حيرانه وعايزة منكم حل ضرورى انا مخنوقه جدا ومحتجاكم
 

بصراحه مشكلتى ممكن تكون مشكله تافهة بس فعلا بالنسبه ليا مشكله
انا بنت عندى 21 سنه وكنت متفوقه فى دراستى انا دلوقتى فى كليه تجارة جامعه القاهرة بس لالااسف انا المفروض دى تكون اخر سنه ليا فى الكليه بس لالااسف انا لسه فى تانيه ومش عارفه ازاكر ولا اركز فى اى حاجه خالص الفترة انا بقالى سنتين بمر بمشاكل كتير هى ممكن تكون مشاكل مش كبيرة بالنسبه ليكم بس بالنسبه ليا كان مشكله

اولا مشكلتى ابتدت من وانا فى تالته اعدادى مشكله اى بنت مراهقه حبيت واحد الواحد ده يبقى ابن عمى حبيته بجد بس مكنش حد يعرف خالص حبى ليه فى نفس السنه سافرنا مع بعض انا وهو واخويا عند عمتى لما سافرنا حصل هناك حاجه مكنتش متوقعاها من ابن عمى انا وهو فى مرة كنا اعدين مع بعض لاقيتوا لمسنى لما لمسنى انا مشيت على طول من قدامه ومكلمتوش تانى بعدها
بس حكيت لااخويا وبنت عمتى وبنت عمتى التانيه
بعدها انا مابقتش اكلمه ولا اسلم عاليه خالص بس للاسف كنت بحبه مش عارفه ايه الى كان مخلينى اتمسك بحبه وافضل احبه على فكرة هو اكبر منى بتلات سنين
لما دخلت ثانوى فضل حبه معايا يكبر بس كان حيى ليه فى السر مكنش حد يعرف خالص انى بحبه هو حاول كتير انه يتكلم معايا وانا كنت بارفض وكنت باحرجه مش عارفه ليه كان عندى احساس انه بيحبنى لما دخلت تالته ثانوى قلت خلاص انا لازم اخليه يعرف انى بحبه رحت ليه انا وبنت عمتى فى المكتبه بتاعتوا حاولت اقله بس ماقدرتش وماعرفتش اتكلم معاه ومشيت وسيبتهم بعد كده كنت برده بحبه اوى لما دخلت الجامعه حاسيت انى لازم بقى انساه واشوف مستقبلى انا مانكرش انى كنت برده بفكر فيه بس مكنتش بفكر فيه زى الاول بصراحه بس لاقيت نفسى بواجه مشكله تانيه وهى انى مش عارفه اتعامل مع زمايلى فى الجامعه مابقتش انزل الجامعه لدرجه انى عدت اولى مرتين وتانيه انا لسه فيها وشاكلى هعدها تانى وكل ده علشان مش قادرة اعيش وسط زمايلى حتى ماليش اصحاب خالص الا قليل اوى
دخلت على مشكله تالته وهى انى اتعرفت على شاب عن طريق الشات الشاب ده وهمنى بحبه ليا لدرجه خلانى احبه وانسى ابن عمى خالص وفعلا حبيته وفى الاخر اكتشفت انه كداب ولا هو بيحبنى ولا هو طالب جامعى ولا اى حاجه من الى قالها والمصيبه انى انا الى اكتشفت كدبه حاسيت انى من جوة مشروخه مش مظبوطه رحت حكيت الحكايه دى لابن عمى الى هو اخو الى انا كنت بحبه حكتله وقلتله انى حبيت واحد من النت واعد ينصحنى لغايه اما فعلا ساعدنى انى ارجع تانى زى ماكنت
المهم طول الفترة الى كنت بحب فيها الولد الى اتعرفت عليه من الشات وابن عمى بيحاول يكلمنى وانا ارفض ولما سيبت الولد الى حبيته من النت برده كان ابن عمى بيحاول يكلمنى وبرده كنت برفض لحد اما بنت عمتى جت اعدت عندنا شهر كل ده اتغير خالص بنت عمتى دى عندها 34 سنه وكانت عارفه موضوع انه حاول يلمسنى وانى مش باكلمه
اول لما جت حكتلها انى مدايقه ان كل حاجه بتضيع منى مش عارفه ليه حتى مزاكرتى مش عارفه ازاكر فى مرة لاقتها بتقلى ان ابن عمى بيحبنى وهو قالها كده قلتلها بس انا مش بحبه قلتلها انى مش باكلمه من ساعه الى حصل قالتلى دى كانت فترة وحاولى حتى تكلميه على اساس انكم اصحاب مش اكتر وموضوع الحب ده ممكن يجى بعد كده قلتلها ماشى انا هكلمه وفعلا ابتديت اتكلم معاه تانى ونسيت الى حصل بينا زمان
بس هو فى مرة جى وسالنى وقالى انتى ليه باقيتى تكلمينى تانى بعد ماكنتى مش بتكلمينى خالص قلتله انت عارف انا مكنتش باكلمك ليه وباعدين احنا ولاد عم واخوات
قالى اوكى ولاد عم واخوات وباعدين عرض عليا انه يجبلى هديه علشان اتصالحنا قلتله احنا اساسا مكناش متخاصمين ورفضت الهديه بعدها اعد مده يجى عندنا ويبات مع اخويا وكنت حاسه انه عايز يقلى حاجه بس مش قادر وانا كمان مكنتش باديله فرصه انى اعد معاه لوحدى او اتكلم معاه بس المشكله انى رجعت حنيت ليه تانى وحبيته وباقيت افكر فيه وباقينا نتكلم مع بعض عادى على المسنجر وباقيت ابعت ليه ادعيه وحجات اسلاميه
المهم اعد مده طويله مايكلمنيش ويفتح المسنجر ومايكلمنيش لحد يوم 12 - 4 كلمنى على المسنجر وقالى كل سنه وانتى طيبه علشان عيد ميلادك قلتله وانت طيب قالى ممكن تقبلى منى هديه علشان عيد ميلادك وياريت ماترفضيهاش بصراحه انا قبلت الهديه
ودى كانت اخر مرة كلمنى فيها لحد انهرده ولا كلمنى ولا حتى جاب الهديه الى كان بيقول عاليها انا باتكلم مع اخوه كل يوم وهو كتير بيفتح المسنجر ومش بيكلمنى
انا مش عارفه اعمل ايه؟
انا عارفه انى مشكلتى هايفه بس بجد انا امتحاناتى الشهر الى جى ومش عارفه ازاكر وحاسه ان راسى هتنفجر
مش عارفه ابن عمى بيحبنى ولا لاء بس انا عارفه انى حبيته وحتى لو مكنش بيحبنى طيب ليه بيعمل كل ده
ومش عارفه اعمل ايه علشان اعرف اتعامل مع زمايلى فى الجامعه
ومش عارفه اعمل ايه فى تركيزى ومزاكرتى
ارجوكم انا عايزة حل
لو كان الحل انى اتكلم مع ابن عمى واقله يكلمنى بصراحه انا ممكن اكلمه بس المشكله انى مش عارفه ده صح ولا غلط
وكمان مش عارفه الى حصل زمان منه ده ممكن يكون لحد دلوقتى بالاخلاق دى ويكون ماتغيرش ولا لاء
وهو ممكن يكون عنده عاده انه بيحب البنات
بصراحه عندى اسئله كتير فى دماغى ومش لاقيه ليها اجابه
بليز عايزة منكم رد على مشكلتى
واسفه جدا لو كنت طولت عاليكم
شكرا ليكم اوى