انا اكثر شخص ابغى انام علشان انسى الواقع واكثر شخص ابغى اكون صاحي علشان احس اني عايش ..

دايما ابغى انام انام انام علشان انسى الشعور اللي فيني او علشان ما احس فيه
ولا اتمنى اصحى ابغاها نومة طويييييييلة لان شعوري واحاسيسي سيئة لمن اقوم ..

ودايما صاحي صاحي صاحي بس لوحدي وجالس على جهازي واتفرج على عالمي ومدينتي
عبر جوالي ولا اشارك الناس في شي ومقطوع عن العالم الخارجي ..

كرهت كل شي ولا اعرف كيف اصلح شي .. ولا بيدي اي شي !

اهلي كلهم يخرجو وانا لوحدي جالس بالبيت ما احب اخرج معاهم لان خرجتهم نكد
ولا عندي اصحاب يمرو علي .. ولا عندي سيارة اروح فيها ( خربانه من يوم اشتريتها الى ان خربت بالكامل )

واخواني الصغار عايشين احسن مني بعد ما اهلي طبقو تربيتهم الخاطئة علي انا والحرمان والعصبية والقمع الى ان اصبحت شخص غير سوي وغير طبيعي ( احس نفسي مو طبيعي وكل شخص ادرى بحاله )

في يوم ما كنت طبيعي وكان عندي علاقات كثيرة لكن افكار الاهل ان الجميع لوطيين وان الجميع يريدون النيل مني
كسر من شخصيتي ودمرني وشوي شوي ابتعدو عني كل الناس .. ( كل ذنبي اني اكبر واحد ولا فيه مبرر لأهلي ولا لجهلهم ولا هي مشكلتي )

وبقدرة قادر سبحان الله اخواني اللي اصغر مني كلهم ما تطبق عليهم هذا النظام..

تركت جميع مواقع التواصل الاجتماعي وانقطعت برغبة مني..
رقمي جديد ( لاحاجة للواتس لان لا احد يعرف رقمي الا ابي )
تركت مواقع التواصل الاجتماعي لان هذا الزمن لازم تكون شاه من القطيع
لابد ان تكون معجب بفتاة مشهورة او تكون زي القطيع لتعيش .. او يكون معاك سيارة رياضية لتدخل الجو مع اصحاب السيارات الرياضيه ( وهذا اللي احبه ولكن ربي مارزقني ) .. او تكون محب لكرة القدم وانا اكره جهل كرة القدم ومتابعتها

شيء واحد فقط اللي بقى عندي وهو برنامج السناب شات .. كل اللي عندي فيه اولاد بعمري من نفس مدينتي
لسبب واحد فقط اشوف الاولاد اللي بعمري وين يروحو وين يجي وايش اجوائهم

غير كذا ماعندي اي شي للتواصل مع احد ..

والله العظيم كلهم يوميا مع اصحابهم عزايم وفطور جماعي وبالليل بالسيارات واختلاف عن حياتي 180 درجة
وايش السر والمغرى وايش هو الرقم السري ومفتاح الفرج الى الان لا اعلم ..........

واول دليل ان كل شيء ضدي .. قبل شهر من الاجازه قررت ادخل جيم رياضي و اكون علاقات لعل وعسى اكون شخص
عايش حياة طبيعية زي الناس .. لكن ربي كاتب لي حياتي هذي والدليل انه كتب ان سيارتي تخرب بالكامل الان ..

وكمان نفسي اعرف انا ولا عمري حسدت احد وكل ماشفت سيارة حلوة اذكر اسم الله واقول يارب اررقني والموضوع هذا الوحيد اللي احبه اللي هو السيارات متعكر في وجهي سيارة زي الزفت اصلا وفوق كذا خربت وماعندي فلوس التصليح ولا عندي فلوس جديدة
ومادري عن ابوي ايش الحل بالنسبه له هل بيساعدني ولا ايش ........

والله جالس اكل في قلبي لدرجة بدأت احتقر نفسي ياناس حسيت نفسي شيء حقير مالي اي قيمة وغير سوي وغير طبيعي وحياتي فرق عن حياة الناس لسبب انا ما اعرف ايش هو وليش اصلا .. والله فعلا بدأت احس نفسي جزمة .. بدأت تقل رغبتي في الحياة .. مرات اقول مسكينة اللي حتتروجني لو انا مكانها مارضيت على نفسي اتزوج شخص مريض وبائس زي ما انا حالتي هذي ..

فضفضة ماقبل النوم ............