|
معا للتخلص من اختلال الانية ..
بسم الله الرحمن الرحيم كيف حالكم ان شاء الله بخير وبصحه وبعافيه يارب ... انا بصراحه لاحظت شي فيكم .... انا عندي اختلال انيه من 4 سنين ... اللي لاحظته ان الكل يشكي منه ويبحث عن اسبابه ويبحث عن اعراضه وكل احد يقول للثاني الي يشكي منه والي يحسه والي ..... منشغلين عن العلاج يعني نادر ماشفت احد ملتزم بجدول علاجي ويجي يسال ها كيفكم مع العلاج ؟؟؟؟!! بصراحه انا اول مره دخلت المنتدى جاتني عقد نفسية اكثر مدري احسكم يائسين بالمررره مافيه تشجيع مافي حماس ابداااااا !!!! هذا هو السبب الرئيسي في عدم شفائنا لللان ؟.؟... ليش مانبدأ مع بعض ليش ؟ ونسويلنا جدول ؟ الين متى والشيطان متحكم باعصابنا ومشاعرنا ومتعبنا وضاحك علينا ؟!!! انا ارفض تسميته بالاختلال اولا وارفض تسميته مرررض هذي كلها خرابيط من ابليس .. الحاله اتفه ممما نتصور بس نحن السبب نعم نحن السبب ضخمنا الامور وكبرناها وصرنا ندقق في كل شي واوجه للاخت هل انا موجوده ... الله يخليك كفاك بحث عن المرض واسبابه دخلتينا ودخلتي الاعضاء بمتاهات خصوصا الموضوع ذاك الي يخلط بينه وبين الانفصام ... ماله علاقه ابداااااااا ركزو معاي باللي بقوله .. المخ اتبرمج على هالحاله على هالشعور.... ومن يتعود المخ على شي ولفتره طويله صعب يصير الوضع بضرب لكم مثال : ولو انه مضحك بس علشان اقرب لكم الصورة عندي قط عودته دايما اعطيه الاكل بمكان معين .... كل يوم كل يوم اعطيه الاكل بنفس المكان بس مره وفجاه حبيت اغير المكان بس القط سبقني للمكان القديم على طول وهكذا كل يوم يروح للمكان القديم مع اني غيرت المكان الين تعود ع المكان الجديد فهمتو ؟؟؟ يعني نحن الي حطينا انفسنا بهالوضع نحن برمجنا عقلنا على هالوضع مالنا بالاسباب والبحث عن الاعراض علينا نعيد برمجة افكارنا وراح ياخذ وقت طبعا ... ومع الاايام بننسى هالشعور المزعج الي هو نتيجة افكار مزعجه لازم نستبدل الافكار بأفكار اخرى ... وانا حاليا اراجع مع اخصائية نفسيه وسالت الدكتور طارق الحبيب بنفسه كان رده بسيط جدا جدا جدا جدا بكلمتين بس " افضل علاج لاختلال الانية صرف الانتباه واعتبار الامر طبيعيا " شفتو كيف نحن مكبرين الامور ومضخمين الامر ... هذي لي 4 سنين وغيري 10 هل صابهم شي ؟ هل جنو ؟ هل ماتو ؟ لا طبعا .... ابي اوضح لكم بس ان الامر بسيط باذن الله والشيطان غرس فينا افكار مزعجة ولدت لنا هالشعور القاسي المؤلم فعلينا صرف الانتباه والعلاج طبعا مو بيوم وليلة لا يبغالنا صبر وتاني ... فاللي مطلوب الحين نسوي جروب مجموعه ونحط لنا جدول علاجي وانا باذن الله بنقل لكم تفاصيل الاخصائية ونصائحها بعد كل جلسه وطبعا الرقية الشرعيه راح تكون من ضمن الجدول .. الي حاس نفسه متكاسل او بيتاكسل او بيضحك الشيطان عليه اقوله استريح مكانك... الي بنسويه مع بعض بسيط باذن الله - الالتزام بالصلوات الخمس في اوقاتها - اذكار بعد الصلاة - اذكار المساء والصباح - الدعاء بالشفاء - قيام الليل لو ركعتين والدعاء بالشفاء - سماع سورة البقره -قراءة القران اي سورة ماراح نلتزم بسور معينه لان القران الكريم كله بركه وخير وشفاء باذن الله هذا من الناحية الدينيه والانسان سبحان الله لما يؤدي الي عليه من فرائض يحس بالرضا تجاه نفسه امممممم الشي الثاني تمارين الاسترخاء قلت للاخصائية النفسيه ماتقنها مية ميه قالت مو مهم كلها تطبقينا علمتني على تمرين التنفس وقالت لي سويه لما تحسي انه الشعور مجننك وخايفه منه باي مكان نسويه غمضي عيونك وقولي اعوذ بالله من الشيطان الرجيم وخذي نفس عميق من الانف واحبسيه لمدة 10 ثواني وبعدين طلعيه من الانف والفم وكرريه ثلاث مرات وتمرين التنفس من البطن ناخذ نفس عميق لحد مانحس البطن انتفخ ونحبسه 10 ثواني ونطلعه من الانف والفم نكرره 3 مرات يعني لما تحسو بهالشعور المزعج و الافكار السوده الله يقلعها يارب هههههههه اجلسو واعلمو هالطريقه المهم نحن يبيلنا صبر وجهد قليل وباذن الله نشفي منه واي حد عنده افادة يطرحها هالجروب نبيه لاساليب العلاج وبسسسسسسسسس فاهمين مابغي احد يشتكي كذا نفتح للشيطان باب انا عارفه وانتم تقرون موضوعي مو مستوعبين وشعور الغرابه مسيطر حاسه بكل شي بس لو نبي رب العالمين بالفعل يشفينا لازم نجتهد مع بعض ونوجه بعض ونساعد بعض فرب العالمين اكيد بيشفينا وبيرفع عنا مابغي يأس مابغي قنوط مابغي احد يقرا قصص الغير وكفايه يكفينا بحثنا عن الحاله بما فيه الكفايه نوعد بعض انه مانبحث في الاعراض ولا عن المشكله ولا عن دواء هنا بس نناقش اساليب العلاج ونقيم بعض بس وانا كل مارجع باذن الله من عند الاخصائيه اخبركم بالللي تقوله وحقيقة استشارت طبيب خبير ايضا وقال الحاله ماتحتاج دواء بالمره فقط علاجي سلوكي معرفي وتبديل الافكار ويحتاج فتره طبعا نحن ياجماعة مو مرضى ولاوصلنا للمرض النفسي ... المرض النفسي اقسى بكثير قولو الحمدلله شي عابر وبيزول مع الصبر والارادة والعزيمه القويه والحمدلله اولا واخيرا على كل شي قولو دائما الحمدلله وكررو انا لله وانا اليه راجعون وقدر الله وماشاء فعل قولوها بنفس راضيه مطمئنة متاسفه لو كان الكلام ملخبط بس ماعجبني الحال ابدااااا ويلا من اليوم ورايح اكتبو وش سويتو وقيمو انفسكم وكل يوم حاولو تدخلو نشاط يشغل العقل يعني عن نفسي ببدا احفظ جزء عم ان شاء الله بنية الشفاء ومن ناحية اخرى اشغل وقتي بشي مفيد بانتظاركم وسامحوني لو الكلام مو واضح اختكم : أميره |
بارك الله فيك
كلام جميل وان شاء الله تكون بداية موفقة |
انا من المدينة وشغلي في ينبع
اليوم اول يوم دوام سافرت مشيت 70 كيلو وما قدرت اكمل كل شوية اوقف على جنب وانزل امشي شوية ارتاح وارجع اركب السيارة وامشي اخر شي لفيت ورجعت عالمدينة والان مره متضايق مني عارف كيف حأسافر وايش اسوي في العمل هيا اعطيني حل ؟؟ حاولت اطنش واقوام ما قدرت |
الحمدلله انا تغديت واصريت ا تغدا وسط الاهل بالعاده اشيل الاكل واكل غرفتي اكلت جبرت نفسي اجلس واكل والحمدلله اكلت ... وطلعت اغتسلت بماء مقري عليه وسدر وصليت لعصر وقرأت الاذكار الحمدلله وحفظت كم سورة
والحمدلله مرتاحه نفسيا .... اقوى من الهلع ؟ انت مشكلتك فقط الهلع ؟ ولا تعاني من اختلال كمان .؟؟؟ بعطيك نصايح عطاني اياها دكتور عن الهلع والحمدلله رب العالمين ماصرت اعاني من الهلع الا نااااااااااااااااااااادر المهم طبقها مثل ماهيه فاهم اخي العزيز طبقها : بعض القواعد المتبعه للسيطره على نوبات الهلع : تذكر ان الاعراض والاحاسيس التي تشعر بها ليست الا زيادة وتضخيم لردود الفعل الجسمية الطبيعيه على الضغوط النفسية بشكل عام ... تمام الي بعدها : تذكر ان هذه الاعراض ليست مؤذية ابدا او خطره انها فقط مزعجه ولن يحدث تطورات اسوا منها ان شاء الله توقف عن زيادة النوبة باضافة افكار مرعبة اليها ومخيفة حول مايمكن ان يحدث بعد ذلك لاحظ مايجري الان في جسمك وليس ماتخاف ان يحدث بعد ذلك انتظر واصبر واعط الخوف وقته كي يمر وينتهي لاتحاربه او تهرب منه تقبله وراقبه بهدةء الي ان ينتهي لاحظ انك عندما تتوقف عن اضافة افكار مرعبة الى مايجري لك فان الخوف يبدا يتلاشى وحده تذكر ان المقصود من هذا التمرين هو ان تتعلم ان تسيطر على نفسك وعلى نوبة القلق دون ان تهرب منها وهذه فرصه مناسبة كي تتقدم في ذلك وفادني جدا هالكلام والنصايح الحمدلله ماعاد احس بالخوف الا ناااااااادررررر طبق هالتمرين واقراه اكثر من مره وبتركيز على فكره قلل من القهوة والشاي ... وان شاء الله يصبح الهلع من الماضي الله يسعدك ويهنيك بحياتك يارب ,,, بسيط الامر لا تقلق ونحن معاك هنا وقبل اي حد رب العالمين معاك ... |
اضافه هناك نصايح من الدكتور نفسه :
- استخدمي لغة اكثر واقعية في حديثك مع نفسك " هذا شعور بالقلق وسيمر مع الوقت فلا يوجد شي سيخرجني عن السيطره ولن يؤذيني شي - طبق تمرين التنفس ( كتبته فوق ) - اعط لنفسك تصريحا بان تشعري بالقلق تجاه مايضايقك واستخدمي لغة حوار الدعم ذلك مثل " بالطبع انا اشعر بالقلق ساتغلب عليه " - لم يمت احدا من قبل بنوبة هلع اطلاقا فيجب معرفة انك لن تموتي من نوبة هلع - توقفي عن الهرب فانت نفسك المكان الامن وانت الشخصية الامنة فلا يوجد داعي للهرب لا يوجد مكان أأمن من نفسك -اذا قرات هذه الطريقه اكثر من مره ونجحت في استخدامها فلن تمري بنوبة هلع مره اخرى وفي معظم الاحيان تتوقف نوبات الهلع تمام |
انا الحمدلله نوبت الهلع ما تجيني الا مره كل اسبوعين يعني نادراً تجيني والحمدلله
لكن تعبني ضيق التنفس وضيقة الصدر اليوم وانا مسافر اتوترت ونملت يديني وبطني نملت واسناني اتقفلت سرت اعض اسناني بقوة اتصلت عالدكتور قلي هذا كله من التوتر مره متضايق مني عارف كيف بكره حأسافر لعملي الله يفرجها ويسهل الامور بالنسبه لإيقاف الافكار بأحاول بس ما بأقدر |
عفوا اختي وش الموضوع لي كتبته انا عن الفصام ؟؟؟
|
مشكور اختي على الموضوع وبجد يبغالنا نتحد يد بيد كي نساعد بعضنا لحل مشكلة اختلال الآنية بس سبحان الله وقت الخوووف الفضيع يهجم عليكي كل انواع الوسوسة
1-من جهة اختلال الانية 2- خوف من مجهول 3-قلق وتوتر شديد 4- وسواس الموت 5-ذكريات الماضي 6- انزعاج من الاضواء 7-زغللة في العيون 8-عدم وضوح الرؤيا الخخخخخخخ باقي كثير لو نذكرها هنا *_" ----- ( * _ * ) حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل مالنا الا ان نتوكل على الله الذي خلقنا بيده الخير وهو على كل شئ قـــــــــــدير --------- اتمنالكم من كل قلبي الشفاء العاجل وادعيلكم من قلبي ان الله يشفيكم ويشفيني |
وانا بعد اشجع الجروب وسانضم اليه ان شاء الله من اجل اننا نتغلب علي المرض باذن الله
|
والله اني كنت حابة من الجميع انهم اسون تخطيط للدماغ لان مجموعة كبيرة من الاطباء والاساتذة في الطب النفسي والعصبي الاوربين يؤكدون ان سبب اختلال الانية هو اضطراب كهرباء الفص الصدغي وكنت حابة ان جميع المرضي المصابون ياختلال الانية عي هذا المنتدي يسون هذا الفحص فهو بسيط وغيرمكلف علشان نعرف ان كان المرض عضوي بحت ومادامت الاعراض نفسها تجمعنا فنري ان كانت الاسباب واحدة وانا جاهزة لاي استفسار
|
اقتباس:
اختي في الله اسلمة قبل كل شئ اتمنالك الشفاء العاجل بس للأسف انتي تحطمين بعض المرضى بكلامك هذه وتجعلين يوسوسون من جديد يعني تخلقين شئ جديد من القلق والتوتر والهلع بدال افداتك انا متابع لاكثر مواضيعك وبعدين ما اظن تركت موضوع لك وما قرأتها انتي مرضك من 7 سنوات او أقل الله اعلم آخر مرة شفتك وانتي كنتي تتكلمين انك رايحة على اوروبا ووتتعالجين بيد الدكاترة اوروبيين هناك على انهم وصلو على علاج للاختلال الآنية وانهم ادرى من اطباء العرررب بما انك تعرفي سبب اختلال الآنية هو اضطراب كهرباء الصدفي في المخ ؟ سؤالي لماذا لحد الآن انتي هنا وما اتعالجتي وما كشفتي عن مشكلتك انا كنت متوقع انك شفيتي بما انك عرفتي مشكلتك اين وعرفتي سبب اختلال الانية زيادة كهرباء في المخ طيب بما انك تعرفي علاج او كشف غير مكلف لماذا ما كشفتي طيب ؟ ولماذا الانتظاررر انا مستغرب منك ولا تجيبين من عندك ايي فكرة ونحنا ننفذها وانتي تأخذين منا التجربة يا اختي بلا كهرباء زائدة بلا صدفية بلا جنون علاجك هو القرآن اقسم با الله العظيم القرآن هو الشفاء لاني انا قبل 10 شهور ما كنت اقدر ارفع رأسي من اختلال الآنية الحمدالله بعد قراءة القرآن الكريم مع الاستغفار والتسبيح والاذكار اتحسنت كثيررررررر كلو هذه بفضل من الله مع اني كنت كسلان ما كنت اقرأ القرآن يوميآ اذا قريت يوم اقطع اسبوع كامل --- لا تجربي القرآن للتجربة اعتبري هذه القرآن هو شفائك بتدبير وترتيل وتجويد وراح تشوفين كيف النتايج خلال اسابيع قولي هل من حالة شفيت من الادوية ؟؟؟؟؟ انا صراحة ما شفت احد من مستخدمي الادوية النفسية شفوا من هذه المرض ولكن شفت ناس شفوا بفضل الله بسبب القرآن الكريم بمتابعة احدى البرامج العلاجية 00``00`00``00`00``00`00``00`00``00`00``00`00``00` مع احترامي لك اختي اسلمة |
شو هذا الهجوم علي يا ما اسم مرضي الله اسامحك والحمد لله ان المنتدي ليس ملكك واسال الله الشفاء لك ولي ولجميع مرضي المسلمين يارب
|
السلام عليكم اخوتي اخواتي المصابين باختلال الانية انا اسفة ان كنت قد سببت لكم اي ازعاج او ارتباك فهذا ليس قصدي وليس هو ماريد كل ماردت القيام به هو المساعدة من خلال تجربتي الطويلة مع المرض وبحثي عنه المستمر اما بخصوص ماقاله الاخ اوالاخت ماسم مرضي من انني اريد ان اجعلكم تجربة فهذ خصمه فيه الله واسال من الله ان يسامحه لان هذا قذف والقذف حرام فانا لم ااتي بشيء من عند واالعلاج كنت قد استخدمته في فترات من الزمن ومفتنعة بالتشخيص وكنت اتحسن بدرجة كبيرة ولكن كنت دائما اتوقف عنه بسبب الحمل والرضاعة اما مايخص القران فانا الحمد لله مواظبة علي صلاتي وعلي الاذكار اليومية وعلي قراءة القران والدعاء واري انه ليس علينا ان نتظر المرض او المحن حتي نقوم بذالك لان هذا واجبنا الديني واسال الله لي ولكم الشفاء العاجل والتوفيق لما يرضي الله وماردت الا الفائدة والله اعلم بما في الانفس ومن الان فصاعدا لم و لن ازعجكم ولم اقترح اي اقتراح
|
كدلك الاخت اميرة صاحبة الموضوع كيف اوهمتك و اوهمت الاعضاء ؟؟ واي موضوع كتبته انا عن الفصام ؟؟
|
اولا السلام عليكم ورحمة الله
ثانيا ايش هذا الي قاعده اشوفه ؟!!! بصراحه زعلتوني منكم ......... هالموضوع مو فاتحته للنقاش وتصفية حسابات مو حلبة مصارعه .... صلو ع النبي واذكرو الله انتم اخوان وخوات هنا بدال ماتعاونو بعض كل احد يبي يتهاوش وبس .. المهم انا متاسفه ع التاخير كانت عندي ظروف وانشغلت بالجامعه والامتحانات واحب اقولكم ان اختلال الانية خففففف الحمدلله والخوف تقريبا انتهى بديت اندمج بالحياة واشعر فيها وماشاء الله تبارك الله بديت اكتسب الوزن الي خسرته واهتم بصحتي وبأكلي خذيت فاتح شهيه علشان يساعدني والحمدلله والشكر لله اولا واخيرا ... نومي انتظم نمت وانا كاني مانايمه من مية عام بديت اسمع الاصوات غير ماستغرب من شي بديت احبببببب ككككككل شي ومتحمسه للحياة جدا .... بتسالون وش سويتي بقولكم حبة دوا ماخذت ابدا ابدا ابدا طول الوقت امي تدعيلي والناس الطيبه ماسويت شي ابدااا الفتره الاخيره كنت ادرس واجتمع مع صديقاتي ونسسسسيت شغلت نفسي اشوف افلام واكلم صديقاتي واجلس مع الاهل واسولف هذا الي سويته بسس على فكره افتحو الشباك الصبح وخلو نور الشمس يدخل للغرفه انا لي شهرين افتحها والاكتئاب اختفى لان قريت معلومه من زمان وطبقتها انه البقاء بغرفه مظلمة لفترات طويله يسبب الاكتئاب وانا طول عمري ماكنت احب ادخل ضوء الشمس بغرفتي واحب الظلمة وانام للعصر والشباك ماينفتح ابدا !!!!! ابدو من بكره نظمو اوقاتكم رتبو كل شي من اول وجديد اصحو من الصبح افطرو شي صحي لان وجبة الفطور مهمه جدا وكثرو من الحليب لان غني فيتامين دال وانتم عارفين ان نقص الفيتامين دال يسبب هلع واكتئاب انا كنت اسهررر للصبح ومرات للعصر وجات على بالي الايه (( وجعلنا الليل لباسا , وجعلنا النهار معاشا )) صدق الله العظيم .. وانا قلبت ايه الكون صار النوم بالنهار والسهر بالليل !! يعني نصيحه مني الي يسهر يبطل سهرر نهائي وراح يشوف الخير اشكر الله سبحانه وحده واتمنى ان يديم علي هالحال ويريح بالي لغاية الشفاء التام باذن الله ... انتو طمنوني عنكم ؟ عسى الله يشفينا جميعا ويريح بالنا .. |
واحب اضيف ايضا اني توقفت عن شرب الشاي والقهوة الفترة الاخيره ففي مره من المرات سمعت دكتور يقول انها تزيد من نوبات الهلع وماهتميت لهاالشي فرحت اخذت كاس مليان قهوة قبل الكلاس وشربته كله !!! وبالكلاس نص المحاضره لاحظت دقات قلبي تزيد تزيد واتعرق من غير سبب مع اني كنت مندمجه مع المحاضر فقلقت جدا وحسيت بخوف واستاذنت من الكلاس وطلعت من ذاك اليوم وقفت عن القهوة والشاي والحمدلله اعصابي ونفسيتي تماااااااااام مرررره لك الحمد يا الله ...
|
مساء الخير ، اختي اميره
انا سجلت في هالمنتدى عشان كلامك عن المرض وانا مثلك مااعتبره مرض ابدد ولا انصح بالادويه لانه بس تخدير انا ماجربت الادويه ، انا احس بهالاعراض ومتى تزيد لما اكون متوتره زيااده مع التوتر والقلق يززيد بقووه انا كنت احس فيه اول سنه كان عادي ضيقه وكذا وكنت اقراء قران او استغفر او انام ولما اصحى يكون راح بس بعدها صارت تجيني هالاعراض كان مو عايشه واحس بالحلم والموت ع بالي ع طوول يعني لو يغمى علي اقول هذا الموت يتعبب صح لدرجةة مادري شقول اختف عني سنه لاني سويت مثل ماتقولين مااعطيه اي اهتمام وكنت في الجامعه واشغل نفسي وكان يروح ويجي نفسه قبل مااشوف كلامك ، بس هالسنه رجع لي واحسه اقووى من قبل انا خلصت جامعه من بعدها صارت لي ضروف ورجع لي لاني قبله اغمى علي مادري من ايش ، انا مابي اايائس بس كل ماقريت عنه ناس تقول بسيط علاجه وناس تقول لا مرض وتطلع كل شي في تخليك تفقد الامل ، قريت عنه وعرفت كل شي ان المرض بسيط وان تقدرين تتخلصين منه بسهوله بعد بس نبي احد يمسك ايدينا ويقول يالله مو يحبطنا انا مابي احبطك ولاشي نبي نتخلص منه كلنا انا عارفه كل شي لما يجي وانه شي عادي واني ماراح اموت منه بس يتعب لما يتكلم معك احد تحسين غريبه مادري شلون ان شاء الله فهمتو علي واذا طلعت صرت اخاف وتجي الحاله . |
منورة بينا يانورة وبأذن الله تشفين منه لان مثل ماقلت لما خفت الضغوط عني والقلق والتوتر ولما اسمع اخبار سعيده حلوة كانت تختفي الحاله واحس ان شفيت ميه بالميه ماعليكي من الي يقول صعب يروح الياس سيطر عليهم وترا الحاله صحيح متعببببببببببببه لكن بسيطه ولاخطيره وان شاء الله هنا نحن نساعد بعض وكثير حالات شفو لا تحاتين بسيطه ان شاء الله
|
ان شاء الله اميره وعندي اراده قويه اني اتخلص منها
انا الحين طالعه للسوق وتجيني الحاله كذا احس اني بحلم عالم غريب احس اني نايمه وراح اصحى ولاقيني بفراشي يعني مو طالعه ولاشي كذا تجيني الحاله واصبر نفسي صار الجوال هو الوحيد اشغل نفسي لين تروح الحاله تمر فجاء وتروح ومرات لا تبقى فيني اني كل اللي عايشتها حلم واعجز اتخلص منها |
السلام عليكم
انا الحاله فيني من عشر سنوات تقريبا ومازالت لكن بسالكم انا يجيني احساس اني بفيق منها فجأه وارجع مثل قبل عشر سنوات بس خايف من شيء اني ارجع بذاكرتي القديمه لان اصارحكم انا عايش مع اهلي وماني حاس فيهم بل ماعرف نفسي فالله يستر |
كيف يعني منت حاسه انهم يتكلمو وانت تفكر ان هذا حلم واذا اجتمعو تحس بكذا
هي الحاله تخليك تفكر وراء بالماضي يعني وانها ماهي قادره تعيش مع الواقع اللي احنا فيه هذا اللي وصلت له مع حالتي |
قصدي اختي ماني حاس بهم انهم اهلي مثل فاقد الذاكررره مافي ذيك العواطف تجاههم وكمان احيان احس اني في حلم خلاصة الهرجه اختي اني مثل اللي مغطى على عقله شيء ماقدرر اتحقق من الواقع زيين
|
اخي فهد مادام الهلع يجييك تاكد ان اختلال الانية لن يفارقك لازم تتخلص من الهلع الاول
|
مثلكم أعاني من اختلال الآنية وياليت تجاربكم في الشفاء وافضل الأدوية المستخدمة... |
اختي نوره حالتنا مثل بعض بالضضضضضضبط مافي اختلاف اخي العزيز فهد لا تخاف اطمن لما يزول الاختلال بإذن الله عادي وتندمج بالواقع على طول ولا بياثر بشي جربت كنت قد شفيت منه فتره اندمجت بالواقع كنت سعيده جداً ولله الحمد ماصار اي تغير وقتها عادي جداً لا تخاف اطمن قالي الدكتور اعتبر هالشعور مثل الصداع مؤقت ويزول صحيح مزعج لكن مؤقت والتعايش معه وتقبله يؤدي للتخفيف منه الى ان يختفي ويزول تماماً ومامنه خطر أبدا أبدا مجرد قلق بس ومثل ماقالت امل يزول ويختفي لو راح الهلع يعني ارتاح من يروح عادي شعور انك ماعارف نفسك يزول وينقلع تحس انك طبيعي ميه ميه ولاكان جاك شي حتى لا تخاف وتضخم الامور بسطها تلقاها تافهه وبسيطه ?
|
افضل علاج له هو التجاهل
|
يالله نفسسسس شعوري بالضبط لي فترة عايشة هالشعور المؤلم وماكنت أدري إن حتى له اسم :( كنت أحسب إني خلاص بفقد عقلي وإن هذي بداية الجنون :( !!
وماعدت أحس بمشاعر حتى لأقرب الناس لي أهلي وأحسهم ناس مزيفين وإني بحلم ومهما سويت من عمل أحس إني أصلا نايمة بسريري وبصحى بأي لحظة وبيكون فعلا حلم .. أحيانا أحس كأني آلة وإني ماعاد أعرف نفسي وأسأل نفسي أسئلة غبية وأتأكد من كل شيء إحساس قاتل حتى الكلمات تعجز توصله ... أختي أميرة99 وينك :( ساعديني !! |
كلي امل كانك تتكلم عن حالتي تماما
الله المستعاااان |
ياجماعه ليش هالاحباط واليأس خلكم متفائلين خصوصا اخي فهد ألاحظ انك مكتئب جداً وحزين وشايل الدنيا ع راسك بسطها ليش هالحزن ابيك تكون متفائل وتحط براسك انها بتزول بامر الله للا تقول فيني من عشر سنوات أنسى المده ولاتحسبها ترا من يزول القلق ويخف بيروح الاختلاال على طول
الله معانا وبأذن الله بنشفى وحالات كثير شفت منها ليش هالياس والتحطيم مشكلتنا نحب نشكي اكثر من ماندور على حل هذا السبب علاجها هو التجاهل وااالانشغال والله احلف لكم انها مجرد افكار لعينه والأفكار تنتج عنها مشاعر هيه فكره وتسبب لنا شعور الغربه انا اذكر مره طلعت مع بنات واندمجنا بالسوالف وضحك ونقاش فجاه حسيت أني طبيعيه ميه بالميه لما انشغلت ومر الوقت بسرعه وماحسيت ولاكان فيني اختلال فتاكدت وقتها انها وساوس وافكار استهدو بالله وارجع وأقول صح انها متتتتتتتتتتتتتعبه لكن مو خطيرررررررره بسيطه ومو مرض حتى عرض وقلق |
هلا اختي امييييره
المعذره مابي اقنط احد بس انا عشت في العشر سنين هذي حياتي وهي معي اختلال الانيه وحسبت ان الحياه كذا طلعت في وهم عايش هذي الحقيقه دعواتك اختي نعم لازم نتفائل والله يعين وييسر الامور |
اقتباس:
بس الحين كوني أتعالج من وسواس قهري وهلع واكتئاب صارت تجيني أيااام ورا بعض وإحساس قووووي جدااا يعني مو بس اختلال أنية إني أحس نفسي مو أنا وإني كأني آلة وأراقب نفسي لا بعد تبدل واقع أحس كل الي حولي مزيفين مو بشر فعليين والعالم كله مزيف أو كأني بحلم طول اليوم لدرجة هاليومين والله ثم والله ماعدت أفرق الحلم من الواقع أببببدا وهالشيء مخليني مشتتة وخاااايفة.. اليوم السيارة تمشي ومن كثر ماأنا حاسة بإني في حلم بغيت أفتح باب السيارة وأطب عشان أصحى من النوم لأن ماعاد فيه شيء حولي يوحي بالحقيقة أبد أحس الي حولي مافيه روح وماعاد عندي مشاعر ولا تواصل مع غيري ولا تركيز ومدري وش أسوي :( !! لما تحسون كذا وش تسوون وهل فيه أحد زيي ماعاد يفرق بين الحلم والحقيقة !!! أنا حاسة هذي بداية الجنون !! عسى مافيني فصام :( ! |
حبيبتي كلي امل بالله اتمنى بالفعل تكوني مثل ماكتبتي وتخلي املك بالله وبس والله انا مافي شعور ما مر علي أبدا ولو اكتب لكم كل شعور مر علي بسبب هالاختلال ماراح انتهي لبكرا كل ماكتبتيه مر علي وأفظع من كذا بعد واحب أنبهك كل من فيهم اختلال وهلع يكون عندهم وسواس وخوف من الجنون والفصام فهذا شي طبيعي نكون خايفين من اي شي للي بوسعنا يكبر الامور يشوفها كبيرة ضخمه وهي بالأساس تافهه بسيطه لازم نعالج السبب الرئيس وهو القلق والتوتر سبب الخوف والهلع والهلع يؤدي للشعور بالاختلال والغربه عن الواقع لما يزول القلق يزول كل شي ان شاء الله سالت دكتور قلت له خائفه انجن مو حاسه بشي أبدا أبدا أبدا رد علي كذا : اختي الكريمة اضحكي وانبسطي لو كانت تسبب حالتك جنون كان سببت وانتهت
بروح اصلي واكتب لكم باقي الحوار |
كلي امل الله يشفيك ويشفيني وجميع المسلمين
اقولها واكررها كانك تتكلمين عني تماما فترات مافرق بين الواقع والحلم لانه بكل صراحه حلم الفرق بينهم حلم نوم وهذا حلم استيقاض فيه دكتور محمد عبدالعليم في موقع اسلام ويب شخص حالتي وسواس قهري اهملته سبب لي عسر مزاج نتج عنه اختلال الانيه والحمد لله على كل حال كم سنه عندك انا 10 سنوات |
أميرة : يادكتور مجنني الاختلال تاعبني
الدكتور : كل ماشعًرتي به اسالي نفسك ماهي الاشياء المحسوسه حولي تلمسيها استشعري الصوت ثم طمني نفسك ان شيئا خطيرا لن يحدث بإذن الله أميرة : مشكلتي اول مايجيني الاختلال اقعد افكر بنجن الحين ماعاد أميز خلاص بيصير شي كارثي الدكتور : تذكرين مرة طلبت منك تمثلين دور انك انجنيتي تمثيلك للدور سيخفف القلق كثيرا لانك ستعرفي على انه لن يحدث شي بإذن الله هذا حواري معاه لما طلب امثل أني مجنونه اول مرة أميرة : كل عام وانت بخير دكتور طول الوقت لغرفتي وماعندي اي نشاط اسويه والاختلال زايد هاليومين لدرجة كله جالسه لغرفتي وأخاف اخرج منها وماصرت اكل وتفكيري متركز بس أني راح افقد السيطرة وانجن وماعاد أدرك واميز هل هذا بسبب نوبات الهلع أخاف تستمر معي طول العمر الدكتور : وانتي بالف خير اختي الكريمه لو فقدتي السيطرة ايش الاشيا الي تتوقعي راح تسويها أبغاك الان تتخيلي انك فقدتي السيطره وجنيتي يلا أميرة : لو فقدت السيطرة بتخيل انه ماعاد أميز شي مابدرك العالم من حولي مابعرف نفسي ولا اهلي وراح أتصرف زي المجانين واتخيل نهايتي مستشفى الأعصاب اصلا تدري يادكتور وانا اكلمك شعور الاختلال ذابحني الدكتور : الحين ابغاكي بسرعه تمثلي انك فقدتي السيطره وتتصرفي مثل المجانين مثل ماتقولين يلا معك ثلاث دقايق وردي علي أميرة : هههههههههههههههههههههه طيب جالسه امثل < مثلت هنا الدور وكله اضحك بس بعد ثلاث دقايق اميره : مثلت يادكتور وبصراحه ماقدرت اكمل من الضحك احس أني تافهه وتخيلت احد يدخل علي ههههههههههههههههههه ومنظري يفطس ضحك الدكتور : مممممممتاز ممممتاز هذا المطلوب الشعور الي انتي خائفه منه ماله حقيقه انتي خائفه من حاجه لن تحصل لك أبدا بامر الله لايوجد شي سيئ سيحدث ان شاء الله أميرة : شكرًا دكتور الله يعطيك العافيه ارتحت الحين وطلعت برا غرفتي وانا بالمطبخ الحين وناويه أطبخ لي شي لذيذ دكتور : الحمدلله الحمدلله ذكري نفسك دائماً ليس ثمة خطر هو خوف بس اميره : ان شاء الله شكرًا دكتور الدكتور : العفو في أمان الله اختي الكريمة اميره : الله يحفظك مع السلامة هذا حواري معاه بالكامل ومثل كلامه كتبته بالضبط واتمنى تستفيدو منه وناويه اكمل لكم باقي الحوارات بإذن الله لان تعبت من الكتابه ع الايباد ههههههههههههه متعب وسامحوني لو فيه خطا |
اقتباس:
تجيني فترات بس أفكار وتجيني حالات فعلاااااااااااااااااا مافيه شيء حولي يوحي إنه حقيقة حلم 100% بس ماأقدر أصحى منه شعور مرررعب مدري وشلون أوصفه ! أنا من سنوات طوييييلة تجيني الحالة زي النوبات وتروح وماكنت عارفه وش هي , بس لي سنتين تقريبا وهي تشتد والفترة هذي بالذاااات واصلة اقصى حدودها شيء غرييييييييييب دوامة عجيبة جالسة أكتب الحين وأنا أسأل نفسي صح أنا أمل الي جالسة أكتب؟ هذي يديني أنا .. ياترا لو أسوي شيء جنوني بينقطع الحلم وبصحى؟ وين بكون فيه؟ بسريري؟ أو إني بغيبوبة من زمن وحياتي كلها وهم .. أشوف أختي تمشي أقول هذي أختي؟ هي تحس؟ طيب ليه هذي أختي؟ ماهي أختي وهي مو واقعية وذا مب بيتنا أنا مب أنا ... والله مدري كيف أوصل الي أحس فيه بس إني ميييييتة خووووووف وأبي أرجع أحس طبيعي وأفكر طبيعي .. بس أتخيل نهايتي إني بمستشفى مجانين لأني أحس إني على وشك الجنون .. حتى العصر نمت وصحيت ومحلمة حلم والحين أتذكر هو حلم ولا فعلا واقع والله إني أخلط الأمور بشكل فظيييع وماعاد أتذكر وش صار وش ماصار والطامة لما أروح مكان مزحوم زي مول أو جامعة أو زحمة طريق تشتد علي الحالة مرررررررررررررة وأحس الدنيا غريبة وماكني عشت فيها من قبل ومدري كيف الناس عايشة .. الي مهونها إن فيه أحد هنا يفهم وش الي أقصده لأن كلامي مخربط وماني عارفه أوصل .. حكيت لأختي مرة عن الي أحس به وتضحك تحسب إني أنكت وفعلا سويت شكلي أنكت لأنها حسستني إنه تفكير مجانين وسكتت والعبرة خانقتني .. أنا الحين أتمنى أستيقظ بأقرررررررب وقت قبل أن أنجن |
متابعة لك أختي أميرة لاحرمك الله الأجر
|
اختي الحبيبة امل لاحظي انه أفكارك هي السبب في هالشعور مشاعرنا وأحاسيسنا بالغربه والاستغراب من كل شي بسبب أفكارنا يعني تجي فكره براسك من انا يوه مو حاسه بشي بنجن تتولد مشاعر نتيجه هالخوف والأفكار وبغالها نعيد نرتب أفكارنا ونستبدلها بافكار ايجابيه وطبعا يبغالنا وقت الين تخف وتزول نهائي لاتخافي اطمني اعرف أشخاص شخصيا تشافو منه ميه بالميه وصارو يضحكو على انفسهم بعد الرععععععععععب الي شافوه بالأخير اعتمدي على الله ولاتياسي يا امل قرات قصه لوحده عانت سنين وصلت الليل وقامت الصبح إنسانه ثانيه معافاة مافيها شي وترا هالعرض ككككككككثير يصابو فيه والأجانب ومشاهير حتى فتحت اليوتيوب ولقيت مقاطع بالهبل لها حتى تصيب طلاب المدارس اكثر شي عندهم لانها ناتجه من قلق شديد عادي لاتخافي وكثير شفت حالات شفو منها وحاطين تجاربهم اشغلي نفسك بالكتابه القراءة الرياضة القران العبادات او اي انشطه وخلك متفائلة دائماً واطمننننننننننننني ماراح تنجني مجرد افكار لعينه من الشيطان يبي يخرب مزاجك وووناستك نحن هنا اخوات وإخوان نعاون بعض تذكري فقط مو انتي لحالك ملاييييين فيهم نفسنا وانا اول ماصابتني فكرت انا الوحيده بالعالم طلعو ملاييين لاتقلقي خصوصا انه في زمن كله ضغوطات ومشاكل ماتخلصصصصص ف طبيعي وقرات مدري وين هنا او وين متذكر انه بأمريكا يعتبرو الي مايزور طبيب نفسي هذا بحد ذاته مريض شي عادي صارررررر بايامناا لاتخافي نحن معك وقبل كل شي الله سبحانه وتعالى معك ومعانه والله يشفينا جميعا
|
أنا أتابع عند طبيب نفسي وعلمته عن الحالة بس هو مركز ع علاج الوسواس والهلع أكثر مع إن الحالة مرررررعبة أكثر شيء !!
طيب أختي فيه أي وسيلة اتصال أقدر أتواصل فيه معاك الله يجزاك بالجنة ووالديك؟ |
اختي كلي امل ما تخافي انا كمان الحالة فيني من الطفولة وتخلصت منها بالتجاهل فهو افضل حل لها طبعا مع الدعاء والرقية وكثرة الاستغفار , هناك تجارب لاخوة تشافو منها بفضل الله ثم الادوية النفسية مضادات القلق والاكتئاب متل سيبرالكس بروزاك سيروكسات ما تخافي هي حالة تنتج عن القلق مو شي خطيير ابدا |
الله يطمن قلوبكم ويمن عليكم بالعافية ..
أختي كلي أمل أنا جربت السيروكسات 3 أسابيع ورحت لطبيب جديد والحين يسحب مني السيروكسات تدريجيا ويعطيني أنافرانيل بدله عشان الوسواس القهري يعني بادية بالعلاج الدوائي الله ينفع به .. مشكلة الأنافرانيل ينووووم نوم كأنك بغيبوبة ماعاد تحسين بالمحيط :/ الحمدلله صحيت من ساعة والاختلال أخف يارب لك الحمد .. والحين بروح أسوي لي قهوة أروق عليها وأشوف دراستي لي فترة أراكم شغلي ماأسويه .. اللهم لك الحمد على كل حال .. أنتم أخباركم حبايبي؟ |
| الساعة الآن 02:04 AM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا