رجيتـــــكمـ ساعدوني ..
 

مشكوووره حبيبتي على الرد ..

وكلامك كله صح .. وعين الصواب..

المشكله ان انا في هالحاله مو من فراقه أبد.. بالعكس انا فرحانه كثير اني اكتشفته على حقيقته وأحمد ربي ليل ونهار اني مااخذت انسان حقير..
لكن اللي حاز في خاطري انه لعب فيني وخلاني ولا شي.. أحس نفسي ولا شي..
مع اني نسيت هالسالفه .. صدقيني نسيتها بالحيل وماافكر فيها أساساً..
لكن من صارت وانا نفسيتي تعبانه صدقيني مو عارفه شلون أفهمك..
يعني نفسيتي تعبانه مو لأني أتذكره.. أحياناً أسأل نفسي أنا ليه زهقانه أو وشو فيني لكن ماعندي جواب.. أحياناً أبغي نفسيتي تكون عاديه لكن مو بيدي.. غصب عني تصير نفسيتي تعبانه ..
صايره حساسه كثير لدرجة أني مااتحمل اي شي او اي كلمه على طول أبكي ...

أخاف أني أحلم وأفرح وفي النهاية أصعب فوق باحلامي وأطيح آخرتها ..

صدقيني أجلس وأسولف مع أهلي عااادي أضحك معهم لكن ماأحس اني أضحك من داخل أحس ان فيني شي..
وأحياناً اذا اجتمع معهم ماأقدر أخفي اللي بداخلي أظل حزينه حتى وان أخفيت الحزن والهم ..

وحتى ربعي في الجامعه بالعكس أضحك وأتكلم معهم لكن مااحس اني فرحانه من الداخل..

دايم يجي في بالي كل الناس اللي فارقتهم .. كل الناس اللي أحبهم وفارقتهم أذكرهم .. دايم أذكر كل الأمور اللي صارت لي..
وأشتاق للي فارقتهم بالحيل..
أحس اخاف اني أتعلق بأي احد علشان ماأفارقه ..



طبعاً هالسالفه ابتدت من سنتين ولكن الحدث الأخير صار من 4 شهوريمكن ..

طبعاً احساسي لايوصف أحس ان الدنيا كلها علي.. أحس بثقل على صدري مو طبيعي ولين ألحين هالأحساس..


صدقيني كلمة تعبااانه قليله مااقدر اوصف لك اللي في داخلي..
وخاصه اني مريت بظروف وفارقت ناس كثيره عزيزه على قلبي ولين ألحين انتظر لقياهم ..

مااقدر اني انسى لأني بس احط راسي على المخده على طول أتذكر كل آلامي وبعدها انام من البكي..


أبغى أتخلص من هالأشياء والتعب النفسي لأني تعبت وربي تعبت ..
مع ان السالفه ماتجي على بالي بس الأمور الثانيه الحزينه ونفسيتي تعبانه ماادري ليه ..؟




ساعديني ربي يوفقك ويسعدك ...

أشكرك اختي من أعمااق قلبي وربي يسعدك ويوفقك دنيا وآخره ..



أهلي مايدرون عن هالشي.. امي دايم تحس ان نفسيتي تعبانه ودايم تقولي لاتتعبين نفسيتك بأشياء تافهه ..

ومره خالتي تكلمت معي لأنها شافت حالة العصبيه اللي جات لي وقالت لي مايصير كذا..
لكن مامره صارحت اهلي بهالشي.. ومااظن عندي الشجاعه اني اقولهم أبغى أروح دكتور نفسي.. لا مستحيل ماعندي الشجاعه لهذا الشي ..


اما عن الموت لا ماأفكر بهذا الشي.. لكن دايم قبل لا أنام اقول جمله.. ياليت انام ماأجلس.. يمكن أقولها من تعب البكي قبل لاانام والتعب اللي أحسه ..
حتى يوم حاولت الإنتحار ماكان في بالي اني أبغى أموت كنت قاعده أبكي وفجأه حسيت اني تعبت بالحيل ومو قادره أتحمل ورحت واخذت الحبوب وفي المستشفى يوم جاني الدكتور النفساني سألني وقلت له ان مافكرت في الموت بمعناه فقط للتخلص من التعب اللي في داخلي..

