|
مستجداتي مع البرنتلكس
السلام عليكم ورحمة الله وبركاته
حياكم الله أخواني أخواتي الكرام جزاكم الله خير الجزاء على وقفتكم و دعمكم لي في عز تعبي و إفادتكم و سؤالكم و دعواتكم .. ما اوفيكم حقكم مهما شكرت و قلت ، ربي لا يريكم باس لا في أنفسكم و لا احبابكم و يحفظكم بحفظه و يرعاكم برعايته .. بالنسبة للبرنتلكس بعد ما كملت شهرين الحمدلله الخوف و الوسواس خف كثير حتى رهاب الخروج لكن أشعر بضيق و اختناق و اكتئاب و عصبية بحيث اتنرفز لأقل شي ما كنت كذا اول و فوق ذا نوم فظيع متواصل ، و كسل و ثقل بالرأس و قلة تركيز في اليقظة ، حتى و أنا صاحية ما استفيد من وقتي بسبب الوهن و التعب لأقل مجهود الاحظ كذلك النوم غير عميق رغم انه متواصل بحيث أدرك المحيط و اسمع الاذان لكن عاجزة اقوم و العياذ بالله، حتى عيوني أعجز افتحها و راسي أعجز ارفعه مدري لين متى بأستمر كذا و الله المستعان |
اقتباس:
|
وعليكم السلام ورحمة الله وبركاته ..
🩷🩷🩷 الحمدلله على تحسسسنك يارب لك الحمد .. وأسأل الله أن يتم عليك عافيته وفضله . فررررحت لك كثير . وبإذن الله مجرد أعراض للدواء وتزول . |
والله مدري ايش اقلك صراحة ولكن اذا مشكلة النوم عندك سببتلك تعطل عن حياتك الطبيعية فمن وجهة نظري انك تستبدلي العلاج بنوع ثاني ما يسببلك مشكلة النوم وعمره في الدم قصير مثل ويلبوترين أو افكسور
يعني بشكل عام قارني بين المنافع والاضرار التي حصلتي عليها من الدواء ولو كانت المنافع اكثر استمري على الدواء ولو كانت الأضرار اكثر اتركي الدواء او استبدليه بدواء آخر لا يسبب نفس الأعراض |
وعليكم السلام ورحمة الله وبركاته
لاباس عليك طهوران شاءالله العافيه على شوي شوي ان شاءالله |
اقتباس:
حياك الله اخوي جرعتي ١٠ ملجم الله يعافيك يارب العالمين |
اقتباس:
يا هلا يا هلا يا وجه الخير أرحبي تراحيب المطر الحمدالله حمدا كثيرا الخوف و الوسواس خف و كذلك الرهاب و الحمدلله بس باقي الأعراض اللي ذكرت تدرين اني فوق سبع سنوات ما حضرت مناسبة و لا رحت سوق او مول كله بسبب الرهاب ما غير اراجع المستشفيات و الدوائر الحكومية فقط قبل كم يوم رحت انا و اخوي مستشفى الصحة النفسية لان عنده مراجعة ، اول مرة اطلبه من بعد ذيك المدة يوافق نمر احد المولات القريبة بعد ما طلعنا من المستشفى عشان اشري و انت بكرامة حذاء ، لأن حذائي اشتكى و تساقط جلده و تفتت و تغير لونه ، من خمس سنين صابر ، كله عشان ما اقدر اطلبه اونلاين زي باقي الاحتياجات الأخرى لان مقاسي يتفاوت ما بين ٣٨ و ال ٣٩ و مالي خلق استبدل و اول ما قسته و جاء على مقاسي ما فكيته خرجت فيه و رميت القديم اللي سبب لي الاحراج حتى ان الموظفة قالت هاتي القديم احطه في العلبة ، قلت معصي تشوفينه و رميته في سلة المحل و قمت اضحك و هي تضحك ، فهمتني قالت عادي مافي مشكلة و الله شعور جميل ما كنت حاسة بخوف بس اخوي طول الوقت متوتر يبينا نرجع البيت بس تحمل عشاني بعدين قلت له لحظة بروح دورة المياه و انت بكرامة ، خدعته و مريت احد محلات الوجبات السريعة طلبت وجبتين برجر قال ناكل بالبيت قلت تبرد خسارة و بالقوة رضي نجلس على احد الطاولات ناكل ثم توجهنا للبيت كنت احس كأني طالعة من سجن اول خوف و قلق