|
هل اطلق زوجتي المكتئبه بعد مرارة سنتين ؟؟
السلام عليكم. اول شي انا شاب اول ماتوظفت تم خطبة بنت لي خطبة تقليدية كالعادة في السعودية وبشوفه شرعية. رفضت ان اصبح مثل اصحابي اسافر وافلها واشتري افخم السيارات ..الخ لاني كنت مشغول بتجميع فلوس الزواج والتي تعدت مع تأثيث الشقة فوق الربع مليون ريال سعودي واغلبها اقساط. قرب الزواج وانا كنت مملك عليها وكان باقي عليه حوالي 4 اشهر او 5 . طلبت اكلمها بالجوال عشان اكسر الحاجز اللي مابيننا وافهمها وتفهمني وكان لي ماطلبت. مكالمة مكالمتين ومع الايام اكتشفت انها عصبيه معي وتزعل من اتفه الامور ولا تبدي زعلها وهي كلها اشياء تافهه واذا عصبت كانت تنتظر الا ان ننهي المكالمة وتسحب علي كم يوم بلا اتصال او رد على اتصالاتي واحيانا الواتساب. وايضا على عصبيتها الزايدة التي كانت اغلبها تنم عن تحكم بشخصيتي حيث كانت تبي مني تنفيذ اشياء بعد الزواج فيهم تحكم كبير. ابي ازور كل عماتي ببيتهم ونزور خوالي ولا من حقك ترفض وغصب عليك ..الخ وفوق تبيني ازور خوالها واسلم عليهم بعد !!. فا كانت فترة الملكة كلها عصبيه ومشاكل مالها اخر وهي التي تسبب اغلبها بعصبيتها وعدم فهمها. وصلت المشاكل إلى اهلي واهلها وتم الصلح والتبرير انه دلع بنات وبعد الزواج بتفهم. قلت يلا يارب. جا الزواج وسافرنا بالخارج. سفرتنا بالخارج اصبحت كلها مشاكل بمشاكل. اذا اي وحدة طالعت فيني قامت تصيح علي وتخاصمني واقل شي تعمله انها تكشر بوجهي إلى نهاية اليوم وعلى الرغم من اننا في تمشيه. وكانت اغلب مشاكله تبررها بالغيرة علي واغلبها خنفشارية مالها اصل. وايضا كانت ترغب في شراء وجعلتني اشتري هدايا كثير ولم ارفض ولكن ان رفضت كانت اقل شي زي ماذكرت تكشر بوجهي واحيانا تتلفظ بالفاظ وقحه. انا انهرت وكدت ان اطلقها الا ان هداني الوالد. <<<شوفو هذا الحين بشهر العسل اول اسبوعين الزواج فقط.
طبعا سألت البنت تقول احبك وماخذتك عن رغبه.
عمرها بذاك الوقت 21 ونص
جينا بعد الزواج لازالت عصبيتها موجودة والمحاولة في التحكم فيني حيث مجرد مكالمة مع صديقي تثور او مراسلتهم بالتواصل الاجتماعي تثير غصبها بقوة تريدني مربوط بها طول الوقت. وايضا كانت ترفض فكرة قدوم ضيوف لي بداعي انها ليست شغالة عند ضيوف وانها ملزومة فيني. شهادة حق كانت مهتمة بالبيت تتفنن في التجارب للطبخات على الرغم من فشلها احيانا ولكن كانت تحاول.
انا لا اريد ان اطيل عليكم .
حالها على مدى سنتين زواج كما هو. عصبيه على اتفه اتفه الاسباب وكل مالها تتمادى والان لها فترة سنه خصوصا بعد ماجابت ولدنا تتلفظ علي بابشع الالفاظ اذا غضبت مني.
مثال: هي: انا ودي اشتري الغرض هذا.
انا: والله ياعمري هذا غالي على ميزانيتي ومهو مهم الحين.
هي: الا ابيه انا ابيه داخل مزاجي ونفسي فيه.
انا: حبيبتي والله مزنوق حسي فيني.
هي: بتشتريه ولا لا.
انا: لا والله بس ابشري بعدين
هي: الله يلعنك ويلعنها من عيشة <<غير السب ال 18+
مثال للتحكم
تكون عند اهلها وليس عندي ركزو اوك
هي: حبيبي وش بتسوي اليوم
انا: والله بطلع مع اخوياي نفس طلعة امس
هي: ليش وش عندك
انا: عادي طفشان وبقابلهم ونطلع
هي: انت وشفيك مزودها طلعاتك كثرت شكلك تبي تدشر.
انا: ؟!؟!؟!؟ احبس نفسي
هي: ايه الرجال الكويس مايكثر طلعات.
هذا غيض من فييييييييييييييييييييييييض سنتين زواج و 6 شهور تواصل بوقت الملكة وانا متعذب وحالتي وحالة. هي المشكلة احيانا تهدى وتقول والله ماقدر اتحكم بنفسي لاعصبت المشكلة تجيب اشياء غير منطقية حتى وهي هاديه وتجادلني عليها. يعني اليوم تبي تكمل دراسه اوافق. تجي بكرة بطلت ابي اتوظف اوافق. تجي بعدها باسبوع تغير رايها.
حياتي كلها معها عصبيه . هي هادية الا ان تشوف شي مهو عاجبها سواء مني او وحدة طالعت فيني بسوق هنا تعصب وتطلع جميع السبات اللي تعرفها . سوت فيني الويل.
انا رميت عليها طلقتين ووديتها لاهلها ونصحوها لين قالو بس وطلع عندها كسل غدة ومن اعراضها العصبيه. اخذت العلاج وهدت شوي رجعتها البيت وواصلت عالعلاج واشوف العصبيه بدت ترجع خلال فترة العلاج وحدة وحدة لين رجعت زي ماكانت. بعد العلاج سوينا تحليلين قالو خلاص الكسل راح سليمه. ولازالت عصبيه وتبي تتحكم فيني !!!
اخرها قلت بوديها استشاري عائلة. قال زوجتي عندها ذهان واكتئاب ونصحني لزيارة طبيب نفسي من اجل اخذ حبوب. رحنا له قال بس عندها اكتئاب فقط.
المهم انا طول هالمدة ارقع لها اكيد تعبانه اكيد تعبانه وهي مشكلتها كانت فترات خصوصا ايام مرضها بالغدة تحط البلا بمرضها لانها خصوصا لو عصبت لو الحس رجولها ماتبي تتفاهم وتسب وتخاصم واحيانا اذا هدت تتاسف واحيانا لا وتقول لا تلومني انا مريضه !!!
مع ان الاستشاري الاول قال هي ماتقدر تتحكم بنفسها بس نصحها بانها تمسك نفسها شوي ولا تاخذ المرض حجة عشان تبررين عصبيتك وتحكمك بزوجك. <<هذا الكلام قبل شهر.
رجعنا للبيت واشوف زوجتي يوم يومين ثلاثه صار مايهمها الامر يعني تقول ودي اتحسن وودي وودي ولا اشوف منها حركة. اشتريت لها كتب هي طلبتها عن الثقة بالنفس ولا فتحت واحد منها.
انا بشهادة اهلها كووووووولهم قالو انت بيض الله وجهك مدلع بنتنا وكل شي. لكن هي تعبانه.
عالعموم المشاكل لازالت متواصله ونكدت علي العيد بمشاكلها . وانا لي فترة اقل من شهر قاعد احسب حساباتي. ضاع من عمري 4 سنين من فترة التجميع لين الحين وانا حارم نفسي ماديا عشان الزواج وعشانها ولا اشتري لنفسي الا ماقل << ترا لو شريت لنفسي شي وجا بنفسها شي ورفضت تسوي الويل لي.
قمت افكر بالطلاق لان حاليا لا اشعر باي مشاعر حب تجاهها كل اللي اشوفه شفقة عليها وعلى ولدنا المسكين. لكن كحب مافيه وغير كذا يوم سويت حساب شامل لقيت ان مافيه بيننا توافق فكري نهائي. ان فتحنا سالفة ماتتناقش ولا تعرف مواضيع عامة نهائيا. حياتي معها اغلبها ملل وهي تتشكى اننا بس عالتلفزيون بس للاسف يوم افتح سالفة تقول انت سولف وانا اسمع. صرت حكواتي.
طبعا بتقولون ليه ياظالم
احب اعلمكم دوامي باليوم 14 ساعة وماعندي الا يومين اجازة بالاسبوع.
العصبيه والتحكم معها من يوم عرفتها اوك . لها فترة 7 شهور كل مالها تهمل كل شي حتى تقعد باليومين والثلاثه بنفس الملابس وبدون استحمام والمطبخ يقعد 3 ايام مايتنضف لين تقلب ريحة البيت زبالة.
هي اشوف منها وعود عشان تتحسن. تتحسن فترة بسيطه ماتتعدى 3 ايام وترجع لعصبيتها والعصبيه تؤدي لمشكلة وتحلف انها ماتمسك شي بالبيت.
انا تعبت زهقت طفشت مرضت. حالتي حالة معها لا انبسطت بحياتي العزوبيه ولا الزوجيه والمشكلة هي تقول تزوج علي وانا رافضها رفض تام لان هي بس تبي تعيش ومادري وش المغزى يمكن ماتبي عيشة اهلها.
هذا شرح ملخبط وطووووووووويل لحالتي واسف عليه لكن عشان ابين لكم واقسم بالله لو بكتب كل شي يمكن تعدي ساعات وانا ماخصلت انا للحين عدا علي نص ساعة لين كتبت هالكلام.
احب ان اضيف بان ابوها تزوج على امها وهي صغيرة وتافقمت مشاكل وطلق امها وهي بالابتدائي ومن بعدها على كلامها كانت تحصل ضرب من زوجة ابوها كثير لمدة 6 سنوات إلى ان اخذوها للعيش مع جدتها. على ماوصلني يقولون بانها هي من كانت تفتعل المشاكل مع زوجة ابيها لكي تنتقم من امها ولانها الكبيرة في اخوانها وعلى الرغم من ذلك لم توجد مشاكل من اخوانها بتلك الفترة.
اللي ابيه منكم الاجابه على هالسؤال.
هل اللي عنده اكتئاب يسوي زي كذا؟ هل مايقدر يتحكم بنفسه نهائيا؟
تصرفاتها بانت امام الجميع حتى امام ابوي وامي تصارخ علي وحتى قدام ابوها صارخت يعني ليس خافي ماهي فيه.
ارجو منكم المشورة وللمعلوميه فكرة الطلاق براسي حتى لو انها بتتعالج لاني خلاص يئست من الحياة معها وماعاد فيه مشاعر تجاهها ولعلي انا اصبت بالاكتئاب بسبب هذي المشاكل.
|