صدقيني تعبانه بالحيل..
أمي ملاحظه ان اكل ماآكل الا القليل واذا اكلت أحس بغثيان ..





بس صعبه أقولها أبغى دكتور نفسي.. وتدرين نظرية الأهل للدكتور النفسي..
وخاصه ان امي تعرف السالفه لكن أبوي مايدري بالسالفه لين ألحين فإذا درى ان أبغى اروح دكتور نفسي بقول لي وش بلاك عشان تبغين تروحين ..؟



وهذي هي المشكله ..

عزيزتي شوق
لاتخلي واحد تافه زي هذا يخرب حياتك
كوني اقوى منه وبحول الله بتتزوجين سيده
وبتعيشين حياه حلوه وبتخلفين صبيان وبنات
وبتقولين كانت ايام الله لايردها
شوق اخيتي
مايصيبنا الاماكتب الله لنا قوي ايمانك بالله
ولاتفكري بالغد فهو في علم الغيب

ذاك اليووم ماقدرت اكل ولا انام
طقيت من الجوع اش سويت طلعت من البيت غيرت جو غيرت المكان
رحت لبيت اختي وتعشيت عندهم حاولت قد ماقدر انسى وحاولت ادخل معاهم با حاديثهم ومشي الحال

ياغاليه الحياه حلوه لاتضيعيها بشئ ما يستاهل كثير تصير هالسوالف
وبتعدي بحول الله انتي قدها

اهتم بدراستك واطلعي زوري زميلاتك روحي الملاهي تابعي برامج مفيده سوي اي شئ بحيث تكوني مشغوله يبعد عنك التفكير السلبي
والعصبيه وقلة الشهيه كل شئ بيروح حبه حبه

عارض ويزول بحول الله بشجاعتك

ليس بالضروره اذهب لطبيب النفسي فقط لاني
مريضه برهاب اوقلق ... الخ
بل ان منهم من يذهب ليخفف تراكمات وضغوط الحياه
لطبيبه النفسي ( فضفضه نفسيه)
تطورت الرؤيا لطبيب النفسي عن ذي قبل والبعض منهم غارق في جهله

تحدثي مع والدتك مع اخوتك الطبيبه النفسيه اختك الاخرى

اوصيك بالاستغفار

وماتشوفين شر

استودع الله امانتك ودينك وخواتم اعمالك

أختي الغالية شوق
في هالدنيا حنا مبتلين وممتحنين يمكن الله سبحانه وتعالى أراد اختبارك ويمكن أراد تذكيرك
حاولي تنسين القصة كلها وتوكلي على الله ( من توكل على الله فهو حسبه ) وثقي بأن الله سيأخذ بيدك في هذه المصيبة إذا أحسنت الظن
كوني قريبة من الله بالطاعات والابتعاد عن المعاصي وتوبي الى الله
ولا تنسي سهام الليل الدعاء أن يفرج الله كربك ويشرح صدرك ويبعدك عن الهموم
وعليك بقراءة سورة البقرة كل ليلة لأنها تطرد الشياطين وتشفي بإذن الله
وكدلك الإستغفار أنا جربته مع اني ما داومت عليه الا اني صرت أحسن من قبل
أرجو من الله أن لا يدع لنا ذنباَ إلا غفره ولا هماَ إلا فرجه ولا عيباَ إلا ستره ولا ديناَ إلا قضاه ولا مريضاَ إلا شفاه ولا مبتلاَ إلا عافاه ولا حاجةَ من حوائج الدنيا لنا فيها صلاح إلا أعاننا على قضائها
آمين .........

أختي الغاليه هيـــا ..


بصراحه كلامك يرد الروح ..
يدخل القلب ويشرحه .. ماقصرتي حبيبتي وربي يسعدك دنيا وآخره ياااارب ..

انا الحمد الله مؤمنه بالله وان هذا اختبـــار .. أحياناً أسوي نفس ماقلتي أطلع وأستانس وأرفه عن نفسي لكن بمجرد أحط راسي على المخده اتذكر كل شي كان محزن .. أحياناً أقدر أتغلب على هالشي وأحياناً تكون الحاله هي أقوى مني ..

وصحيح نفس ماقلتي مو شرط نزور طبيب نفسي لأن كل السالفه فضفضه عن مافي داخلنا ..

صدقيني أحياناً أكون تمااام وعال العال وشهيتي مفتوحه..
وأحياناً تكون نفسيتي مسدوده وتنقلب حالتي بشكل مو بإرادتي .. وهذا اللي مضايقني ان نفسيتي تكون تعبانه بدون ارادتي كذا فجأه..
لكن من يوم رايح من اتضايق ر اح أقرأ قرآن وأكيد راح أتغلب على هالحاله ..


حبيبتي ماتتخيلين شقد ان كلامك ريحني كثير .. مشكوووره وربي يقضي حوائجك كلها .. يــــــــارب ..




تحياتي لشخصك ..

أختي الغاليه خريف ..


كلامك جميـــــل ويدخل داخل الروح وريحها ..
كلامك عين الصواب .. الله يمتحنا سبحانه ولازم نكون واثقين منه..

الحمد الله ثقتي بالله كبيره حيل .. والحمد الله مؤمنه ان اللي صار وراح يصير بقضاء الله وقدره ..

لكن أحياناً الشيطان يوسوس للإنسان بأمور أعوذ بالله منه ..

أختي العزيزه مافي انسان يحب يكون بهالحاله ..

لكن وش نسوي لما يكون غصب علينا..

وربي ان اللي صار مايجي في بالي لكن تجيني حالة اكتئاب مفاجئه .. يعني فجأه احس اني متضايقه ومالي خلق أي شي..
ومالي خلق حتى أطلع وودي اكون لحالي..




آه صدقيني تعبت وأبغى اتخلص من هالشي..

أحياناً تشوفيني تمام وحالتي عال العال والأمل مالي حياتي..
وأحياناً وفجأه انقلب...



ادعولي تكفوووون

اي والله يااخيتي شوق اقبلي على الله فلعل ماحدث لك خيرا بحوله العلي المتعالى فتكوني شوق اخرى ثانيه
اسعدي واسعدي من حولك ولاتكوني ضعيفه استحوذعليها الشيطان
فاحزنها واضعفها
كوني شئ حبيبتي حددي اهدافك في الحياه عندها لن يكون لك مجال لتفكري وتهتمي
مثلا عندك انا
قاعده بالبيت لاشغله ولامشغله وشغالتنا سافرت وماعندي هدف
مرررره
لكن انا بسويلي هدف بحول الله يقدرني على انجازه
وهو اني اشيل البيت على اكتافي يعني شغالتهم الجديده
حتى نومي موملكي يعني بحاول انام بدري عشان اصحى من النجمه
هدفي راحة اخوتي
لانهم ليهم مشاغلهم
ابغى اقدم شئ لاحدابغى احس بوجودي بقيمتي
يوم احط راسي عالمخده اقول يامحلى الراحه بعد التعب
واغيب في نومه طويله وعذبه
لاافكر في امس ولا بكره بس وينك يامخدة
لاتنامي الالما تقفل عيونك لاارادي عشان تحطي راسك من هنا تنامي من هنا
ولاتنسي ان الي صار معاك مكتوب منذ الازل شوق حيصير معاها
كذا
وهيا حتسيب الدراسه وتجلس حبيسة البيت هي اقدار اخيه
فارضي ترضي ربك
لما تكتئبتي اذكري الله كثير وحاولي تطلعي من البيت
اوتسولفين مع امك او خواتك افتحي مواضيع واقرائي قران
او استمعي له
استودعك الله

