متى يبدأ مفعول الفافرين ؟
 

السلام عليكم ورحمة الله وبركاته

حياكم الله جميعا ..

قبل فترة كتب لي الطبيب الفافرين لعلاج المخاوف و الوسواس بجرعات متدرجة حتى اصل الي جرعة ٣٠٠ ملجم يوميا

انا كذلك تدرجت في تناوله بواقع ٢٥ ملجم لمدة ثمان أيام
ثم ٥٠ ملجم لمدة ثمان ايام أخرى

و الان ٧٥ ملجم أتممت أربعة أيام منها

و في كل مرة تزيد المخاوف و الأفكار الوسواسية أكثر و أكثر أشد من فترة بداية العلاج

أفضل فترة نعمت فيها بشيء من الهدوء و تلاشي الأعراض كانت في الثمان الايام الأولى بواقع ٢٥ ملجم


الحين وش الدبرة .؟

ما هو كل ما أزيد الجرعة يزيد العذاب

لين متى طيب ؟

بدأ صبري ينفذ و لا أبي ادخل في دوامة تبديل الأدوية

فقط ابي اللي سبق جرب الفافرين متى بدأ معاه مفعول العلاج و متى شاف الطمأنينة ؟

ربي يرزقنا وياكم طمأنينة و أمان الدارين

اللهم امين يارب العالمين

دخلت قروب في التليجرام للموسوسين ابسأل عن الفافرين لقيت كلهم ال ٦٠٠ وسواسهم في الطهارة الله يعافيهم و لا احد فيهم يتناول علاج

تجننت كله عن الافرازات و النجاسات الله يكون في عونهم
زاد غمي غم و خرجت منه

الفافرين علاج خفيف جدا المفترض التدريج يكون 50 ' 100 ' 150 ' 200

جزاك الله خير الجزاء اخونا الكريم

متفائلة انصحك تقفزين الى ١٥٠ مباشرة

السلام عليكم ورحمة الله وبركاته

حياكم الله اخواني الكرام على الإفادة

انا الان على جرعة ١٠٠ ملجم يوميا
الوسواس الحمدلله خف عن أول و كذلك دقات القلب السريعة يعني الخوف لكن حل محله كرب و ضيق و اختناق ، مافي شي يطلعني من هذا المزاج أبد لدرجة عاجزة عن أداء أبسط المهام و أحسها كالجبال

و فوق ذا ما انفك عن طحن أسناني و الضغط على الفكين طوال اليوم ، أقوم الصداع ما فارقني لأن
كل وجهي متوتر من الألم

الحمدلله الكوابيس خفت

لكن قعد لي الضيق و طحن الأسنان مدري متى ارتاح منها و الحمد لله على كل حال

أبغى أذكر شي اخاف تقولون شكاويها كثير
لاحظت كذلك الغثيان مستمر و الاحساس بالشبع و الامتلاء لدرجة اكل وجبة خفيفة وحدة باليوم

هذا شي طيب لكن الغثيان اتعبني

و الحمد لله على كل حال

مدري هل كل هذي الأعراض ناتجة عن العلاج

اللي جرب العلاج هو اللي يستطيع يرد

السلام عليكم ورحمة الله وبركاته

حياك الله أخوي

انا مترددة في الزيادة
بدأت بجرعة ٢٥ ملجم لين وصلت ل ١٠٠

و اخاف كل ما أزيد تزيد الأعراض

الحين يا إني نايمة يا في حالة كرب لا تطاق مكبلة ماني قادرة أسوي شي بسببها طوال الوقت اتنهد من الضيق حتى و انا نايمة
اختناق لدرجة انطباق في ضلوعي
حتى عيوني ماهي راضية تجود بالدموع حتى أرتاح

الحالة هذي من رمضان من يوم بدأت العلاج و قاعدة تزيد مع زيادة الجرعة
ربي إني مسني الضر وانت ارحم الراحمين

فراغ في عقلي كذلك مافي تفكير و لا احساس بأي أحد

فقط كرب و ضيق لدرجة الاختناق

ابذكر الله ماني قادرة احس حتى لساني مربوط

انا ما انحديت على العلاج لين ما وصلت لمرحلة الوسواس اللي أفقدتني عقلي و أمني
و الا اول متعايشة مع الرهاب و الهلع سنين
و الحمد لله على كل حال

الأدوية هذا طبعها تشيل عنك شي و تضع شي آخر

الان بس ودي ذي الغمامة اللي مقيدتني تنقشع
ربي يجيب العواقب سليمة

مدري وين الأخوات اللي قالن انهن سبق جربن الفافرين يطمنني
حتى أطباء ما ابغى

لا يألم الجرح الا من به ألم

انا اتناول الفافرين كذا ١٠٠ ١٥٠ ٢٠٠ وزي الحلاوة مايأثر بأي شيء تصدقين انهم يعطونه للمتزوجين حديثا لتاخير القذف

السلام عليكم ورحمة الله وبركاته

الواحد وش موزمه يغامر بسلامة عقله و يجازف بصحة نفسه عشان مشكلة زوجية تبي تنحل بعد فترة ..

معروف كل الأطباء يقولون تبي تنحل بعد سنة من الزواج. ، لما يقل الشغف و يخفت الوهج

الأعراض الجانبية للأدوية النفسية لا يمكن تحملها
يكفيك الكرب الملازم و الغثيان و الدوخة و الصداع و النوم الطويل

من عوفي فليحمد الله

إذا متزوج و يعاني من ذا الشي فيه غيره ما هو متزوج اصلا
و يروح يبلي عمره بالأدوية من بداية زواجه

يكفي ان الأدوية تخليك جسد بلا روح بس تنتظر متى ينتهي عمرك و ترتاح

انا فعلا هذا الشعور أحسه .. احس حتى ما اطمح للتغيير ، فقط ابغى اقابل ربي مع حسن خاتمة

يكفي ان الواحد لو اكل كم قطعة بسكوت مالح تقعد في بطنه لليوم الثاني كأنه بالع له ذبيحة ،. ثقل بالمعدة و انواع التلبك و الغثيان و الحمد لله على كل حال
بالله وقتها هل يبي يكون له نفس يطالع بوجه عروسته حتى يفكر في مشكلة زوجية بسيطة

يعني جمع على نفسه المعاناة النفسية و الجسدية و الفكرية و قعد بها ..


انا شفت في التليجرام خلايق الله يعافيهم يقعدون في دورة المياة يتوضون لصلاة الظهر ما يطلعون الا مأذن العصر من شدة الوسواس ،
خلايق بعدد شعر الراس و لا يفكرون يغامرون بالعلاج النفسي مع انهم أولى الناس بالعلاج ،
من يوم تجيب لهم طاري العلاج يتنافضون
بينما عرسان جدد يدهورون أنفسهم بالأدوية من بداية حياتهم الله يعينهم