|
(((((( عايلة نجوم نفساني ))))))
في الصالة ( غرفة المعيشة ) ( بعد صلاة العشاء )
ام احمد ( امنا ) جالسة معنا في الصالة .. تصب لنا القهوة وتدعي لنا .. جدنا البتار : كح كح كح ولدي صوت الشباب ! صوت الشباب : هلا جدي امر . البتار : وين اخواتك ؟! صوت الشباب : ياطويل العمر .. واهمة في غرفتها تصحح الدفاتر ، ومثايل جالسة مع واهمة تقرأ كتاب جديد اسمه " عندما يهطل المطر ،، تبتل الشوارع " ،،، والخيالة هذي هي جالسة تقطع كوسه هي وهمس الغمام ..اما اساهير ولمياء هم بس سمعوا ان فيه تقطيع كوسه و راحو غرفتهم .. والقريشية في المطبخ . وتابط شرا هذا هو معي نسولف ،، وقيس بن الملوح اللي بجنبك يقرا الجريدة .. البتار : صوت الشباب الله يحفظك تدري انك ازعاج .. الحين اقولك وينهم قل موجودين وخلاص ،، لازم تسوي تقرير كامل ..الله يهديك بس . صوت الشباب : امين كل اللي في الصالة طبعا لقوها فرصه يضحكون على صوت الشباب .. تابط شرا : يمه ام احمد : سم ( بفتح السين ) تابط شرا : مساك الله بالخير ام احمد : انجز انجز .. هات من الاخير تابط شرا : ودي اعرس ومره ثانيه الصاله تعج بالضحك قيس بن الملوح : احلىىىى كبرت يابو شرشر .. صوت الشباب : ايه اكيد كبر ماتشوف الشنب اخضر .. ام احمد : ايوه .. وما قلت لي كم تبي حبه .. ثنتين ولا ثلاث .. البتار : طيب وين تبي نحطهم لك ، في غرفتك ولا بتحطها في السيارة .. قيس بن الملوح : تصدق تابط انها فكرة .. صوت الشباب : والله صدق فكره .. لو ناخذ اخوات بعد .. يمكن اهلهم يراعوننا شوي . ((( فيه ضحك جاي من برى الصالة ،، والله اعلم اذا ماخاب ظني انها لمياء واساهير ))) ويدخلون فعلا الثنتين وهم يضحكون لمياء: انا اشوف لو نجيب لكل واحد حبة ،، يعلقها في مراية السيارة .. صوت الشباب: انتي اطعلي منها وهي تزين .. البتار : لمياء انتي واساهير تعالو تعالو .. (( ويقربون منه وهو يقول الله يهديكم ااذا اخوانكم يتكلمون جد لا تتريقون ،، قربو الله يهديكم وهم يقربون ...... ويمسط كل وحده منهم بالعصا اللي معه )) تابط شرا : خلصتو تريقه ؟! اصلا الشرهه علي انا اللي فتحت الموضوع .. صوت الشباب : قلت لك لا تتكلم في هالموضوع وفيه بنات .. الخيالة : تعال انت وياه الله يهديكم نمزح معكم ، بس من جد انتو لسه طلاب كيف تبون نخطب لكم ؟! همس الغمام : يعني ترضون احد يصرف عليكم انتو واهاليكم ، تابط شرا : لا ما ارضى طبعا . قيس بن الملوح : ياعمي طير بلا ما ارضى ، انا راااضي المسالة فيها زواج ، والحمدلله الفلوس حلال ، ومؤقتا الين اتوضف ،، عادي والله ما عندي مانع . ((( جت القريشية من المطبخ ، وواهمه ومثايل من الغرفه ،،،،، كانهم شمو ريحة تريقه وضحك ))) صوت الشباب : لحظه لحظه انت وياه اللي يسمعكم يقول بس الوالد ، ينتظر بس موافقتكم ،، هو اصلا ماراح يرضى ومستحيل يعطيكم مصروفكم هذا زواج موب لعبة .. يعني الحين الحرام اسهل من الحلال . مثايل : طيب يا صوت الشباب هذي الحياة وظروفها والمجتمع و عاداته ، صوت الشباب: صادقه ، وانا ماقلت شي اقول فعلا صار الحلال صعب اصعب من الحرام .. واهمه : ومن قال محد بيمولكم ،، انا مستعده اعطي كل واحد الفين ، يعني راتبي كله مستغنية عنه ،، الين تتوضفون بعدين ترجعونها لي تقسيط .. صوت الشباب : الله اكبر الله اكبر .. هذي الاخت ولا بلاش ، واهمه : لا يكثر ،، يالله عطوني مواصفاتكم وانا ومثايل بندور لكم .. تابط شرا : انا عني ابيها طويلة ، وعيونها وسيعه ، وشعرها طويل ، ومشيته مثل مشية الغزال، وعيونها عيون المها، وشعرها شعر فرس اصيله ، وكلامها تغريد البلابل .. صوت الشباب: ارفق ارفق .. حديقة حيوان ذي ميب بنت .. وبعدين من زينك اللي يسمعك يقول وائل كفوري .. حوش الشعر عن عينك حوش .. تابط شرا : انت خلك في حالك اذا جا دورك تكلم ... واهمه : ماعليك منه .. ان شالله القاها لك .. وانت ياقيس ؟؟ قيس : ابيها ... حكيمة ، رزينة ، هادية ، سيدة منزل ، مبتسمه ، حنونه ، مؤمنة ، متدينة ، خجولة ، مطيعه .. صوت الشباب : وانت بعد هد السرعه شوي هذي مواصفات قاضي ولا بنت ..الله يرضا عليك قيس : ياخي انت ملقوف ؟ بلا لقافه انا ابيها كذا .. اهم شي البنت توافق ... لمياء ( تقطع كلامه ) : لا لا ، وش ذا الشرط التعجيزي لازم توافق ؟ صعب صراحه . القريشية : اكيد بتوافق اجل بيسحبونها بشعرها .. مثايل : خلوه يكمل لا تقطعون كلامه .. قيس : خلاص بس قصدي اهم شي توافق تعيش معي في ملحقنا .. اساهير : عاد قيس لا تبالغ .. وين تلقى وحده ترضى تعيش في ملحق .. الا غير سعودية صوت الشباب : احلى غير سعودية ، احسن لك تعشيك فتوش وتغديك محشي ،، وتقولك : تقبر قلبي قيس : اولا اسمها تؤبر ألبي ،، موب تقبر قلبي ،،،،، ثانيا على عيني وراسي بس انا ابي سعودية .. تابط شرا : مصدق انت من بلادي سعودية .. عطرها الورد والكادي .. يارجال كلهم بنات .. قيس : المهم مابي الا سعودية .. دورو لي وانشالله تلقون . واهمه :انشالله ، هاه انت يا صوت الشباب نسمع انت وش تبي ؟ صوت الشباب : اول شي يا جدي البتار ،، انا والله ما اتكلم الين يقومون همس الغمام ، والقريشية ولمياء .. قاعدين بس يتريقون البتار : يالله بنات قومو الحين قدامي .. ( ويقومون البنات ) البتار : خلاص اجلسو لا تعيدونها صوت الشباب( حااااااااقد ) : انا ابي البنت تكون عاقله ، ميب من بنات الموضه ومطاردة الاسواق ، وتكون مطيعه واعية لحقوق الزوج والاولاد ، واهم شي ما تشتغل برى البيت .. لمياء: لقيتها .. لقيتها .. لقيتها ام احمد : وش اللي لقيتيها بسم الله علينا .. لمياء : العروس المناسبة لصوت الشباب . صوت الشباب : هاه بشري منهي ؟ وش اسمها ؟ بنت مين ؟ لمياء: حجابها ، حجاب امهاتنا .. صوت الشباب: ماشالله لمياء : طول ماهي جالسه ، تستغفر وتذكر الله وتدعي .. صوت الشباب : منهي ذي ؟ ماشاء الله لمياء: وكل اهلها يحبونها .. صوت الشباب: لمياء خلاص بلا استفزاز بالله منهي .. الله يحفظها لالها؟! للاسف لمياء رفضت تقول لصوت الشباب الا في الحلقة الجاية ،،، انتظرونا عشان نعرف من سعيدة الحظ ؟؟ نشوفكم على خير ،، :) |
:rolleyes:
|
تحياتي لك اخي صوت الشباب000 وحمد لله على السلامة
رائع يااخي حسن الدعابة 0 ود مك فعلأً خفيف 0 وأنا بانتظار الحلقة القادمه انشاء الله0 |
ها ها ها ها ها ها ها ها ها ها
ها ها ها ها ها ها ها ها ها ها :D :D :D :D :D :D الله يا خذ ابليسك الكل جالس يطالعني وانا اضحك ويقولون لي وش فيك ...... ها ان ابا وحده من حديقة الحيوان وانت تبا الملتزمه ها بس ماعلي لو لا انك ياي من غيبه طويله لما سا محتك امزح يا اخويه... انت خطير الله يعين البنيه تعيسة الحظ الا بتاخذها;) تحياتي لك يا زعيم:) |
" عندما يهطل المطر ،، تبتل الشوارع "000!
كتاب من تأليف المُبدع : صوت الشباب 00 :cool: |
هع هع هع
أقول حشا ..كم عددنا ..ماصرنا عائلة صرنا مجتمع :D بعدين فاتك شئ يا ابو الشباب اختنا واهمة وخياله متزوجات يعني المفروض انهم في بيت رجاجيلهم وش جابهم عندنا بس يضايقونا هم وبزارينهم (( عاد أنا خالت بزارينهم ترى :D )) ...... بعدين تراني سرقت كتاب مثايل بأٌقراه ...... بعدين وهذا الأهم منيب قايلتلك منهي البنت حتى لو في الحلقه الأخيره لا تحاول معي خلاص منيب قايلتلك منهي يعني منيب قايلتلك منهي :32: إلا إذا لبيتلي شرط .. تعرف وشو الشرط لا تعرسون يا ملحطين وللي يرحم والديكم تسولنا زحمة في البيت فوق الزحمة هذي :D |
قويـــــــــــــــــــــــــــــــــــــة يا ابو الشباب
والله انك مشروع مؤلف ناجح تنفع تالف في شهر رمضان مسلسل ونسميه عايلة منتدى نفساني بما ان طاش هذي اخر سنه له وش رايك . شفت المتزوجات وشلون يفكرون بس انت انجز وخلص المسلسل وابد ما تدري الا يجيك اتصال من اسامه انور عكاشه يسلمك الخلافة:11: |
ماشاء الله تبارك الله
صوت الشباب النفس عندك طويل ماشاء الله انا ابي اعرف كم ساعة جلست تكتب القصة على كل حال حلوة وبعدين انا ولد الشغالة ماجبت أسمي:37: صحيح اني جديد بس يعني شوف لها مخرج لوووووول مع عسوووووول:33: والله يحفظكم ويرعاكم:37: |
يؤؤؤؤؤ وش جايبني في بيتكم يا صوت الشباب ؟؟:)
ورجلي وينه؟؟ وعييلي ؟؟ أقول تراني البارحه قدمت إستقالتي من الوظيفه يعني دورولكم وخيتن غيري تصرفكم شف صفو الحياه تراها موظفه مثلي :D إلا أقول كل مؤلف وله هدف من ورا المسلسل , إنت وش هدفك ؟؟ :) :) لا تنسى حط دعايات في وسط الحلقه حتى تجذب القراااااااء :D لممووا : بقعد عندكم في بيتكم شهر ومعاي جيشي كللللللللله :) |
صوت الشباب .. تابط شرا
" خلوا طاري العرس الحين وتعالوا العشا جاهز لان الكوسه بصراحه انهرست :D وانا احضرها عالسفره وبعدين اشيلها واحميها من جديد .. وبعدين جدي البتار المفروض يتعشى وينام بدري لان السهر مب زين لصحته:( وسوالفكم يبيلها قعده ولاّ ؟ " اقول .. السفره ماكان عليها كوسه وبس:eek: لااااااااااا كان فيه فطير ومرق بعد " تدرون لان حلو الواحد ينام خفافي " |
انتهز موضوعك لابداء اعجابي بما تقدمه .