السلام عليكم ورحمة الله وبركته....
غاليتي شوق قرأت مصابك وقرأت للاخوات الذين وقفوا معك وما اجد كلمات بعد تلك النصائح...لكن سأذكر لك ....ليكن عندك صفتان العزيمه والاصرار...اياك الهزيمه النفسيه....اذا ذهبت الى فراشك لاتقولي لااريد ان انام ان حدثتك نفسك بانك ماتنامي فورا ضعي رأسك على المخده وقولي اريد ان انام وابدئي باذكار النوم فانها تشغل عقلك...
في البدايه سيكون هناك صراع كبير في نفسك....لكن ستشعرين براحه....وعليك بالنداومه قدر المستطاع على اذكار الصباح والمساء...فان لها فعل عجيب في النفس ....
استخدمي فكرة الايحاء يعني تخيلي وانتي مغمضه عينيك او مسترخيه استرخاء لا داعي لان تغمضي عينيك حسب نفسك وايهما ترتاحين ثم تخيلي انك في وسط ملئ وحولك الناس من اهلك واقاربك او اصدقائك وتخيلي نفسك تضحكين وانك مستمتعه جدا كرريها دائما ستعكس عليك بعد مده...تخيلي نفسك في موطن فرح وسعاده بين اهلك.....واستمتعي مع خيالك ....
اياك ان تذكري ولابلمحه عما مضى....انسيه قدر المستطاع....واشغلي فكرك بالقراءه النافعه والمفيده وعليك بالرياضه البدنيه ...والعمل في اي جانب لو في المنزل ...اجعلى هناك تفريغ لطاقتك تبعدك عن التفكير....
واخيرا هناك مشروب له فعل عجيب في الراحه النفسيه وله فوائد صحيه ويسمى عند العطارين(البردقوش)وعن تجربه يشعرك بهدوء ونشاط وراحه.....
او (التلبينه) وهي ايضا عند العطارين فانها تريح الفوءاد وقد وصى بها النبي صلى الله عليه وسلم....
ثم اجعلي ماحدث درس لك في الحياة وان كان قاسيا..لكن لتتعلمي منه لا ان تقعي فيه...
واذا اردت فنحن هنا معك ....فجميعنا يدا واحده....
تحياتي لك ....وللاخوات جميعا....
اسأل الله ان يفرج همك ويزيل كربتك.....

حبيبتـــي هيـــا ..

بصراحه مو عارفه كيف أشكرك على متابعتك لي... وربي ان كلامك يشرح الصدر ويعطيني امل كبير..

وربي يشهد أنكم ريحتوا نفسيتي والله والله ..
سويت اللي قلتوالي عليه.. صرات أطلع حتى اذا مالي خلق واغير جو وصارت نفسيتي أحسن..



أختي هيا .. شخصيتك رائعه والدليل انك صنعتي لنفسك الهدف علشان تكونين شخصية هادفه في المجتمع وبين اهلك كماان ..
ربي يخليك لاهلك مافي منك كثير..



أنا ألحين الحمد الله صرت احسن لكن باقي مشكله وحده وهي النوم ..
صدقيني ماأروح احط راسي على المخده الا فيني النوم بالحيل لكن حتى اذا نمت على طول بعد ساعتين أجلس..
وأكون مرهقه وفيني النوم لكن ماأقدر انام الأرق متعبني ..
او اني انام واجلس وأظل كذا طول اليوم ..
وهذي المشكله الوحيده اللي متعبتني..
أقرأ قرآن قبل لا أنام واستغفر الله والحمد الله هالشي يشرح صدري بالحيل ويطيب نفسي..


بصراحه مو عارفه كيف أشكركم ..
لاتتركوني تراني محتاجه لكم بالحييييل ..

ربي يوفقكم ويسعدكم دنيا وآخره يااارب العالمين ..


تحيه لروحك الراقيه يا هيــــا ..

غاليتي الأولى ...

ثقافتك رائعه .. كلامك درر .. أسلوبك راقي..
حديثك مفيد ويريح النفس ويسعدها ..
وربي أثلجتي صدري..
أستفدتي من كلامك كثير كنت من قبل ودي بأشياء مثل التخيل وغيرها وأشياء فيها معاني الأسترخاء محتاجه
كثير لمثل هذي الأمور ..
كمان استفدت من أسماء الأعشاب وانشاء الله بشتريها وخاصه اني سمعت في المرقدوش انه كويس كثير..
راح أسوي كل اللي قلتيلي عليه .. وبالحرف الواحد ..


حبيبتي ..
راح يكون عندي عزيمه وإصرار ..
أنا الحين الحمد الله قدرت أسولف مع ربعي واضحك معهم مثل قبل واحسن بعد .. وماأظل لحالي
لأني عارفه ان ظليت لحالي راح تجيني الأفكار .. أحاول اشغل فراغي بالأستفغار وذكر الله سبحانه
والحمد الله قدرت أسيطر على جزء كبير من حالتي النفسيه التعبانه ..
كمان قمت أشغل نفسي بالدراسه وأحاول اني مااجبس لحالي حتى دقيقه وحده..


صحيح تجيني حالات بسيطه لكن انشاء الله راح أقدر أسطر عليها..

وانشاء الله بحل مشكله الأرق لكن كيف ماادري ...



ربي يقضي حوائجك .. وتدون بسمتك..

ماراح انساكم من الدعااء.. كل من ساعدني هنا..
لأنو بجد وقفتوا معاي وقفه عمري ماراح انساها...




كوني بخير حبيبتي ..

تحياتي لرقيك ..

اختي شوق

عليك باكثر الاستغفار

ملاك الكون ..

يـــــــــــاااه قرأت ردك مره ومرتين وثلاث..

كلامك عــذب جداً ..


غاليتي أشكر لك التواجد الرااائع وأكثر من رائع ..


حبيبتي..


شوق ألحين تغيرت كثير,,
ساعــدت نفسي بنفسي إني أرجع شوق اللي قبل وأحسن واحسن من قبل بكثير..
لأن الغنسان يتعلم من تجاربه .. والحمد لله اني اكتشفته قبل لاآخذه وانا واثقه ومتيقنه ان الله بعوضني عنه..
ومثل ماقلتي انا جامعيه عندي حياتي وتوني صغيره راح ألقى من التجارب الكثير..
توني خاسره تجربه جديده وهي صداقه من ولادتي يعني من 19 سنه ولكن خسرتها ألحين وبكل بساطه..
صدقيني ماتأثرت لأن الحيااه هي كذا تجااااااااارب..
حاولت انقذ نفسي من حالتي النفسيه التعبانه وأصريت على هذا الشي..
تقربت من الله سبحانه وتعالى وطلبت منه انه يزيل عني الهم والغم..
وسمعت نصايح خواتي اللي هنا الله يجزاهم خير ..
وأنا أحب علم النفس.. صرت أبحث في الأنترنت عن مواضيع الإسترخاء والعلاج من المراض النفسيه وصرت أطبقها..
وأنا عندي كتب نفسيه .. صرت أقرأها وأتثقف منها..
وأيضاً أحد الأطباء النفسانيين اللي هنا في المنتدى الله يجزاه خير نصحني بكتاب اسمه ( العقل فوق العاطفه) وهو يعتبر كتاب للعلاج من المراض النفسيه ومنها القلق والتوتر وغيرها.. وصرت أطبق اللي في الكتاب والحمد لله ماتتخيلين شقد صرت انسانه ثانيه تماماً
حطيت في بالي ان لازم أهتم بدراستي عشان أرفع راس أمي وأبوي
والحمد لله حتى امي فرحت لتبديل حالتي وأبوي بعد..



الحمد لله .. اللي يتقرب من ربه ويطلب منه المساعده ماينرد أبد..
وماانسى بعد فضل رب العالمين فضل خواتي اللي هنا.. وفضل كلامك اللي شجعني أكثر واكثر واكثر..


تسلمين يالغاليه على مرورك الطاهر..

تحياتي لشخك الموقره ..


شوووق ..

ياحياتي انتي الله يساعدك ويسعدك ويعوضك باللي احسن منه
انتي تستاهلين الاحسن
والله سبحانه وتعالى مقدرلك هالشي وماتدرين وش الصالح رب ضارة نافعه
يمكن هاللي مريتي فيه وتمرين فيه راح يقويك اكثر يخليك قادره على مواجهة الحياة اكثر
وتقييم اللي قدامك انتي اقوى من ان هالشي ياثر فيك الله يقويك يارب

طمنينا عنك شوق كيفك ؟؟؟؟وكيف النوم معاكي ؟؟؟؟

وان شاء الله امورك تمام......

يارب أرجوك ..

حبيبتي مشكوووره على الرد والتوجد الغالي..

الحمد الله إن الله وضح لي نيته قبل لاأرتبط فيه..

وانا واثقه ان هذي حكمة من رب العالمين ..

مشكووره حبيبتي على التواجد مره ثانيه وانشاء الله ماتمرين ابللي مريت فيه ياارب العالمين

الأولى ..

ياحياتي والله ..

ماتتخيلين شقد انا مرتاحه بالحيل ألحين ..
الحمد الله رجعت لحالتي الطبيعيه وأحلف لك إني أفضل من حالتي الطبيعيه اللي كنت عليها قبل المشكله بعد ..
حطيت في بالي اني بنت جامعية واهم شي دراستي واني أرفع راس أمي وأبوي واهلي كلهم ..
حطيت في بالي ان الحيااه كذا مايبيلها الا التطنيش فقط ..
والتوكل على الله والإيمان بالقدر والمكتوب أهو أهم شي..


الحمد الله بالنسبه للنوم تعدل نوعاً ما..

يعني انا من الأساس قليلة نوم ..
لكن الحمد الله الأرق راح عني .. صحيح ماأنام في الليل كثير.. بس انا هذا طبيعتي أفضل نوم النهار أكثر من الليل..

بس ماتتخيلين شقد نفسيتي ارتاحت..
سويت كل النصايح اللي قلتوها لي ..
وأنا احب علم النفس دخلت على مواثع علم نفس وتعلمت عمليات الأسترخاء وظليت أقرأ فيه وصارت عندي ثقافه عن علم النفس بشكل عاام ..

وهذا الشي يرجع لفضل الله وفضلكم وفضل الكتاب اللي أرشدني عليه أحد الأطباء النفسانيين الله يجزيه خير.. وإلى ارشادات الأستشاري محمد سليمان ري يجزيه خير..

وإلى كل اعضاء المنتدى الغالي..

ماراح أنسى فلضلكم وفضل المنتدى هنا بعد فضل ربي سبحانه ..


حبيبتي .. مو عارفه كيف أشكرك وربي وخاصه انك ردعتي تسأليني عن أحوالي
ربي مايهينك ويسعدك ويوفقك دنيا وآخره ياارب العالمين ..


تقبلي أرق تحياتي لشخصك الطاهره ..

جزاك الله خير والله لا يذيقك بأسا ....

لابد من الابتلاءات في الحياة ...

وَلِيَبْتَلِيَ اللَّهُ مَا فِي صُدُورِكُمْ وَلِيُمَحِّصَ مَا فِي قُلُوبِكُمْ ۗ وَاللَّهُ عَلِيمٌ بِذَاتِ الصُّدُورِ (ال عمران154)

ارأيتي كيفيت تحميص الخبز على النار ومدى تعرضه لهذا اللهب الحارق ...هذا نحن في الدنيا مع ابتلاءات الله ...مالنا غير الاستسلام لامر الله والانصباغ له والرضا فهو خير لنا دائما ولا يريد الله لعباده الاكل خير ......

والحمد لله انه ظهر لك الحكمه من الامر....لابد من الابتلاء تلو الابتلاء لكن من اجل ان تتجاوزي هذه المحن كوني مع الله يكن معك الله .....

تحياتي لك غاليتي.....

الولى ..

صدقتي الله مبتلينا بأنواع عديده..
ولابد من الإنسان انه يجتاز هذا الإبتلاء بالصبر وبالإيمان ابلله سبحانه ..

الله يبعدنا عن الهموم والأحزان أنا وانتي وجميع المؤمنين والمؤمنات يااارب العالمين ..


تحياتي لك غاليتي ..

اخت شوق
مساء الخير
جعله الله في ميزان حسناتك
مشكلة القلق بسيطة وهي معك جديدة وعلاجها اسرع من الذي يعاني لسنوات والله يا اختي لو تعلمي بمعاناتنا لسنوات لعلمت انك في خير .
استمري على ما انت عليه والله سيشفيكي اما الارق فاشربي قبل النوم كاس من منقوع البابونج لانه مهديء للاعصاب ويبعث على النوم .
التلبينة انصح بها للقلق والكابة
والله الشافي

تحية الرب ..

اخي الكريم أنور محمود ..
أشكر لك تواجدك الراقي هنا..

وكما قلت الحمد لله فأنا بسبب الظروف التي مررت بها أصابتني حالة القلق..

أما الآن فأنا في أحسن أوضاعي ولله الحمد ..


وخاصه القلق تخلصت منه تماماً ..


أخي الكريم .. ان كنت مصاب به فأتمنــى لك الشفاء العاجل يااارب..

وأتمنـــى لكل من هو مصاب به الشفاء..

دمتَ في رعاية الرب وحفظه..

تحياي لشخصك..


شوق.