لما تفهم الهلع، رح توصل لنصف العلاج موضوع تفصيلي قد يفيدك
 

السلام عليكم

اهلا بالجميع، اتمنى انكم بتفائل وصحه افضل

رح يكون هذا موضوع طويل لكنه ان شاء الله مفيد لانه بيفصل امور كثير عن نوبات الهلع وايش بالضبط الي يحصل فينا. ولما نفهم الامور هذي نكون فعلا وصلنا للفهم الكامل للهلع وليش يكون شي مزعج.

بسم الله الرحمن الرحيم

الهلع او نوبة الهلع هي محفز للانسان وهي اصلا شئ طبيعي في الانسان وهو شئ جيد جدا جدا، بل انه من دونه ما بيكون لنا استجابات في مواقف الخطر. ف الهلع شي مطلوب جدا حتى نستطيع ان نعيش و ننجو من المواقف الخطره وهو اصلا رد فعل طبيعي في المواقف الخطره وهو الذي يحفز الانسان لشيئن ( أما الهروب، أو المواجهه )

يوجد خمس اعراض للهلع متوحده مع الجميع، وهي ( خفة الرأس، تغير الحراره المفاجئه، الرجفه، شعور بصعوبة التنفس، ضربات القلب السريعه )

كل هالاعراض لها تفسيراتها الطبيعيه وهي غير مؤذيه اصلا. تفسيراتها كالتالي:

1- ضربات القلب السريعه: القلب يضخ الدم بسرعه للعضلات لانك تحتاجها في حالة الخطر
2- ضيق التنفس: ليس ضيق لكن الحاجه للأكسجين بشكل أكبر للجسم في حالة الخطر
3- خفة الرأس: لان الدم يقل في المخ، وينتشر في الاطراف اليدين والرجلين
4- الرجفة: لام عضلات الجسم صارت مشدوده ومستعده للخطر
5- تغير الحرارة: بسبب تدفق الدم السريع بالجسم لان الاطراف تحتاج دم اكثر واسرع

كل هذي الاعراض طبيعيه ونختبرها في حالة الخطر، مثلا لو واجهنا نمر، الاعراض الي فوق كلها تجي وهي تحفزك لشغلتين ( الهروب او المواجهه ) وبكلا الحالتين جسمك جاهز عشان كذا الاعراض الي فوق صارت.

في هذا الوقت لما يكون فيه خطر، ما رح تخاف من النوبه اصلا... لأن ببساطه فيه مسبب لها وهو النمر ف ما رح تتفاجئ منها اساسا ولا بتشغل بالك وبمجرد هروبك بتخف الاعراض وتعيش طبيعي، او لو معاك سلاح وواجهته برضه بزوال الخطر بتروح الاعراض تدريجيا. وتفسر وضعك في وقت الخطر انه خوف ورعب لكن ما رح تفزع من الاعراض وكل شي طبيعي.

المشكله وين، لما الاعراض الي فوق ( الي هي غير مؤذيه اصلا ) تجيك بوقت مافيه خطر. هذا الي يسبب الرعب الشنيع للإنسان.

عشان مبسط الصوره، نخليها قسمين

1- نوبة الهلع بمسبب

ينتج عنها التحفيز هروب او مواجهه

2- نوبة هلع بدون مسبب

نمشي خطوه خطوه
لما تجي اعراض الهلع الي ارجع واذكر انها غير مخيفه ( الي بالاعلى ) من غير خطر، رح يجيك قلق ( ركز على القلق ). القلق هذا رح يفتح باب اسأله كثيره و ينتج عنه اعراض اكثر وهي ( الخوف، الدوخه، الغثيان،، الخ). هذي الاعراض الجديده بتخليك تتسائل و تصير تقول وش صاير فيني؟ هذا السؤال هو الباب الي فتحناه. تبدا تكثر الاسئله، وش فيني؟ قلبي شفيه شكله فيه مشكله؟ النفس عندي ضايق شكله فيني شي؟ شفيني اختريت فجأه؟ فيني الم بالصدر ( طبعا بسبب ضربات القلب السريعه ) شكله فيني ذبحه او جلطه؟ ما كان فيني شي قبل شوي؟ شكله الناس تطالع فيني؟ لو انا بخطر من يساعدني؟ هل الناس بتساعدني؟ ابي اطلع من المكان؟ وين الباب؟ رح يغمى علي؟ رح انجن؟ رح اموت؟

