المشاركة الأصلية كتبت بواسطة ولاء مبتعثه

نفسيتي طبعا تعبت و ماعرفت انام و جالي صداع و قررت ما اروح الجامعه لانه ما كنت أبغى أكلم احد ولا احد يشوفني بالحالة اللي انا فيها
و قعدت في البيت أفكر في حالي و دراستي و الغربه اللي انا فيها و كلمت خطيبي و أنصدم و قالي نصبر لين نشوف ايش يصير ...

الحكايه و مافيها اتصلت اختى على الداخليه تستفسر عن رقم المعامله الجديد بعد ما راحت للاتصالات الاداريه
قام الموظف الله يهديه يقول المعامله تحولت مره تانيه للاماره ونشيك هناك يوم الأربعاء الجاي !!!!!
طبعا انصدمنا من الموضوع لانها لِسَّه راجعه الاماره وقالوا الأوراق كامله ما ناقص الا ختم كانوا ناسينه
وتتصل اختى بالاماره و تقول لها الموظفة انه المفترض ما ترجع لهم و انه او في موافقه او رافض من الداخليه و الاماره المفروض مالها اي صلاح
وان الأوراق كامله و ماطلعت من عندهم الا بمواقفه الاماره و انطباق الشروط عليها

حسّيت طبعا و قتها الدنيا انسدت في وجهي و صعبت علي الدنيا انه في حياتي مالنا كلمه و في ناس تقرر لنا مصيرنا ، املي بالله كبير بس ثقتي في الناس و أمانتهم في شغلهم انعدمت تماما . قعدت بس اتحسب و فعلا جديا فكرت اقنع اهلي نعقد من غير موافقه و بعدين نصحح وضعنا .

قعدت في البيت اقرأ و اشوف تجارب ناس تانيه و مالقيت اي احد مر بالموضوع نفسه
ولسبب ما قمت شيكت على رقم المعامله تاني في الداخليه
و الاحظ ان الجهه التى صدر لها تغيرت من الاتصالات الاداريه
و كتبوا وكيل الشؤون القنصليه بوزارة الداخليه !!!!!!!!
ماصدقت اللي شفته و قمت أتأكد من الرقم و التاريخ و كل شئ لأكون كاتبه شئ غلط
و فعلا معاملتي
و اول حاجه اعملها اتصل على الوالد و أعطيه خبر و اختى و أمي و خطيبي
والله حسّيت ان هم و انشال و لِسَّه ماني مصدقه
الحمدلله حمدا كثيرا والله عيوني كلها دموع كيف ربي غير حالي من احباط و اكتئاب لفرح و راحه
كله من فضل الله و رحمته بي و انا المقصره

والآن نصيحة للموجودين لا تعتمدوا تماماً على كلام الموظفين بعد اللي صار لي هشيك بدل المره عشره و استفسر يوميا
ما اعرف ايش خلى الموظف يقول معاملتي تحولت و ايش خلاه يفتي من غير علم الله يهديه و حسبي الله و نعم الوكيل

يارب يسهل أمور الجميع و بكتب لهم الفرج من حيث لا يحتسبون
وبالتوفيق

دعواتكم تتسهل الأمور الان و نعقد على سنه الله و رسوله