في هالحالة هل احتاج دوا يادكتور رعد ؟
 

السلام عليكم ورحمة الله وبركاته
كيف حالك يادكتور رعد
ابشرك يادكتور انا طيبة ان شالله ومتفائلة لكني امر بظرف عاطفي يخص الزواج ولا استطيع البوح باكثر من ذلك لكني اصبحت شخصية جادة ومزاجية والشجن يغلب علي وكل مره احس تخنقني العبرة ونا بين الناس احس بالحنين للجلوس لوحدي احس بارهاق التلفاز عفته وكرهته الاب توب من شهور مافتحته والواتس تو حذفته انا ما احس بكتئاب الحمدلله لكن ضغط علي وارهاق وشايله هم واشياء حتا اهلي ما بحت لهم فيها مدري بهالحاله فيه شي يعدل مزاجي ؟ محب اكون حزينه وكل مره دمعتي تنزل الحمدلله اقرا قران ومحافظة ع الاذكار بس جد انا اعاني ؟

عليكم السلام ورحمة الله وبركاته

انا بخير عساكي بخير يا طيبة
الله يبشّرك بالخيرأختي عواطف
وسلامة قلبك، ما تشوفي باس، يارب يفرّج عنك ويطمّن قلبك

اللي ذكرتيه اختي الكريمة هي اعراض اكتئاب غالبا
وخلينا بلاش نقول اكتئاب لأن كلمة اكتئاب بحد ذاتها تجيب اكتئاب
لكن خلينا نسميها انخفاض في المزاج أو تعكّر في المزاج

طبعا انتي سبق وجربتي البروزاك، وحسب ذاكرتي انك تعبتي في البداية من الصداع لكن حسيتي بفايدة منه
حتى لو ماكانت ذيك الفايدة الكبيرة

فيه دوا اسمه لاميكتال، وهو مثبّت للمزاج ومانع للاكتئاب، يمنع انخفاض المزاج ويساعد على القدرة على الاستمتاع
ايش رايك تستخدميه فترة مثلا 6 شهور؟
طبعا هو يكون مفعوله افضل لو اخذتي معاه دوا زي بروزاك
وأنا هذا رأيي، فإيش رايك؟

لاميكتال ؟ ! مشكلتي احتار واخاف طيب انا بسالك هل هو زي البروزك ؟ وبسالك هل السبيرام حلو؟ انا الاخ ابو علي ايام غرف الدردشة حاول يقنعني بالدوا ونا رافضة لكن الان بحاول اخذه حتا تهدا نفسيتي وان شالله باذن الله مايخلص دور العلاج الا ومشكلتي انحلت؟ اما مسالة اكتئاب لا هو مش اكتئاب هو حزن لمواقف حصلت لي عبر سنين واختتمتها بمواقف قاسية من العام الماضي ولا زالت .

لا ي حنين، لاميكتال يختلف عن بروزاك وسيبرام

لاميكتال مثبت للمزاج
وبالنسبة لك اسمك عواطف ومسمية نفسك حنين، ولاميكتال يقلل العواطف والحنين :)

كثيرين وكثيرات اختي الفاضلة يكون سبب تعبهم النفسي وحزنهم او تكدر مزاجهم هو رهافة عاطفتهم.
ولاميكتال لايسبب تبلد وانما يعطي قوة وثبات في المواقف العاطفية

عموما سيبرام وبروزاك هي مضادات اكتئاب وبالتالي تحسّن المزاج. ويتفوق سيبرام على بروزاك من ناحية انه لايسبب قلق
ولا أرق، لكنه ممكن يفتح الشهية للأكل أكثر من بروزاك

لاميكتال له مشكلة واحدة هي انه لابد ان تأخذيه بتدريج بطيء كي لايتسبب في مرض جلدي خطير. يعني لو أخذناه على طول بجرعة
عاليه فممكن يسبب مرض جلدي خطير كنوع من الحساسية التي ان لم تعالج بسرعة قد تؤدي للوفاة
لكن لو اخذناه بالتدريج فلا يوجد منه خطر، لأنه نادر جدا جدا جدا ان يتسبب بمشكلة، ولو تسبب فستكون مشكلة بسيطة وفي
بدايتها وتنتهي بمجرد ايقاف الدواء

النقطة الثانية في لاميكتال هو ضرورة الانتظام عليه وعدم ايقافه الا بالتدريج البطيء ايضا لكي لايسبب تشنجات

يالله قولي لي ايش رايك؟ لو بانصحك بقول جربي سيبرام أول رغم اني متأكد ان لاميكتال لواخذناه بالتدريج
فهو آمن وانه هو الأفضل

لا لا لا قردي مابيه تراني خوافه ماحب المغامرة قبل اخذت علاج من مستشفى الملك فيصل التخصصي بغى يذبحني لا والله معليش ما ابيه واشكرك علي كلامك وتعليقك ضحكت بالبداية انخرعت بالنهاية *^▁^*

ههههه
سلامة قلبك من الخرعة

طيب بلاش لاميكتال، ماقلتي رايك في سيبرام، اعتقد انه بيساعدك وما منه مشاكل

طيب ابي اصلي استخارة .