طبعا الاسأله هذي كثيره ولكن الحصيله الي بنطلع منها من الاسئله تكون قلق اكثر!! ومعها بتصير متوجس لانه ببساطه جتك اعراض من غير ما يكون هناك موقف يستدعي التجهز لـ ( الهروب او المواجهه )

وهنا نصير بدائره ما تنتهي وتتكرر نفس العمليه الي موجوده مره ثانيه وتصير دورة او حلقة كـ الآتي

نوبة هلع ( هروب او مواجهه) > قلق > تسائل > قلق اكثر ،،،،،وهكذا

لحد ما تدخل في اضطراب القلق. وقتها تنفتح ابواب ثانيه واهم الابواب هي بابين مهمه:

1- الوسواس

لان الاعراض الي ارجع اقول عنها ( غير مؤذيه ) صار في عندك تساؤلات وتبدأ مرحلة الاكتشاف. يبدأ ان في مشكله يالقلب او التنفس او او الي هم الاعراض الخمسه للهلع. وطبعا يكون التشخيص كل شي سليم. ويزيد القلق بقوه لان الشي هذا صار مجهول وتزيد الدوخه الي هي عرض من اعراض القلق وليس الهلع. وتأتي نوبات غثيان والاعراض المعروفه للقلق لأننا ببساطه دخلنا القلق عن طريق الهلع. ويبدأ البحث عن مسببات الدوخه و باقي الاعراض ومع هذا مافي شي. ونصير قلقين اكثر وهذا بدوره يزيد الوسواس انه فيني شي ولكن ما احد اكتشفه وقد يتطور ان فيني شي غريب ما ادري ويتفاقم الوسواس ويصير وسواس للجنون او الموت.

2- رهاب الساح

طبعا طبيعي جدا اذا الشخص مو عارف وش فيه ولكنه يختبر اعراض ممكن يتجنب الاماكن الي ما يقدر يهرب منها مثل مجمعات او اسواق او مطاعم لانه ببساطه لسه مو عارف اي شي عن الي فيه وخايف انه تحصله وهو بهالاماكن وقد يتطور الموضوع انه يكون حبيس البيت.


وهنا تصير حياة الشخص مشلوله ويوصل لمراحل يأس ويصير الشخص حاس انه غير قادر على اي شي.


فهم المرض هو نصف العلاج، وطبعا كل الي كتبته فوق عشان اوصل لمعلومه ان مفتاح الهلع كالتالي:

نوبة هلع> (((((( القلق )))))))> تسائل > قلق اكثر

القلق الي بين الاقواس هو المفتاح، لانه هو الي يفتح التسائل ويخليك قلق اكثر وتدخل بنوبات اضطراب القلق. مو سهل ان الشخص ما يقلق من النوبه او يخاف منها لكن مع الوقت، لما تجي نوبة الهلع وقف القلق وخلي النوبه تجي عادي هي دقائق وتروح وانت بهالوقت انسدح او اجلس لين تروح وطمن نفسك انها نوبة خاطئه وبتروح.

ارجع واقول، مو سهله ابدا انك ما تقلق لكن هي المفتاح.

اتمنى اني اكون افدتكم بهالموضوع وان شاء الله نتغلب على الهلع بالتدريب على تهدئة النفس. ويعينا على وقف القلق قبل ما نوصل للتساؤل.

اسف للاطاله

موضوع جميل أخوي ماندوزا بس عندي سؤول فضلوي شوي ولا تزعل علي وش معنى ماندوزا وليش اخترت هذا المعرف وتقبلي مني قبلة على رأسك عزيزي حفظك الله

جزاك الله خير , كلام رائع و يارب يستفيدون الاخوان

ما يحتاج قبلة الرأس احنا هنا نساعد بعض ومرات بحتاج مساعدتك ف لا تستعجل ههههههههههه

بالنسبه للاسم، هذا شخصيه كرتونيه اسمه ماندوزا كان بمسلسل الاحلام الذهبيه شفته وانا صغير وكنت اقلده لانه هو بطل وشجاع ومن هالكلام. وطبعا اصحابي الي معاي بالمدرسه صارو ينادوني باسمه ( لان اسمي الحقيقي اصلا غريب على سعودي ) ف لصق الاسم فترة لبعد المراهقه.

ولما سجلت حبيت اني اتذكر هذيك الايام واذكر نفسي بهالبطل واقهر المرض هههههههههه تقدر تقول نوعا ما حرب نفسيه

شكرا لمرورك، والله يجزاك الخير وهذا الي اتمناه اننا نستفيد جميعا

الله يعطيك العافيه
صدق لما نغير قناعة نوبة الهلع على انها شي عادي
وما تسبب شي بإذن الله مارح نخاف منها
وبنعرف انها عرض وبيروح
لكن اكثر شي مزعج ومصاحب للنوبه
اللي هو اختلال الانيه 😭
وما تكلمت عنه :/

اي صحيح ما تكلمت عن اختلال الانيه وذلك لعدة اسباب ولكني بكتب اخر شي توصلو له ولا اعرف هو صحيح او خطأ


اختلال الانيه يمكن ان يكون اضطراب بحد ذاته يعني هو احد انواع القلق او انه يكون احد اعراض ( الوسواس القهري، الصرع، نوبات الهلع، الاكتئاب )

اخر شي توصلو له لكن معروف مافي تأكيد لان الاضطراب ذا لين الان يعتبر غامض. توصلوا ان الشخص المصاب بأحد الامراض المذكوره بين الاقواس يكون شبه منعزل بتفكيره. يعني انه يكون مع اهله مثلا لكن باله مشغول بأفكاره ومو شرط الافكار تكون عن نفسه لكن تكون عن ازمان، اماكن، الي يعرفهم، اهله، نفسه،،، ايا كانت هذه الافكار لكنه فعلا ينعزل ذهنيا عن المحيط الي هو فيه. وهنا يصيبه الاختلال.

ايضا قد يأتي كـ أحد اعراض نوبة الهلع ولما تروح النوبه تختفي ، ويمكن تطول الى ساعه ساعتين، وقد تمتد طويلا.

للاسف غير معلوم كيفية القضاء عليه لعدم تأكيد سبب الاصابه به، لكنه يعالج حاليا بمضادات الاكتئاب ومع هذا مو اكيد يزول. ثبت انه 40 الى 50 بالميه من المصابين بالاختلال يتعالجون منه بـ زاناكس ، ولكن مشكلة زاناكس معروفه. وايضا لسه في نسبة خمسين بالميه انه ما ينجح.

على العموم هو يزول لوحده بزوال السبب،، بس معرفة السبب صعبه عشان كذا هالحاله هذي مالها مراجع كثير بالحلول.

شكرا واسف للاحباط

بارك الله فيك
بس عندي سؤال
هل ممكن نتجنب نوبات الهلع بمعنى نمنع حدوثها
أني ساعات بحس و كأنها ستأتي فأقوم بحركة أو أغير تفكيري فتروح
أو ممكن هذا يكون مجرد خوف وتوقع لحدوثها
وبالنسبة للرهاب ...
أنا شخصيا أتعامل معه بالعكس
يعني لما تجيني نوبات قلق أخرج للسوق ولما أحس أن النوبة راح تجي أزيد من سرعتي فيتشتت الذهن أولا و أحس الاكسجين يوصل للنخ فتخف سبحان الله أو أدخل محل و أتفرج وأتمتع ههههههه
ويوم تجيني عزومة ألبي دون تردد و أشوف الناس و أحاول أشغل نفسي ولا يحدث معي شيء
بالعكس لما أبقى لوحدي ترجع النوبات كثير
هههههههههههه مادري هل هذا ممكن أم أني بس بتخيل هذا