و توتر طوال الوقت غير رهاب الخروج اجلس في عذاب لين ارجع البيت و لا يمكن افكر امر محل غير المكان المطلوب و اللي يكون يا مستشفى او دائرة حكومية اذكر الوالدة العام طلبت امر المكتبة تبي غرض ما قدرت امر من الرهاب و القلق ، يا دوب راجعت الدائرة و رحت البيت مع ان المكتبة جنب البيت بس قعد لي الخمول و ثقل الراس ، حتى صار غسل الكوب مجهود لا اطيقه و ما اتحمل تخليصه من أثر الصابون و انا اغسله لدرجة اتنهد من ضيقة الخلق ضيق خلق فظيع و غلقة و الحمد لله على كل حال يارب ان كل ذا يروح و القادم يكون أجمل علينا جميعا يا كريم ربي يسعدك على سؤالك و نثر عطرك حبيبتي |
اقتباس:
انا و انا اختك من يومي الأدوية النفسية تسبب لي نوم و خمول طوال الوقت حتى البروزاك اللي قالوا ينشط استخدمته أكثر من سنة خلاني ٢٠ ساعة نايمة زي باقي الأدوية لذلك انا ادري وش يبي يصير لي من ناحية النوم و الخمول قبل اقرر اتناول العلاج مهما قالوا منشط غير فوبيا الانتقال بين الأدوية و تكلفة العلاج جزاك الله خير الجزاء على الإفادة و الاهتمام |
اقتباس:
حياك الله اخونا راعي المدى جزاك الله على المرور و خالص الدعوات ربي يسعدك و يوفقك و يبارك فيك |
اقتباس:
والخير بوجهك 😊 ياربي لك الحمد .. أسأل الله أن يسعد قلبك ويجعل أيامك من خير إلى خير .. يارب ياكريم ما تدرين يمكن تكونين أنتي المناسبة السعيدة القادمة اللي تحضرينها بعد سبع سنين 😁 وتفرحينا بكل ما يسرك .. تذكرت آية يُوسُفُ أَيُّهَا الصِّدِّيقُ أَفْتِنَا فِي سَبْعِ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعِ سُنبُلَاتٍ خُضْرٍ وَأُخَرَ يَابِسَاتٍ لَّعَلِّي أَرْجِعُ إِلَى النَّاسِ لَعَلَّهُمْ يَعْلَمُونَ (46) أسأل الله كما مرت السبع العجاف .. أن تمر عليك سبع خفاف .. وعام تغاثين فية ويكثر فية فيض الرحمات .. وملبوووس العافية .. لما تشترين لنفسك شئ لو بسييط ينعكس على وجه أيامك بالبهجه والسرور . أنتي نفس مشكلتي في المقاس 😁 خذي 38.5 أنسب مقاس تعرفين مقاسنا مقاس سندريلا يجي صعب وفيه كسور ومعادلات 🤣 و عسى تقطعينه بالعافية وبالروحات والجيات اللي تسعدك . ههههههههههههههههههه ضحكت وتخيلت وجه الموظفة 😄 طلعه الهنا يارب .. يوم جميل يستحق الإمتنان 🫶 أهم شئ لا تضغطين على نفسك في الشغل ودلعيها لبى قلبك . 🤗 وبإذن الله تبشرينا بزوال الأعراض المزعجة . 🩷😊 |
اقتباس:
ولكن اذا استمرت معك مشكلة النوم مع برنتليكس بشكل مزعج فعندك ثلاث خيارات الأول هو علاج افيكسور لأن عمره في الدم حوالي 11 ساعة وتستخدميه وقت النوم والخيار الثاني هو علاج ويلبترين فهو يعمل بطريقة مختلفة عن باقي مضادات الاكتئاب ومن المحتمل ان لا يسبب لك نعاس ولكن عيبه ان مفعوله ليس قوي على الاكتئاب والقلق الشديد الذي تعانين منه والرهابات ومفعوله قد يكون ضعيف مقارنة بباقي مضادات الاكتئاب والخيار الثالث هو علاج اوروريكس فهو ينتمي إلى فصيلة مختلفة عن باقي مضادات الاكتئاب وتسمى MAOIs وهو في نفس الوقت فعال جدا في علاج الرهاب والقلق والاكتئاب ولكن يعيبه أنه غير متوفر في أغلب الصيدليات وربما متوفر فقط في المستشفيات الكبيرة والمستشفيات الحكومية |
ومشكلتك الأخرى انك مسؤولة عن والدتك واخوك المريض نسأل الله ان يكتبلك أجرهم ومريض القلق لا يستطيع تحمل الضغوط النفسية بدون علاج وأنا أعرف حالتك تماما لأني أعاني من نفس أعراضك اذا تعرضت للضغط النفسي ولا استطيع تحمل الضغوط النفسية بدون دواء وبشكل عام مريض الاكتئاب والقلق لا يستطيع ان يعيش حياته خارج دائرة الراحة وأي ضغط نفسي يتعرض له يسبب له انتكاسة مرضية وهذه الانتكاسات لا يحمي منها بعد الله إلا الأدوية
|
اقتباس:
يا هلا يا هلا و كيلو حلا اول مرة احس اني استحيت من دعوة : ) حتى استحيت اكتب آمين لكن ما يهمك قلتها في سري ^ ربي يقدم اللي فيه الخير لنا جميعا سبحان الله العظيم كأنك كنت معي فعلا اللي ناسبني ٣٨ و نصف و هو اللي أخذته الله يهنيك حبيبتي هناء و سعادة الدارين و يقر عيونك بكل شي جميل حولك و حواليك و يطمني عليك و يسمعني عنك كل خير اللهم امين يارب العالمين $ |
اقتباس:
فعلا صادق رغم اني اخذ البرنتلكس قبل النوم مباشرة لكن ابشرك الي الان ما وصلت لعشرين ساعة ممكن ١٦ بالكثير و يارب ما تزيد لكن عشان ما يبقى من اليوم غير كم ساعة تلقاني احشر كل المهام في ساعتين ثلاث لين ينكسر ظهري من الألم بحيث اذا جيت استرخي اتألم الله يدبرنا جميعا بحسن تدبيره اشكرك على الاهتمام بالرد |
اقتباس:
الله يسعدك كأنك فعلا حاس فيني امي و اخوي كأنهم اطفال حبايبي معتمدين على اعتماد كلي مافي خادمة غيري اخدمهم برموش عيوني و قليل فيهم هم عيالي و مافي أم تحس انها ملزومة بل واجب عليها و لا تنتظر الشكر على خدمة عيالها و خاصة امي بعد كسر الحوض عندها و عمل عملية بصعوبة تمشي صارت كأنها طفل ابو سنة يوم يتعلم المشي لها ست سنين و هي كذا رغم أنها ما تمشي غير بعكاز مستطيل تستند عليه يوم تمشي و ما تمشي الا كم خطوة لدورة المياه و انت بكرامة ثم ترجع للسرير و اخوي ربي يعافيه زي الرجل الآلي لا مشاعر لا تفاعل لا خروج ، كلامه نادر تعبان يهوجس و الحين زايدة عليه الضلالات البصرية ، كل شوي ناقز عند الأبواب و الشبابيك مرة خايفة عليه و موعده بمنتصف رمضان و قبل كذا كانت له تجربة محاولة انتحار و الحمدلله اللي نجاه هذي الهواجيس و التفاكير تزود عليا الخوف و القلق و الوسواس صحيح الحمدلله بفضل الله خف لكن ما زال من يوم افتح عيوني على أذان الفجر يداهمني الخوف لين الظهر ، و اليوم مع اني مصلية الحمدلله الفجر على وقته و نايمة على وضوء الا يباغتني جاثوم فظيع ، أطول جاثوم مر علي في حياتي جاثمين على ظهري مكتفيني ماخليت اية و الاذان اخر شي تكبيرات الحج ، ما راح الا يوم قمت اردد تكبيرات الحج خلاص مالي حيلة انه ينزاح أعوذ بالله منه ، حتى اشوف ان جوالي بيدي ابدق على الشرطة ٩٩٩ لقيت رقم ٩ غير مفعل ، يعطي رمز مو رقم بغيت انجن اردد اردد مو راضي لين الهمني ربي تكبيرات الحج قمت ارددها و انفك الحمدلله للان صوتي مبحوح و حلقي يوجعني من الصراخ ، لاني اكون ارفع صوتي لأعلى شي بالترديد بعدين وش الجواثيم اللي تجي بالنهار انا مواعيدها بعد صلاة الفجر فترة الضحى حتى لو نمت تسع الصباح تداهمني أسأل الله الكريم لي و لكم و لجميع المسلمين الشفاء العاجل يا كريم |
| الساعة الآن 03:50 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا