عمال الصيانة جرس بيتنا ما يدق الا عشان مندوب يوصل غرض او عامل عنده صيانة كله بسبب الرهاب امي عشان حالتها الصحية بصعوبة تمشي و اخوي عشان الفصام من أعراضه الرهاب و انا كذلك اعاني من الرهاب فوق عشر سنين ما أطب عتبة الباب الا عشان مستشفى او مراجعة دائرة و فوق ذا اقعد ااجل في المواعيد و مع ذلك كنت متعايشة مع الرهاب مدة عشر سنوات و أكثر ،. لدرجة يقولون الأخوان هنا كيف متحملة تناولي علاج ، قلت لا ، لأن العلاج ينومني مدة عشرين ساعة و يزود وزني لين داهمني الوسواس في ثاني يوم من شهر رمضان العام الماضي ، يعني من سنة و أكثر ، لذلك اجبرت إجبار على العلاج و ليته فاد و الحمدلله على كل حال خوف و قلق و انعدام نوم و فوقها وسواس و من تالي كرب و كآبة و الحمدلله على كل حال ما تدري يمكن ربي ابتلاك ابتلاء اهون من غيره يشهد الله ما اقلل من احساسك لكن احاول اصبرك لان هذا واجبنا تجاه بعضنا كأخوان و يارب يارب يارب من غفا و هو مكسور الأحلام يصحى على فرحة تجدد حياته |
أدري بتقول انت حرمة و انا رب بيت و مسؤول
تدري هذي الحرمة هي ربة و رب البيت بنفس الوقت اقوم بكل مهام الام و الاب من طبخ و تنظيف و عناية و متابعة فواتير و مقاضي و صيانة و مستشفيات و دوائر و سداد إيجار امي و اخوي كأنهم حرفيا طفلين كأني ارملة بطفلين اوقات من شدة الإرهاق اتمنى احد يروح يطفي النار عن الأكل او يحمل عني كيس النفايات لا يوجد لان اخوي مريض الفصام ينام اوقات كثيرة مدة يومين متواصلة و أكثر ، انا اللي أسقط علاجه في فمه بعد ما اشربه الحليب او العصير بالمصاص عشان الأدوية ما تسبب له قرحة بالمعدة وش نسوي لازم نصبر و نحارب طالما ما زال فينا نفس مو بكيفنا ، ورانا التزامات و مسؤوليات ربي يعيننا عليها يارب العالمين |
اقتباس:
انا يوم كان عندي رهاب اقول الحمدلله اقدر على الاقل استمتع بكاسة الشاي طالما اني ما اخرج ، لأن رهابي مرتبط بالخروج طالما ادري ان مافي خروج اقدر اتعايش مع مهامي و حياتي ، ما كنت اقصر بشي مع نفسي و أهلي و أولادي القطط ،. انا عندي قطين عميان و قطة مشلولة يحتاجون عناية خاصة بالذات المشلولة اغير لها مسكينة و الا التسلخات تذبحها و غير بعض القطط الثانيين اللي صادفتهم في طريقي مواليد رضع بدون امهات و ارضعتهم و كبروا و صعب اردهم الشارع كل المسؤوليات أعلاه مع مسؤولية أولادي القطط غير القطط اللي يجون كل عصر مدخل بيتنا من الخارج و اضع لهم الحبوب الجافة و الماء و إذا لقيت فيهم المريض اعالجه فترة عندي لين يطيب ثم افكه يسرح في الشارع و الحمدلله ما كنت حاسة اني اعاني لين داهمني الوسواس و العياذ بالله اختلفت ماني انا كأن الله شالني و حط بدالي و الحمدلله على كل حال قصرت للأسف في عبادتي قصرت مع اهلي و الضعوف و الله المستعان لدرجة أولادي القطط يتلوني مع شوشتي و انا نايمة او يبركون على وجهي يصايحون عشان اقوم احط لهم الطعام ، كذلك حقين الشارع يضطرون ينقزون من فوق الجدار من طول الانتظار . وش يسوون ضعوف جوعانين على الاقل امي و اخوي احط عندهم شابورة و بالثلاجة الزبادي ما ينقطع عشان لو جاعوا لين اقوم و اطبخ لهم |
اقتباس:
جزاك الله خير اخوي بخصوص يوم تقول الحمد لله ما حنا مشلولين فعلا اخوي حبيبي مات بعز شبابه ما كمل ٣٢ بعد شلل دام سنتين شلل مفاجئ ما فيه الا العافية و هو الوحيد اللي اجتماعي و يحب الناس و الخروج ، هو الوحيد اللي يجبرني اطلع ، كان مسوي حس بالبيت و حياتي و الان البيت تقل مافيه احد لولا مضاربات القطط أسأل الله الكريم أن يرحمه و يجعله من أصحاب الفردوس الأعلى من الجنة و جميع المسلمين اللهم امين يارب العالمين |
كمان فيه شي حابة اضيفه
الحين اقوم من النوم عويناتي طايرة تلاقط من الخوف ، كأني كنت في عالم و طحت في عالم ثاني ، لدرجة ودي ارجع للنوم حتى الخوف يروح العام قبل رمضان ما كنت كذا كنت اصحى عادي اشوف في المفكرة ايش المهام اللي مجدولتها و لازم اقوم فيها حتى العبادات ، حتى حياكة الكروشيه اللي احبها الحين بس ودي اتغنم السلامة و أشعر بقليل من الاطمئنان و شي من التركيز كل شي مؤجل ، كل شي مكركب ، فوضى شملت حياتي كلها .. اول كنت طالما اني في البيت و ما اخرج فأنا بخير الحين انعدم الأمن في الداخل و الخارج و الله المستعان ، الوسواس و الخوف أكل قلبي و عقلي و الحمدلله على كل حال لذلك الواحد يرضى حتى ربي ينعمه و يرضيه و يطالع للناس الاقل منه في الصحة و في الأرزاق .. الفضفضة هذي تصبرنا كلنا .. لان المصائب تجمع المصابين و كلنا نحتاج ذاك صاحب المروءة اللي ينسيك او يسليك او يتوجع .. على الاقل نفضفض هنا و نعين بعضنا .. اخوي الغالي ما له صديق ابد ، ما يشيل في يده جوال ، مجرد ايباد بدون شريحة يتصفح فيه يارب يعيننا جميعا و يؤجرنا و يعافينا و يطمنا على أنفسنا و احبابنا اللهم امين يارب العالمين |
اقتباس:
|
اقتباس:
من تجاربي الطويلة في مجال الدواء ناسبني اكثر سبراليكس لكن انا حاليا متوقف عن الدواء من سنة ومحتار ارجع لع او اشوف علاج اخر وشكرا على الرد والمواساة |
اقتباس:
ولو يعلم الاعضاء وقع الكلمات الطيبة على قلوبنا والله ما انقطعوا ولا هجروا المنتدى لكن الكل له عذره تعقيبي على كلامك للاسف الانسان ما يستطيع يقارن نفسه بالاشخاص اللي تتكلم عنهم رغم اننا كلنا معرضين لمصيرهم لكن في احساس كامن ومبني على الدليل والعلم ان مثل هاؤلاء حالات نادرة وخطاء الانسان يقارن نفسه فيهم ليشعر انه بخير الا من باب الحمد والشكر لله والعضة والعبرة فقط ومثل ماهو خطاء تقارن نفسك باشخاص لا يشكلون 1٪ من المجتمع كذلك خطاء تقارن نفسك بنماذج من المحضوضين في الدنيا واللي ما يعرفون معنى التعب او العمل وحيزت لهم الدنيا بملذاتها ،// احنا يا عزيزي نقارن نفسنا بالسواد الاعظم من اهلنا واقاربنا وجماعتنا والى اخره من الناس الطبيعيين بالنهاية اتمنى يا اخ متزوج لو اقدر اكلمك على اي برنامج تواصل مثل السناب او غيره ودي اخذ واعطي واشكي واستمع لواحد مثل حالتي |
اقتباس:
لكن اغبطك على قوتك و صبرك على كل هذه المعاناة وانصحك بالعلاج الدوائي نعم الدواء ثم الدواء ثم الدواء وخوفك منه صدقيني نابع من وسواسك لكن الموضوع يحتاج لحزم والحياة بنعيشها مرة واحدة فقط فاغتنمي الفرصة واذا ما ناسبك العلاج او انك تنامين بسببه غيريه مع الطبيب لعلاج ثاني واذا ما استفدتي غيري الطبيب بكبره لكن لا تستسلمين لهذا الوضع اللي تعتبريه استقرار وهو عذاب في عذاب الان قفلي الجوال وروحي للطبيب او استخدمي تطبيق مثل لبيه او غيره وانتي في البيت والوصفة تجيك على الجوال وشكرا |
اقتباس:
|
بالنسبه لقولك ان هؤلاء محظوظين ولايمكن تقارن نفسك بهم انا اقولك ان هؤلاء ماشاءالله عليهم ماجسلوا مكتفين يديهم ويشتكون هؤلاء الله يعطينا عزيمتهم جاهدوا وتعبوا لين تشافوا المريض الروحي فيهم تعب وشق على نفسه بالرقية الى ان شفي والي عنده رهاب داحم المجالس وصار بالصف الاول وتدرب ويوم عن يوم في تحسن الى ان صار من ال١% الي تقول السواد الاعظم ياخوي هو انا وانت وغيرنا الي للأسف الي معتمدين على الادوية الي انكهت اجسادنا واتعبتنا صدقني الادوية النفسيه علما ان تعالج الرهاب لكن لو قللت منها او تركتها ممكن يهجم عليك رهاب ماقد شفته في حياتك تخاف تتكلم مع عامل بقالتكم وانت اصلا اخذت الدواء لانك ماتقدر تدخل في حفل زواج ..!!!! يعني تقول ان وضعك الاول اهون بكثير من الان ..
|
اقتباس:
السلام عليكم ورحمة الله وبركاته حياك الله اخونا وحيد و مين طلب منك اصلا تقارن نفسك بغيرك حتى لو من السواد الاعظم ترى حنا فقط مأمورين اننا نطالع من هم أعلى منا في أمور الدين حتى نتحمس و نجتهد في الطاعة و نصير زيهم ، و نطالع اللي اقل منا في أمور الدنيا حتى نحمد الله على ما أعطانا و أمور الدنيا تشمل العافية و الصحة و الرزق و المال و الوظيفة و الذرية ليش نطالع للي مثلنا و نتحسر على حالنا و ما راح يفيد التحسر الا المرض و العذاب اللي يمشي مطلوب منه يطالع للمشلول اللي بيته ملك يطالع للي بيته إيجار و بصعوبة يسدد و هكذا حتى يمتلئ قلبه قناعة و رضا و يحمد الله حتى يزيده الله من فضله أسأل الله الكريم لنا وياكم العفو والعافية في الدنيا والآخرة و لجميع المسلمين اللهم امين يارب العالمين |
السلام عليكم ورحمة الله وبركاته
فيه نقطة حابة اضيفها كذلك ليش لازم نطالع للي أقل منا في أمر الدنيا لان الصحة و الرزق غير مضمونة ، بحيث لو ربي كتب على عبده ان يفقد أحدهما أو كلاهما ما ينفجع او ينجن أو يفقد دينه و ثقته بربه لا قدر الله ثم ينحرف .. يصير مهيأ في هذه الحياة و متدرب ان كل ما يعطيه ربي اياه وديعة ممكن يستردها في اي لحظة حتى عياله اللي من صلبه و من صميم لحمه و عروق دمه ، حتى ماله الذي تقطعت كبده في جمعه . و ليش نطالع للي أعلى منا في الدين ، مثل ما قلت عشان نقلع عن بعض الخطايا المدمرة اللي لو مات العبد عليها فجأة ما راح ينجو في الآخرة ، لأن الموت يأتي بغتة بدون ما يكون العبد مهيأ له ، و كل ما طالع كذلك في اللي احسن منه في العبادة يبي يتحمس و يجتهد و يسعى للمنافسة للفوز برضا ربه فينجو في الدنيا و الآخرة وش انت حي له ؟ وش انت حي له اذا ما كان هدفك في هذي الحياة الا ان ترضى ربك بتفكيرك و قلبك و جوارحك ليش حنا عايشين قاعدين نتنفس .. ؟ ليش خلقنا اصلا ..؟ الا من أجل عبادته و طاعته و رضاه و حمده على الضراء و شكره في السراء اخوي الشاب الجميل المتعافي رحمه الله فقد صحته في لحظة ، و فقد حياته في لحظة أخرى كذلك هل كان يضمن انه ما راح يفقد أحدهما أو كلاهما فجأة ؟ حط تحت ( فجأة ) الف خط .. ذاك الصباح ما كان فيه شي ، في كامل نشاطه و قوته ، كان أكثر صحة منا كلنا انا و امي و أخوي مريض الفصام ، استعين بوه بكل شغلة تلزم قوة و جهد ، ذاك الصباح راح يرمي النفايات و انت بكرامة و هو راجع طاح من طوله على الأسفلت ثم قام عادي ما فيه شي و انسدح على سريره ، و يوم اذن الظهر اصحيه للصلاة ما قدر يوقف على حيله ، انا انفجعت غير مصدقه فكرته يمزح ، طلع فعلا عاجز عن الوقوف تماما ، لين جاء الإسعاف شاله و تنوم شهور و هم ما خلوا تحليل و لا إشاعة حتى خزعة أخذوا منه من العضلات و الأنسجة يبون يشوفون وش السبب اللي ما خلاه يقف ما عرفوا ما ينقلب حتى لا على يمينه و لا يساره ، فقط يحرك يديه و رقبته ، و كل الجزء السفلي ما يشعر فيه جلس سنتين كاملة على ذا الحال ما تغيرت حالته شعرة ثم يوم جاء يموت مات فجأة ( فجأة ) كنت عنده ذاك الصباح صباح الجمعة ، حضرت له الفطور رفض يفطر ، و قعدنا نتكلم سوا عادي لين تركته يغفو لين قبل صلاة الجمعة ، نام ما عاد قام مات على سريره رحمه الله في عز شبابه هل كان يضمن صحته ...؟ هل كان يضمن حياته و انه ما راح يموت ذاك اليوم بالتحديد ؟ رحمه الله و رحم جميع موتى المسلمين يوم مات والدي رحمه الله ما تأثرت قد وفاة اخوي رحمه الله جدتي رحمها الله اللي انجنيت يوم فارقتني و كانت لي في الحياة بمثابة ابو طالب عم الرسول صلى الله عليه وسلم ( اللي كان يحبه و يناصره و يدافع عنه) للرسول عليه السلام كنت افكر صدمتي في فراقها من أقوى الصدمات اللي مرت علي في حياتي ، طلعت صدمتي في إصابة اخوي في عافيته ثم فراقه من اقوى الصدمات و الحمدلله على كل حال لأن اخواني اولا مالي غيرهم بعد الله .. كنا أربعة فقدت اثنين في عز شبابهم رحمهما الله .. و بقي فقط اخوي مريض الفصام الان حفظه الله بالذات أخواني غير .. اخواني تبارك الرحمن أطيب حتى من نفسي و من نيتي و من قلبي و تفكيري ، اخواني اغليهم أكثر من نفسي و والديني ، لأنهم مستعدين يفدوني بحياتهم .. الله يرحم الميت و يخلي لي وحيدي الحي و والدتي الغالية ، مالي غيرهم في الحياة .. و ربي يحفظ لكم غواليكم و يحفظكم لهم .. عشان كذا رسولنا الكريم عليه افضل الصلاة و أتم التسليم استعاذ من موت الفجأة و ساعة الغفلة لابد نكون مستعدين للقاء ربنا طوال الوقت و يشوفنا و حنا راضيين عن أقداره كلها حامدين شاكرين طوال الوقت على كل ما يصيبنا .. |
