فضفضه وبس :(
 

السلام عليكم ورحمة الله وبركاته

بس حبيت افضفض شوي .. تعبت ونفسيتي تعبت من الرهاب
اتمنى اطلع زي الناس اضحك معهم اكل معهم اسولف
يوم الخميس اخذت علاجي واخذت ابرة فيتامين وكانت عندنا طلعه واقول بنفسي اطلع او لا
وقلت لازم اقوي نفسي واطلع وفعلا طلعت وتمنيت اني ماطلعت
مو قادره اسولف ويسولفون معي واحاول اخلص الموضوع بسرعه
ماقدرت اتقهوى وغصبتني وحده اخذ الفنجال ويدي ترتعش
وجا وقت الاكل وربي ماقدر امسك الملعقه واستغنيت عن الملعقه وقلت اكل بيدي وبصعوبه ارفعها اكلت مرتين وقمت ماقدرت ابلعها حتى
رجفه بشكل فضيع وتعرق بشكل واضح :(
ابغى اروح دورة المياه وانتم بكرامه مو قادره اقوم اولا مشيتي تصير مضحكه وغير متوازنه مااعرف اوزن نفسي مره الف يمين مره يسار كني خبله
ورعشه بالجسم وبالوجه انشلت حركتي وصرت جالسه وجودي مثل عدمه
رجعت وانهرت وبكيت ودعيت ربي يشفيني وكل من يعاني من هذا المرض ولااحد يذوق مرارة هذا المرض
والحمد لله زوجي واساني ويارب لك الحمد على كل حال
نفسيتي جدا في نزول مو قادره اطلع روتين ممل
تخيلوا شخص متعافي ومافي جسمه ولاشي بس مايقدر يمشي ولايقدر يتحرك ولايطلع
كاني بالمجتمع زيادة عدد .. لي امنيات كثيره
منها اتوظف ومنها التحق بدار تحفيظ ومنها اكمل دراستي واخذ الماجستير لكن الرهاب حطمني
والحمد لله الحمد لله الحمد لله
ربي اني مسني الضر وانت ارحم الراحمين

وعليكم السلام و رحمة الله
أختي الفاضله : أمنياتي لك بحياة أفضل و راحة البال
نصيحتي لك :
- قراءة الكتب و مشاهدة المحاضرات التي تزيد من الثقه بالنفس.
- ممارسة الرياضه .
- وجود عوامل النشاط و الحيويه للجسم , و أولهم الاغتسال بالماء البارد نوعا ما .
تحيه و تقدير

ياعمري الله يشفيك ويشفيني .. انا مثلك المشكله اننا ندور الحل والعلاج عند الدكاتره والنت ونسينا ان ربي الوحيد القادر على شفائنا هذا ابتلاء من الله وباذن الله ماجورين عليه .. تصدقين بقولك موقف صارلي كان زوجي مقرر اننا نسافر لاهله وانتي تعرفين يعني جمعه وكذا وهذا موقف ودي اهرب منه باي طريقه المهم جلست فتره الح عليه مانروح باعذار كلها كذب وادعي ان الله ماييسر هذي الروحه بس قرر نروح والله كنت طول طريق السفر وانا ادعي وقلت اول مااوصل باخذ حبوب مهديه تهدي الاعراض وسبحان الله لما وصلنا مالقيتها في الصيدليه قلت يمكن خيره لاني استخرت .. ووالله ماتصدقين لما وصلت لهم ربي ييسرها بشكل انا متفاجئه منه الى الحين وكنت طبيعيه جدا وراحت مخاوفي مو كلها لكن معظمها .. كله من الدعاء والله لاني كنت طول الطريق ادعي وبالحاح .. الحين احس اذا تقربت من ربي وظعيت اني افضل بكثييييير

اخوي عابر سبيل

تسلم ويعطيك العافيه عالنصائح
وان شاء الله ربي يسهل امرنا

اختي ام ميما ..

انا مدري صراحه ليش نخاف ونرتبك مع انو مو ناقصنا شي الحمد لله :)
والعزومات واهل الزوج عندنا رعب يالمتزوجات الله يعين
بس الصراحه انا اكثر شي افكر فيه عيالي ومستقبلهم ولازم اكون قويه يني انتي وش صار معك رحتي للعياده ..؟
انا صراحه افكر اجرب السيروكسات بس محتاره وان شاء الله استخير واذا فيه الخير ربي يكتبه لي واذا فيه الشر يبعده عني
واهم شي نتقرب لله ومانيأس لأن لو يأسنآ راح ننعزل عن كل شي فلازم نكون اقوياء :)
ولأن ربي يحبنا ابتلانا والحمد لله هذا الشي يفرح الواحد ان ربه يحبه وان شاء الله تكفير لذنوبنا
واسأل الله الشفاء لي ولكي ولمرضى المسلمين يارب