وأخيرا اجريت عملية تدبيس العصب السمبثاوي
 

الحمد لله انك طلعت بالسلامة
من اي بلد ووين سويت العملية
وليش سويتها للاحمرار او التعرق وماذا احسست بعد العملية
انا تاريخ موعدي يوم 15 مارس بمصر عند الدكتور حسام احمد فؤاد وانت ووين سويتها وبكم ومادة العملية وهل هناك الم بعد العملية ومااضرارها الجانبية لهده العملية

و ين و بكم ؟

الله يسلمك
في البداية شو تفرق عملية العرق عن الحمرار؟؟؟؟؟؟؟؟؟؟؟؟
اخوك من الاردن كان عندي احمرار بالوجه و كان يسبب الي احراج كثير
بالنسبة للالم كان فيه بعد العملية الم بالصدر و اعلى الظهر و للان ما في اضرار جانبية.
العملية : الجانب الايمن فتحة صغيرة تحت الابط و تحتها ب 10 سم فتحة اخرى و الطرف الشمال نفس الشي

في الاردن و ما بعرف قديش تكلف لاني عملتها على حساب التأمين

لو سمحت شو اسم الدكتور اللي اجريت عنده العمليه واسم المستشفى لاني من الاردن وحابة اعملها كتيير ومو قادرة اعملها بره
ارجو الرد

اسف جدا للتأخير
المدينة الطبية - جراحة صدر

الحمد لله على السلامه


يا رب تكون العمليه مفيده لك وتتكلل بالنجاح


أخوي أرجوك لا تنسى أخوانك هنا وتوافيهم بالتفاصيل وتصدقهم القول عسى الله أن يجزاك خير عنا وعنهم

شكرا ع الرد

حمرة الوجه
 

السلام عليكم
الاخ قاهر الخجل هل الاحمرار في الوجه اختفى و مادا حدث معك من الاثار الجانبية
انا لم يبقى لي الا ايام معدودات على العملية
ادعونا بشفاء

الله يسلمك و يبارك فيك لحبك الخير للجميع و للعلم اخوك سجل بالموقع جديد و بعد العملية حتى اجاوب عن اي اسئلة لانو في كثير ناس محتارة بالعملية،
و محسوبكم جاهز لاي استفسار.
"فقط اريد دعوة صادقة بظهر الغيب "
و الله يشفي الجميع.

لا شكر على واجب ، اصلا انا موجود للخدمة .
بالتوفيق ان شاء الله

للان الامور تحت السيطرة يعني المواقف البسيطة اللي كان وجهي يصير احمر لاحظت انو في فرق لكن لسه ما جربت المواقف الساخنة ( مثل المناسبات الاجتماعية او المحاضرات)
بالنسبة للاثار الجانبية : جفاف حاد مزعج باليدين لكن بستخدم مرطبات و عرق بالبطن و الظهر بسيط غير مزعج.
و الله يعافيك و ترجع بالسلامة و يا ريت تطمنا بعد العملية.

بعد العمليه كم يوم يبغاك لتصل الى نشاط بدني يمكنك من الحركه

تقدر تتحرك و تمشي خفيف بنفس اليوم لكن بصعوبة
اما نشاط بدني بدك من اسبوع لعشر ايام تقريبا
ممكن من شخص لشخص تختلف لكن هذا اللي صار معي

اول معجزة بعد اجراء عملية تدبيس العصب السمبثاوي لحمرة الوجه
 

السلام عليكم
الحمد لله ......الحمد لله ..... الحمد لله حمدا كثيرا
اجريت عملية تدبيس العصب السمبثاوي لحمرة الوجه يوم اربعاء الفارط عند دكتور حسام احمد فؤاد بالقاهرة
بعد مرور 5 ايام الاحمرار لحد الان مند ان افقت من العملية اختفى لكني لم اجرب موقف كبير كالقاء محاظرة
اثار الجانبية تكاد منعدمة
عرق بسيط في اسفل ظهر + يديا ناشفتان عادية+عرق في الوجه اختفى نهائيا
الى حد ساعة مازلت قيد التجربة
ان شاء الله يشفينا جميعا من هدا المرض

نعم يااخي احمرار كانت رحلتنا موفقة وسوينا العملية في نفس اليوم وكانت دكرى ممتازة اي سؤال نحن هنا
شكرا للرب وشكرا للدكتور حسام الدي جعل شفائنا بيده والحمد لله

التوتر الشديد وزيادة ضربات القلب في المواقف اهم من التعرق والاحمرار

انتم تعالجون العرض ( الاحمرار والتعرق ) ولا تعالجون السبب وهو ( التوتر الشديد )

اتمنى من كل من اجرى العمليه ان يجاوب هذا السؤال :

هل تعالج العمليه التعرق والاحمرار فقط ؟

ام تعالج التوتر وضربات القلب ايضاً ؟

هؤلاء المرضى وانا منهم يا اختي يعانون من رهاب وزياده في احمرار الوجه وتعرقه في المواقف
واحيانا بلا سبب
يعمي السبب لتوتره وخفقان قلبه هو الخوف من احمرار وجهه وتعرقه امام الناس مما سبب له
انطواء وعزله عن الناس
اذا السبب هو احمرار وجهه وتعرقه لذا العمليه ازالة هذا السبب بعد ذلك يذهب التوتر وخفقان القلب

الاخ " احمرار "
و الاخ " الراضي بالله"
الحمد لله على سلامتكم وان شاء الله حياة جديدة بعد هذه العملية.
بالنسبة للاخت " بنت الجوري " و الى كل من يريد ان يعرف ماذا تعالج العملية : (و الله على ما اقول شهيد)
يعني لما الواحد يتعرض لموقف محرج مرة بالسنة مش مشكلة لكن كل يوم؟؟؟؟؟؟؟؟ والوجه يصير احمر على الفاضي و المليان؟؟؟؟والشخص يكون متأكد انو مش مريض نفسي والله مشكلة!!
بعد 45 يوم من اجراء العملية تعرضت لمواقف كثيرة و الحمد لله بدون احمرار للوجه وبدون ضربات القلب السريعة وبدون رجفة وبدون الشعور ب الفليلة او الانهزام و الاهم من ذلك كله عدم احتقار النفس بعد الموقف.
خوف بسيط جدا جدا و ان شاء الله مع الايام رح يزول لان العقل الباطني رح يتأقلم مع الوضع النفسي الجديد.
و ابشركم تعرضت لموقف بالعمل امام المدير العام وكان موجود عدد من الموظفين و وجه لي كم هائل من الاسئلة الصعبة ( يعني لو شخص طبيعي كان مكاني يمكن ينحرج ويصير وجه احمر)
والحمد لله الحمدلله الحمد لله الامور كانت ممتازة جدا و فرق شاسع عن السابق (لاني كنت من اول سؤال او حتى قبل لا يسأل ارتبك و ما اقدر اجاوب مع اني عارف لكن كل تفكيري يصير بوجهي و كنت اتمنى الارض تنشق و تبلعني ) كنت مبتسم و قادر للدفاع عن نفسي وما همني شي حتى الموظفين اللي كانوا موجودين كانت نظرتهم الي عادية جدا و كانوا خايفين من المدير اكثر مني.
ملاحظة : انا عملت كي للعصب مش تدبيس يعني ان شاء الله للابد.
وبدكو الصحيح ياما كنت ضعيف بحق نفسي و هسه بدي اعوض كل اشي بإذن الله تعالى.
17 سنة اعاني راحت من عمري لكن الحمد لله على كل شيء.

السلام عليكم
الى الاخ قاهر الخجل شكرا لك
الى الاخت بنت الجوري العملية تعالج احمرار وتعرق فقط ...فقط .....فقط . اما التوتر الشديد الدي انت تتحدثين عنه ماهو الى فرع من فروع شجرة اسمها احمرار
اما ادا قطعنا شجرة احمرار اقسم بالله ان كل شيئ سيزول .
والله انا اليوم تغيرت حياتي تماما اشعر اني ولدت من جديد بعد عشرية سوداء مع احمرار

باختصار شديد للاخت
اانت من ماذا تعانين
اذا كنت تعانين من الااحمرار + او تعاني من الرهاب بسبب الاحمرار فسوي العملية فورا
اذا كنت تعانين من الرهاب دون احمرار لاتسوي العملية وتوجهي لطبيب نفسي او ادوية
الرهاب في جهة والاحمرار في جهة انت من ماذا تعانين بالضبط لنفسر حالتك لعلك تستفيدين

نحن نعاني من الاحمرار سوينا العملية لانعاني من شيئ اخر ابدا
انا شخصيا لااعاني من الراهاب ولا الخوف انا منت اعاني عندما يحمر وجهي اشعر بخفقان وتعرق وعدم التحكم بتعابير وجهي فاجريت العملية فاختفى التعرق وعادت الثقة بالنفس واصبح وجهي لايحمر ابدا

ما شاءالله انتم مشكلتكم بسيطه ولا تعتبر من الرهاب ( الاخطبوط ) الذي يكبلنا ):

رهابنا نحن عبارة عن توتر قبل المواقف الاجتماعيه واثناء الموقف

قبل كل مناسبه نعيش مأساه لا يعلم بها الا الله

نعد الايام التي تسبقها نراها تنقضي مسرعه لتقربنا اكثر من الموقف

نحترق في دواخلنا نبكي نتألم

لا نملك القدره على الذهاب للمناسبه وان لم نذهب نتهيأ لتعذيب اللوم وجلد الذات والشعور بالفشل

ليس هذا كل شي انما هو غيض من فيض

السلام عليكم
اخ قاهر الخجل و كل من اجرو العملية الحمد الله ع سلامتكم 😊
اخ قاهر الخجل ممكن استفسر عن اسم الطبيب الذي اجريت العمليه عنده ؟ و هل تعرف ما الفرق بين تدبيس العصب او كي العصب ؟ وقرأت في احد المواقع ان من الآثار الجانبية للعملية هبوط في الجفن ، فهل هذا صحيح ؟

ما في حدا يرد علي ؟ 😓 بدي اسم طبيب بعمل العملية في الاردن ،، أرجو المساعدة 😟

اسف للتأخير
اجريت العملية في المدينة الطبية.
و الفرق بين التدبيس و الكي واضح : التدبيس عبارة عن وضع دبوس او ملقط يمنع اشارات العصب من الخروج.
و من وجهة نظري الكي افضل من التدبيس.
الاثار الجانبية تختلف من شخص لاخر و قبل ما اسوي العملية سئلت دكتور عن هبوط الجفن و حكالي ان العصب السمبثاوي يمكن ان يكون له تأثير بسيط جدا.
والحمد لله ما صار عندي هبوط بالجفن و حتى الشباب اللي اجروا العملية بعدي سواء بالسعودية او بمصر ما حدا شكى عن هبوط الجفن.
و اي استفسار جاهزين

شكرا اخ قاهر الخجل ، انا خايفة كتير من العملية و من آثارها الجانبيه 😟
في دكتور مشهور اكتر من غيرو بالمدينة الطبية ولا عند اي حدا اعملها ؟ و بدي اسألك الآثار الجانبية اللي صارت معك كانت بسيطة ؟ و بتقدر تتحملها ؟ ومكان العملية مساحتو كبيرة وبتضلها مبينة ولا بتختفي ؟ 😟
وبدي اسأل كمان سؤال ايمتا بقدر ارجع ع شغلي بعد العملية ؟ 😟
شكرا كتير كمان مرة عالمساعدة وآسفة عالإطالة ..

اختي سيسيلينا ارد عليك نيابة عن قاهر الخجل انا سويت العملية بمصر وسويت تدبيس الاعراض الجانبية تظهر في حالة التعرض للحرارة فقط يعني جفاف باليد عادي + تعرق تعويضي بدون رائحة بالظهر والبطن + رطوبة باسفل القدمين انا في البرودة او عندما يكون الجو معتدل مايظهر ولا عرض من الاعراض السابقة
+ اما الجروح يعني على الاغلب شهر تختفي وهي عبارة عن فتحيتن باليمين و 2 باليسار كل فتحة تقريبا 0.75 سم او 1 سم يعني صغيرة جدا والالم يكون في بداية 3ايام فقط ويزول مع المسكنات التي تعطى من طرح الدكتور وبعدين يختفي بعد رابع يوم ويمكن الرجوع الى العمل بعد اسبوع اما الرياضة العنيفة مثل كرة القدم او العاب القوى والتدريبات وغيرها بعد اسبوعين على الاكثر

أشكرك اخي الراضي بالله ، الله يجزيك الخير و كذلك اخ قاهر الخجل ، طمنتوني ،، ان شالله تزبط معي و اعملها و تكون ناجحة العملية ، ادعولي ..

اخ قاهر الخجل بتنصحني ب اسم دكتور معين بالمدينة الطبية ولا عادي عند اي حدا ؟

اذا كان عندك احمرار حين التعرض للمواقف افالعملية 100 بالمية رايح تزبط معاك او بالمصطلح العملي ايروتوفوبيا -- اي الخوف من احمرار الوجه فقط
فالعملية تقضي على الاحمرار من المواقف والعملية جد بسيطة
وادعو من الله ان تنجح معاك ---------------------------- استخيري ربك اكثر من مرة ولن يخيب ضنك

اشكرك اخي الراضي بالله ، نعم عندي فقط احمرار في بعض المواقف وان شالله بتزبط معي العملية :)

اخ قاهر الخجل ارجو المساعدة انا من الاردن و اريد اجراء العملية بالاردن لإنو صعب اعملعا بالخارج ،و ما حد غيرك عمل العملية بالاردن ، آسفة عالازعاج بس بتمنى ترد على اسئلتي لإني و الله تعبت كتير و مو ملاقية حدا يساعدني بهالموضوع
كتير نفسي اعمل العملية و رحت عالمدينة الطبية و دخلوني عند دكتور ما بعرف شو اسمو كتير خوفني من العملية و حكالي انها صعبة و بدها يومين نوم بالمستشفى مع انو الكل بحكي انها سهلة و بطلعو ب نفس اليوم ، و انو بس يعملو العملية ممكن تأثر عالرئة لأنو في اثناء العملية بعملو تنفيس للرئة من الجهة اللي بقصو منها العصب وحكالي في احتمال يصير هبوط بالجفن و انو رح يكون واضح ، مع اني قرأت في احد المواقع انو بكون خفيف و مع الوقت بختفي ،، ارجوك اخ قاهر الخجل بتنصحني ب اسم دكتور معين شاطر ؟؟ كتير خوفني هدا الدكتور من العملية و خايفة يكون مش شاطر او تكون الآثار الجانبية لكي العصب اكتر من التدبيس؟ ، و آخر سؤال بعد هاي المدة من اجراءك للعملية ندمت ؟ او حسيت مع الوقت في آثار جانبية تانية ظهرت معك مع مرور للوقت ؟
بعتذر على تكرار الاسئلة

اسف للتأخير،
طبعا بعتذر عن اسم الدكتور لاني مش ماخذ منو اذن انشر اسمه لكن قسم جراحة الصدر فريق واحد و كثير فهمانين و محترمين و اخلاقهم عالية و يا ريت اقدر اكافئهم .
و أكيد ندمان كثير.........كثير.........
ندمان اللي ما سويت العملية من زمان لانو راح الاحمرار نهائيا و صرت متأكد مية بالمية انو الخوف و الرهبة و سرعة دقات القلب و احتقار النفس كان سببه الاحمرار فقط. لاني كنت لما اخسر بلعبة شدة او يجي قول بفريق اشجعه او اكون احكي بموضوع و يجي شخص فجأة او واحد يوجه الي كلام قدام ناس كثير يصير وجهي احمر ويا حبيبي كل الموجودين يصيروا يطلعوا ع وجهي و يعطوني نص ابتسامة و طبعا احس حالي بدي اطلع من الحيط.
و الصحيح قبل فترة اكلت اكلة حارة كثير و شعرت بشوية عرق بالوجه و بعدها بشوية ايام حسيت انو وجهي بلش يحن لايام الاحمرار طبعا ما بعرف اذا الاكل الحار حفز العصب او شو الموضوع؟ على كل حال بدي استنى اي موقف جديد خلال هاي الايام و اذا رجع الاحمرار بدي اراجع المستشفى و اطلب منهم اسوي العملية مرة ثانية ولو بضطر اسويها كل سنة و رح اظل مبسوط لاني جربت اكون بدون احمرار و الصحيح شعور لا يوصف،
الاثار الجانبية :
جفاف اليدين مزعج نوعا ما لكن مع المرطبات احسن شوي.
شوية عرق بالظهر و البطن غير مزعج.
والحمد لله ما صار هبوط بالجفن .

لكن طبيعي اي دكتور رح يحكي عن الاثار الجانبية اللي ممكن تصير حتى يخلي مسؤوليته .

بالنسبة للعملية :
دخول قبل العملية بيوم و الخروج بعد العملية بيوم ( يعني كلام الدكتور صحيح يومين بيات).
وكان في الم بالظهر و الم بالصدر (لعيون الاحمرار مش مشكلة).


و ان شاء الله اكون جاوبت عن اسئلتك ،
و اي اسئلة منك او من اي شخص انا جاهز ، بس ادعوا لي بظهر الغيب انو ما يرجع الاحمرار.



ولو في طريقة اساعدك او اساعد اي شخص من الاردن بشكل مباشر كمان جاهز.

اخي قاهر الخجل انا مؤيد كلامك 100 بالمية والله الحياة مع الاحمرار والله مو حياة ابدا بل جحيم
والان انا الي 20 يوم من سويت العملية اختفى الاحمرار حسيت حالي انسان اخر اسنا حر
والله الي عندو احمرار هو سجين لم يذق طعم الحرية والله
انا لي 20 يوم خرجت من سجن الاحمرار واذا عاد الاحمرار راح عاود سوي العملية مرة مرتين ثلاثة 10 و 100 و 1000 مثل ماقال الاخ قاهر الخجل
راضي بالعملية 100 بالمية والحمد لله القادر على كل شيئ
اولا وآخر الى كل من يسال هل اسوي العملية ام لا وهل في اعراض جانبية ......... اقول له سويها الان الان الان

الله يحزيكم الخير ، ريحتوني كتير ، والله مزبوط الحياة مع الاحمرار مو حياة ، الحمدلله على كل حال ..
ان شالله ما برجعلكم الاحمرار نهائيا و ان شالله بتزبط العمليه مع كل اللي بدهم يعملوها ، ادعولنا..
رجاء ازا صار معكم اي تطورات جديدة لما بعد العمليه تخبرونا فيها و الله يجزيكم عنا كل خير يا رب ..

السلام عليكم
اخ قاهر الخجل آخر مرة ذكرت فيها انك شعرت انو الاحمرار بلش يرجعلك و انو ازا ضل الحال هيك رح تراجع الدكتور ، خبرنا شو صار معك ؟ و الصراحة انا بس دخلت عالمنتدى ما كنت قارءة غير هاد الموضوع بس لما قرأت باقي المواضيع اللي بتخص الاحمرار في كتير من المرضى رجعلهم الاحمرار بعد فترة :( صار معك هيك ؟؟

كل المواقف اللي تعرضت الها بعد العملية مباشرة كان الاحمرار صفر والخفقان طبيعي و ما في خوف. بس ما بعرف شو اللي صار قبل فترة بسيطة بلشت اشعر بخوف بسيط و انو وجهي بدو يحمر لكن بنسبة بسيطة.
و شو ما كان الوضع افضل من قبل العملية.
ولسه بدي اجرب حالي كمان من شهر لـ شهرين اذا الامور ساءت و رجع الاحمرار بدي اراجع الدكتور و اسوي العملية مرة ثانية.

انا صراحة مبارح بس قرأت باقي الو اضيع عالمنتدى عن الاحمرار و المعظم برجعلو الاحمرار مش عارفة شو السبب :( يعني ازا العصب انقطع ما برجع ينمو المفروض :( انا كنت ماخدة موعد للعملية بس كتير مترددة صرت :((( مع انو نفسي اعيش بدون هالمرض :'( الله بعين ..
اشكرك جدااا اخي قاهر الخجل و ارجو منك انك تبقى على تواصل و تحكيلنا شو بصير معك لإنو كتييير صرت مترددة اعملها و انا بصراحة كمان ما عندي تأمين ف مش معقول اعملها كل كم من شهر و هي مكلفة :((
ادعو الله لك انو يكون اللي بصير معك هالفترة يكون عرضي و ما يرجعلك الاحمرار و ترجع متل ما كنت بعد العملية مباشرة والله يشفي كل مريض يا رب :(