|
لم اعد استطيع اخفاء السر .... ياريت تشاركونى بارائكم عافاكم الله
انا طالبة بكلية صيدلة 20 سنة سبق وكتبت كتير موضوعات هنا فالموقع فملتقيات وعيادات وشرحت حالتى بالكامل ... واخيرا اخر مرة روحت فيها للدكتور لوحدى وطبعا اهلى ميعرفوش انى تعبت تانى وعايشة بالعلاج وروحت للدكتور مرتين من وراهم انا مستحيل اقدر استحمل المرض ده او اسكت عليه لانو بيدمر حياتى ربنا ادالنا عقل ياجماعة وارادة وربنا بيحب المؤمن القوى مش الضعيف انا جربت وسائل كتير واهلى ودونى لشيخ قبل كدة منفعش معايا غير العلاج الى دكتورى بيكتبهولى والحمد لله اتشفيت بنسبة 90 % دلوقتى بعد ما انتكست مرة وفضلت اجرب ادوية كتير مع الدكتور لغاية منفع معايا الحمد لله باروكستين واولابكس واميبريد وبروثيادين الى ماشية عليهم دلوقتى .... الدكتور قالى انتى لستى مريضة نفسيا او لسه مدخلتيش اوى فالمرض وهو الفصام من نوع (اضطراب التفكير ) وده بيفقدنى قدرتى على الفهم والكلام والقراءة ده غير انو مصحوب باعراض قلق واكتئاب شديدة جداااااااااا لكن انا الحمد لله بلحق نفسى اول باول بالعلاج واخر مرة الدكتور قالى انا خايف عليكى مالادوية النفسية :( انا جربت كل الادوية ياجماعة تقريبا والله :( ولله الحمد يعنى فبداية مرضى اخدت بروزاك وسيروكسات وزيبريكسا وبعد كدة سبرالكس ولوسترال ودلوقتى الى قلت عليهم فالاول .. انا بقى عندى خبرة ودراية كبيرة بحالتى وبالادوية النفسية والجرعات وكدة ده بالاضافة انى فصيدلة سنة تانية ... اهلى لو يعرفو انى باخد دوا هيطردونى فالشارع :( المشكلة دلوقتى انى فى شخص فحياتى وبيحبنى جدااا وكلم مامتى وعايز ييجى يتقدملى خلال السنة الجاية ان شاء الله وده من سنتين تقريبا هو حبنى بعد مااتشفيت اول مرة مالمرض ونسيته تماما طبعا مقلتلوش على تجربتى المؤلمة دى لانى كنت بخاف افكر فالموضوع اصلا وبدات اعيش حياتى عادى وانا كمان حبيته وارتحتله اوى لكن انا السنة الى فاتت انتكست تانى وتعبت وكنت بروح للدكتور وباخد العلاج دلوقتى وعايشة عليه من وراه هو ميعرفش :( انا نفسى اقوله لكن خايفة يتصدم ويخاف عليا اوى ويزعل وفنفس الوقت مقدرش ابعد عنه واظلمه وهو مش بيعتبر انو ليه حد غيرى دلوقتى بعد ما بباه اتوفى من سنة وكان بيحبه جدااااااا ... اعمل ايه ... انا تعبت من كتمان السر ده .. وكمان خايفه اوى على مستقبلى مش عارفة اعمل ايه .. هل لو قلتله هيفهم وهيتقبل وانا هقدر استحمل ولالا ... انا تعبت اوى ارجوكو ساعدونى انا حاسة انى شايلة حمل تقيل اوى لوحدى ....
|