نفساني - عرض مشاركة واحدة

30-04-2015, 07:53 PM

سبحان الله انا مثلك ماعمره طب فمي لا مخدرات ولا حشيش ولا حتى دخان ولكن وش اللي جابلي الهلوسات هذي السمعية الله اعلم!!
وللي فاقع قلبي والله تخيل اني كنت استخدم مخدرات وش راح بيصير فيه؟؟
كان يمكن اني من كثر المشي تعديت مجرة درب التبانة ووصلت مجرة ثانية وانا حافي!!
وغيري طول وقته يضرب في الحشيش والابيض ووضعه ماشي زي الحلاوة!!
وترى هذا اللي عندنا في الحارة للمعلومية مثلي ومثلك ماعمره تعاطى مخدرات ولا شي بس مدري من ايش جاه الفصام؟؟!
وبعدين تصدق قبل ما استخدم مضادات الذهان ماكنت اسمع هذي الاصوات نهائيا!!
كنت بس احس ان الناس طول الوقت يتآمرون عليه ويتكلمون فيه ويسبونني وانهم بيروحون مثلا يبلغون فيه الشرطة وافكار سخيفة من هذا القبيل!!
والمشكلة ان ادري انها افكار سخيفة بس في نفس الوقت ما اقدر اسيطر عليها وكانت تسببلي اكتئاب شديد لدرجة اني افكر بعض الاوقات في الانتحار للتخلص من هذا الاكتئاب الشديد اللي يجي مع الافكار الاضطهادية
وكانت نوبات الاكتئاب احيانا تشتد عليه لدرجة اني احيانا اجلس اسبوع كامل ما اقدر انام ولا اقدر آكل ولا حتى اقدر اجلس في مكان واحد!!
واقعد طول وقتي ادور على نفسي في البيت وبكاء وتطريش لدرجة اني في اليوم الواحد يمكن استفرغ اكثر من خمس مرات!!
ولكن بعد ما استخدمت الادوية بسنتين تقريبا صرت اسمع اصوات واصوات صراحة مزعجة بعض الاحيان تخليني افز من فراشي!!
وهذي الاصوات ماتجيني الا وقت النوم يعني يادوب احط راسي على الفراش اسمع انواع الاصوات واحيانا انغام موسيقية واحيانا شعر واحيانا كلام غريب مدري وش هو بالضبط احسه لغة غير لغتنا!!
واكثر شي ملاحظة صراحة ان الاصوات تشتد عليه اذا مثلا توترت او مثلا كان عندي التزام اليوم الثاني يصير يادوب احط راسي على المخدة الا وانواع الهلوسات السمعية وياقلب لا تحزن :(

صح اني في البداية اول ما بديت اسمع الاصوات جاني خوف شديد واكتئاب ولكن بعدين مع الوقت خلاص تأقلمت مع الوضع صرت يادوب اسمع الاصوات على اطول اصحى من نومي واغسل وجهي واشرب شوي مويه واكل زبادي وارجع اكمل النوم مع الاصوات والنغمات الموسيقية والشعر الناس تروح الفراش تنام وانا اروح الفراش وادخل في عالم اليس في بلاد العجائب هههههههههههههه

وتصدق صرت احس ان الدكتور محمد عبدالعليم صراحة ماعنده سالفة يوم يقول مضادات الذهان ما تخرب المخ الا بالعكس تنظم الكيمياء في المخ واكثر الدكاترة يقولون مضادات الذهان ماهي هي اللي سببتلك الهلوسات وانا بصراحة ماني مقتنع انها تشفي الا بالعكس انا شاك بنسبة كبيرة ان مضادات الذهان هي اللي سببتلي الهلوسات السمعية بس عاد غلطة وندمان عليها ..
وانا علشان كذا قلتلك اترك مضادات الذهان يعني الدعوة ماهي فلسفة من عندي صراحة ولكن من بعد الشي اللي جربته والقصة اللي عشته قلتلك اترك مضادات الذهان لاني بصراحة ما اعتبر مضادات الذهان ادوية ابدا واشوف ان ضررها اكثر من نفعها