الزبير ابن العوام (حواري الرسول صلى الله عليه وسلم
 

أعضاء منتدى نفساني أحيكم بتحية الإسلام فالسلام عليكم ورحمة الله وبركاته أما بعد فأتمنى أن تقبلوني بينكم عضوا جديدا؟.................... وأشير إلى أنني أقل قدرا من الصحابي الجليل إلا أنني
أحب أن أتشبه بالكرام............

أقول ترى أبي أعرف أساميكم واهتماماتكم .....البتار و أخوي صوت(ترى في قلبي سر ولازم تعرفه )و تأبط(تعال شو سالفتك ويَ اسمك ترى مادري كيف غريب اشوي، وانت من هل (أهل)دبي؟) و الأخ هدهد سليمان
و تراني بلمح من الحينه إني برز ويهي اشويه فاتحملوني و السموحة ...

وسلام على من اتبع الهدى

سأعيد الابيات على مسمعك....

اشرق النور وبان
..............مرحبا بمن اتـــان
ايه الزائر اهلا
.............لك في القلب مكان
مرحبا بمن وصل
............ بالعيون والمقل
قلبنا هو المحل
........... وبه شوق جلل

اخي اهلا بك ... حياك الله

ان شاء الله تفيد وتستفيد

بالنسبة لاسمي فهو لقب لاحد الشعراء كما تعلم

ومما لا يخفى عليك انه لقب بهذا الاسم عندما

دخل الى المنزل والشر في عينيه واخذ سيفه

فرءته امه وجاء رجل يسأل عنه فقالت خرج

تأبط شرا.....

والنسبة للادب نعم انا احبه ومهوس به ولكني لست مبدعا فيه

انا اقرءه وحسب

اقول اسمك غايه في الروعه ويدل على شخصية رائعة

بس نكته بسيطه ما اعلمه والله اعلم ان قول السلام

على من اتبع الهدى يقال لغير المسلمين ....

الا اذا انت سامع فتوى بجواز قولها ايضا للكافرين

اقبل تحياتي اخوك ... تأبط شرا

أقول تأبط مو أدب لكن دبي و شكلك الغالي ما عرفتني.......... بعدين وينه صوت الشباب؟؟؟؟؟؟؟؟؟؟؟

اقول يا الزبير انا اسف

العتب على النظر

عطيتك محاضرة في الشعر وما ادري ايش

المهم انا عرفتك يا الغالي

انت من يجهلك ....

مرحبا بك ما اتشوفني ارحب فيك و اقولك اشرق المنتدى بيك

بلغ تحياتي

الحمدلله من منتدى لين غيرة مب راقد طول الليل أبيكم معاية ترى موسم امتحانات و موعد الردة جرب بس بشر كيف الحال

أقول صوت الشباب كل شوية أطل واتروح مو وراك دوام انت؟؟؟؟؟؟؟؟

هلا هلا وعليكم السلاااااام ورحمة الله وبركاته


(( اليوم باتكلم اماراتي مدامكم كلكم اماراتيين ))

اول شي هلا فيك خويه الزبير بين اخوانك 00


هاه خويه الزبير بشرني شو السر اللي بقلبك تبا تقولي 00


هاه قول انا اسمعك 00






;)

شوف حلمت فيك حلم أوصيك بالشيخ نافع جار الشيخ الألباني الله يرحمه و رقمه تلقاه عند تأبط(أبلشته) المهم :
انت ماشي و جداك سلم رقيته ...شويه ولا بنت تقول لك تعال(لا تخاف ما شفتها زين) واسمها (حصة) اسم اماراتي .........المهم:
تقول انت بسم الله وتاكل من الأكل الأكل والله ويشهد ربي مثل اللي وصفته...عسل وسمن وتغمس وتاكل وشوي وتناظر (الله المستعان) انزين بعدين ينادي منادي لبيك اللهم حج لبيك اللهم عمرة؟؟؟؟
تراه حلم بس استانست منه ............ لا تفسر رح واسأل

يا سلام عليك يا الزبير

كيف كان شكل صوت الشباب

بيزعل لا تقول على المنتدى رح اتصلك رد علي

تراني طفرة اتصلك وماترد

انا اخسر عمري على فاضي

تقول مغترب وما تتصل واخرتها ما ترد

اقول شخبار حبيبي الا عندك

الزبير من جدك انت 00 :cool:


طيب تكفى وانا اخوك اتصل على الشيخ و اسأله عن الرؤيا ولا قل تأبط شراً يسأله 00 وعطوني الخبر انتظر منكم رد


