المشاركة الأصلية كتبت بواسطة mrs.abdulkarim

انا قدمت على الداخليه جلست في الحقوق شهر و3 ايام واتصدرت على اماره مكه جلس كم يوم وراحت شرطه مكه ومن شرطه مكه حولوها لشرطه جده

وهنا تروح مكتب الزواج ادوني الطلبات طبعا الطلبات الطرف السعودي بنت والاجنبي ولد مقيم بس غير مولود لان الطلبات تختلف على حسب مين الطرف السعودي

1 - ورقه موجهه للمختبر الاقليمي للتحاليل ليا ولخطيبي ((طبعا سوينا موعد من الموقع حق المختبر ورحنا حللنا واستلمنا النتايج بعد 10 ايام ولمن تروحي للتحليل خدي صورتين 4*6 لك وصورتين لخطيبك مع اصل الاقامه واصل الهويه وورقتين للموعدين))


2 - ورقه موجهه للبحث لخطيبي راح لهم واخدوا بصماته وادونا موعد بعد اسبوعين بس انا رحت بعد 10 ايام ودوني هيا

3 - ورقه تثبت باني ربه منزل وعليها يوقعوا 2 شهود وتصدق من العمده

4 - ورقه تثبت ان الخاطب غير متزوج بسعوديه قبل كدا وتوقع من 2 شهود وتختم من العمده

5 - وورقه موجهه للاحوال المدنيه للطرف السعودي طبعا بطلب برنت

6 - ورقه تعريف راتب بعمل الزوج ونصدقه من الغرفه التجاريه

7 - صوره من هويه المخطوبه وصوره من اقامه وباسبور الخاطب (( و لمن تروح تسلمي الطلبات لازم تكون معاكي هويتك الاصل واقامه وباسبور خطيبك الاصل ))

حيدوكي 3 ورقات اقرارات من مكتب الزواج في الشرطه تعبي البيانات فيها وتوقعي وتكتبي رقم جوالك

وبعد كدا تحولت للبحث الجنائي ودوني موعد بعد شهر ونص

وتحولت لاماره محافظه جده (( لمن رحت عملوا موعد بعد اسبوعين وطلبوا حضور الخاطب و2 شهود سعوديين يعرفوا الخاطب والمخطوبه او ولي امرها)) مع احظار الاثباتات الاصل طبعا ... بعد الموعد بيوم تحولت للاماره ووصلت بعد يومين

وصلت الاماره الخميس وبدا العمل فيها الاحد وتصدرت الاثنين مره تانيه للداخليه (( لمن سألت ليش قالولي لان الورق ماكان كامل وخطاب المحكمه يطلع من الداخليه لانه غير مولود بالسعوديه ولمن كلمت الداخليه قالوا نفس الكلام نحتاج تكمله الورق))

انا قدمت على الداخليه بصوره هويتي وصوره اقامه وباسبور خطيبي وبرنت الاحوال حقي وورقه العمده وكان مع معقب حسبي الله عليه طبعا طلع نصاب اخذ الفلوس واختفى رغم انه قدم الورق مع اخويه في الداخليه راحوا مع بعض وعملوا خطاب هناك باسم اخويه لانه كان معاه وكاله رسميه من المحكمه من بابا

وبس لسه ما وصلت الداخليه اليوم حكلمهم واشوف

واسفه لو نسيت شي ESWVG