كيف اخبر اهلي عن مرضي النفسي
 

السلام عليكم

مثل ماهو واضح بالعنوان أبيكم تقولون لي عن طرق اخبر فيها اهلي عن مرضي اللي هو الإكتئاب الحاد

أكيد فيه كثير ما قالوا لأهلهم وما يعرفون كيف يفاتحونهم بالموضوع

أنا بالنسبة لي متزوج صار لي 10 شهور وزوجتي حامل
ابي رايكم هل اقول لها او لا
اخاف تتأثر وما احس إني راح أستفيد لو قلت لها لأنها حساسة
السبب اللي ابي اقول لها عشانه هو رغبتي الجنسية

دامك متزوج م يحتاج اهلك يدرون يشيلون همك المفروض زوجتك يكون عنده خبره وخله بعد الولاده ان شاءلله هاذا من رايي

حتى أنا ودي بعد الولادة بس أنا قاعد افكر في زوجتي أكيد مستغربة لأن رغبتي الجنسية معدومة ودي اقول لها عشان هالسبب وودي ااجل لبعد الولادة

ماانصحك تخبرهم لاتفتح على نفسك ابواب مقفله
بعد انتهاء الكورس العلاجي بترجع لك الرغبه

عبق الذكريات والله صح كلامك

السلام عليكم ورحمة الله وبركاته

حياك اخونا الفاضل

مثل ما قالوا الأخوان ربي يجزاهم خير ماله داعي تزعجها و تقلقها عليك في فترة أحوج ما تكون فيها للسكينة و الهدوء طالما أنه كورس يبي ينتهي و ربي ما يحوجك للرجوع له .

ربي يتمم حملها على خير و ترزقون بالذرية الصالحة اللي تكون قرة عين لكم و يعافيك

عندي احساس كبير يوم يولد المولود بيروح هالاكتئاب بإذن الله كل مولود يجي برزقه و بخيره معه انا انصحك لا تعلمها
و لا حتى بعد الولاده دامك قادر على قوامة بيتك و معطيها حقوقها اما الرغبه فحاول تاخذ اشياء طبيعيه معززه و مساعده استشير دكتور او اسأل اصحابك المتزوجين من زمان راح ينصحوك و يفيدوك و ابدا لا تحس بالذنب و لا تقلق و تشيل هم فوض امرك لله و لا تستسلم للكآبه فكر في اللي جاي هذا سواء بنت او ولد اشغل نفسك بشي يشرح صدرك و اقعد مع زوجتك تكلم معها او اسمع لها اسمع طموحها في هالطفل و قسم يومك معها المهم لا تحسسها بعزلتك و بعدك عنها شاركها قدر المستطاع باللي تقدر عليه و ربي يصلح لكم الحال و يسعدكم و يبارك لكم و يشفيك عاجلا غير آجل .

عيون متفائلة
مستكفة

الله يسعدكم يارب

اولا اخوي انت تاخذ دواء ؟


ثانيا / الدواء النفسي لايقتل الرغبه لكن يؤخر القذف ... لكن ممكن ان مزاجك مكتئب وهذا ينعكس على الجنس وغيره من الرغبات

ثالثا : لاتخبر احدا بهذا الامر الا في الضروره القصوى جدا جدا جدا وفقط زوجتك وليس هناك داعي ان تخبرها الان او حتى بعد الولاده
الا اذا لاحظت تغيير في مزاجك والحت عليك بالسؤال

تحياتي

و يسعدك يارب
رجعت موضوعك عشان اعطيك معلومه بسيطه
بعض النساء و ليس الكل يجيهم اكتئاب في فتره الحمل
خاصه على الشهور الاخيره و بعضهم يجيهم بعد الولاده
و هذه امور طبيعيه دكاتره النسا يشوفوه شي عادي و متوقع هذا الاكتئاب لفتره و يعدي احتمال الى تكمل الاربعين .
الصبر على الشريك واجب و التغاضي و الاحتواء و الاحترام امور هامه في علاقتكم ببعض فهمها انكم يالرجال تجيكم حاله اكتئاب بشكل شهري زيكم يالنساء جيبها لها بصوره خفيفه عشان تراعي وضعك بدون قلق او هم انت كمان ابغاك تنظر للاكتئاب على انه عرض لازم تاخذ علاجه و بإذن الله بيروح
و انك قادر على التخلص منه . الله يحفظكم و يسهل اموركم

اي نعم استخدم دواء واحد اللي هو برنتلكس وقريت انه محايد في الجنس
امممم مالاحظت انه يأخر القذف بس الرغبة ضعيفة جداً ممكن بسبب الاكتئاب مو بسبب الدواء

والله إني خايف من هالشي لأن امها قد جاها اكتئاب بعد الولادة
وأنا خايف يجي زوجتي
مشكلة لو جانا كلنا بنفس الوقت

اكتئاب الوالاده و الحمل مؤقت اسأل اي دكتور عن هالنقطه و مو كل النساء يجيهم و مو شرط اللي يجي لامي من عرض يصير لازم يجيني امي ولدت كم مره ما قد جاها اكتئاب اختي ولدت جاها اكتئاب و الحمدلله كملت الاربعين راح بدون ادويه و هالنوع من الاكتئاب خفيف لا يستدعي علاج مع اللي تمر فيه المراه من وقت عصيب و ربك بيعين و بيلطف امهاتنا تعبو و جابونا و الحمدلله سنه الحياه .

انا ما قلت لك هالنقطه عشان ازودك هم و اخوفك
كان غرضي اولا اعطيك معلومه عامه مفترض تكون قرات عنها
و ثانيا عشان تعرف ان اي انسان معرض للاكتئاب بمختلف درجاته و هي في حال و وضع حتى بعد الولاده ما ينفع تخبرها و سبق قلت لك دامك قادر الحمدلله تأدي فروضك و ان شاء الله مانت مقصر في بيتك ماله داعي احد يعرف بالاكتئاب اللي عندك ترى ماحد خالي من المتزوجين الا و تلقى فيه شي بس نحمد الله برضو على الصحه و العافيه و نلتزم بعلاجاتنا و نستعين بالله على هالحياه .

اتذكر ام زوجتي ما كان خفيف ابد
الله لا يعيدها من ايام

خلاص ان شاءالله ما راح اقول لها وان شاءالله الفترة تعدي
وارجع اكتب هنا الله لا يعيدها من ايام

يصير كان فيها من قبل تحمل و تولد و ظهر بزياده بعد ما ولدت
الله يشرح صدرك و يكتب لك خير الجاي و يفرحك بالمولود و بسلامه زوجتك و يحقق لك كل ما تتمناه يارب .