تربتيلا + انافرونيلا
 

تربتيلا = اسم الدلع لتربتيزول
انافرونيلا = اسم الدلع للأنافرانيل
مرحبا حبايب قلبي شخباركم طبعا اخوكم صاحب جولات و صولات مع نوبات الهلع و الرهاب الاجتماعي و رهاب الخلاء ( دمرت حياتي حرفيًا)
جا قبل سنه وشكل الدكتور طفش مني وقال اسمع يا تركي بعطيك دواء كحل اخير لان صارلي اكثر من 13 سنه معانات
كتبلي انافرانيل و تربتيزول
ما راح اكذب واقولكم انها خففت التعب عني لكن صار التالي
الاكتئاب انمسح مسح من حياتي مو خفت اعراضه ، انمسحت
الهلع انمسح مسح من حياتي
وكذلك رهاب الخلاء و الفوبيات وغيرها
فعلا ثلاثيه الحلقات سحر مو علاج لذلك قررت التالي
10٪ كل شهر تخصم من راتبي و اتبرع بها لمخترعين هذي الادويه
وباذن الله بحج عنهم و ادعيلهم هههههههههه تبون يازين الحياة بدون اكتئاب و هلع و رهاب اجتماعي لكن مستغرب شي و مقهور بنفس الوقت
ليه ماكتبوا لي هذي الادويه من اول زياره كانت اختصرت سنين طويله من حياتي ، الحمدلله على كل حال
وبس سلامتكم 🥰

كم جرعة تستعمل من كل دواء و كم مدة بداية مفعوله

حمستنا ياخوي كم لك عليهم وكم جرعاتك ؟

شباب بالنسبه للجرعات 25 انافرانيل و 50 تريبتيزول
ورب الكعبه صاير مثل الي يركض يركض 1000 كيلو والان وقفت ارتاح
بالنسبه للمفعول التريبتيزول من اول حبه تحس فيه وعلى فكره اي دواء ينزل يقارنون كفائته بالتربتيزول
وفيه ميزه ايضا ان كل يوم تحس انه افضل من اليوم الي قبله
الان صار لي سنه تقريبا عليها
في نقطه اخيره انا ماكنت افكر بيوم من الايام اترك الدواء لان مجرد الفكره كانت ترعبني والان العكس بديت افكر اني اكلم الطبيب اترك الادويه لان احس اني متعافي 100٪ وعقبالكم يارب ترتاحون

ماشاءلله ان شاءلله دوم التحسن .. لاكن اتوقع التحسن جاء بسبب خلط الادويه مع بعض ؟

ماشاء الله الله ينفع بهما . وجرعاتك صغيرة زادك الله شفاء وعافية
ولكن عليك بالاكثار من الماء ، التربتزول ثقيل على الكليتين
والوالد رحمه الله رحمة الابرار كان يستخدمة لاكثر من ١٥ سنة واصيب بالفشل الكلوي ، وذكر لنا الطبيب بان سبب الفشل يعود للاميتريبتيلين وكان ياخذ جرعة عالية ١٥٠ ملي قبل النوم .

تدلعهم هههههه الله ينفعك بهم

الخبر اليقين حبيبي ما أتوقع أبدا من الإميتربيتيلين ( تريبتيزول ) و وش جاب دكتور الكلى عند دكتور النفسية و ما عنده معرفة عن الأدوية النفسية بس تعال أهمس بإذنك : أنت مرفوع ضغطك منه أصلا عشان ما زان لك و الله يرحم بيّك و يسكنه الفردوس و يجعل ما أصابه شفيع له و ماحي لخطاياه و رافع لدرجاته في عليين

عساه دوم يارب والله ان الادويه نعمة من الله
انا زيك تقريبا سيروكسات 50 جرام حبتين ممتاز
بس باقي لي اواجه الخوف واطلع كثير برا

ما شاء الله فعلا يستاهلوا الدلع 😁
حمدالله على سلامتك لا تنقهر و لا شي
كل شي نصيب و رزق من الله ..

ماشاء الله تبارك الله
الله يشافي كل شخص وكل عضو بالقروب


اخوي هل هي ادويه مقيده (كنترول) وهل تسبب الإدمان ووش الإعراض الجانبيه لها

ماشاء الله تبارك الله ..
الله يمتعك بالصحة ويجمع لك بين الأجر والعافية وعلى كل مبتلى يارب العالمين
لو تفيدنا يا غالي كيف تعاملت مع الأعراض الجانبية للأدوية ؟
انا لي 15 سنة على الأدوية و وصلت لمرحة جداً صعبة من ناحية الاكتئاب والوسواس والقلق
ولي صولات وجولات مثلك في مسألة تعدد الادوية ودمجها مع ادوية الذهان ولكن بلا فائدة او تكون الفائدة بنسبة بسيطة لا تُذكر
الطبيب الأسبوع الماضي قرر يكتب لي دواء الانفرانيل فقط من غير أي دواء آخر
يقول بحول الله ستجد منه ما يسرك ، ويارب يا كريم ..

ماشاء الله الله يديم عليك وعلينا الصحه كم مده الاستخدام وهل الانافرانيل يسبب زياده انزيمات الكبد هو الدواء الوحيد اللي يناسبني سعره لكن خايفه من الانزيمات