موقف يموّت من القهر !!!
 

السلام عليكم و رحمة الله و بركاته

في موضوع عن الأحداث الطريفة التي تحدث في ليلة الزفاف قرأت هذا الموقف الذي جعلني أغضب لدرجة لا يعلمها إلا الله فهاأنا أقوم بإدراجه لكم لتحكموا على هذا المدعو زوجاً:

يوم لاينسى..... تقول كان زواجي بعد أيام من السهر وقلة النوم وعدم رغبة في الأكل وسافرنا في ليلة زواجنا إلى المدينة المنورة...ودخلنا الفندق.....قال لي زوجي: لم يبق وقت لننا م....لننزل الحرم نتهجد إلىأن يؤذن الفجر ولا تفوتنا الصلاة ...المهم رحنا.....لما وصلنا الحرم مشي على الأقدام ...طبعا ً قال خذي المفتاح إذ ا صلتي إرجعي وأنا سأجلس إلى شرو ق الشمس ...وبعد ماصليت طلعت أمشي وأمشي َيعت الفند ق ماا انتبهت له ولاإسمه!!!!!ولاأعرف منين رايحه ولامنين جايه وأبكي من قلبي , وراني الشرطي وأنا أشهق من البكا ء واييييييييي........وجلس يبحث ويدور معي إلى الظهر وفجأة....رأيته....عريس الغفلة وهو في حا لة الله يعلم بها و......وسقطت على الأرض مغمى علي........ ولم أصحو إلا اليوم الثا ني!!!!وكا ن يوم لاينسى.....


تحياتي و تقدري للجميع

والله انه عريس الغفله :)

ِأختي العزيزة القريشية

اشكر لك هذا التواصل و لكن بكل صراحة شكله خايف و أعصابه متوترة و كان يبغى يرجع للفندق و هي نايمة يمكن يهدأ شوي.

بس ما أقول إلا الله يعين زوجته عليه و لو أني مكانها كان وريته شغله.

تحياتي و تقديري للجميع

وووووووو صدقتي ياالقريشيه هذا هو عريس الغفله
من أولها يقول لها روحي وأنا بصلي ثمن ألحقتس ؟؟يؤؤؤؤؤؤؤ


أجل بعد شهر وسنتين وكم أربعطعشر أسبوع وش بتقوله هي ؟:):)

الله مير يرحم حالتس ويلطف بضعفتس على هالعريس العديم الرحمه والمسئوليه

ما يقول البنت اكيد تعيبينه ولا ما مانامت لها كم يوم ولا على الاقل اكيد انها ما كلت ,,,,,,,,,وين بتاكل وهو عرسها الليلة الله يخلف على امن جابتها بس

بس لو هالعريس عندي كان وش يفكه مني ................اشوى انه ما اعرس علي ولا كان حماته تحبه صحيح

الله يعيـــــــــــــــــَنه عليـــــــــــــــه :9:

الأخوات الفاضلات واهمة و الخيالة و صمود

أشكر لكن تفضلكن بالرد و التواصل في هذا الموضوع و الحقيقة أنا لو كنت موجود يوم يصير الموقف كان حكمت على الزوج بالإعتكاف في المسجد لمدة لا تقل عن أسبوع قبل ما يدخل الفندق علشان يتأدب و الا شبيصير لو أنه صلى الفجر في الفندق مع زوجته كإمام لها و شبيصير لو أنه جلس معها حتى الإشراق بالفندق بدل الحرم و لكن بكل تأكيد كان خائف من المواجهة و يبغى يجي و هي نايمة.

لكن من هذا الموضوع أطالب كل أصحاب الفنادق بوضع اسم الفندق و تلفونه على الأقل على كل مفتاح لأي غرفة أو شقة في الفندق علشان المسكينات أمثال اللي صار لها الموقف.

تحياتي و تقديري للجميع

حاطين حيلكم على هالعريس الأجودي ..

راعي طاعة .... قاعد يسأل ربه أنه يوفقه في المسجد ... وتقلون عنه هالحكي..


الكلام والله على هالعروس الصتيمه اللي توها جايه من الفندق ما عرفت ترجع له...
ثمن على فرض أنها ما تدل ... ما فتحت ثمها جعله يدق .. وسألت رجلها وين أروح للفندق معه .. يومنه يعطيها المفتاح...


قطعت قلبه حسبي الله عليها ...

لكن هذي تاليت اللي يسافر بالحريم ... غثى وشينة نفس.

شي ثاني ما أنتبهت له ... وهو تعليق المهندس التالي..


وش رايك يا أخوي المهندس عندي لك وظيفة زينتن بالحيل ..
وهي مفتي العرسان (( وكل فتوى ... بفرخة )) مثل ما قال الشيخ عبد الرحمن الدوسري الله يرحمه...

ذالحين العريس رايح للمدينه ..... علشان يصلي في الفندق !!! سبحان الله

ثمن حركة العريس هذي ... أعتقد أنها قمة في مراعات مشاعر العروس ..
حيث أنها وبعد ليلة الزفاف الطويله وتعب السفر ومشقته .. تحتاج أن تأخذ دش وتغير ملابسها ... وغرف الفنادق لا يمكن أن يكون للزوجة شيئ من الخصوصية فيها اذا كان معها زوجها .. وهي عروس ويلفها الحياء .. وفأراد العريس أن يمكنها من أن تأخذ راحتها في غيابه .... ولكن وش الحيله في هالصتيمه...



المهندس تكفى لا عاد تطري كلمة (( خايف من المواجهة )) أو مترادفاتها ... لأنها مهيب زينه ....... تكفى مادام أني أقولك تكفى ... لأن غيري ليس في قاموسهم كلمة تكفى.


والله الموفق والهادي الى سواء السبيل

النشمي.

أخي العزيز النشمى

أشكر لك هذا التواصل و إثراء الموضوع برأيك السديد.

أخي الفاضل ما أعلمه أنه من السنة أن العريس يصلي صلاة الفجر في بيته إماماً لزوجته و هذا ما هو معروف للجميع و لكن إذا كان رأيك أن يخالف هذا الأمر و يذهب ليصلي في المسجد فهو خير على خير و لكن من الواجب على هذا الشخص أن لا يجلس في المسجد إلى إشراق الشمس حيث أنه من غير المناسب لشخص قد تحمل السهر و التعب يوم الزواج و ليلة الزفاف و يترك زوجته و يجلس إلى صلاة الإشراق في الحرم و كان المفروض أن يضع في حسابه أن الأيام قادمة و سيجلس بدل هذا اليوم الأيام المقبلة.

هذا رأيي القاصر بكل طبع و لكم مني فائق الإحترام و التقدير

أخوك
إنجنيييييير

يؤؤؤؤؤؤؤؤ يا النشمي كل هذا عنصريه وتعصب ونخوه لها العريس التعبان ؟؟؟


نشمي إيه بس مو لهاالدرجه , والمسيكينه من قوة قهرك كتبت فيها أبيات سجع وهجاء غلبت على هجاء الفرزدق .....


لا يكون بس العريس من ذوليك إللي مسوين لهم مواقع من عيال العم والخوال :) :)



لا تنسى إنك نشمي خل هجاء الفرزدق بعيد عني بليز :)

أخوي أنجنير ......

كيف الحال ..... ترى أدبك الزايد خلاني أستحي على وجهي .. وأقدرك ..
بس يا خوي طلعنا من حفرة وطحنا في دحديره ...
حيث أنك تقول عن ترك الصلاة مع جماعة المسلمين سنه ..... يؤ سنننننننه حته وحده
ثمن تقول .. (( الواجب على هذا الشخص أن لا يجلس في المسجد إلى إشراق )) .. أيضا يؤ ... من اللي أوجب هذا الشيئ ...

أخوي ترى شفاء العي السؤال
وأنا ما عندي زود علم شرعي ... لكن أحيلك على الشيخ هدهد أو الشيخ البتار.. وهم ان شاء الله وبحول الله مهومب مقصرين معك لأنهم والله اعلم أجواد وأهل واجب... ولا هومب فاكينك الا لين تضبط علومك.

تحياتي لك أخوي



=======
واهمة

جعل من همه نشا الثوب يفداك ***** واللي فلوسه في بنوك الفوايد

تكفين غيري والا بدلي...
عنصرية حته وحدة ............
والعلم الحق ان العنصرية عندس أنتي وخواتس للعروس الصتيمه الله يرحم حال رجلها..


وبعدين أنا وش قلت ....والله اني مسيكين وترى:
ماعلي من الفرزدق ولا حتى جرير ****** حتى خيال القوافي ترى عادي شباب
همي الاول00 الاول00 الاول والاخير ****** طاعة الله والنبي يا معزين الخطـــاب
يوم انا الانسان ان عشت مجهول المصير ****** من تـراب خلقت وان مت ارجع للـــتراب

والعريس والله أني ما أعرفه لكن الحق حق والا لا.......

ولأني نشمي لو يجي الفرزدق ويهجي في أحد من الاجواد في هالمنتدى أقص لسانه .... وشلون عاد لو يحكي في شيخة الاجواد كان أزنطه لين تطلع عيونه...
ماهقيت انس تضنين بي بي هالضن.

بارك الله فيك أختي الفاضله .....
وستر عليك وعلى نساء المسلمين.
واعذريني على ما ترين أعلاه من السفاهة أو زود الميانة.


-----------
النشمي
والقصيدة أم ثلاثة أبيات لواحد من عوال عمي.