لحظة ضعف ،، فضفضه لا أكثر
 

السلام عليكم

أتتني لحظة ضعف بدأت معي من نصف ساعة تقريبا

نوعا ما تعبت جدا جدا !!!!

رهاب الساح هذا مقيدني بشكل فظيع !!! كثير الناس فيها هلع وقلق لكن مو الكل فيه رهاب الساح.

حياتي مشلوله جدا جدا ما استطيع الخروج نهائيا من المنزل وكأني محتجز بقفص. اشوف كل شي برى ولا استطيع ان اكون معهم. لي الان اكثر من شهرين ما رحت عملي، اصلا مو قادر اطلع البقاله الي جنب بيتنا.

حاولت سابقا وطلعت قبل ما ازيد جرعة علاجي. العلاج جابلي القلق بزياده لما رفعته وتكورت على نفسي من جديد. وانا عارف ان هذا اليأس جاني من العلاج حاليا لأني رافع الجرعه وما اخذت وقتها. وجالس اتحملها لكن لي طاقة تحمل واذا ما انفجرت الان يمكن ما اقدر اكمل ف لازم انفجر. جائتني اليوم نزعات انتحاريه وانا وربي كنت متوقعها لان قرأت عن الدواء لكني ما توقعت انها بهالقوه. كتمه شنيعه بالصدر احساس بالضيق واشعر كأني ابي اشق ملابسي.

لا حول ولا قوة الا بالله العلي العظيم

في ايام مرضي كلها ما خرجت الا 3 مرات و خرجت ايضا 3 مرات للطبيب المعالج. طلعاتي كلها 6 مرات يعني بمجموع كامل ما يتعدا 7 ساعات بكل الطلعات مجتمعه.

رهاب الساح ليس خياري ف أنا ابتليت به،، وليس سهلا ابدا ولا يعلمه الا الذي يعيشه.

اهلي مثلا،، يعتقدون انه شي عادي مره مرتين وخلاص ولا يعرفون المعاناه الي اتعرض لها. الناس تتشمت لدرجه صرت اخجل اني اقول اني اخاف اطلع. هالشي قتلني اكثر ، اذا منت فاهم نقطنا مسكاتك لا تزيدها علي،، يعتقدون انه شي عادي ،، هذا انت تمشي وتجلس يلا اطلع غير جو !! كيف غير جو يا جماعه انا شخص فيني رهاب !! الي فيه رهاب من الصراصير يهتمون فيه اكثر اما الي يخاف يطلع هذا واحد جبان او انه دجاجه.

هل يا ترى انا مبسوط يعني اني بالبيت وتارك العمل؟ هل انا الي اخترت مثلا الجلوس وان تصلا مالي خلق اطلع؟!

لا احد سيفهم الا الي ذاقه فقط. انا ما يأست لكني تعبت جدا جدا ومعاي حق محبوس بالبيت واحس اني مكسور الرجلين وتحت رحمة الناس.

لكن الله كريم ورح اتحمل مثل ما وعدت نفسي

رح امضي الليله هذي والله يعديها على خير وغدا نلقاكم

الله يعينك يا أخي
سبحان الله اللي يشوفك تنصح وتساعد يقول إنك مية مية
والله حاسة فيك لأني أنا كمان في حالة لايعلم بها إلا الله
والحمد لله على كل حال
ماعليك ....كلها أيام من الصبر حتى ياخذ الدواء مفعوله و كلوا بأجره فلا تنسى
حاول تقرأ قرآن أو تدعي أو تسوي أي شيء يريحك و إذا ماقدرت تقرا بنفسك شغللك فيديو

شخصيا ماجربت الرهاب بس أنصحك تصبر أياما أخرى وبعدها حاول تطلع و لو مع شخص آخر
وشوية شوية على حالك

والله يلطف بنا جميعا يااااااااااااااااااااارب

كان الله في عونك ورهاب الساح مؤلم خصوصا لرجل مثلك لانه مطالب بالخروج وقضاء حوائجه بنفسه
انا ماجربته لكن متاكده انه بالنسبه لي ماراح يكون مثل تاثيره عليك
اصبر ان الله معك وبعون الله كلها ايام وتفرج باذن الله بعد ماياخذ الدواء وقته وان شاء الله قريب تجي تبشرنت بشفاءك
تمنياتي لك بالصحه والعافيه

عندنا وعندك خير أنا من الظهر ومستر هلوعي ماسك راسي وصدري ومن شدة الالم اروح للسوبرماركت أشتري اغراض للبيت رغم ان البيت مو محتاج بس من ضيقة الصدر والاوجاع وفرفر بها الشوارع تقول درباوي كله من ها المرض بس شكوى لرب العالمين هو الاعلم بالحال واصل ونا خوك على العلاج وأن شاءالله الايام الجاية تبي تطمنا وتبشرنا أن أمورك تحسنت بكثير بأذن المولى عز وجل

لالا ي مآندوزآ لاتضعف آبد لازم آلصبر وطولة آلبآل
..لاتستعجل الشفآء ولا تتحطم من حآلك ناس اسوء منك وتشافو ..
ادري بعض الاحيآن العزيمهه تفتر و تشتد بس لا تيأس ..
ثق في نفسك وأطرد الهواجيس واعرف ان ربي ألطف بعبادة دائماً..
إلجأ لربك وأدع وتصدق عن نفسك وأطلع اختلط مع الناس الوحده مو زينه أبداً وعمرها ماتحل مشكلة.
الخوف شيء طبيعي .. لكن اذا زاد عن حدهه لاتسمح له يتعدى حدوده وقاومه.. أنت رجال والرجال المفترض مايخاف الا من ربه ..قوي قلبك .. ترى فيه علاقهه عكسيهه بين الثقة والرهاب كلما زادت الثقة انخفض آلرهاب والعكس صحيح
سآلت صديقتي عن اختهآ لان قبل كانت تسولف لنآ عنها انها انطوائيه المهم تقول ان اختهآ آلحين مآشاء الله لاقوة الا بالله تشافت تمآمآ استخدمت دواء اسمه اوروركس ولاسبب لهآ اعراض جآنبيهه وقريت عن تجآرب الناس اللي استخدمو هالدواء ونفعهم اللي يقول عطآني جراءه غير طبيعيه واللي يقول انه صآر اجتمآعي ..
انت ماقدرت تساعد نفسك مع اني أثق جدا انك بتقدر تساعد نفسك .. ادري اللي خلاك تفضفض الرغبه وارادتك قويه وتقدر تطرد الافكار السلبيه وتتمسك بالايجابيه منها..
عموما لاتيأس ولاتحزن مشكلتك رهاب قول الحمدلله علاجه سهل وهو من الأمراض النفسية سريعة الاستجآبه للعلاج ..قدامك العافيهه..

اللهم فرج همك وأبدل حزنك فرحاً،

أحبك ماندوز مدري ليش بس احبك ياخي
مشاركاتك ساعدتني كثير شكرا لهذا من القلب لم اشفق عليك لسبب من مشاركاتك شعرت بقوة ارادتك باندفاعك وما يتعبك هي عزيمتك القويه وستدفعك حتما لتستعيد حياتك وحيويتك أن في استراحة محارب نعم لتجمع شتات نفسك ولن تدوم طويلا بإذن ربي تعلمت من هذا المرض أن أشد ايام المي تعقبها ايام رائعه جدا استمتع فيها بقوه اخي ماندوز ياخي اسمك صعب لازم ارجع انقله من فوق ههههه ولا اتوقع ان ما بك الآن أشد ما شعرت به فأنا على ثقه انك قد تخطيت ما هو أشد انت حقا رائع ولو كنت اسكن بجوارك لزرتك وسحبتك باذنك
يارب يسعدك ويشفيك وجميع حبايبنا الداعمين الرائعين يالي فوق طمني سلام يا بطل

لا تخاف ولا تيأس هذا هو العلاج لابد ان يكون معه نكسات بسيطه واحيانا قويه ...

صدقني مجرد نكسه وبترجع تستجيب مع العلاج...

اما موضوع الخوف من الخروج من المنزل بإذن الله راح تتشافى منها بس انت قوووووي نفسك وحاااااول تطلع لا يتفاقم الموضوع اطلع من اخوك او خذ الوالده والخوات لمشوار بالسيارة راح تتبسط وشوي شوي راح تنفك هالعقدة ...كل شي يجي بالصبر والدعاااااء


شفانا الله وإياك

أهلا اخي ماندوزا
أسأل الله العلي العظيم بقدر ما انت ارحتنا وشجعتنا بمقالات مفيدة ورائعة وأسهمت كثير ف حل مشاكلنا أن يزيل عنك كل أنواع القلق والوساوس يارب
لازم نصبر، انا نمت الآن ع بالي لي فترة وخلصت م الهلع وافقت من النوم على نوبة هلع ، الحمدلله يارب على السراء والضراء
أصبحت موكلة أمري لله وخلي نوبة فزع وقلق أو رهاب ساح تجي ربي بيعيننا بإذنه تعالى
انت ماشاءالله قدها وقدود لأن اصلا لديك إيجابية عالية

ان شاء الله وشكرا لك،، وما زلت بكمل على وضعي نفسه والصبر ان شاء الله



امين يا رب... اي الدواء يلعب لعب لكني صابر عليه وانا كنت متوقع ان بتمر علي فترات زي كذا بس انها تجي فجأه لكني صابر


اترك اذني ياخي هههههههههههه،، شكرا لك اخوي ولا تحرجني بسالفة احبك ولا ترى بتهور ههههههههههه


امين يا رب العالمين وانت ايضا


شكرا لدعمك يتيمه وانا ليتني انطوائي كان نص مصيبه، الا ودي اطلع بس مو مشكله ما زلت مكمل وشكرا لك مره اخرى يا صاحبة غسيل الصحون


خلاص تعال مرني ناخذ حمضيات ونفرفر هههههههههههههه
تسلم اخوي وان شاء الله كلنا نتحسن



شكرا لك ظل امرأه ويا رب اني اتحسن بإذن الله وانا مكمل للاخر ..... لا مافي فايده احد معاي او لا القضيه ان خوف عام لكني بحاول ان شاء الله


اي والله يا ام سما انها صعبه لكن بإذن الله مكمل
وشكرا لك اختنا ام سما وانتي ايضا شدي حيلك


امين يا رب ،، والله يا ام البنوتات ان هالرهاب هذا معوق للحياه لكن ما بتركه باذن الله وشكرا لك اختنا ام البنوتات

شكرا للجميع و ما تقصرون

لحظه ونكسه دوائيه لكنها شديده وان شاء الله مكمل ونشوف اخرتها مع هالمرض ذا

الله يعطيكم العافيه جميعا

صباحك نور وسرور وتسلمي

صباح المنتدى منور فيكم ما شاء الله

امين يا ري ولا تشوفي بأس بإذن الله

شكرا لك يا ظل عسا الله يظلك في ظله