الملكة وأهل العريس
 

مبروك لاخوك و ربي يجزاك خير كونك خطبتي له صحبتك لظروفها و البنت لو ما شفتي منها الا كل خير ما كنتي خطبتيها لاخوك و اللي تعرفيها و معاشرتها افضل من اللي ما تعرفيها و كويس انها ناسبت اخوك الى هنا تمام و حلو.
احنا عوايدنا عزيزتي تختلف الحضر غير و القبايل غير و القبايل تختلف من قبيله لقبيله في الطقوس و العادات و التقاليد انا مخلطه و مهجنه من كل لون احكيك من اللي اشوفه حولي من اهلي يعني اروح ملكه من اهل امي طقوسهم غير عن ملكه حضرتها عند اهل والدي.
الملكه عاده يقوموا بها اهل العروسه و العروسه تعمل كل شي تحبه و يعجبها لها الحريه هي و اهلها لانهم هم اللي بيستقبلوكم بطريقتهم و بتطلع بنتهم زي ما يحبوا انها تنزف لزوجها فلا تتحسسي ان رفضت او ما عجبها اقتراحك و التوزيعات و الافكار و الزفه اللي تحبيها خليها للفرح ان شاء الله سوي و بدعي اللي تبغيه و اما بالنسبه للمبلغ البسيط اللي تبغاه من المهر لانها شايفتك مثل اختها صديقتها المقربه ولا الاصول و المفروض بعد المملك ما يملك يقدم لها المهر.
انتم ممكن تعملوا عشا رجال يوم يملك المملك و هي يوم ثاني تسوي ملكه النساء و تقوم بالملكه من و الى.
لازم تعرفي حبيبتي انكم ناسبتم عايله مختلفه تماما لابد تحترموا طقوسها و هم يحترموا طقوسكم لانكم بتندمجوا ببعض بتصيروا عيله وحده و انتي بالتأكيد اخدتي بنت ناس طيبين و هي تستاهل منك انك ما تزعلي و لا تزعليها اتركي امر الملكه عليها و اللي نفسك فيه سويه بالفرح ولا تعامليها بالمثل يوم الفرح لانك بتكوني عروس كمان و حيكون الفرح مشترك
الله يسعدكم و يفرحكم و يجنبكم الشيطان ترى المشاكل تكثر في هالفتره حقت الملكه الى الزواج حاولي تكوني حكيمه و محايده و قلبك مثل قلب الام تتقبل اي شي بصدر رحب دام فيها ستره لاخوك و صديقتك انتي كسبتي اجرها في اللي سويتيه فكمليه على خير و بحب و سواء بالاغاني و لا بغيرها و لا بالتوزيعات و بدونها راح تمر الليله على احسن ما يمكن بإذن الله و الملكه في وجه العروسه و اهلها .
عروسه اخوك دلعيها و ارضيها و خليها تعمل اللي تبيه في ملكتها و انتي ربي بيرضيك بالمثل ان شاء الله لا تخلي امور بسيطه و تافهه تكدر عليكم فرحتكم .
ربي يحفظكم و يكثر افراحكم و يجمع شملكم على خير.

عارفه انا حاسه فيكي في ملكه اخويه كنت فرحانه و متحمسه
و تفاجأت من عروسته حركات و صد و تهرب و امور كذا استغربتها
في الفرح عرفت كيف اسلوبها خلاص ما صرت اتدخل غير ها محتاجه شي اعاونك في شي اذا احتجتي شي خبريني ها مبسوطه ناقصك شي و خلاص من بعيد لبعيد دام اخويه فرحان و سعيد و مناسبته هذه عندي تسوى الدنيا كلها.

شكرا حياتي أنا الحين فهمت وماراح أتدخل وماراح أعاملها بالمثل لأني أنا كمان أخاف إني أعمل شيء يضررهم وأخاف الله وأنا لمن حاولت أتدخل كنت أبي شيء لأخوي علشان نرقص معاه ..لاكن كمان ماراح أكون مررة طيبة بعدين يقولو هذه هبلة وساذجة راح أتعامل معاهم بعقل وحذر لأن أبوي متوفي وأمي ماتحب المشاكل وانا حساسة من ناحية ان الناس مايحترمونا لأننا مو قبيلة ..لازم والله يوفقهم ويسعدهم يارب ..
شكرا انتي كذا نبهتيني وفهمتيني والله يجزاكي خير وعقبال أحبابك يارب .
وصدقيني ماراح أزعل منهم حتى أخوي جالس يفهمني انو لي حق أعمل أي شيء في الزواج ...مع أهل العريس ماراح أقول أنا فقط لأن لهم حق يفرحو لأخوهم ...

الحمد لله انك فهمتيني وحسيتي فيني ..

يعني شكلو كذا كل العروسات لازم مايعطو وجه لأهل العريس ؟؟
كويس انك فهمتيني وانا والله جالسة ألوم نفسي حسيت اني لهذه الدرجة رامية نفسي عليهم ولا ايش الموضوع كل شوي ناطة لهم في الواتس وهي تقول بعدين خلي الموضوع يتم وأنا أقول طيب

ماني مصدقة رغم اني أقول ساعات واجب علي اني أسال عنها لاكن خلاص أنا كمان حبعد منها وأتقرب لأهل زوجي ما أبغى أقهرهم ولا أحسسهم مثل ما انا حاسة من جد كتمو فرحتنا أنا وأمي ..

أمي تقول المفروض يتناقشو معانا في القصر نروح سوا امكن احنا فاهمين غلط مدري ..

لاكن في الزواج أنا راح أعطيها مساحة محددة لأنها ماراح تشاركنا وماراح أظلمها وأنا لي حق أفرح وكمان أخوي وأهل زوجي
وأخوي متفق معاي لأنو شايفني قد إييش ماني قادرة أفرح خاصة اني وحيدة لاكن ربي راح يسخرلي الناس اللي مثلكم يوقفو معي ويفهموني كيف أتعامل مع هذه الشخصيات وأتفهم وضعهم

بس خلاص هم في طريقهم واحنا في طريقنا إذا كان هم يبو حواجز وأهل زوجي بحطهم في عيوني ماحيكون كذا ولاراح أحط حواجز وأكتم فرحتهم هم ليش أختاروني علشان أنكد عليهم ؟؟.

يارب لاتجعل نفوسنا فيها غل على أحد من الناس

شكرا حياتي على الرد والله يسعدك ويفرجها عليكي وعقبال أحبابك يارب

لا تتحسسي ولا تكوني رسميه خليكي حمامه سلام و ملاذ للطيب و اهل للاصاله و الاصول
انتم بتصيروا عايله كلكم تكملوا بعض في امور يبغالنا نرخي فيها و امور نشد و اوقات زي هذه المرونه فيها حلوه و التساهيل خير فيها و نصيحه مني خليكي وسط لا تكوني طيبه بزياده مع اهل زوجك افهمي اللي حولك كويس تعاملي بحب و ابذلي بصدق لكن بحساب على قولنا اهل الحجاز حق الناس للناس عشان تعمر العلاقه بينكم و زوجه اخوك نقاوتك و صحبتك و لما خطبتيها عشان ظروفها غرضك في هالزيجه اسمى و اعظم من انك ترقصي يوم الملكه مع اخوك في امور عظيمه تخلينا نتغافل عن كثير امور عشان المركبه تمشي بسلام ترى في هالاوقات الشيطان شاطر يفرق و يبث الحزن بين النفوس ولا هي المفروض تكون فرحه للجميع كيف ما كانت الليله بتمر ان شاء الله بس ادعي ان الله يبارك و يبيض وجوهكم و يكفيكم شر الحاسدين.
و اهلين فيكي بأي وقت عزيزتي الله يسعدك تشرفت بالحديث معك.

اذا كانت متكفله بكل شي ماديا
فالافضل انك ماتتدخلين
لكن لو العكس
يحق لك تتأمرين كمان
موفقين

لا قول بعد قول مستكفه .
عين العقل .

تسلم الله يجبر خاطرك و يسعدك

شغلي سوره البقره في البيت اي جهاز في اي غرفه شغليها حتى لو بصوت منخفض و اتركيها شغاله بشكل مستمر و لو تداومي عليها تقرئيها افضل و اياكي تخلي الشيطان يهزمك بوسوسته اللي ما وراها غير الهم و الحزن افرحي و فرحي
الله يسعدك و يبعد عنك كل مكروه.