هههههههههههههه لا ما تتخيلين هذا فعلا صحيح ولا فيه شئ. وبالنسبه لرهاب الساح درجات مو درجه وحده. وغالبا الخوف من البقاء وحيدا هذي احد درجات رهاب الساح. لكن مو شرط كل اصحاب نوبات الهلع يكون عندهم رهاب الساح، وايضا مو شرط ان يكون عندهم وسواس لكن ارتباط هالمرضين مع الهلع قوي جدا. اولا نكون اكثر صراحة، نوبة الهلع هي نوبة فجائيه بالعاده ويمكن تتكرر وتصير اضطراب هلع في حالة كانت من غير سبب. احنا المهلوعين، اكثر من 90 بالميه من نوباتنا نستحضرها وانا كتبت موضوع اسمه خدعة الاعراض قبل شوي تقدري تشوفيه. لكن تبقى نسبة عشره بالميه ان النوبة مفاجئه لكنها عادة تجي مع الضغوطات الكثيره سواء نفسيه او اي ضغوطات اخرى. الى ان نشفى تماما من القلق النفسي بعدها ودعي النوبات.

حبيبي ماندوز اش التواضع هذا تتمنى تكون مادري ايش يا راجل انت شلت ثلاثه ارباع الوجع احس وسواسي جاه وسواس مركب منك هههههههه😃😃😃😃هههههه انت زي العسل احترمك جدا تحياتي أفضل شي حصل من المرض انه عرفنا على الناس العسل مثلك وشرواك

شف اخوي
بالنسبه لإختلال الآنيه
هو له عدة أوجه
منه اضطراب تبدد الشخصيه
وتبدد الواقع
وهو يعتبر عرض لشي
والشي هذا هو القلق و التوتر و الخوف
وممكن يكون اضطراب اختلال الانيه اذا كان ناتج عن صدمات نفسيه او عاطفيه وما الى ذلك
يعني بالأول نعالج القلق عشان يروح اختلال الانيه
معالجي يقول هي حاجه سخيفه وعاديه وطبيعيه جدا
وكل الناس قد جربوها في مواقف معينه لكنه يروح بسرعه
وعشان احنا نركز عليه عشان كذا هو باقي معانا
مدري مو مقتنعه بكلامه انه شي عادي
لأنه صدق حاجه مجهوله !
ودايما اقوله مارح تعرف الشعور لين تجربه
لأن تحس نفسك مو في المكان نفسه وماتحس بنفسك
او كأنك مو في الواقع وووووووو
وكمان يقول علاجه بالتجاهل والتأمل في الاشياء
بالعكس تأملت بالأشياء اللي قدامي وحسيتها مو صدق :)
الزبده انت بقروب نوبات الهلع ؟ يخي احس اني اعرفك اسلوبك مو غريب :)

ههههههههههههه اهم شي تقنع وسواسك انك رح تفهمله وقتها المهمه تصير سهله بالتدريج لكن يبيله صبر

تسلم يا خيي انت العسل ومرورك اعسل مني :)

انا ما عندي اضطلاع كثير على الانيه لاني ماني مصاب فيها لكني قرأت فقط امور بسيطه بالمواقع الاجنبيه وهذا الي طلعت فيه. اما انتم المصابين فيه اعلم مني بهالموضوع وهذا احد الاسباب الي ما هلتني اكتب عنه لاني بصراحه ما جربته الا مرتين فقط وكانت لا تتجاوز دقايق باصابات بالعمل ايامها مو بسبب مرضي.

ما الغريب الا الشيطان هههههههههههههه لا والله ماني بقروب الهلع ولا ادري وينه فيه. لكن اتمنى الشخص الي نفس اسلوبي يكون كويس عشان اكون كويس هههههههههههههه