وبعدين خويه الزبير ما عرفت من شكلها من تكون ؟

وش شكلها ؟

طويلة ولا قصيرة ؟ سمينة ولا نحيفة ؟ سمراء ولا بيضاء ؟؟

من الجنوب ولا من الرياض ولا من وين ؟؟؟


اوووووه صح تقول اسمها حصه

يعني اكيد من الرياض ولا من راس الخيمه 00000


يااااارب من فضلك


:rolleyes: :rolleyes:

الزبير ودي اسألك عن شكل صوت الشباب دبدوب ولا هيكل ؟؟

ما يصير خاطرك الا طيب ::: أحم أطويل بس معظل على ضعف وله لحية كثه وأبيضاني بس اشوي اسمير أو حنطاوي................ بس تأبط من صجك تعرفني؟؟؟؟؟؟؟؟؟؟؟ أنا ماعرفتك.؟؟؟؟؟؟؟؟؟

أقول الزبير خلي هنك هاي الحركات

بسك اذيت الريال مسكين

اقول ليش ما ترد على التلفون

انزين صوت انا ما بسال هذا السؤال حرّه فيك

واتقول ما يهمك شكلها

:D

الزبير احرجتني بوصفك


والجواب ما تراه لا ما تسمعه :mad:



تابوط شرشور اصلا محد طلبك تتصل على احد ارتااااح :15:



وعلى فكرة يا جماعة الخير ترى ايميلي موجود في ملفي الخاص اللي يقدر يسأل عن حلم الزبير يرسل لي التفسير عليه ولو طلع اللي في بالي لأخربها واعشيه في مطعم بخاري حبة شواية بالرز ;)



سلام

حيا الله الزبير.. تراني أنا بعد عضو يديد يا ليت لو نكون رباعة...

أدري إني بنيــه ولو الود ودكــم تشوتوني برررره ...
بس ماعليه لابسه واقي ضد الرصاص أنا

المهم حياك الله يالزبير ...بس ترى أخوك تأبط أشتاقلك مرررره يا أخي حرام عليك ارجع لديرتك ولأهلك ولأخوك تأبط تراه من يومين يصيح ما أدري وش فيه يقول أبي أخوي ;)
وقعدت أداريه وأسكته وأقول خلاص يا بابا بيجي أخوك خلاص لا تبكي ...
:25

ابو الشباب ارفق على نفسك لا تطيح وتتكسر ..تراه حلللللم حلللللم :3:

\بغيت أتعش فيك ياتأبط تغديت فيني ...... ماعلى إنزان لا تعب عمرك و تطصلي ترى التلفون ما يرن ما دري شو ياه؟
المهم بلا فضايح وان شاء الله نلتقي عقب باشر في المطار الساعة 6 أو 7 و سلامي الحار لمعارض..................
أقول يا بو الشباب أنا ودي أعرف شو تدرس و شو آخر كتاب قريتة و أبا أسأل سؤال على الماشي شو رايك تاخذ اماراتية وأنا أجهزلك كل شيء طبعا بعد ماأتعرف عليك زين ترى البنية مب هينة .................
آخر عمري انجلبت خطاب....
بس ماعليه تستاهل يا صوت ... يمكن كل الشباب يعرسون عقبك........من يدري؟
أقول مب هاي الصور اللي طالعه لوجه انسان
طيب شو حكمه .... وكيف تستخدمها و هي شبهه يابوالشباب ؟؟؟؟؟؟؟؟؟؟؟؟

أقول أخوي سعيد ترا أبشر الزبير أخوك وعند حسن ظنك ان شاء الله......
حياك الله وينا .............

اولا اقول يا الزبير خلي عنك هذي الحركات وودر الريال في حاله بيموت علينا

وثانيا يا صوت انت روحك قلت خلي تابط يسال

المهم انا رح اطرشلك رقم الشيخ نافع مع نفساني

وكم مرة اقولك ودر البخل يا ريال اتصل روحك

المهم لمياء فضحتيني جدام الزبير ....

