|
متضاااايقة .. مخنووقة .. عجزت أرتاح
السلام عليكم ورحمة الله وبركاته جميعا يسعد صباحكم جميعا
بداية أحب أقولكم إني ترددت في كتابة مشكلتي بعدين عزمت إني أفتح قلبي وأقول كل اللي أحس فيه مو معقول أعجز عن البوح على أرض الواقع وخلف الشاشة !
أنا بنت عمري 25 سنة مشكلتي بدأت من بعد تخرجي من المرحلة الثااااانوية وخفت شوي فترة الجامعة وزادت سوووء في السنة الأخيرة وبعد التخرج .. دائما أحس بضيقة شديدة عجزت أعرف إش سببها .. صرت انطوائية بعد ماكنت أتصدر المجالس عند صحباتي وقريباتي .. كرهت كل شيء نفسي وحياتي .. أبكي لوحدي دائما وغالبا بدون سبب بس كذا متضايقة ومخنوووقة وما أعرف أنفس عن هالضيقة إلا بالصياح والنياح .. النقطة الأهم مافي شيء يسعدني لا طلعات ولا جمعات ولا شوبينق ولا سفر ولا أي شيء بالحياة يسعدني .. مخنوووقة بجنوون نفسي أعيش زي ما كنت عايشة زمان .. نفسي أرجع أحس بالحياة ويكون كل حاجة لها طعم عندي .. أبغى أضحك من شغاف قلبي مو من ورى أسوار قلبي .. تعبت أقول إني بخييير وأنا ماني بخير أنا أموت في اليوم ألف مرة .. غير هذا صرت شخصية قلقة ومتوترة أغلب الوقت .. والآرق ملازمني من بداية حياتي وهذا بحد ذاته بيجنني .. أحس بخوف ما أدري من إيش بس كذا أحس بخوف وعدم ارتياح في الحياة .. وجاء موت أمي الغالية وكمل الناقص زاد همي وضيقتي ودموعي .. مرت على وفاتها سنة ونص ولليوم أبكيها ما كأنها إلا أمس متوفية .. وفاتها جات في وقت أنا كنت فيه في قمة ضعفي واكتئابي .. كنت محتاجة حضنها بس إرادة الله فوق كل شيء .. سويت كل شيء صليت وبكيت ودعيت أطلب من الله يخفف ضيقتي ويشرح صدري ويهدأ بالي لتنام عيني بالإضافة لقراءة القرأن لكن حالي هو هو والحمدلله على كل حال يارب ..
أتمنى منكم ترشدوني هل حالتي تستدعي أعرض نفسي على طبيب نفسي ؟ وإذا إيوه ياليت تفيدوني بأطباء كويسين وثقة ويخافون الله في جدة .. خااااايفة ما أروح لطبيب وحياتي تنهار وأوصل لمرحلة أصعب حرام شبابي يضيع في النفسية الدمار هاذي .. وبنفس الوقت خايفة من العيادات النفسية أو بالأصح من الأدوية النفسية ما أدري لوين بتوصلني !
أعتذر وبشدة لو طولت عليكم .. شكرا لكم
|