المشاركة الأصلية كتبت بواسطة ساره-محمد

هوا مو رافضه كشخص
هوا بس ما يبغى معاملات ويجري ورا شي
يبغى رجال جاهز
انا مطلقة واهلي صح خايفين عليا
بس ابوي يبغاني اتزوج واحد من الجماعةو وخلاص ما يبغى معاملات ولا كلام ناس ولا شي
هو متاكد انه الرجال يحبني وشاريني وانه انسان كويس
وقالي هيا بصريح العبارة انا مالي نفس اجري ورا معاملات
انا تطلقت من فترة طويلة واهلي ضغطوا عليا في زواجتي الاولى وما كنت مقتنعة وراضية
قلت اش احسن من اني ابسطهم بس ربي ما كتب لي اكمل ورضيت وسكت
رغم اني اتعب واتوجع كثير بس اقول يا بنت الناس لا تكتئبي وتتعبي اهلك بهمك
شلت نفسي واشتغلت ودرست وابتعثت وكنت في كل شي زي ما يبغوا
والحين يبغوا يزوجوني انا عارفة انه من باب خوفهم عليا واهلي مو من النوع الظالم
بس بتفكيرهم وضغطهم عليا بيظلموني بدون ما يحسوا
يعني الحين يقولولك في طابور عرسان اختاري ولا تتعبينا
كلهم متزوجين ولا كبار في السن
تراني لسة 25 سنة ولما زوجوني كنت طفلة بجد
انا فعلا مابغى اخوض تجربة ثانية واعل قلبي عالفاضي وانا عارفة نفسي
ودايما اقولهم بلاش تخلوني اظلم احد انا الي حتحاسب بعدين مو انتوا
ما احس انه حقدر اتحمل عيال مو عيالي وهذا الكلام
ليش احط نفسي في حياة انا مو قدها وما حصبر عليها
بس عشان اكون متزوجة ومتستتة في بيت مع رجال واخلف منه وخلاص
يعني بجد مافي شي يستدعي اكون كذا مو ناقصني جمال ولا مال ولا تعليم ولا نسب الحمدلله
مرتاحة من كل النواحي الحمدلله
وما كنت متخيلة انه في رجال بيدخل حياتي واقول ابغى اتزوج تاني
سبحان الله ربي حط الانسان هذا في طريقي
هو ما يحتاج اقناع لانه ابوي اعرفه لو رجال يبغاه تلقينه يجري وراه عشان يرضى علينا وانا ما احب كذا
يعني ما فينا العيب الي يخليه يسوي كذا
تصدقي اول مرة اتجرأ اقول هذا الكلام بس فعلا هذا الي صار معايا ومع اخواتي
هوا اطيب من قلبه مافي وحنون معانا يمكن هو صح تفكيره تفكير زمنه وعمره وانا ما الومه
بس مو بيدي التعب
ربي يسهل امورنا ويسهل قوانين البلد هذي
وخطيبي ليبي مو سوري حبيبتي