يوم تقول اطالع السواد الاعظم ، و كذلك تقول انا وش لي باللي أقل مني ؟
الحين مثلا السواد الاعظم تجد أن الله سبحانه رزق كل واحد بالبنين و البنات سوا .. قليل اللي تلقى عنده بنين فقط أو بنات فقط أو محروم تماما أو غير متزوج اصلا .. كل هذي الفئات الأربع السابق ذكرها قليلة في المجتمع .. اتفقنا طيب لو جات وحدة مثلا ربي أعطاها بنات فقط ، و بتموت على مولود ذكر ، لو طالعت للسواد الاعظم راح تنجن و تتردى صحتها ثم تنقهر من حالتها لين يتولجها ابليس و الله ما يتركها لين تسخط على أقدار ربها و العياذ بالله ثم تعطبها و تنسلخ من دينها مرتن وحدة ، و هذا مطلوب ابليس و مراده وش استفادت .. ؟ لا تمتعت بالنعمة اللي بين يديها و لا شكرت ربها و لا ارتاحت في دنياها و لا فازت باخرتها .. يعني خسرت دنياها و اخرتها نسأل الله السلامة ما درت ان ( اللي ما خلفش بنات ما عرف الحنية و لا ذاق طعم الحلويات ) انا اشهد : ) لكن لو طالعت للي ما عندها ذرية اصلا ، بل حتى ما عندها زوج يواسيها تالي الليل على مصابها راح تحمد ربها على ما هي فيه ثم ربي يرضى عنها و يزيدها من فضله و نعيمه و رحمته في الدنيا و الآخرة لأن سبحان الله حتى يوم تطالع النعمة اللي انت فيها و تتفقدها و تقلبها يمين و يسار و تشوف ان غيرك محروم منها تبي تستمتع بها أكثر ثم ترضى أكثر بل تسعد أكثر و أكثر ثم تشكر ربك خطوات سبحان الله يجر بعضها بعض .. لذلك مين قال اصلا اننا نطالع للسواد الاعظم ما راح يخسرنا امننا العقلي و النفسي و دنيانا و رضا ربنا و ديننا الا النظر للسواد الاعظم اهم شي ندرك ان الدنيا مزرعة الآخرة و نكون طوال الوقت مستعدين للموت ، احد التابعين رضوان الله عليه يقول لو غفلت عن الموت ساعة لفسد قلبي ما قال السواد الاعظم ماهم ميتين خلني ارتاح من التفكير بالموت ممكن يختاره المرض فجأة و الموت فجأة مثل ما اختار اخي أسأل الله الكريم أن يحسن لنا وياكم الختام و يرحم موتانا و موتى المسلمين اجمعين اللهم آمين يارب العالمين |
وعليكم السلام ورحمة الله وبركاته
اهلاً وحيد صالح ان شاء الله انك بخير وصحه طيبه اخوي وحيد كلنا نعاني من رهاب ونوبات هلع وكتئاب وقلق وتوتر لكن الحمدلله العلاجات ساعدتنا في تخفيفها وسيطره عليها نوعاً ما ومر العيد ولبسنا ملابس جديده والحمدلله عيدنا مع اهلنا ومر كل شي بسلام لكن صراحه يوم قريت كلامك احزني وضعك انا مدري انت تستخدم علاجات او ما تستخدم ! السيروكسات والاندرال والاميكتال تركيبه جيده للرهاب الاجتماعي |
اقتباس:
انا اصبت من سنين طويلة وفعلا كنت اتعالج بالادوية وجربت تقريبا كل شئ طبعا اتكلم عن مضادات الاكتئاب و اندرال للطوارئ لكن سمعت كثير يمدحون لاميكتال لكن خفت لما عرفت انه دواء للصرع وفي حال تركه له اعراض انسحابية قاسية من تشنجات او غيره المهم انا تارك الادوية من سنة وزيادة وكنت اعتقد اني طبيعي لكن اللي حصل اني كنت في زيارة وحصلت لي انتكاسة رهيبة بدون سابق انذار وبعدها وفي نفس الجلسة اصبت بنوبة هلع بسبب الرهاب فرجعت للمربع الاول الان يا ليت يا صديقي تعطيني الجرعات اللي استقريت عليها وهل في اعراض جانبية من لاميكتال وهل تستخدم اندرال يوميا ولا فقط في المناسبات اخر شئ انا جربت سيروكسات وللاسف ما ينفع ابد للمتزوجين واكيد فهمتني اتذكر اني ارتحت اكثر لـ سبراليكس انتظر ردك وبالتفصيل الله يسعدك |
هلا أخ وحيد سيروكسات ممتاز جدا بس مشكلته نفس ما قلت مايصلح للمتزوجين وغير ان يزيد الوزن ويسبب خمول ،هل جربت دواء زولفت الانه حسب ما يقال ان زولفت فعاليته مقاربة لي سيروكسات مع اعراض جانبية اخف وعندك دواء الافيكسور وايد ناس استفادت منه بس اعراضه الجانبية والانسحابية قوية وايد وعندك دواء بريستيك دواء مشتق من الافكسور ممتاز بعد للرهاب والقلق
|
اقتباس:
ايفيكسور هو اول دواء بديت فيه لكن مثل ما قلت اعراضه مرهقة جدا و يزيد الوزن بشكل كبير زولفت بالنسبه لي فعاليته ضعيفة جدا وما استفدت منه يمكن ما ناسب جسمي سيروكسات جربته وهو دمار شامل للمتزوج وكل مازدت الحرعة صار الموضوع اسواء حاليا رحعت لـ سبراليكس واشوفه اهون دواء من ناحية الاعراض |
اقتباس:
والدنيا وانا اخوك تجارب والعلاجات اللي نستخدمها امنه بس يبيك تقراء عنها ووش اللي يتعارضن ودكاتره وانا اخوك مامنهم فايده وماخذينا فأران تجارب انا طال عمرك استخدم السيروكسات + الاميكتال + الاندرال واضفت عليهم المرزاجين والحمد لله خف الرهاب وقريت عن هذي الخلطه انها فالسليم وصرت اتدارك وضعي شات جي بي تي يعلمك وش اللي يصلح وش اللي مايصلح بنسبه للاميكتال انت قريت انه للصرع لكنك لم تقراء انه كذلك لنوبات الهلع الاميكتال يعتبر داعم مثله مثل مثل اي داعم لسيروكسات او لسبراليكس وكذلك منشط يخليك نشيط وجريء اصلا ياوحيد هي خربانه خربانه استخدم العلاجات لين ماتلقح معك وتلقى العلاج المناسب لك والله بنسبه لي ما عاد تفرق استخدم العلاجات صرت من نفسي بس اتاكد انهم مابينهم اي انعكاسات سلبيه تحياتي لك ودمت بود |
اقتباس:
على طاري شات جي بي تي سألته عن لانيكتال فقال يستخدم للصرع و لمرضى ثنائي القطب وسألته عن استخدامه للرهاب قال ماله علاقة ابداً ويعتبر استخدامه خارج التوصيات الرسمية” (off-label) المهم كلمت الدكتور اللي اتعامل معه وقالي بعد ما توصل للجرعة القصوى وتستقر ندخل الدواء الداعم طبعا انا قاطع الدواء من سنتين وانتكست في عيد الفطر الماضي كنت اعتقد اني تحسنت واكتشفت اني اضحك على نفسي في الواقع كنت اهرب او متخبي في كهفي والعمر يمضي وانا مو حاس يالله الحمدلله |
| الساعة الآن 11:13 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا