فكرة جديدة
 

ازيكم يا جماعة عاملين ايه
انا لاحظت ان الموسوسين امثالنا لما بيطلعوا اللى جواهم وبيفضفضوا بيرتاحوا خصوصاً لما نكون بنحكى لناس حاسين بيهم
ايه رأيكم نتفق على يوم نعمل فيه حاجة كدة زى علاج جماعى نتكلم مع بعض ونطلع اللى جوانا ويكون يوم ثابت من كل اسبوع او يومين زى ما نتفق
قولولى ايه رأيكم

موافقة انا معاكي

حددوا يوم

و أنا معكم

مثلا نتفق نحفظ شيء من القران 👍

حددي يوم

بيتهيألى انسب يوم بيكون يوم الخميس لأنه بعده اجازة
انا شخصياً فاضية كل الأيام شوفوا انتوا كمان اللى تحبوه

صباح الخير عليكم

انا جبتلك الصفحة بتاعت الاخصائية النفسية اللي قلتلك عليها و بما ان الرسائل النصية مش شغالة , حاكتبلك عنوانها هنا

من هنا

شكراً اوى اوى اوى يا عادل والله بجد مش عارفة اقولك ايه
ان شاء الله تيجى بفايدة

أنا اديتها فكرة عن حالتك و قالتلي خليها تكلمني و ان شاء الله خير , ابعتيلها بس رسالة على الصفحة و احكيلها كل اللي حاسة بيه

بجد جيت فى وقتك انت مش فاهم انا حالتى ايه دلوقتى

ابقى كداب لو قلتلك اني حاسس حالتك عاملة ازاى دلوقتي , لان للأسف -بطبيعة الحال - محدش بيحس بالانسان الا نفسه أو حد بيحيه بجد , و الأخير ده نادر الوجود . انا سامعك بقلبي لو تحبي تتكلمي :)

أخوكي في الله عادل

حسة ان الكلام بيطلع منى بالعافية وكل ماجى اعمل حاجة اقول و ايه فايدتها منا كدة كدة هموت و مش قادرة قلبى مقبوض و خايفة انام

طب خليكي معايا
اكتبي اى حاجة هنا , أى كلام ييجي على بالك , حاولي تفرغي الشحنة اللي جواكي
اعملي شات مع اى صديقة عندك في الفيس او برامج الدردشة

انا اصلاً معنديش اصحاب

كدا انا تفهمت شوية العذاب اللي عايشة فيه , اسراء انتي عايشة في مصر و لا في دولة عربية تانية ؟؟

فى مصر ايوة

انا مش بحاول اتدخل في خصوصياتك و اللهِ العظيم انا بحاول افتح معاكي حوار .. بسألك انتي من مصر عشان بعديها نتكلم على اللي بيحصل في مصر , و الناس المتطرفة من كل التيارات المختلفة اللي حايودينا في داهية .. و بيني و بينك بحاول ألغوش على تفكيرك شوية :)

ههههههههههه
لأ ولا يهمك مفيش حاجة
انا حسة ان فى ناس جاية تكفرنا مش عارفة ليه اول امبارح فجأة حسيت اننا فى افغانستان
وحبة تانيين ما بيصدقوا يشبطوا فى اى مشكلة عشان مصالحهم وحاحة لوحدها تجيب اكتئاب اصلاً

بيني و بينك انا كنت من المؤيدين لحمدين صباحي عشان راجل اشتراكي و بيبحث عن كرامة الانسان و حريته و الكلام ده , لدرجة اني في ايام الانتخابات كتبت اسمه بالبنط العريض على باب بيتنا , المهم حسيت ان حمدين صباحي و غيره عينهم عالكرسي اكتر من مصلحة مصر , انا متاكد انهم عايزين مصلحة مصر , بس رغبتهم في اعتلاء كرسي الحكم اكبر من حبهم لبلدهم .. ففي الاخر بطلت أؤيد اى حد سواء كان اسلامي او ليبرالي , بقيت بأؤيد عقلي بس , أنا كعادل أؤيد عقلي و بقتنع بللي عقلي بيفهمه , مش حادي الفرصة تاني لأى حد يستغلني و يوجه تفكيري لمصلحته الشخصية , على فكرة انا مش عشاق ابراهيم عيسى و يسري فودة .. بس ابراهيم عيسى بموت فيه و بالرغم اني بحبه جدا , بس فطست من الضحك لما قالوا عنه : شوال القطن ابو حمالات يوم الجمعة اللي فات .. بس هو مارحمهمش النهاردة .. فكرتيني بالست اللي اعلنت اسلامها على المنصة و قالت اشهد ان لا اله الا الله .. على اساس انها كانت كافرة قبل كدا .

براڤو عليك على فكرة
انا اه منتخبتش حد بس كنت عايزة شفيق يكسب ولما مرسى كسب قولت يللا اهو راجل بتاع ربنا انما بعد كدة بدأ يظهر فى قراراته ولائه وانتمائه لجماعته اكتر من البلد والناس اللى بقت مسئولة منه اتركنت على الرف وبقى بيهتم بغزة اكتر منهم
جايبلنا حكومة رئيسها معندوش اى فكرة عن الادارة فاكر انه قاعد فى كشك وكل حاجة يقولك النظام البائد
نظام ايه الله يحرقكوا اومال انتوا جايين ليه مش عشان تصلحوا اللى عمله ؟
ابراهيم عيسى بقى انا مكنتش بحبه ابداً بس بعد حلقة الجمعة اللى قبل اللى فاتت مبقتش افوتله حلقة بجد مشكلة
كل الاعلامين دلوقتى جالهم صحوة ضمير وفاقوا مش عشان شايفين الصح
بس عشان ماشيين مع التيار الناس عايزة اللى يهاجم الحكومة لأن لو فضلوا يزوقوا فى الكلام نسبة مشاهدتهم هتقل والمعلنين يسحبوا اعلاناتهم ومش بعيد القنوات تستغنى عن خدماتهم
وفى كل الحالات الناس هى اللى حقها متاكل

كلامك ريح بالي جدا .. الواحد بيتنشق انه يلاقي حد بيفكر بمخه مش بمخ غيره .. و اللهِ يا إسراء انا ارتحتلك لله في لله :)

أنا حاستأذنك لأني مضطر أدخل انام , يومي ملخبط بقى .. شفتي حد بينام 6 الصبح :)

تصبحي على خير و هنا , يا إسراء :)

انا زيك بظبط يومى ملخبط
انفضل طبعاً تصبح على الف خير ان شاء الله

نسيت أقول لك ... لا إله إلا الله :)

سيدنا محمد رسول الله

غيرتي جو يا إسراء بالكلام عن أوضاع مصر

انا باشاركم الحديث مع اني ما اعرف اي شيء عن أحداث مصر الحالية

بس انا أتوقع و بإذن الله أن مصر رح يكون لها في المستقبل القريب شان عظيم

وراح تكون من افضل البلاد

مش عارفة بس انا بيتهيألى الوضع هيطول كدة لأن اللى مسك الحكم كانوا بيخططوا من 80 سنة يمسكوها ومعندهومش فكرة عن الادارة مالص ونصهم كان فى السجون اصلاً تخيلى

صباح الخير عليكم

صباح الخير يا حبيبي زوزي .. أخبارك ايه النهاردة

اهلا اسراء عاملة ايه النهاردة

اهلاً عادل الحمد لله بس خايفة شوية

انت عامل ايه

الحمد لله :)
هو مفيش هنا شات خاص بالمنتدى ؟

مش عارفة والله
مش بفهم فى المنتديات غير انى اعمل موضوع وارد وبس

جربت أطلِّع، وأفضفض، وأرتاح

لكن للأسف: صار معي غير الذي يسمى وسواس الموت، صار عندي وسواس الفضفضة، عندي فوبيا من الفضفضة، وممكن تفهمون قصدي