اقول الزبير انا عندي دوام في الكلية يوم الخميس

اسف ما اقدر ايك المطار

اسمعني يا صوت ترى الزبير معرس ومخلص شغله

ودومه يبا ييوز الشباب

ماعليك منه

هو حبيبي وربيعي بس هذا اليسويه ما حيد انه يسويه

الظاهر ان الغربه اثرت فيه

شوف الزبير سير جابل ولدك وودر الرمسة الفاضيه مع صوت الشباب تراه ما بيفيدك

واخير اخي سعيد الرامي اهلا فيك

لحظة لحظة

الزبير تقول البنية مب هينه

ليكون انت تقصد بنية بذاتها

دخيلك السعودية فيها وااايد حريم زينات

الامارات قلة فيها

خل الزينات المب هينات حقنا

ودور حق صوت من السعودية

ولو انت مصر يوزني انا اياها

اقول صوت شو تقصد بهذي الرمسة:

... ولو طلع اللي في بالي لأخربها واعشيه في مطعم بخاري حبة شواية بالرز

انا ما فهمت شو الي في بالك ليكون وحدة

وتعالو البنية بطلتله الباب مب ازوجها

لمياء الله يحييك بس لا تعيدينها ولا يكثر طيب يا ماما :D

وترى المره الثانيه ما ينفع واقي رصاص لاني باعفطك وارميك مافيها رصاص ولا اكشن 00

وبعدين لمياء ما تلاحظين شي في تأبط شرشور ؟ ما تلاحظين انه ادهر اماراتي ونسى اللهجة السعودية 00 خلاص من لقى احبابه نسى اصحابه 00



المهم الزبير انا ادرس برمجة كمبيوتر 00 واخر كتاب كامل قريته الحكمة الضائعة ( يتكلم عن الابداع والعبقرية ) 00 لكن انا اقرا متقطع يعني مره من كتاب زاد المتقين مره من تفسير ايات الاحكام 00 واقرا جرايد واقار تاريخ انتهاء اللبن واقرا مشاركات لمياء ;)


وبعدين وش اللي تدور لي بنت في الامارات 00 حبيبي الزبير 00 بابا 00 خويه 00 الزبير عندنا هنا بنات 00 بنات 00 بنات الله لا يوريك بس المشكلة الماااااده 00 لا وظيفة ولا شي ماعندي الا مية ريال في جيبي وبعد الظاهر اني بادفعها قطه اليوم بنطلع رحله الثمامه 00


تابط ،، اللي في بالي بنت اجل خبز مفرود 00 اكيد بنت وهي ميب في بالي مره مره طبعا لازم اسال عنها بس هي في بالي مبدئياً يعني معجب


:rolleyes:


حسبي الله عليكم

شوفي لمياء ما عليج من صوت وخذي راحتج انت اخت الجميع

صوت الله يستر انت اونك تستحي

هذا وانت تستحي عيل لو كنت جريء شو كنت بتقول

طيب اسال واذا خير حق بعض الله يجمع بينكم

وترى انا ما انسى الاصحاب

والحمد الله شكرا لانك تنازلت

اسمع يا الزبير خلاص دورلي انا

انا ابى ... خل اهلك يدورون لي

:)

اخي الزبير........اهلااااااااا وسهلااااااااا فيك

وبين ربعك الامارتيين ولك اخواماراتي اسمة تابط شرا

واهلا فيك وفي اهل دبي وباخوناسعيد الرامي

الي شكلة من جماعتكم لانه عضو يـــــــــــديد

واللة شكلي بتكلم زي كلامكم الاماراتي
:p

ياحليلك ياصوت الشباااااب أنا أستخدم مترجم عشان يترجملي كلام الزبير وتأبط مررررره كلامهم صعب ...:9:
بعديييييين (( الرمســـــه )) هذي معقدتني وش معناها بالله ؟؟؟

وأقول أنتوا مالكم سالفه تشتغلونها عليها إلا الزواج ..أقول كل واحد يقابل دراسته ...ولين خلص يكون خير ..مفهــــــــوم ...؟؟؟

بعدين في سؤال صغيرون مرررره لتأبط أقول تأبط ليش إنا إذا رحنا الإمارات مانشوف إلا هنننننننوووود وروس .....في كل مكان وزمان ..حتى الشرطي هندي ...يعني بأفهم أنتوا يالإماراتيين وينكم وين عايشين فيه ماتنشافون حتى في ديرتكم :confused:

حيـــــــــــــــــــــــــــــاج الله يا لميـــــــــــــــــاء

اولا شي شو صحتج ان شاء الله بخير

ثانيا معنا الرمسة هي الكلام والهذربان

والهذربان يعني الكلام الاّ ما له فايده

وترى يا لمياء الرمسة الاماراتية حلوة وسهلة

شوفي بعلمج ...دايما اذا رمة -تكلمة- اماراتي

خلي الجيم ياء مثل الجنوب عندكم

وخلي الكاف جيم بس بثلاث نقط (يعني بين الجيم والشين تقريبا)

ها ان شاء الله فهمة :)

وترى الاماراتين موجودين بس اكيد انت اتسيرين الشارجة عشان جي ما تشوفينهم

شوف تعال عندنا دبي وبتحصلينهم في السناتر والمطعام

وقلة منهم في المسايد-مساجد-

على فكرة شعب الامارات قلة

وما يشتغلون كل الاشغال

يحبون دايما المراتب العالية بخلاف السعودين والعمانيين والكويتين والبحرينيين

وتعالى الشرطة المفروض يكونون اماراتيين

اكيد انت شفت سكيرتي هب شرطي

المهم على فكرة انت قلت انج بيتين الامارات ها ييت ولاّ بعدج

واذا ييت وين سرت

شوفي اقدر ادلج على اماكن ممتازة وطيبة عندنا

خلاص استويت مرشد سياحي;)

تقبلي تحياتي

ابوج تأبط شرا;)

صح نسيت اقول شي

لمياء الزبير هب اخوية

بعطيج فرصة تخمنين :D

اختي القريشية انا اخو الزبير في الاسلام نعم

ولكن ليس في النسب

وترى سعيد الرامي ما اعرفه انا

وتقبلي تحيات خالج تأبط شرا;)

نسيت ابشركم الزبير وصل ادبي

وهو يسلم عليكم

بيدخل المنتدى بس بعد ما يسلم على اهله واهل اهله

والله وشفت ولده على قولت لمياء بزره

فنـّــان ما شاء الله عليه

تأبط تكلم عــــــــربي الله يعافيك :D

بعدين الزبير واحد من أقاربك أخوك ولد عمك اللي هو المهم سلمني عليه

وبالنسبة للإماراتين يابن الحلال أنا أقصد دبي بعينها ..والله الهنود فيها كذا كنهم نمل والروسيات على (( على أفا من يشيل )) ...وجميع جنسيات العالم فيها إلا الإماراتيين
:D
من جد أبوي يدور عليكم مايحصلكم ومررة كان في انتداب عمل واللي يستقبلونه كلهم هنود واللي وقعوا العقد معه هنود اللهم إماراتي واحد بس كان معهم :3:

ولا وهنودكم كشخه ووخر عن دربهم مدراء ورؤساء أقسام ومهندسين :D

مو جــــــــــذيه ؟؟؟:D :D

السلام عليكم

الله يعافيج ان اتكلم عربي:)

يالس اقولج الاماراتيين قلة

وعددهم اقل بوايد منكم يا السعودين

وبعدين الاماراتيين موجودين في

الاماكن الا فيها اماراتيين ها فهمة و لا :D

خلاص المرة الياية تعال عند الاماراتيين مب الهنود

تقبلي احترامي

لمياء ، لا حظتي :)

وبعدين على فكره يعني حتى الاحلام ما تبينا نحلم 00 يالله وش اسوي انا في نفسي 00 وبعدين ترى الاحلام اللي زي كذا حلوه وانا عني احبها واحب اسولف فيها 00


تابط شراً انا احب الاماراتيين بس احب ييون عندي مو انا اروح لهم وانت عارف ليه


;)



توقيع :

واحد من الشباب

:D

صوت الشباب :24:

لازم تجي لعندنا مرة رح تشوف العجب

شفت انا اتكلم معك سعودي

لا تزعل وبعدين ان شاء الله اذا حصلت وقت رح اتصل بالشيخ

واساله عن تفسير الحلم

وبعدين رح اخبرك ok

الزبير يسلم عليكم

تأبط وش فيك عصبت ..ترى ماقلنا شئ يا أخوي..والله

حتى إنت يا أبو الشباب خلاص أنتوا ماعد ينقالكم شئ

وخلاص ماعد يمزح معكم ولا شئ وبأصير ثقل مرررررررررررررررررررره
وتشوفون يالدلوعين <<<(( البنت موصله معها ... معها حق بكرة عليها اختبار صعععععععععب ولا ذاكرت وداخله الأنترنت بعد ويا وجهها ونايمه النهار كله
انزنقت والنفسيه عليها السلام )):mad:

يا لمياء وش دعوه خذي راحتك :rolleyes:


الله يوفقك في اختبارك لكن مدام عندك اختبار ليه داخله النت انتي ووجهك 00



يالله اشوف اطلعي ذاكري لك كلمتين مسرح انجليزي يمكن تنفعك 00


يالله الحين برىىىىىى


تابط شراً
عساك على القوة خل الزبير نفسه يسأل عن الحلم لأنه لازم هو بنفسه ترى الشيخ بيسأله عن اسمه واسمي وعن شكله وعن شكلي و و و و وش شاف بالضبط في الحلم 00



;)

توقيع

متحمس