نفساني - عرض مشاركة واحدة

23-02-2015, 07:45 PM

يا قلبي مشكلتك مرة بسيطة صدقيني وحلها بيدك أنتي
لا تتوقعين إن أحد عنده لك حل سحري يخليك فجأة تتعافين لكن الحل بيدك أنتي غيري طريقة تفكيرك ريحي نفسك واسترخي راح تلاحظين إنك تحسنتي
أهم شئ تحرصين على الأذكار وعلى الذكر عموما لأن ذكر الرحمن يطمن القلب ويريحه
كل ما حسيتي إنك خايفة أو متوترة اذكري ربك واستغفري واستشعري معنى الذكر الي تقولينه راح تهدين بإذن الله
شفتي قد ايش الحل قريب منك وأنتي غفلتي عنه
خليك إنسانة متفائلة شوفي الإيجابيات الي عندك لا تفكرين ب السفر وخوفك من نوبة الهلع وقت السفر لأنه غيب ما يعلم فيه إلا الله,
يعني الحين لما فكرتي بالموت راح تمنعينه إذا جاك!!, المسلم نظرته للموت إيجابية لأنه يفكر فيما بعد الموت راح يستقر في الجنة برحمة الرحمن
اقري كتب عن التفاؤل والطموح, خليك إنسانة مطلعة تحب التجديد والتغيير والسفر فرصه تتحدي فيها نوبات الهلع وفرصه تتغلبي عليه
انا كنت اعاني مثلك فوبيا السفر وكنت ابكي لاجابو طاري السفر لان اخاف منه والله ي قلبي سافرت ولاصار لي شي الحمممممممدلله كلهها اوهامم ماراح يصير لك شي وحتى لو نوبة الهلع جاتك والله ماراح تموتي منهاااا ولا راح يصير لك شي اسأليني انا مججججربه والحين الحمدلله قدرت اتخلص من خوفي من السفر
لا تشيلين هم شئ أكثرمن اللازم ولا تعطين الأمور أكبر من حجمها لأن الي كاتبه ربي راح يصير شلتي هم أولا أقلقتي نفسك أولا, وربك ماراح يقدر لك إلا الي فيه خير
وإذا خفتي من شئ تنفسي بعمق إلى ما تحسين بطنك امتلى هواء بعدين فرغيه يعني شهيق وزفير كرريها كذا مرة
وإذا جاك التفكير بالموت مباشرة تعوذي من الشيطان واستغفري اقطعي تفكيرك مباشرة فيه
الموت شئ مكتوب علينا جميعا صح ومطلوب إننا نتذكره عشان ما تغرنا الدنيا لكن بعد بوسطية واعتدال لأن الشئ إذا زاد عن حده انقلب ضده
حاولي تستمتعين بحياتك بالمباحات لأنك ماراح تعيشين إلا مرة وحدة ليه تقضين هالمرة الوحدة في الهم والضيقة
وسعي صدرك
وحولي تفكيرك بالموت من سلبي لإيجابي اقنعي نفسك إن المسلم ما يخاف من الموت لأنه قاعد
يزرع في هالدنيا له أعمال تنفعه بعد الموت
الموت راح يخليك تنتقلين لحياة الآخرة راح تشوفين مقعدك من الجنة راح تبشرين بإذن الله ما
فيه هم ولا غم كله سعادة في سعادة تجتمعين بأحبابك وتتنعمين بنعيم لا ينتهي..~