المشاركة الأصلية كتبت بواسطة لماا محمد

السلام عليكم
الحمدلله الذي بنعمته تتم الصالحات اليوم تم عقد قراني في محكمة الاحوال الشخصية في جدة انا العضوة لماا محمد اللي كان عندي مشكلة في التحاليل هيا مو مشكلة قد ماكان خوف وحرص مني عشان كذا سألت في المنتدى ورح اقولكم الحين طريقة سير معاملتي من غير تفاصيل لأني ما أملكها ولكن حبيت افيدكم وان شااء الله يارب يبلغكم وصولها للمحكمة عاجلا غير آجل ..

انا الطرف الاجنبي وعمري 23 سنة اسكن في الرياض وخطيبي الطرف السعودي عمره 30 سنه ويسكن في جدة

كان التقديم من محافظة جدة لانه هو الطرف السعودي قعدت 4 ايام اتوقع لانها مستوفية الشروط وراحت للشرطة في جدة .. الشرطة هناك طلبت اوراق كثيرة بس احنا جهزنا اثبات السكن وصور الاقامات والجوازات والاقرار من بدري وقدمناها هناك من اول ما تحولت للشرطة واعطوه ورقة للتحاليل لي وله .. بس خطيبي قال انه البنت في الرياض وكتبو اني اسكن في الرياض في قفا الورقه عشان تتحول للرياض ونحلل فيها .. احنا حاولنا اني اجي جدة واحلل عشان ماتطول المعاملة وهيا تتنقل وكذا .. طبعاً ما وافقوا وقالو لازم وكانت خيرة سبحان الله من ربي المهم انه راح حلل هوا وكمل اوراقه في شرطة جدة وتحولت لشرطة الرياض طبعا قعدت شهر في الطريق :/ الشرطة في الرياض طلبوا التحليل ورحنا المستشفى عشان نخلصه وهناك قالولنا ما نقبل ورقة طلب تحاليل من الشرطة جيبوها من الامارة .. ورحنا جبناها من الامارة ورجعت المستشفى حللت من الامراض الوراثية والمعدية ونقص المناعة المكتسبة وهذي العبارة تشمل الامراض الثمانية اللي يحلل منها الطرف الاجنبي كلها (( وما اعتقد في مناطق تحلل امراض اقل او اكثر بس يمكن تختلف مسمياتها)) وشكلهم مؤخراً زادوا تحليل الصدرية وكان تحليل بول واشعه لمرض الدرن وخلصنا واستلمنا النتيجة في عشرة ايام مكتوب في التقرير عبارة ( الطرف المذكور أعلاه لائقة صحياً وخالية من الامراض المعدية وكذلك خالية من مرض نقص المناعة المكتسبة ومصابة بنقص انزيم g6pd ) اللي هوا انيميا الفول .. رحنا نوقع التقرير من عيادة المشورة الدكتورة قالت بسيط يممشي مبروك يا عروسة وبعدين اكتشفنا انهم في جدة يدققو عالانيميا دي فخفنا وبديت ابحث وكلمنا دكتور ثاني من الرياض قال دام المستشفى اعطاك التقرير ما توقف ان شااء الله << سألناه برضو اذا المفروض يدونا ورقة توافق قال اذا التحاليل طرف اجنبي وطرف سعودي ما نعطي توافق هذا التقرير يكفي والامارة يتصرفو هناك اذا موافق للشروط ولا لا>> بس كنت اكذبهم وموسوسة مرره وبدأت اسأل ولا لقيت احد نفس وضعي كلهم توقفت في المستشفى فقررت اطنش لانه الموضوع تعبني ولسا ما عصلقونا عشان كذا سجلت خروج من المنتدى وتوكلت على ربي توكل تااام .. المهم وديناه لشرطة الرياض وخلصنا الاوراق المطلوبة ورجعت سافرت معاملتي لشرطة جدة هناك طلبو اشياء تانية زي تصديق صورة شهادة الميلاد من مكتب المواليد وصور اوراقي مصدقة مرة ثانية عشان ماعجبهم تصديق شرطة الرياض ويبغون تحليلي عليه صورتي ومختومة لانه في الرياض يبصمونا مكان الصورة رجعنا سوينالهم اللي يبغوه كله ورسلناه وتحولت على محافظة جدة وفي المحافظة مشيت على ادارات ما اعرفها ماكنت تعرف سيرها بالتفصيل فسامحوني ومنها تحولت عالمحكمة الحمدلله يوم الاحد ووصلت الخميس واسبوع على مانجي انا واهلي من الرياض وعقدنا اليوم الحمد لله معاملتي تقريباً اخذت ستة شهور وما راحت الداخلية عشاني مولودة هنا وبس

ابغا اقولكم توكلو على ربي هوا مدبر الامور اقول لنفسي دحين لو حللت في جدة كان مداها مرفوضة واحنا كنا مصممين اننا نحلل في جدة عشان ما تتعطل ربي عارف الخيرة فين .. المهم انتوا توكلوا وحاولوا فيها بكل الطرق واكيد ربي ما بيخيب لكم امل سبحانه