|
أكتب ردك مهما كان
السلام عليكم ورحمة الله وبركاته
أنا عضوه جديده بهالمنتدى أتمنى إني أكون خفيفة ظل عليكم وأنا بصراحه ماشتركت بهالمنتدى إلابعد ماحسيت إني فعلا بحاجه الى(فش الخلق) .... بإختصار أنا فتاة أبلغ من العمر 19عاما متاخره في الدراسه سنه وذلك بسبب عدم توفر مدرسه تحويني عندما كنت في سن ال7سنوات .... المهم كنت طول عمري أتمنى إني أتوظف في مستشفى أي وظيفه كانت.لكن الوالد كان دائما متأمل إني أدخل طب وذلك لتفوقي بالدراسه حيث أني دائما من الأوائل على المدرسه.ولمن دخلت سنه ثالث ثانوي حسيت إن المسؤوليه أكبر مني وحسيت إني عايشه بهاجس إسمه نسبه وصرت كل شهر تقريبا ترتفع حرارتي الى 39وأروح المستشفى ويحطولي مغذي وصدفت هالحاله حتى أيام الإختبارات النصيه والشهريه وحتى النهائيه وكل من حولي قطع الأمل إني أجيب فوق ال90% وبالنهايه مرت هالسنه على خير وتخرجت بنسبة96%وقتها الكل نصحني إني أقدم الطب في جامعة الملك سعود لكن أنا من سكان الشرقيه وماأحب الغربه فقدمت في جامعة الملك فيصل وقبل الإختبار التحصيلي درست مناهج الثانويه طبعا بس المواد العلميه وإذا تبغوا الصراحه فعلا فعلا عاااااااااااااااااااااانيييييييييييت وكان الإختبار صباح يوم الخميس وكان يوم الأربعا زواج أخوي وقطعت الزواج على شان أرجع أنام وفعلا كنت مرهقه . وكانت أكبر صدمه تعرضت لها بحياتي هي عدم قبولي بالجامعه ولمن إتصلت بالجامعه وقلت لهم إني جبت نتيجه بالإختبار تسمحلي بالقبول قال بالعربي(عندك واسطه تدخلي ماعندك الله معك) وأنا فعلاماعندي واسطات نهائيا والوالد ماعنده مقدره إنه يدرسني على حسابه والحين أنا صافه بطابور كل الطلاب اللي مانقبلوا . وأنا عارفه إن في غيري كثيريعانون من هالمشكله لكني تأثرت بهالموضوع بشكل غير طبيعي وماكنت أتوقع إن هالشي راح يأثر على نفسيتي مع العلم إني فتاه مرحه وضحوكه ولكن حاليا ضحكتي ماتطلع واذا كثرت ابتسم ووزني نزل 11كيلو وفقدت الشهيه للاكل والشيب مليان في شعري اللي يشوفني مايقول اني بنت ال19 أتمنى من كل عضو يمر على موضوعي إنه يعلق بمواساه لأني ماأتوقع إني محتاجه لعلاج كثر ماني محتاجه لمن يواسيني خصوصا إن أهلي ماعترفوا باي تعب تعبته وقالوا اني لومقدمه زين كان انقبلت تحيــــــــ لكــــــــــــــــــــــــم ــــــــــــــاتي |
حسبي الله ونعم الوكيل
ولكن يا اختي ،، انشاءالله لن يضيع تعبك ،،،، لا تجلسي في البيت ان لم تستطيعي دخول الجامعه ، حاولي الانتساب لدورات مفيده لك ، أو حاولي أن تنتسبي لجامعات مسموح فيها الانتساب ، قد تكون مكلفه عليك قليلا ، ولكن افضل من الجلوس ،،،، |
كان الله في عونك
طيب ليش ماقدمتي على تخصص ثاني غير هذا يمكن يكون في هذا الأمر خيره لك |
عندما تتجول في الاماكن المرتفعة ... فانك دائما ما تسمع .... لا تنظر للاسفل ( لانك ستدوخ.. و قد تقع)
تلك الجملة و التقيد بها اساس نجاح المظليين و هواة الطيران الشراعي و الالعاب الهوائية العالية و الخطيرة وهي تعتبر قاعدة اساسية في التدريبات و التعليمات في تلك الاماكن هنالك قاعدة مهمة ( لا تنظر الى الخلف) و هي لا تختلف في المصداقية و الاهمية .... لكن... قلة اؤلئك الذين يعملون بها اذا كنت ممن ينظر الى الخلف..... فلا عجب ان تسير ي الى الخلف وان نظرت الى الامام...... فالقدر قد يجلب المستحيل على خط الافق |
الله يعينج على ما ابتلاج ...
من ناحية دراسة العلمي ... حدها متعبة ... كان كل امتحان.. يصير بوجهي نحوم السما ... و يحوشني الصلع ... شعري يطيح و حالتي حالة ... لكن عن جد الله يعينج .. و انتي درستي واجتهدتي و الله ماراح يضيع تعبج ... لكل مجتهد نصيب ... انتي ما تدرين الخير وين ... قدمي على مكان ثاني .. و إن شاء الله يقبلونج .. و ربي يفتح لج قلوب من حولج ... يحفظج ربي الله لا يحرمنا من ضحكتج الحلوة |
إييييييي نسيت أحيج
حياج الله في مكانج ... |
اقتباس:
|
عليكم السلام ورحمة الله وبركاته
الله يعوضك خير ومثل ما قالت نور ليش ما قدمتي تخصص ثاني |
نور
يجب ان يكون هذا مؤشرا ايجابيا لك عندما يعجبك احد ردودي .. فانت اصبحت تتعلمين لكثر |
شراني
يأخي وراك تتكلم باللألغاز وش تقصد ؟ أحس أنك تطنز علي!!! |
حيااااااااك ربي يالغاليه
شوفي ياروحي مو كل شي بالدنيا تقدرين توصلين له عشان كذا لاتعلقين املك او حلمك بشء واحد |
حاولي تتجهي لقسم أخر
والتحويل منه ولا تياسي يمكن خير لك يحفظك ربي |
نووور
تبغي الصراحه انا كمان أحس رد شراني علمي ومفيد حتى اني استفد منه هو لو يترك قشارته بس :) على قول النشمي يسلموووو |
السلام عليكم ورحمة الله وبركاته أختي الغاليه صرخه صدقيني هذاشي بسيط من هموم الدنيا وأنتي لازلتي صغيره لتواجهي الهموم .. لاتكبرينهاوهي صغيره.. يعني شوفي تخصصات ثانيه قريبه من الطب البشري(طب الأسنان , حاسب , إدارة أعمال , أنجليزي ترجمه , علم نفس , علم أجتماع ) وبالنسبه للواسطه (فساد المجتمع)اللذي لم يتكلمو عنه الأعضاء وتجاهلوه .. فهو بإذن الله سيزول والله يجعل كيدهم في نحورهم .. أختي أنا تخرجت بنسبة 97% القسم العلمي قريبه من نسبتك ودخلت التخصص بالواسطه بعد يعني مافي شي بدون واسطه هنا(عندك فيتامين واو تصيرين دكتوره حتى لو أنك ماتستاهلين أنك تصيرين .. وإذا ماعندك فيتامين واولو أنك الأولى على دفعتك ماتصيرين حتى فراشة مدرسه .. ولعلمك الطب البشري صعب ويبيله وحده رايقه وفاضيه وأنطوائيه بعض الأحيان يعني له مساوئ مثل ماله إيجابيات .. أطلب من الله العلي القدير أن يزيل من يتلاعبون بشبابنا وبناتنا بكلمة الواسطه ويحرمونهم من أبسط حقوقهم .. تحياتي أختي وأتمنى تحولين على طب أسنان أو غيره من التخصصات اللي تحبينهاوأهم شي (اللي ماتحتاج واسطه) لأن هالأيام مهو على لنسبه تنقبلين (على الواسطه).. مع السلامه |
| الساعة الآن 03:39 AM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا