ملتقى نوبات الهلع .... إلى أين .؟؟
 

السلام عليكم ....

لا لا لا .... هذا الحال ما ينسكت عنه ...

الصراحه شي يقهر ويضايق شوي ...

اولا ً: المنتدى خاصة ملتقى الهلع نايم نايم ...ليييش شصاير ....يا اخواني واخواتي مرض نوبات الهلع يحتاح التواصل على طول ....انا ادش كل يوم المنتدى ما لا يقل عن 4 او 5 ساعات .... لكن والله بعد ما اطلع استخسر هالساعات اللي ضيعتها ..لاني اكتشف اني الوحيد ومعي اللهم عضوين او 3 يتفاعلون معاي ... الاحساس بالوحده هذا يخلي الواحد يمل وما يدخل المنتدى ..!!!

ثانياً: والله اتكلم بصراحه ...((^ماكو تشجيع لكتابة المواضيع ^)) يعني يدشون الموضوع 200 واحد .. و 2 يردون ..!!!!! غير انك عادي يتم لك يومين تطلع على موضوعك وانت طالب ردود الاعضاء الاعزاء ... تلقاهم دخلو علىمواضيع قديمه ومالها اهميه وردو عليها وخلو موضوعك على جنب ......
ودي اقولها بكل صراحه ... واعتبروه سؤال من اخوكم ..::

انا كثر ما اقدر قاعد احاول اطلع الاعضاء من اللي اهم فيه وقلبي عليهم واحس اني اعرفهم من سنين مو توني من شهرين ...لكن قاعد احس ان هالاحساس وهم ... انا حاطهم ابالي ابكل وقت ...وهمما يفكرون حتى يتفاعلون بالموضوع :(:( ...

سؤال :: هل وجودي بالمنتدى ومواضيعي وردودي تضايقكم ؟؟؟!!! اذا تضايقكم قولولي !!! عشان ما اضايقكم زياده !!

ارجو الرد ...بعد مو تسكبوون .. عاد ابي رايكم بصراحه ...

استغفر الله ..

ياخوي المنتدي صج مافيه احد يرد كلنا يقرا ويطلع يعني ماحد يخدم متابعه لك دايم وانت رائع

انا ايضا الاحظ ذلك فمعظم الاعضاء يدخلون للقراءة فقط

اخوي ممكن ارجع بالعكس مواضيعك وردودك في المنتدى رائعه جدا والاحظ حرصك على الاعضاء وتحفيزهم بالكلام الايجابي الله يجزاك خير

لكن انا من ملاحظتي في المنتدى بعض الاعضاء يشاركون لما يكونون تعبانين فقط ولما يحسون بتحسن يتركون المنتدى

وبعض الناس الي عندهم نوبات الهلع يبغون يبتعدون عن اي شي له علاقة بنوبات الهلع فما يقدرون يدخلون المنتدى ويشاركون بشكل يومي لانهم يبغون ينسون نوبات الهلع

عشان كذا المشاركات في المنتدى قليله شوي

انا مع المتفائل دائما بكل حرف كتبه هو صح

ممكن ارجع
انا وانت خلينا نجلس ع الباب تبع اصحاب الهلع
واللي مارد على اي موضوع نضربه ونعاقبه يرد ع مواضيع المنتدى كلها
ايش رايك

صراحة كلام صحيح
بس كيف يتم التفاعل

امل الكويت . شباب ضايع ... الملك المتفائل دائما ,., احساسي غيير .... مشكووورين على الردود الحلوة ... وبالعكس انا متضايق ان الكل تعبان ... بس والله ابي اريح الكل وابي ارتاح ....يعطيكم العافيه

احساسي غير .... لا لازم كل واحد يرد وهو مقتنع ...لان راح يحاسب على رده

مثالي ... التفاعل بالرد والمشاركه ...!!

لا لا لا لا ..
طلع كلامي مظبوط ...
المنتدى مو بس نايم الا مهجوووووووووور :(

افا مزعلين احلى مهلوع فى ملتقانا

اسمع ابقولك شى

صدقنى مو مهم الردود المهم انهم يستفيدون

يعنى لو لقيت المشاهده ][شخص واحد][ لاتحزن لنك وصلت له معلومه

بعدين كل ماتحط موضوع قول احتسب اجره ع الله حاول تخلى النيه لله

وايضا احيان اقرا مواضيع بس مافينى حيل ارد

احيان احس بملل بس ادخل الملتقى واروح اشنغل بالنت واترك نكى معلق

اهـم شى انه كلام حبيت تفيد فيه غيرك وكتبته الى رد شى طيب والى مارد زين انه قراءه وان شاء الله يستفيد

استمر بالعطاء ولاتنظر خلفك الا اذا اردت ان تساعد اخ لك فى النهوض والاستمرار معك

وانا ايضا احس انى اعرفك من سنين وغيرك بعد

وكلنا نحس ببعض لن احاسيسنا حنا ملتهبه على طول وتلقط اى تردادت حزن وكآبه ][سلبيه بشكل عام][

فالاحس اس هذا ثق والله اعلم انه متقارب جدا بينا خاصة في خانة الهلع التى نعيشها وتوابعها النفسيه والفكريه والجسديه

اللللللللله عليك يا ملك والله ونستني بردك ... احسه كأن مي بارد نزل على جسمي ... يعطيك العافيه ولله يكثر من امثالك .
وان شاء الله راح اسوي بنصايحك ...

وهذا كله لوجه الله ...ثم لكم يا حبايبي

انا كنت مثلك اتضايق من عدم الاهتمام بملتقى الهلع
بس مع الايام تعودت
شوف من قبل المغرب شغااله تخبيصات بشريط الاهداءت
وانا متاكده انه فيه ناس فاهمتني غلط بس بعد تعودت
المهم انا واثقه من نفسي وبس

احساسي ... شلونج الحين ... ان شاء الله احسن ....؟؟؟!!

طمنيني

طيبه وبخير اليوم راااااايقه عارف ايش السر
بس هات اذنك لاتقول
اخذت حبتين مهدئه

كثير اوقات اجي اكتب بس اتراجع والله مافي سبب بس احس بتعب شديد واكتفي بالقراءه

ميما ... ما تشوفين شر ...
يارب تستفيدين من موضوعي .. التخلص من النوبات

احساسي غير ..

اشرحيلي كلمة رايقه الله يخليج :) جم نسبة التحسن ؟؟؟

مم
يمكن لان دوامات والنوم حوسه

ويمكن مالهم خلق تعرف الهلع يخليك مالك خلق

هو عموما فيه ناس صامتين بس وشوله تطلع وتتضايق :)

اللي يتفاعل معك تفاعل معه وبس

تسلمين على الرد يا رب ارجووك ..

ان شاء الله ..

بس بوقت هاليومين عن الكتابه برتاح عقب برجع

افا طيب وش ذنب اللي ينتظرون:(

اخى الكريم ممكن ارجع
اشكرك كثيرا على غيرتك على الملتقى
وحرصك الدائم على التواصل
اننا نسعى جاهدين لتلبية ارائكم واقتراحاتكم ونعمل على هذا
ويسعدنا ويشرفنا وجودك بين هذه الباقة التى ارتادت صفحتك
تحياتى...

٥ ساعات !!
خطأ تجلس على النت كله اكثر من ٤ ساعات
على فكره هو اللي يبعدك عن المجتمع الواقعي وييأخر تقدم شفائك
واقولها عن تجربه
حاول تتواصل مع ناس طبيعيين اكثر علشان تغفل عن حالتك
واذا على نشاط المنتدى
كل واحد له ظروفه وفيه ناس ماتقدر تسجل بس يزورون
وفيه ناس مايقدرون يدخلون دايم
حاول تكون ايجابي
والله يعين

اخي صلاح سليم ...
مشكوووور على رد..
وطبعا اغار لان نص يومي ابهالملتقى ..

الله يعين .. وان شاء الله يزدهر المنتدى وهالملتقى بالذات ..

مصفعتني ....شسوي يعني الحاله مخليتني اقعد بالبيت على طول ...غير هذا ماحب اطالع تلفزيون الا شوي ... فيعني ماكو الا النت اقضي وقتي فيه واستفيد ..

ادري ان مو زين حق العين وهذا يعتبر ادمان ...

الله كريم

مايصير تقعد بالبيت على طول
جرب رح لبقاله رجليه
وكل مره شوي شوي
لين تترك جلسه البيت المطوله ذي

اخوي مصفعتني الدنيا ...

شسوي ما اقدر اطلع الا مع اخووي ,.,,, واخوي قليل ما يكون فاضي..

وقعدت البيت عالاقل ما فيها توتر وقلق ..

بس يعني اطلع بين فتره وفتره بالاسبوع مرتين تقريبا اروح بحر او مكان اتونس شوي واغير جو

رح لحالك للبقاله او شي قريب لبتكم
انا كذا سويت في البدايه وشوي شوي لما تتعود

اي ان شاء الله ..
انت شلونك الحين ... احسن ؟؟

ولله الحمد مسيطره على النوبات المتوسطه والخفيفه
والقويه الحمدلله انها ماتجي دايم
بس اللي يهد الكوابيس والاكتئاب والقلق العام والوسواس
واحاول اني مااترك لنفسي دغبتها بالبقاء والانعزال
جزبت هالحاله كم سنه وللاسف كل ماطالت مده الانعزال زاد الاكتئاب
وكل مالواحد اشغل نفسه
بالزيارات ، مكالمات الاصحاب والاقارب وصله الرحم
الجلسات العائليه ،، تخف الحاله عليه
وللصدق اني اجاهد نفسي على بعضها واحيان ازور الاقارب وانا ماودي بالروحه
والله اللي يعين

ما خذيتي علاج كلش؟؟؟؟!!

وكم سنه الحاله ...!! تسوقين سياره ؟؟!!
اسف عالاسأله .. بس امانه ودي اعرف .

الحاله من عام ١٩٩٦
وعليك الحساب
والعلاج اخذت زاناكس والسبرالكس
ووقفتهم لانهم مافادوني او ممكن الزانتاكس يريح
بس الاعراض الانسحابيه انت شديده
والحمد لله صارلي ٦ سنوات مافيه علاج دوائي
واعالج سلوكي وتثقيفي
واهتم بالرقيه والقرآن وهذا نفعني كثير
بس احس في واقع نفسي انه خلاص هالمرض مزمن ماراح يروح
لازم اتعايش معاه رضيت والا ابيت
وبالمقابل احس ان الله يشافي من كل الامراض وبيده الشفاء
والله اللي يعين
وشايله هم النوم من الكوابيس اللي اشوفها كل يوم
الله يبعدها عننا

ومن ناحيه السواقه لا مانسوق حنا
بس احاول اطلع لحالي مشاوير علشان اتقوى

السلام عليكم

اخوانى انا عضوه قديمه وقليله مشاركاتى غبت مده طويله وضيعت الايميل وسجلت من جديد المهم
انابسال عن النادى القديم وبعض الاعضاء الاخت الفرج قريب والاخت دموع الشموع وعمار على متذكر الكل وينهم ماشوفهم يدخلون ياريت تطمنونى عنهم

والله انا معاك في كل الكلام نووووم مو طبيعي
ومن جد من جد احس انكم اقرب الناس لي بليييييييز خلينا يد وحده ونتفاعل ونساااااعد بعض ونقوي بعض ونهون على بعض
والله المستعان