أوك،، الله يوفقك ويكتب لك اللي فيه خير،، وبانتظارك

معليش ابي كل اعراضه الجانبيه وفوائده وكل شي حتي السعر هههه

طيب ولا يهمك

الدوا اسمه العلمي سيتالوبرام citalopram

وفيه منه انواع من انتاج شركات مختلفة أشهرها الشركة الأم واسمه سيبرام

وسعره عند الشركة الام (بإسم سيبرام) هو تقريبا 100 ريال للعلبة 28 حبة

وعند شركات أخرى عربية تختلف الأسعار بين 50 و 100

الدوا هو من نفس فصيلة بروزاك وسيروكسات واسمها مثبطات اعادة امتصاص سيروتونين

وهي ادوية تقوم بزيادة الناقل العصبي سيروتونين وهو المسؤول عن المزاج لدى الانسان

وبالتالي هي ادوية تعالج الاكتئاب بأنواعه والقلق بأنواعه والوسواس

اغلب هذه الادوية تسبب قلق في بداية العلاج الا سيبرام وسيبراليكس وسيروكسات

هذه الادوية قد تسبب زيادة نشاط مثل بروزاك ولوسترال أو خمول مثل سيروكسات أو لاتؤثر على النشاط

لا بزيادة ولا نقص، مثل سيبرام وسيبراليكس وفافرين (مشكلة زيادة النشاط هي الارق ونقص النشاط هو كثرة النوم)

الاعراض الجانبية هي : جفاف الفم (يحدث بكثرة مع بروزاك وسيروكسات ونادر مع سيبرام وسيبراليكس وفافرين)

القلق والارق (يحدث في بداية العلاج ببروزاك ولوسترال، ولا يحدث مع سيبرام)

زيادة الوزن نتيجة زيادة الشهية للأكل (تحدث مع كل الادويةولكنها تقل مع بروزاك ولوسترال وتزداد مع سيروكسات وتقريبا

لاتزداد كثيرا ولا تقل مع سيبرام)

زيادة التعرق (تحدث مع كل الانواع بما فيها سيبرام) ، هذي هي اهم الاعراض الجانبية

الله يوفقك وين ما وجهت اشكرك من كل قلبي لكن بسالك قدااامي ان شالله حج هل تنصحن اخذه هالحين ؟؟؟

واياكي ياغالية، والعفو ياطيّوبة تستاهلي أكثر من كذا

ايه، ممكن تبدئي من اليوم، الدوا خفيف من ناحية الأعراض الجانبية
وماهو زي بروزاك، يعني مابيسبب لك ازعاج في البداية

وحج مبرور، الله ييسّره لك ويقبله منك ويجعله بداية خير لحياة سعيدة

وترى انا شغال في النقل الاسعافي في مكة، يعني لو جاكي دوخة من غير شر لاتقلقي خخخخ
ويوم عرفة بيكون عملي هناك في عرفة وباكون انا وممرض معانا سيارة اسعاف
اذا تعبتي من المشي علميني وننقلك بسيارة الاسعاف من عرفة لمزدلفة، بس لاحد يدري ههههه
المشكلة هي بس كيف نحصّلك في ذيك الزحمة، لا انترنت ولا نفساني شغال ولا جوالات شغالة

مافي الا نجرّب الحمام الزاجل خخخخخ
الله يعين بس

قريت ردك ونا بالسيارة لدوام والان في مكتبي وللحين وفيني الضحكة من كلامك الله يسعدك خلاص اشاور اخوي واميرة ام مشاري ومايصير خاطرك الا طيب هههه

بس الغريب انت دكتور نفسي ليش يخلونك مع الاسعاف

اما الدواء الله يستر من سنتين ماخذت ادوية واخاف اتعب .

ههههه،، دوم الضحكة ياارب
ماشاالله أخوكي بيحج معاكي؟ الله ييسّر لكم جميع ويتقبّل منكم

والله يحييكم جميع ، مع ان سيارة الاسعاف صغيرة، لكن ان ماوسعتكم توسع قلوبنا
وزي مايقولوا السودانيين: الزحمة فيها بركة، والاسعاف يشيل 2 بدون اي زحمة، واحد منجطل والثاني جالس
ونقدر نحط معاكم حاج او حاجة من كبار السن، نكسب فيهم اجر يعني <--- واحد مصر جدا يقلبها اوتوبيس خخخخ


لاتشيلي هم الدوا ي طيبة، بيكون مناسب وسهل ان شاالله

بالنسبة لعملنا في الحج هو اسعافي، ويعطونا دورات اسعافية متقدمة
لأننا في الأصل اطبّاء والمفروض اننا نعرف نتعامل مع الحالات الاسعافية عند الضرورة

ايه اخوي هو الاساس اجل كيف ههههههه مع اختي وزوجته طبعاً كلهن اصغر مني وانحف مني هههههههههه يعني لو اغمي علي مشكلة صحيح وزني مو كبير لكن هم اوزانهم قليلة ههههههه واشكرك على رحابة الصدر ماتقصر والله
اما الدوا والله اذا اشتريته بخبرك ان شاء الله اليوم .

ههههه،، العفو أختي الغاااالية، تستاهلي كلللل خير

أوكي،، بانتظارك

تحياتي

معليش دكتور بوقت الحج خايفه يتعبني لان معي علاج السكر وعلاج اخر اخاف يتعارض مع بعض ؟؟ وكذلك باخذ بسكوبان وكلارتين

ماشاالله النت اليوم سريع، مع انه مع العد التنازلي للحج توقعت انه يصير ابطأ

ممكن تكوني الحين بالطائرة وفي طريقك لمكة

الله يسهل دربك ويتمم لك على خير

اوكي، خلي الدوا اذا رجعتي بالسلامة

ربي يوفقك

هههه لا الان بقفل جوالي ونستعد لذهاب ان شالله الله يسهل جد احساس فرح يخالطه هم من الزحام وكذلك فقد امي عسا ربي يتقبل مننا وجزيت خيرا وان شالله ارجع من الحج ما احتاج ولا دوا *^▁^*

استودعتك الله مع السلامة .

في امان الله وحفظه أختي حنين

استودعتك الله الذي لاتضيع ودائعه :)

دكتور كم المدة اخذ سيبرام وابي وصفه منك .

الله يازين هالموضوع يذكرني بشعوري بالحج .

الان العلاج بحوزتي يا دكتور والنشرة كلها انجلش قوته 20 ملجم سعره 114 هذا هو العلاج؟ وابي تشرح لي كيفيه تعاطيه من فضلك .

طيب حلو،، يارب يكتب لك فيه الشفاء

الطريقة غاليتي هي نص حبة مرة واحدة مساءا يوميا لمدة اسبوع
ثم نرفعها الى حبة مساءا يوميا ونستمر عليها ونشوف بعد 3 اسابيع ان كان نحتاج نزيد الجرعة او نكتفي بحبة واحدة

طبعا بديت لك بنص لأني اعرف انك تتأثري بزيادة بالادوية حسب معرفتي لك وتجربتك مع بروزاك
والا ممكن نبدأ مباشرة بحبة

لا تشيلي هم اعراض جانبية. سيبرام اقل اعراض بكثير عن بروزاك
ولو سبب لك ارق في الليل خذيه الظهر بعد الغدا

ممكن يسبب زيادة في التعرق ، لكن لا تقلقي، حنا مقبلين على شتاء زي مانتي عارفة

أي شيء اختي عواطف انا حااااضر وفي اي وقت،، انتي بس آمري أمر

إي والله صادقة،، رجعت لي الذكريات رغم الكرف اللي انكرفناه بس كان حلو

ههههههه حلوة الكرف الي كرفناه ونا وش اقول ماشالله صرت عداءه قطعت كيلوات مدري ليه رايحين بحملة اذا دام نقطع هالكيلوات بس استفدت نزل وزني مرررره ،


اشكرك دكتور ع الوصفه يعني شورك ابدا بنص حبه ؟

معقول يسبب ارق ؟ اهم شي ما يسمن؟

ما جاوبتني دكتور تاخرت رحت اخذت الحبه اخر النهار بس من بكرى ان شالله ينفع اخذها الظهر ؟

آسف اختي عواطف ع التأخير، ماعرفت ان في مشاركة ثانية

ايوة تقدري تاخذي الحبة بأي وقت ، اهم شي حاولي قدر الامكان تاخذيها يوميا في نفس الوقت
زايد ساعتين او ناقص ساعتين مو مشكلة.

بعض الناس تسبب لهم ارق ونشاط فساعتها الافضل تاخذها في النهار (الصباح)
وبعض الناس تسبب لهم نعاس، وساعتها بالليل قبل النوم افضل
وبعض الناس وهذا نادر، تسبب لهم نعاس مع أرق وهنا يصير اخذها الظهر او العصر او المغرب افضل

جزاك الجنة ووالديك .

صارلي الى امس اكل نص حبه 8 ايام واليوم التاسع اخذت حبه كامله كذا تمام ؟ والله يكتبلك الاجر.

انتظرك الله يعطيك العافيه.

تمام التمام ي حنين
ابدئي حبة يوميا واستمري كمان اسبوع ونشوف بعدها هل نزيد الجرعة لحبتين والا نكتفي بحبة

سامحيني غاليتي على التأخر في الرد، ماشفت كتابتك الا الحين
ربي يسعدك حنين، فديت قلبك،، وليتني اشيل كل التعب عنك :)

الله يجزاك الجنة وان شالله ما احتاج زيادة ولا تشيل ولا شي الله يعينك كل الاعضا ودك تشيل عنهم كذا بنقطع نفسك انت شايل عنا كثير ولا تقصر وحليت ازمات من بعد الله وانا ابشرك الان هدوء و شامخة رغم الانكسار وراضية بقضاء الله وقدره وما العلاج الا طرق سبب من الاسباب وجزيت عني الخير كله دقه و جله.

صورة عيالك ماشالله شي شكلهم حلوين ماشالله الله يحرسهم يارب.