نفساني - علاج الرهاب الاجتماعي بدون ادويه ، والله اني لكم ناصح

السلام عليكم و رحمة الله و بركاته ..

اقسم بالله العلي العظيم اني ناصح لكم يا اخوان ،من باب واقع تجربه لبعض اللي راح اذكره.

ما راح اطول عليكم و اكثر بالكلام و العلاج يبغاله صبر و تنفيذ بشكل صحيح و هو كالتالي :

1- اقرأ ما تيسر لك من القران و تدبر معانيه و كذلك ايضا اقرأ سورة البقره يوميا وتدبر معانيها .
بالبدايه راح تجد صعوبه بقراءتها ومع الوقت راح تصير قراءتها عليك سهله جدا و ماراح تاخذ منك وقت طويل .
2-صل جميع صلواتك في الجماعه .
3- حافظ ع السنن والرواتب قبل و بعد كل صلاة مفروضه .
4-بعد ما تنتهي من كل صلاة اجلس لمدة اقل من 10 دقايق و اقرأ ما تيسر لك من الاذكار و اكثر من الاستغفار . مثال على ذلك:
استغفر الله ، حسبي الله ونعم الوكيل ، لا حول ولا قوة الا بالله ، لا اله الا انت سبحانك انتي كنت من الظالمين ، حسبي الله لا إله الا هو عليه توكلت و هو رب العرش العظيم ، إن لله و إن إليه راجعون ، سبحان الله و بحمده سبحان الله العظيم ، اللهم صبي وسلم على نبيتا محمد .
5-اكثر من الاستغفار. يعني كل ساعه خذ منها خمس دقايق من وقتك واستغفر الله .
6-ادع الله في سجودك و ركوعك بأن يشفيك او يقضي حاجتك .
7-قم وصل في الليل وامسك المصحف و اقرأ ما تيسر من القرآن .( صفحتين او ثلاث او اربع او عشر او ميه ) .
8-اقرأ اذكارك الصباحيه في وقتها و اذكارك المسائيه في وقتها .
9-اجعل ايمانك بالله قوي جدا و انه هو الشافي وحده و حط براسك ان هو اللي بيشفيك.
10-تفائل بكل خير ، املأ قلبك وحياتك بالتفائل ، تفائلو يا اخوان ، هذي نقطه مهمه جدا .
11- واجه كل ما تخاف منه ، و خل يصير اللي يصير ، وش بيصير يعني ؟ خل يصير اللي يصير ، و توكل على الله و واجه .
12- النقطه الاخيره والاهم ، جميع الاشياء اللي تخاف منها لا تفكر فيها نهائيا ، و اقطع التفكير فيها وشلها من راسك ، و بدل التفكير بامور ايجابيه ثانيه ، و هذي يبغالها وقت لين تنطرد المخاوف من عقلك الباطن و تأتي مكانها الامور الايجابيه التي كنت استبدلتها بالامور السلبيه اللي قطعت التفكير فيها .
13- اكثرو من الصدقه لو بريال و ادع الله بعد ما تتصدق انه يشفيك .
14- اذا طبقت هالامور اللي فوق بحذافيرها هناك نقطه مهمه واخيره واللي هي يجب انك تبتعد عن كل ماهو حرام وعن كل ما يغضب الله.

و بعدها شف النتيجه و احكم ، بذكر الله تطمئن القلوب ، و القرآن شفاء للناس ، و ابتعدو عن المعاصي والحرام والكلام المسيء .

انا طبقت كل هالامور اللي ذكرتها و اقسم بالله ان نفسيتي اصبحت جميله و اللي كنت اخاف منه تشافيت من اغلبه لكن استغفر الله رجعت لفعل المعاصي و انتكست حالتي .
بالبدايه راح تجد صعوبه بسيطه لانك ماانت متعود والشيطان يخليك تتكاسل ، لكن خل عندك عزيمه ، واجتهد و اصبر ، فالله سبحانه وعد ان مع العسرا يسرا ، والله يا اخواني يشهد الله علي اني ابيلكم الخير بس طبقو اللي قلته لكم و ارجعو الى الله فهو الشافي و القادر على كل شي و امره بين الكاف و النون ، يقول له كن فيكون .
وبالاخير ادعولي ان الله يشفيني من كل شي اعاني منه .
والله يشفيني و يشفيكم جميعا .
استغفر الله و اتوب اليه .
محبكم .