وكي ابارك لك الشهر الكريم الله يكتب لنا فيه صالح الاعمال. واقول غيابك كان موحش لنا حفظك الله عز وجل. |
اشكركم كلكم بس لا اصدق نفسي بكره وانا عند انور عكاشه يصور لي مسلسل
اما المتزوجات فهم جايين يرمضنون عندنا ( يعني يقضون رمضان مع العايلة الكريمة) وعيالكم في الحوش يلعبون سكري يا ورده فتحي ياورده اما رجالكم خلوهم يسجلون معنا بعدين نتفاهم نجي للاهداف ،،،،،،، صدقوني هدفي مو بس اني اكتب اي كلام ، ولا استخف دمي ، ولا لفت نظر والهدف لا يمكن ان اكتبه لكم لاني اذا كتبته ما استفدنا من المسلسل ،، ولا يعني عشانكم حكومه تبون تعرفون كل شي ما يصير الواحد يتكلم (( احم احم الظاهر اني بديت اجيب العيد بسرعه )) الله يخلي لنا حكومتنا الادارية الراشدة بقيادة جدي البتار وام عيال اخت لمياء . ;) اما الاعضاء اللي ما جبتهم ترى ادواركم محفوظة ، صدقوني ما نسيتكم خاصة حقين جده الجدد والغائبون الحاضرون جروح تبتسم وصفو الحياة وحمرة الشفق وthe queen وغيرهم بس ابقو معنا فنحن معكم :D عبياني اشكرك وحفظك الله ،،، وافتقادك لاخيك ذلك من طيب معدنك :) يالله خلاص قومو العشاء الضعيفة همس الغمام كل شوي تحميه بعدين نرجع نكمل موضوعنا ونعرف من العروسه رضت لمياء ولا ما رضت |
:D :D :D :D :D :D
ههههههههههههههههههههههه شهالسكربت العجيب يا صوت الشباب ... تؤبر قليبي ويعطيك ألف عافية ... لو مخليني واحد عزوبي ما يفكر بالزواج ألين ما يضبط أموره ....... الله يستر ، أنا حاس أن زواجي بيتأخر واجد في المسلسل وفي الحقيقة هههههههههه |
مرحبااااااااااااااااااااااااا قيس بن الملوح..
اقول صوت الشباب فكرة ان ناخذ خوات تراها مب شينه يعني بمعنى اخر واحد منكم يقول لامه تدور 3 خوات و على بركت الله ..... همس الغمام ترى الكوسه مااااااااااالحه شو نمت وانت تحطين الملح والمرقه مالها طعم استغفر الله لازم تتعلمين الطبخ بخبر عليك امي ام احمد .......ام احمد تعالي شوفي بنتج شوفي طبخ بنتج:D تحياتي لكل عزوبي ... اقول قيس لا تفاول على عمرك |
طرقععععععععععععع طرقييييييع <---------( قاعده تشوت عيال أختها واهمة من غرفتها عشانهم حاسوها :D ))
أبو الشباب لعب البزارين واحد طش ثنين طش خلهم يلهون عننا ازعجوا ابونا الشايب البتار :D بعدين كلوا وانتوا ساكتين مفهوووووووووووم لأسطركم وللي مو عاجبه يدخل المطبخ يسويله خبزه فيها جبنه المهم أبو الشباب يالله كمل المسلسل ......الحلقه الثانيه .....ولاتكثر من دعايات الصافي دانون طيب |
أضحك الله سنك يا صوت الشباب00
بصراحه ماشاء الله 000روعة في العرض00وفقك الله |
تـــــــــــــــــم حظر لميـــــــــــــاء لمدة 3 أيـــــام
|
(( على سفرة العشاء ومعنا بزارين واهمه و الخياله ))
لمياء : وبعدين تدري انها ماعندها مانع تتزوج في بيتهم ولا في أي مكان يعني ماتفرق معها . صوت الشباب : واهمه خليها تتكلم . لمياء : خلاص خلاص ،، هذي ياطويل العمر جارتنا عايشة . (( امنا والبنات يضحكوووووون )) صوت الشباب : وش السالفه ؟! مثايل : هذي جارتنا العجوز ، ام ابو صالح . القريشية : بس على وصفك يا صوت الشباب مناسبة. همس الغمام:لا وعمرها ما تعدى 60 سنة يعني لسه صغيرة . البتار : بس ما تلاحظون انها صغيرة على صوت الشباب ؟! صوت الشباب : حتى انت يا جدي ؟ واهمه : انا عندي في المدرسة مدرسة رياضيات لبنانية باسألها اذا تعرف حولها بنات للزواج .. قيس بن الملوح : الله الله لبنانية مره وحده . ام احمد : انتو من جدكم ؟ ولا تمزحون ؟ تابط شرا : اكيد من جدنا يمه ، ليه موب من حقنا نتزوج ؟! ام احمد : اقول تعشو تعشو وقمو نامو عندكم دراسه بكره ، واتركو عنكم هالسواليف ، اذا تخرجتو وتوضفتو ابشرو باللي يسركم . البتار : الله يصلحكم بس ، الواحد يصير رجال قد المسؤولية الزواج موب لعبه هات وخذ وزوجني وزوجتك وخلاص . صوت الشباب : اقول تابط شرا ،، عطني خبز وقرب الايدام شوي قايلك انا من اول ،،،،، هالايام تقدر تسوي شي الا الزواج . قيس : طيب ميب مشكله بس خل الايدام في حاله . انت تمسح اللي حولك ، وتطوف على اللي عندي . صوت الشباب : قايلكم يمدحون الاسواق الواحد يروح ويلقى اللي يبيه بدون تعب . لمياء ( في هالامور تفهمها وهي طايره ، قامت تجيب عصا جدي من مكانه وتعطيه ) البتار ( هو بس شاف العصا ويمسط ابو الشباب على ظهره) : انت ما تستحي على وجهك تقول هالكلام هاه ؟ قيس : استغفر ربك واركد واصبر ترى كل شي ولا الحرام . صوت الشباب : استغفر الله ،، الله يبعدنا عن الحرام بس انا قولك انكم والله تحدون الشباب على هالامور والبنات بعد . مثايل : صدق صوت الشباب ، لو كل واحد يزوج بنته وولده من بدري كان كل المشاكل هذي اللي عندنا خفت كثييييير . واهمه : ولو موب عذر لهم عشان يروحون يعاكسون والرسول صلى الله عليه وسلم يقول " من استطاع منكم الباءة فليتزوج ومن لم يستطع فعليه بالصوم فانه له وجاء " همس الغمام : صوت الشباب ،، تعش تعش صوت الشباب : طيب صبي شاهي وانتي ساكته . شفت يا تابط شرا كلها منك انت اللي فتحت علينا باب على الفاضي . قرررررررب الايدام ياخوي !! تابط شرا : طيب لا تدف خلاص خذ بالعافية . همس الغمام :صوت الشباب ، نحن قوم لا ناكل حتى نجوع واذا اكلنا لا نشبع ،، احمد ربك وقم . صوت الشباب : خليها على الله انشالله محدش حوش . تابط شرا : بس من جد احنا ما نعرف ناكل ، أي اكل وباي كمية بس اهم شي عب البطن وامش . صوت الشباب : قايلك الناس يمشون على نظام غذائي واحنا نمشي على نظام الله يستر . البتار : تدرون ؟؟ يا شباب !! قررت ازوجكم واعطيكم من دخل مركز التسويق العالمي حقي . لاني اكتشفت ان هدفكم ان تعفون انفسكم عن الحرام . صوت الشباب : والله صدق هذا هدفنا ، الشاب فعلا بحاجة للزواج لكنه غالبا ما يقدر يفاتح اهله بالموضوع وهو لسه طالب . مع انه فعلا محتاج للزواج . قيس: تدرون وش يقول الطنطاوي عن السن المناسبة للزواج .؟! يقول : خلق الله الانسان بغريزة حفظ الذات وحفظ النوع ،، وحفظ الذات يحركه الجوع فياكل ،، وحفظ النوع يحركه الشهوة فيجامع ، لذا فان السن التي جعلها الله في الانسان مناسبة للزواج هو سن البلوغ . لمياء : معليش ياقيس وين عايشين احنا تبي واحد عمره 16 يتزوج بنت عمرها 12 ؟؟ ما يقدرون تابط شرا : يقدرون صدقيني يقدرون لو المجتمع يبغاهم يقدرون ، بس المجتمع مايبي خلاص .. البتار : ماعليكم المساله صرفية ؟ عادي كل شهر انا اعطيهم مبلغ يدبرون اعمارهم لين يتوضفون . مثايل : ياجدي المساله ميب صرفية بعد الزواج وبس... عندك مصاريف زواج ما يقدرون عليها .. البتار : يعني مثل وش ؟ مثايل : قاعة افراح .. مثلا القريشية : عشاء للمعازيم وذبايح وحلويات وعصيرات ووو .. اساهير : وكوشه للعروس وفستان العرس وشبكه وهدايا لاخواتها ومدري مين ... لمياء : والطقاقه لا تنسونها .. صوت الشباب : بس بس بس اصلا والله قاااااااايلك يا تابط شرا كلما رقعناها من جهة انشقت من جهة .. تابط شرا : المشكلة مدري يعني البنات مايبون يتزوجون يوم يتشرطون كل ذا الشروط .. لمياء : يعني مثلا تبي وحده تتزوج مثل اول في البيت ولا استراحه وتعزم اقاربها ويطقون شوي وينامون ؟ ما يصير قيس بن الملوح : يصير والله يصير بس البنات وامهاتهم ما يبون هالشي .. القريشية : طيب مادام الوحده بتلقى واحد يلبي هالطلبات واحد موظف يعني وشو له تحط نفسها مع واحد مثلكم لا يهش ولا ينش .. تابط شرا : تدرون الحين ان اغلب الموظفين يقسطون سيارات يعني ليلة الزواج ينبسطون الحريم ويرقصون ويفلونها ،، وانتي بعد الزواج ..مره تنزلين تدفين سيارته الخرده .. ومره تقولين اشتر لي الشي الفلاني ويقول الاقساط ذابحتني ... البتار : يعني المساله معقده ؟؟ همس الغمام : اكثر مما تتوقعون . صوت الشباب : مثايل كلمي زميلتك the queen اللبنانية يمكن تعرف لنا عرايس لبنانيات من ابدع ما يكون .. مثايل : ابشرو اليوم الثاني : مثايل : يا شباب ابشركم the queen لقت لكم ثلاث لبنانيات .. جمال واخلاق و ستات بيوت .. وساكنين في السعودية مع ابوهم المدرس في معهد خاص .. تابط شرا : قداااااااااام متى نروح نخطب صوت الشباب : والله حمستينا .. مثايل مثايل : يوم الخميس بعد صلاة الجمعه الساعة 9 بالليل نسير عليهم ونكلمهم على طول بدون مقدمات .. ام احمد : ياعيالي الله يهديكم ، مافيه ازين من بنت بلادكم اللي تفهكم وتفهم عاداتكم وتقاليدكم .. تابط شرا :: ههههاااااااااااااااااااي ضحكتيني يمه وانا اشرب شاهي .. قيس : من جد صادقه امي والله .. صوت الشباب : بالله ريحنا انت والشعارات الكذابه .. واهمه : بس ياشباب فعلا ما تلاحظون عندنا في السعودية عنوسه زايده .. ليه ما تتزوجون بنات بلدكم .. القريشية : ان جيتو للجد البنات هم اللي يجنون على انفسهم .. اغلب الللي يتزوجون من برى تلقينه ماعنده يتزوج سعودية وهي تتشرط وتبي وتبي .. صوت الشباب : صدقتي والله وبعضهم يبي زوجته تعيش مع امه وابوه واغلب السعوديات يرفضون هالشي .. ام احمد : ولو ولو .. قيس : انا معليش طلعوني من التشكيلة ماني متزوج غير سعودية . الله يخلي بنت عمي ،، اصبر شوي الين اتوضف والحمدلله تتيسر الامور .. صوت الشباب : اجل رح ادخل في اقساط ، وديون ، وحوسه وعلى ايش الحمدلله في غير سعوديات عايشين هنا وفاهمين كل شي بس احنا نحب نبالغ .. مثايل : خلاص اكلم اهل البنت نزورهم يوم الخميس ؟؟؟ صوت الشباب و تابط شرا :: لا تستعجلين شوي نفكر .. بنشوف اذا فيه بنات سعوديات يقبلون يتزوجون شباب مثلنا ولا نعزم على اللبنانيتين .. سؤال لكم انتو يا اخواتنا في عايلة نجوم المنتدى !!!!!!!!!!!!!!!! هل تقبلون بمثلنا كما تقبل غير السعودية .. لا اعتقد ذلك ،،، ام ان الدوران حول الاسواق والمعاكسات هو الحل المؤقت الى ان يحين وقت الزواج ،،، اعتقد ان الكثير من الشباب يفعل ذلك ،،،،،،،، ام نرجع فنقول الصوم ،، ذلك ما اتمناه لمن لا يستطيع ولكن يبقى السؤال معلق الى المجتمع وخاصة البنات والامهات .. لماذا كل هذه التكاليف والتعقيدات ؟؟ سؤال بريييييء :rolleyes: ولازال للمسلسل حلقاااااات كثيرة وبدون اعلانات تجارية فقط ابقو معنا فنحن معكم :) |
اخيـــــــــــــــــــــــــــــرا جت الحلقه:D
اقول صوت الشباب قبل يومين سرت للوالده اقولها متى بي دوري قالت: اصبر عرس اخوك الكبير بعد شهر واختك بعد 4 تشهر اصبر اخلص منهم و يجي دورك ان شاء الله قلتلها يعني اصبر 5 تشهر قالت: ان شاء الله ... والبارحه اقولها دوري وحده عندها اختين صالحتين للزواج بعد قالت :خاف ربك ما يجوز تجمع بين الاختين قالت: لا وبعد تبغ تاخذ اكثر من وحده مااااااا شي جواز لين تخلص الجامعه اقولها اسمعيني يا الوالده انا كان قصدي ...راحت الوالده هذا كله بسببك يا صوت الشباب راحت عليه شو هذي الحاله... والصراحه لولا كل هذي الطلبات لتزون وارتحنا من هذا المنوال الشبه يومي ثم تعالي يا اساهير ليش لازم اعط هدايا لخواتها ومدري مين انا بتزوجها هي ولا خواتها |
قبل فتره جاني واحد من الشباب يقول:
عبد العزيز عرفت وش صار قبل يومين؟؟؟!! قلتله : لا وش صار؟! قال : تعرف فلان ؟ قلت: سمعت باسمه بس ما اعرفه قال :هذا زوج ابنته طالب علم.. مهرها عشر دراهم والعرس عزيمه صغيره قلت له : الله يكثر من امثاله عقبالك يا صوت الشباب....:) |
:D
:D |
صمود الحمدلله على السلامه ،،،،،،، ولا تروحين بعيد يمكن تلقين نفسك يوم من الايام مسويه زحمه في المسلسل .
تابط شرا :D احمد ربك امك تقول لك بعد خمسة شهور انا كل ما قلت لها قالت امسك سرى ،، قبلك واحد واذا قلت للي قبلي تحرك ياخوي شف لك صرفه ،، يقول روح روح انا باتاخر :( متوهق بين اثنين اما عن اللي زوج بنته بعشرة دراهم باقولك قصه يمكن ما تصدقها .. زميل لي اعرفه شخصيا ،، خطب بنت خالته ،، البنت هذي يوم جاء يوم الملكه وكانت جالسه معه ،،، قالت له : شف حبيبي انا اعرف انك ما عندك اللي يقوم بحفلة و بتضطر تقسط سيارة ولا ثنتين ،، وانا ما ارضى لزوجي حبيبي اني ادخله في ديون ومشاكل عشان ليلة .. انا متنازلة عن الحفلة والطقطقة وعن اي شي انت ما تقدر له ،، ولو ما تقدر الا تعطيني مهري وبس انا والله راضية .. هو طبعا ما صدق ورفض ،، قال لا انتي منتي اقل من بنات الناس ،، وماعليك لا تشيلين همي انا اهم شي عندي سعادتك تدري وش قالت : انا سعادتي في قلبي وبوجودك معي .. واذا تبي رضاي صدق بلاش تكلف نفسك ... الولد فكر في الموضوع كلم اخوه .. في نفس اليوم اخوه طالب علم معروف ،، قال له شف يا عبدالله توكل على الله وخذ زوجتك من اليوم .. وراح اخوه كلم اخو البنت عشان يتزوجون اليوم ويعلن الزواج مره وحده مع الملكه .. اخوها وافق وهي وافقت .. ومن ذاك اليوم طلعت معه على طول اخوان هذا الشاب زميلي ،، يوم شافو البنت كذا دفع كل واحد منهم عشرة الاف لاخوهم يعني 40 الف ريال ،،،،،،، وقالو هذي لك انت وزوجتك سافرو اشتر لها اللي تبيه وسو اللي تبون حلال عليكم .. كمان ايش تتوقع البنت قالت : قالت انت قلت لي ان معك من اول 20 الف خلاص 20 تكفينا ملابس وسفر وكل شي الاربعين هذي اشتر بها سيارة لنا بدل ذا الكرسيدا اللي تنفتح شنطتها مع كل مطب. :D اللهم ارزقنا زوجات صالحات كهذه المرأة وانتظرو الحلقات القادمة من مسلسل ((((((عائلة نجوم نفساني)))))) نحن معكم فابقو معنا ، وبدون اعلانات تجارية :rolleyes: |
صوت الشباب000كيف الحال000
أخوي أعرف رجل زوج ابنته بــ خمسة ريال فقط00قبل سنتين تقريباً الحمدلله أن البنت مبسوطه لأن الشاب طيب 00ويخاف الله 00وولد خالتها في نفس الوقت000 لكن هل تظن معي يا صوت الشباب أن هذا الكلام منطقي00!! هل أزوج بنتي 00مثلا أو أنت تزوج أختك بمبلغ كهذا000 يا صوت الشباب 00كما أن الغلاء والمتطلبات الزائده مرفوضه فالإعتدال 00أيضاً مطلوب000 جميل أن يشعر الشاب في هذا الزمن بقدر الزواج وأنه ليس من السهوله بمكان أن يحصل على زوجه00حتى يقدر والمسؤليه ويضع في أعتباره قدر لبنت الناس000 صوت الشاب 00أنت تعلم أن أحد الشباب بعد الزواج قال لزوجته عند أول نقاش أحتد بينهما000روحي وأنت مادفعت فيك شئ 00قيمتك قيمة هايلكس مقربعه!!!!! أرأيت أن الشباب ليسو سواء000 هل هذا قدر أهلها الذين أردو لبنتهم السعاده والستر0000 أرجواأن لا تسئ فهمي يا صوت الشباب بأني أؤيد الغلاء وماشابهه ولكن000زوجكم الله بأقل المهور وأيسرها تحياتي لك |
لممو يا لممّوو .ترااني وخيتس العود وبغيت أتغشمر معاتس . ..ترااني بدويتن بلحيل بلحيل ولا أعرف وشلون يسوون الحظر . :D :D
بزاريني موب لعبتن عندتس تقولين لهم طرقع طرقع :) :D |
:mad: مثايلوووووووووووووووه تبينا نناسب لبنانيين (هم والنعم فيهم ماقلنا شئ ) بس مايصلحون لنـــــــــــا إنا مو من ثوبهم ولاهم من ثوبنا ....أقول مثايل اطلعي منها وللي يرحم والديك
بعدين أسمعوا عندي لكم حل ياعيال لاتحطون عرس ولا طقاقات ولا عشاء ولا يحزنون < __ناظروا عاد مين اللي تكلم :D إي والله الحل سهل زواج عائلي مافيه إلا إنا وأهل العروس في بيتنا ولاّ بيتهم وعشا يعني محترم من مثلا ماريز ولا مطعم النافورة ولاسعد الدين يعني مايكلف 5000 بالكثير 7000 واستريو ..وخلاص اللهم لك الحمد بس عاد ياشاطرين لا تنسون الشبكة للعروس (خاتم ألماس مع ساعه كشخه ماركه ...يعني يمكن يكلف الخاتم 8000 والساعه هاه نقول 30 ألف أقل شئ ولا هاه نشتري اشين ساعه بعشرين الف بس تراها تفشل ) وبعدين الصباحه طقم ألماس يلق دهره يعني يكلف يالله عشانكم طلاب نقول ناخذ أخيس طقم ب50 ألف بس بعد التخفيض يصير ب 30 ألف كذا زين صح ؟؟ وش بعد إيه بعدين ناوي تفشلنا يا أبو الشباب ترسل 40 مهر لا يأخي أقل شئ 50 ولا 60 وشويه بعد ........بعد بكرة يتريقون علي صديقاتي يقولون أخوها أرسل مهر 40 ألف بس :mad: بعدين خير ان شاء الله ياتتزوجون يا تدجون اسمعوا يا أخواني ..كل واحد ذنبه على جنبه موب تقعدون تهددونا إنكم إذا ماتزوجتوا بتروحون تعاكسون ....والله حاله بعدين الدنيا ماتتوقف على الزواج ولا خلاص أبروح للحرام ..لا ..في رساله لكل إنسان لازم ينجزها يا أخي العباده صوموا وصلوا.. يالله اسمعوه أذن يالله أشوف قوموا صلوا ولا جيد تتسدح يا تأبط شر قم لأخلي جدي البتار يلحطك ثانيا اشغلوا نفسكم بالدراسه ...ادرسوا اجتهدوا ..وشرط ماتلقون وقت للتفكير بشئ ثاني ثالثا يا أخي اشتغلوا وأنتوا تدرسون ..إي والله لو في مطعم لو في أي شئ يا أخي عادي جمعولكم كم قرش هماكم صجيتوانا مسؤوليه ومسؤوليه يالله ورونا وشلون تصيرون مسؤولين عن أنفسكم ..وبعد التخرج والأمتياز اشتغلوا بشهاداتكم الوظيفه اللي تليق بكم ..ودخل الوظيفه جمعوه كم سنه على اللي جمعتوه يصيرون محرزين مع مساعده ابونا البتار والأخوات المتوظفات والله قاعدين يتسدحون ودراسه كنها وجيهم ويتشرطون بعد ..... اه ه ه تعبت خلاص خلصت كلامي :D يالله ياعيال اختي واهمه تعالوا غرفتي عشان العبكم ببلاي ستيشن حقي تعالوا ..شفتوا اتحداكم تلقون خاله مثلي . :D |
<---------- انسحب من الموضوع بس بهدوء :D
|
صفو الحياة ،، جميل ان نحفظ حق الفتاة في المهر ولكن ليس جميل ابدا ان نجعل الزواج ليس سهلا .. ابدا ابدا ،،،،،،، واذا كان على السخرية فانه حتى لو قال : لو اني اشتريت لكزس بدل مهرك والله كانت اصرف .. وبعدين فيه الف طريقة وطريقه للسخرية اذا كان السخيف يريد ان يسخر ...... المساله ان تختار الفتاة الشاب المناسب وكفى اما المادة فلن تزيد الاحترام ..
الامر الثاني : مالذي يجعل مثل هذا السفيه يسخر من قلة المهر الا ان المجتمع كله مهورهم غالية ،، لذا فاننا اذا نجحنا بان نجعل غالبية المهور ميسرة فان السخرية ستنتهي ان كان هناك سخرية . واهمه : ليتك حظرتيها من جد ريحتينا شوي من ذا الازعاج ، لكن الظاهر بدت الواسطه عشانها يعني تلعب عيالك ;) لمياء : انا ما اهدد بالمعاكسة انا اقولك شوفي المجتمع هو اللي يحد الشباب (((((((((( والبنات )))))))) للمعاكسة ،،، لان البنت ايضا تعتبر اساس عندما لا تجد من تتجمل له فتتجمل لشوارع والاسواق ، خصر وعيون وخليها على ربك. الصقر : تدري وش دورك في المسلسل ؟ شفت الايدام اللي كنا ناكله على العشا ،، هذا كان باللحم ،، تدري اللحم لحم وش ؟؟ لحم صقر ،،،،،،، تدري الصقر هذا منهو ؟؟؟ انت ياااااااصقر |
الحلقة الثالثة
بعد اسبوع في العصر الخيالة : ترى كلمت البنات اللبنانيات اللي قالت لكم عنهم مثايل ،، وكلهم موافقين بس طبعا يبون يشتغلون بعد الزواج .. صوت الشباب : لا لا كلش ولا الشغل واهمه : ياااااااااااااعدو المرأة وش فيها اذا اشتغلت ؟ صوت الشباب : فيها اللي فيها ، انا انسان مابي زوجتي تشتغل ، لان هالشي ياثر نفسيا واجتماعيا واخلاقيا .. الخيالة : وازيدك من الشعر بيت ، تراها ممرضه . صوت الشباب: بعد ؟؟ لا لا لا انا اسف مااقدر قيس : والله هذي شكلها تناسبني. واهمه : لا انت خلاص لقيت لك بنت عمك كلمتها ووافقت عليك . تابط شرا : يالله ابسط ياعم لقيت لك سعودية وبنت عمك بعد . صوت الشباب : تدرين مثايل انتي وواهمه!! طلعوني من الموضوع الله يعيني باصبر الين القى اللي في بالي .. واهمه : انطر ياحمار الين يجيك الربيع . صوت الشباب : اييش؟؟؟ من الحمار ؟؟ مثايل : يا صوت لا تفهم غلط ، اقرأ بين السطور . صوت الشباب : أي سطور الله يسلمك هو عاد فيها سطور. واهمه : مجرب قبل كذا تصقع راسك في جدار يا صوت ؟ صوت الشباب : ايه تابط شرا : المهم خلاص انا باذن الله عزمت اتزوج عالية اللبنانية . قيس : وانا باذن نويت اخطب الهنوف بنت عمي والفلوس والتكاليف ييسرها ربي . صوت الشباب : اما انا قررت اروح الفيصلية احط لي كم رقم هناك واسترزق . واهمه : ياخوي ليه انت الفاظك سوقية وافكارك منحطه . صوت الشباب : رجاااء واهمه خليك في حالك موب عشان انتي اختي الكبيرة تقعدين تنافخين ،، ترى انا بعد شنبي صار اسود. وبعدين ترى امزح معكم ،، اعوذ بالله ما بقى الا هي. تابط شرا : المهم الخيالة و واهمه ضبطو المواعيد بمعرفتكم .. الواهمه : ابشر مالك الا طيبة الخاطر .. انت ووقيس بعد . صوت الشباب : وانا يااا مثايل ،، هاه يعني فتحي عيونك على البنات منا ومنا ولا على قولة تابط شرا منيه منيه .. ليبن تلقين اللي على مواصفاتي . مثايل : بس ياصوت الشباب ترى لازم تتنازل شوي عن بعض المواصفات عشان تقدر تلقى .. صوت الشباب : الفروع ممكن اتنازل عنها ، يعني الجمال مثلا ،،،، لكن المبدأ عندي واااضح ولا اتزحزح عنه . قيس بن الملوح : ارحمنا يااا اتزحزح .. يا رجال ارتااح وريح عمرك . (( ويدخل علينا فتحي " ولد واهمه " ويفركش السالفة )) فتحي : يمه يمه يمه يمه شفي لمياء تبي تاخذ القلم حقي .. لمياء : والله انه قلمي اسالي اساهير .. واهمه : اقول لمياء ،، كم حق القلم ؟؟ لمياء : 5 ريال واهمه : طيب هذي 10 ريال وفكينا بالله عليك .. يعني كلها اليوم وبنمشي ما تقدرين تحملين شوي .. بعد اسبوع الخيالة وواهمه في بيوتهم عند ازواجهم .. طبعا تابط شرا(بالتلفون يكلم الخيالة وهو في السيارة ) : طيب حددتي معهم الموعد ؟ متى نجيهم ؟؟ الخيالة : باذن الله يوم الخميس الجاي بعد صلاة الجمعه الساعه 9 . تابط شرا : لا لا من جد اكلمك متى ؟؟ الخيالة : يوم الخميس انشالله بعد صلاة المغرب . تابط شرا : حلو حلو حلو الله يخليك لنا .. ....... امشي وامني نفسي واقول الليلة عرسي ،، اتكشخ واضبط لبسي .. الخيالة : اثقل اثقل لاحد يشوفك بس .. يالله فمان الله مشغوله ماني فاضية لك . تابط شرا : ودعتك الله يا مسافر وناوي الفراق وما قدر الله يكون .. خوي تابط شرا معه في السيارة : هههههههههههه سلمات والله وش عندك مبسوط .. تابط شرا : يوم الخميس الجاي باشوفها . زميله : منهي ؟؟ تابط شرا : باشوف بيروت باشوف الكبة بالعجه .. باشوف خطيبتي عاليه . زميله : اهااااااااا مبروك مبروك . تابط شرا : الله يبارك فيك وبهالمناسبة اليوم حليب السعودية وواحد كتكات على حسابي .. زميله : بتباشر على جدتك انت ،، ياخوي جب لي منت قاردن .. بنانا كولادا . شي زي كذا . تابط شرا : لا من هالحين لازم اوفر للعرس . ههههههههه في غرقة الوالدة قيس :يمه الله يرضا عليك ، لازم اشوف البنت يعني باتزوجها من الباب للطاقه ما اعرفها ولا شي .. ام احمد : الله يرضا عليك ،انا كلمت اختها "صفو الحياة "واعتذرت،،، هذي عاداتنا وتقالدينا ما نقدر نحيد عنها عشان حضرتك ،،، وبعدين وش تبي خلاص احنا قلنا لك البنت مملوحه يعني لاهي ملكة جمال ولاهي شينه .. قيس : يمه الجمال انا اللي احدده وبعدين موب المساله عيون وشعر وطول ،، والمساله اني ارتاح لها وهي بعد ترتاح لي ويوفق الله بيننا .. ام احمد : لا ماعليك انشالله انه بيوفق بينكم ، هذولا خواتك تزوجو ولا شافوهم ازواجهم وكل الناس تزوجو بدون مايشوفون وبسم اله عليهم .. قيس : يمه ما اختلفنا ، ممكن اشوف وما توفق بعد الزواج ، وممكن ما اشوف واتوفق بعد الزواج ،،،، لكن ولو هذا حق من حقوقي .. ولا عشان انا ما اتغطى وهي تقدر تشوفني في كل مكان خلاص .. ام احمد : اننننس الموضوع ، شوفه مافيه .. تبي تشوف رح دور عند غير اهلك وربعك .. واللي ما نرضاه لبناتنا ما نرضاه لبنات الناس .. قيس : ترى يمه باشوفها بطريقتي .. ام احمد : هههههههه ايه هذا الكلام ،، بيني وبينك ياولدي ترى اغلب الرجال يسوون كذا ، خلك مثلهم شف لك دبره وشفها بطريقتك .. ( اما صوت الشباب فهو لازال في حياة العزوبية ) (وجاء يوم الخميس موعد النظرة بين تابط شرا وعالية اللبنانية) ولكن انتظرو الحلقة القادمة عشان نشوف تابط شرا وحوسته في السوق والحلاق .. ونشوف قيس كيف يقدر يشوف بنت عمه بدون ما تدري عنه .. ابقو معنا فنحن معكم ،،، وبدون اعلانات تجارية |
واحنا وين رحنا؟
الصراحة انا مع عسووووووووووول صحيح اني جديدة بس اقلها حطونا عيال الشغالة او اعطونا دور الكومبارس!!! معليش ترى اكتب قصة واحط اللي ماحطيتهم ؟ ترى امزح والله عائلة حلوة
|
يؤؤؤؤؤؤؤؤؤؤ أخو مروان أسمه فتحي :D :D
ابشر يا صوت الشباب المره الثانيه إن قالت لبزاريني طررررقع طررررقع بحطها حظر , والله يا المياء أحطك حظر ولو لــسااعه واحده :) :D |
واهمه اتفقنا ؛) عسوووووول وسكررررر تدرون ليه ما حطيتكم في المسلسل ؟؟ موفركم عشان بتطلع العايلة طلعة يوم الخميس ونبيكم على الشاهي والقشطه ... يا سكر ويا عسوووووول ;) |
اوووووعك:24: ما تحشرررنيييييييش في الزحمة ده :D
صمود مش حاضره يومياً :10: هي المــثألة إييييييه مسلسل :32: يا خرااااااااااشي :eek: ،،،،،،،،،،،،،،،،، سلمك الله ياأخي صوووت العـــــائلة:D :D تحياتي للعـــــــ:28: :28: ــــــــــائلة |
والله انك اسم على مسمى عضو مبدع
بعدين كن شكلي مرتن بالحيل عاقلة وانا ترى مخفة شوي ممكن اودي في داهيه:p شف لازم ترجعني بيت اهلي مرتن ثانيه عشان نسوي تحبيشه للموضوع لازم فيه اخت عارفه لامور الزواج والا ححرمك من الميراث واتبرى منك:D واهمه وووولمياء خفوا شوي على العرسان من مصاول هالبزارين |
الللللف الحمدلله على السلامة وبعدين يعني انا الحين مثلا مثلا بنت البطة السودة على العموم فكرة خطيييييرة تنفع مسلسل كوميدي رمضان الجاي وبالتوفيق دوماً :27: :27:
|
السلام عليكم
اهلا اخي صوت الشباب بصراحه عندك خيال واسع .....وتصلح كاتب مسرحيات اي والله وانتي صادقه اختي الخياله اسم على مسمي ولك تحياتي |
صمود ،، فيه حلقات ثانية نطلع فيها عن الزواج ومشاكله يمكن تكونين انتي وغيرك ابطالها ،،، ما تدرين :p
الخيالة ،،، تسلمين على كلامك وبعدين ترى اصلا انتي مسويه زحمه وانتي في بيتك اجل اشلون لو جيتي ،،، لا لا خليك في بيتك وبعدين ترى العبرة بالخواتيم يمكن تجيبين العيد في قيس مسكين مع بنت عمه :rolleyes: روح الحياة ،،، الله يسلمك بس انتي بعد الحمدلله على السلامه منيرة ،، عليكم السلام انتي و روح الحياة من جد اذا تعرفون لي واحد يدعمني اقدر اسوي لي برنامج ولا مسلسل وناااااااااااااسه لا واوعدكم بدووووون دعايات ولا حفايظ ولا لبن ولا شي ... ;) |
صوت الشباب ,,
الله الله 000 اللحين انت ليش مشغلني خطابة ؟؟ :mad: ومن قالك بجيبلك لبنانية 000 ؟ انا اذا بجيب 00 بدور لك على وحدة قطرية 00 وش زينهم بنات ديرتي 00 اخفف شوي من العنوسة 000 ;) ولا تبي كويتية من ديرة خوالي ؟ 00 :D لكن لبنانية 00 مرة وحدة 000 لا اسمح لي 00 مااقدر ! وبعدين فكني من لسان هالمياااااااااا هاذي 00 عاجبك قومتها علي ؟؟ :( +_+_+_+_+_+_+_+_+_+_+ للعلم 00 انا من رأي اختي صفو الحياة 00 انه المهر يكون ميسر وسهل 00 لكن مش لدرجة كونه مبلغ اسمي 00 نادر 00 و خصوصاً في هذا الوقت 00 انه نلاقي الشخص اللي يستاهل انه البنت تجيه كذا 00 بشنطتها 00 بدون مصاريف و بدون مهر 00 انا مستحيل اعطي بنتي هالشكل 00 ولا بأي حال من الاحوال 00 الا ان كان شخصاً باع الدنيا ليشتري رضا الله و آخرته 00 اي من اتوسم فيه ايماناً 00 و اخلاصاً وصدقاً 00 هنا وحين اطمئن على بنتي 00 ممكن ما آخذ عليه شيء 00 لأني على يقين 00 بأنه سيتقي الله فيها 00 :rolleyes: +_+_+_+_+_+_+_+_+_+_+_+ واهمه 00 تقفيييييييييييين 00 طااااااااالبتك 00 سوي حق هالمياااااااااااااااااااؤؤؤؤؤؤؤ هاذي حظر 00 عندك اياها 00 تراها لجتنا 00 بس امانه 00 لازم اكون موجودة 00 واشوف 00 عشان ارتاح نفسياً !:D ;) |
صوت الشباب 0000الله يسامحك صفوالحياة تؤيد النظره الشرعيه 100%
لكن00 مادام المخرج عاوز كده00أمرنا لله000 |
صوت الشباب تكفى عطني البطولة المطلقة تراني ممثل متمرس وبعدين هوليوود كانوا يبوني أمثل معاهم بس قلتلهم مرتبط بعقد مع المؤلف والمخرج صوت العقاد قصدي صوت الشباب :D :D :D
المهم شد حيلك تراني أراقبك عن بعد |
| الساعة الآن 08:46 AM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا