المشاركة الأصلية كتبت بواسطة يارب يسر امري

السلام وعليكم ورحمة الله وبركاته

حابه اسردلكم قصتي ومعاناتي مع عالم المعاملات

طبعا قبل كل شي انا عمري الان في رمضان دخخخلت ?26 اتخطبت في اوااخر 23
خطيبي نفس عمري ?(( ?من جنسيه عربيه وام سعوووديه ومولود وداارس هنا الين البكالريوس )) (( يعني ابن مواطنه ))
وشوفو كيف المعاناه مافاد دا كلو

في البدايه قدمنا اول معامله وانتهينا من كل الاجراءات وكانت التحاليل سليمه
طبعا في عام 1434 قبل تغيير الشروط الي 30
فوسط معاملتنا اتغيرت الشروط وسارت 30
لما وصلت معاملتي الاماره اتوقفت ورجعت تاني الشرطه والسبب تغيير الشروط اللي يشمل الجميع حتي اللي مقدمين من قبل للاسف بعد صبر 8 شهور
((وكااانت اووول عقبه))
الكلام دا حصل في نهاية شهر 6 و في شهر 8 اتعاملو اهل خطيبي مع معقب على انه يدفعولو نصف المبلغ والباقي بعد العقد وحصل ودفعولو ومااااطلنا من وقتها يا مايرد يامسافر يا زحمه شغل الييين شهر 3 السنه اللي بعدها يعني صبرنا عليه قرابه 9 شهور وفي النهايه ولا شي
((وكانت العقبه التانيه))
في اواخر شهر 3 بابا دخل ع الامير وقدم معروضو لكن للاسف رجع في الشرطه بعد اسبوعين بحسب التعليمات
((وكانت العقبه الثالثه))
قام الامير خالد الفيصل الله يطول في عمره بتغيير شروط العمر
والجميع فرح وكانت بالنسبه ليا معجزه في حياتي مو بس فرحة
وقدمت من مكة والمرات الاولي كانت كلها من جده
وللاسف مستشفي الولاده طلعو خطيبي مريض بمرض الهميوفيليا (( كذب )) بعد اعادة مرتين يعني تلاته مرات سحبولو دم حسبي الله عليهم وفي النهايه افترا وكذب في كذب?
فااتوقفت المعامله?
(( وكانت العقبه الرااابعه ))
خطيبي اتجنن وانا اتجننت واهلو واهلي كيف الكلام دا وعمره مااشتكي من اعراض و و و وغير حلل قبل كدا وكان سليم
وكثرة الاقاويل والكلام وانو خلاص خيره ومن الكلام اللي مايحتاج اقولكم عليه اكيد كلكم سمعتوه
راح خطيبي مختبر البرج بتيسير من الله اللي مايترك عبده وحلل والحمدلله طلعت النتيجه سليم ونسبة تخثر الدم عاليه كمان ماشااء الله تبارك الرحمن
اخد خطيبي النتيجه واعطاها المستشفي تاني ودخل ع المديرة هدى فلمبان?
?وقالتلو حنعيدلك التحليل للمرض دا فقط وبعد كم يوم نصدرها فعلا وراح استلمها في اقل من 10 ايام والنتيجه سليم ماشاء الله تبارك الله بحمد الله
وتم اكمال اللازم من الاجرءات بتيسير وفضل من الله جل وعلا?
وتم عقد قراني ماشاء الله تبارك الله يوم مابلغتكم
وانتهي كابوس سنتيييين اللهم لك الحمد
اللهم لك الحمد كما ينبغي لجلال وجهك وعظيم سلطانك
وعقباااال كل اللي منتظرين ياااارب

اتخيلو النفسيات اللي عديت فيها خلال السنتين دي جربت كل انواع الحفظ اللي يجربوها الناس من عمر
من تحاليل
?من معروض?
من تقديم عادي
?كلو حفظ حفظ

سردتلكم قصتي عشان اللي تعبان يصبرر ويشوف ايش سار معايا والحمدلله فالاخير عقدت
ولعلمكم انا ولا شي جنب غيري لو تسالو حتسمعو العجب العجاب اكتر مني
لكن ماكان بيدنا غير الصبر والدعاء

وماانكر انا وخطيبي جاتنا اوقات ضعفنا واتحطمنا وفكرنا انو خلاض نفاسخ
لكن ينفتح باب جديد من الله يعطينا شويه امل
وماتضيق الا تفرج باذن الله


المختصصصررر لكل شاب وبنت اذا شاريين بعض اصبروووو واتحملووو وخلو املكم بالله كبيييير لانو هو اكبر من ما نتخيل

وبكرا لمن تفرج ويسير النصيب حتحمدو الله انكم صبرتو و وماااقطعتو الامل