السلام عليكم ورحمه الله وبركاته
كيف الحال ان شاء الله طيبين
معاكم اختكم شيخه من الامارات
حبيت اخبركم عن الحاله هذي متي بدت معاي وشلون قدرت اسيطر عليها بفضل الله
اول شي بدى معاي وسواس عادي جدا ماوصل للخوف او الرعشه
كنت حامل وافكر وايد باللى في بطني وبعد مابعد مايتني ولاده مبكره
كنت خايفه من العمليه القيصريه لانها بتكون في تخدير موضعي وكنت احس بالشفرات
وقت العمليه جاتني رعشه قويه وخوف وكنت ارتعش من البرد والحمدالله علي كل شي
ثاني يوم العمليه حسيت بالم في صدري وخفت وقلت اسوي فحص وطلع كلش شي سليم فقط تضخم بالصدر بسبب الحليب
وصرت افكر وقتها كثير ببنتي اللى في الحضانه المركزه لانها قاصر وكل يوم اروح للحضانه واجي وعاشر يوم الولاده سويت حادث بالسياره
وكان فيني ارتباك وتفكير زايد وكنت متعايشه مع الوضع لين كملت فترة النفاس
صرت اسلي نفسي بالمسلسلات ويوم تجي مواقف في المسلسلات عن الامراض كنت اخاف
وفجاءه الصبح كنت اسولف مع خدامتي وافضفض لها عن ناس الله يسامحهم وهي بتعرفهم وبتسولف معاي
وقالت لي خدامتي يامدام يوم طلعت الحرمه من البيت قالت والله لاوريكم ..؟
قلت لها الله كريم ورحيم والله يصبرنا
قلت لها برقد شوف البيبي
ورحت علي السرير وقلت اللهم اني استودعتك نفسي وزوجي وابنائي وبناتي وبيتي وخدمي وحلالي ومالي
فاحفظنا يا الله بعينك اللتي لاتنام وحصنا بحصنك الذي لا يرام
وقراءت سورة الناس والفلق والاخلاص وايه الكرسي وغفيت وانا استغفر
فجاءه حسيت بشي يدخل عن رجيلي ورعشه قويه وخفقان في القلب \
وزوجي كان نايم في الصاله صرت اروح من غرفه لغرفه
ولما ادخل الصاله اللى فيها اولادي اطلع مش قادره اشوفهم حتي وارتجف وايد
وفي الاخير استسلمت ورحت لزوجي وقلت له يافلان اقعد ودني المستشفي قالي ليه
قلت انا مش بخير احس اني بموت وقعد يحضني ويقرا علي وانا ارتجف اكثر واكثر
قالي يالله البسي بنروح واشرب ماي زمزم وارجع واشرب ماي عادي وارجع ماقدرت
ويوم طلعت من البيت وصلت عند الدوار قلت لزوجي اتصل علي المطوع بسرعه
اتصل علي المطوع وقال انا جاي اللحين وهو عند لفة البيت قلت لزوجي ترى المطوع وصل
وقمت اتجشؤويطلع الهوى من فمي وقرا ايات التحصين اول شي وبعدين وضع يد زوجي علي راسي
ويد المطوع فوق يد زوجي ولما قرا علي حسيت بمثل الرعشه خلتني اقوم واقعد في مكاني
واحس بشد بعضلات الصدر الايسر والم بالبطن
وبعد القرايه حسيت براحه ورقدت
وقمت من النوم خايفه واخلي الخادمه تمسح علي بزيت الزيتون وترش الماي المقري فيه علي جسمي
وبعد الحاله هذي بثلاث ايام جاتني استحاضه قويه ورحت العياده علشان اتاكد انها استحاضه واواصل صلاتي وقرايتي
والله ثم والله اني كنت في عالم ثاني الخوف كان ملازمني
خوف من الموت والامراض الحمدالله علي الصحه والعافيه والله يعطينا طولت العمر يارب
بس صرت اذا دخلت الحمام اعزكم الله اخاف اقفل الباب صرت اجبر نفسي واقفل الباب
احس اذا شفت نفسي بالمرايا اخاف اكتشف شي واوسوس صرت اشوف نفسي غصب بالمرايا
كنت اخاف اغمض عيوني وانا اتسبح صرت اغمض عيوني غصب
صرت اخاف اصلي وانا مش طاهره اروح اصلي وانا مطمنه من طهارتي
يوم اسمع اصوات في البيت في اي وقت اتجاهل الاصوات ولا كاني اسمعها
لما يجيني فضول افتش تلفون زوجي طبعا اخليه ولا افتش التلفون
لما ابا اطلع في الليل للمطبخ واخاف من الظلام صرت اطلع غصب وانا اذكر الله واسوي حليب وارجع
لما يجيني خبر موت او مرض عن طريق الواتس اب صرت اقراه غصب وانا ادعي لهم بالرحمه او الشفاء
ولما يجي الوسواس عن الموت اقول ربي اعطني طولت العمر
ولما يجي وسواس المرض اقول ربي اعطني الصحه والعافيه
داومت علي الصلاه في وقتها
الاذكار مساء وصباح
ذكر الله في كل شي
لاحول ولا قوة الا بالله
لا اله الا الله
سبحان الله
الحمدالله
استغفر الله
الله اكبر
لا قوة الا بالله
اللهم اني اعوذ بك من وسوسه الصدر وشتات الامر
اللهم اني اعوذ بك من الوسواس الخناس
اللهم انزل الطمئنينه علي قلبي وابعد عني كل وسواس او حسد او عين او مس او سحر او جن
الحمدالله كما ينبغي لجلال وجهك وعظيم سلطانك
اتابع طبعا ماخفي عليكم رحت المستشفي طلع عندي جرثومه بالمعده
وتمت معلاجتها بفضل الله
وقت العلاج كان ملازمني الاسهال اعزكم الله
وبعدها نفص فيتامين ب 12
وبعدها قالو انه القالون العصبي
وسبحان الله الثلاث اعراض هذي تسبب الوسوسه وتصل الي الهيجان
ولما تهيج تجي رعشه وخفقان وهكذا
واكثر اللي فيهم وسواس قهري هم اصحاب جرثومه المعده او نقص فيتامينات او قولون عصبي
ماخفي عليكم زوجي قبل 7 سنين جاه الوسواس وكان يفكر وايد ويقول بروح للجهاد مابي اموت في فراشي
وسبحان الله قدر يتجاوز المرحله بذكر الله
اللي خلاني اروح افحص واحد من المطاوعه الله يجزاه خير يوم قلت له اعراضي قالي روحي سوي فحص فيتامين دال
انا سويت فحص شامل والحمدالله علي كل شي
طلعت جرثومه المعده ونقص فيتامين ب 12
بس بعد مادومت علي الاكل الصحي والفيتامينات حسيت نفسي افضل من اول
وطبعا صرت اذا جاني الضيق والوسواس اراجع الاكل اللى اكلته واتجنب العصبيه
وثاني شي زوجي كان له يد بالعلاج انا بالعاده احب تربية الحيوانات وكان وقتي فراغ
وهذا الشي اثر علي راح زوجي جاب لي انواع كثيره من الدواجن والطيور النادره وجاب لي حضانات لطيور
واقفاص كبيره وقالي كلمتين لما شاف نفسيتي تغيرت
(( لو اعرف ان الحلال بيغير نفسيتج كان مامنعتج من تربية الحلال ))
وما اقول غير ربي يوفقه ويفرجها عليه ويرزقه من اوسع ابوابه
بس جات فتره صار يزعل ويتضايق من كثر الم\طاوعه والمستشفيات
وصرت انا مقصره في حياتي الزوجيه وكنت كثير اقرا قران او اتم افكر لين قررت اني اعكس كل الافكار اللى تجيني
ماخفي عليكم تجيني افكار حاليا بس الحمدالله علي كل شي
لا اعطيها اهتمام وكانها عابر سبيل
واللى يعاني من قلة النوم
حاول تقعد مع صلاة الفجر من الساعه اربعه وحاول ماتنام الا الساعه 10 ونص الليل او 11 بالكثير حاول ترقد في الليل وانت خلاص مرهق
علشان لو جيت تنام ماتقعد تفكر ولا تنام الا وانت قاري المعوذات واذكار النوم علشان ترقد مرتاح
والله ان ذكر الله هو العلاج من كل داء
وعلي فكره الوسواس منتشر بكثره
جارتي عمرها 56 سنه جاها الوسواس قبلي ب 6 شهور طلع معاها جرثومه بالمعده وقولون واعصاب ونقص فيتامين ب12 ودال
واحاول قد ماقدر اساعدها بتغير نفسيتها لانها تبكي وتتذكر اولاده وتخاف تصلي والله يشفيها شفاء لايغادر سقما
عليكم بالصلاه والاذكار
لو حسيتي بفكره جات في بالج علي طول اتصلي لاقرب صديقه او جاره واقعدي سولفي معها عن الملابس العائلات الطلعات الماضي اي شي
لو حسيتي بوقت فراغ روحي المطبخ سوي فطاير كيك مكرونيه صوري شغلج نزلي انستقرام
سوي قهوه وشاي وحليب وكيك روحي لاقرب جاره عندج وسولفي معاها حاولي تخلي الابتسامه ماتفارق شفاتج اضحكي تفائلي بالخير
ترى كل شي فان ويبقى وجه ربك ذو الجلال والاكرام
كل شي بيروح ماشي بيتم في هالدنيا
والموت حق علي كل مسلم
والحمدالله رب العالمين
واتمني ترحبون بي كاخت بينكم
واللى حاب يتواصل وياي عن طريق السكاي بي لسوالف والوناسه
يكون افضل علشان مانعطي الوسواس اكبر من حجمه
واللى ساعدني اكثر التواصل مع الناس غير من نفسيتي كثر
والله يوفقك ويشفي جميع المسلمين المؤمنين يارب العالمين
شيخه ..:)