كان والدي يعاني من مرض مزمن ومثل ماذكرت سابقاً يحتاج إلى عناية أسرية من أهله وهذا واجبهم رغم مرض والدي والظروف القاهرة سبق وقف مع أعمامي كلهم اثنين منهم والدي تكفل بالمساعدة بالسفر معهم وعلاجهم ومرافقتهم إلى أن تشافوا
وكذلك عماتي ساعدهم كثير في حل مشاكلهم الأسرية والطبية
يعني بإختصار بدل كلام طويل وقف معهم مواقف صادقة وفزعات لا تنتهي
وبالمقابل يتصرفون معه ومع أبناءه بتصرفات لا إنسانية ولا يصدقها العقل وبدون سبب!

رغم مرض والدي مازاروه أبداً ومن واجبهم يزورونه ف بيته ويسألونه عن صحته وهل تحتاج إلى مساعدة ؟ طيب من واجبات أبناءهم زيارة خالهم ف بيته وسؤاله عن صحته وهل يحتاج إلى المساعدة ؟ لو مجاملة طيب ؟ طيب لو تليفون ؟ طيب لو بالأعياد بس يعني مرتين بالسنة ؟ للأسف جميعها لا
مثل ماذكرت سابقاً اتى الإسعاف أكثر من مرة ولم يزرنا أحد منهم أو يتصل يسأل
لكن كان فيه جار طيّب حاس فينا وشايف حركاتهم رغم صغر سني أعطاني سيارته للذهاب بها لزيارة والدي بالمستشفى جزاه الله ألف خير
والواضح من الجار هذا من علامات وجهه إنه شايف وبقوة تصرفات أهل أبوي
عموماً من ضمن المواقف التي لا تنتهي
مرة من المرات حصل خلاف زوجي بسيط جداً جداً يحدث لجميع المتزوجين

أخي الصغير خاف أن يحدث شيئ بين أبي وأمي وراح يجري لعمي حصل عمي بالشارع وبكل برود ولا مبالاه عمي قال لأخوي الصغير شايف الشرطي هذاك ؟ اخوي قال ايوة .. قال عمي روح للشرطي علمه !
ثم أخوي الصغير بسبب صغر سنه وصغر فهمه بأمور الحياة راح للشرطي وعلمه وجات الشرطة لبيتنا وجيت أنا من مشوار فجأة وأحصل سيارتين دورية !!!
قال لي الضابط أخوك الصغير يقول كذا وكذا واتصل بنا واحد ع الهاتف اسمه ( ..... ) طلع عمي اسم عمي
قلت للضابط ماحصل إلا كل خير واللي اتصل بكم وجابكم عمي الله يهديه
الضابط قال ليه يهج من الموقع ؟ الله يهديه
قلت له مدري عنه بس ماحصل إلا كل خير
المفروض من العم الإنسان الواعي العاقل يحن على ولد أخوه الصغير ويروح يشوف أخوه وإذ فيه مشكلة من عدمها أم لا وصلى الله وبارك

بس بخبث يقول لاخوي الصغير روح للشرطي ويتصل ع الشرطة ويهج .. اسالكم بالله يا اخوان هل هذا تصرف انسان عاقل ؟
عموماً اتصلت به أنا وهددته بأن لا يقرب من والدي أو يحاول يعيد تصرفاته الهمجية بجلب شلة شوارع هددته بأن لا يقرب من والدي مجدداً وقال لي ايييييييييييييييييوة من زمان انتظر اللحظة هذي كويس سمعت منك الكلام هذا
وقفلت السماعة
طبعاً تصرفي تصرف شخص يحب والده ولا يرضى المذلة أو المضرة لوالده ولوقف المهازل والإنتهاكات اللي تحصل لوالده
طبعاً لو في إنسان بينهم عاقل بيقول تصرف الولد تصرف رجولي وكفو ويدل على بره لوالده لكن للأسف تخيلوا سبق وذكرت لكم إنهم ينشرون عنا شائعات عند الناس كلها كذب ف كذب وللأسف المصيبة الناس يصدقونهم!
رغم ظروفنا القاهرة الصعبة والوضع المادي المتدني ماعمرهم زارونا أبداً خير شر هم وعيالهم

مع العلم أنهم يتمتعون بوضع اجتماعي واقتصادي ممتاز جداً
من بيت ملك وسيارات وفلوس
أبناءهم للأمانة يدخنون ولهم أصدقاء سوء
أنا لا أدخن حتى ببسي ما أشربه ولا أقربه
أحياناً أكون رايح لمطعم ألاحظ خروج عيالهم من كازينوهات شيش وإلخ
لا أريد إطلاق الأحكام على عيالهم ف الله اللي يحاسب الناس وليس أنا
ولكن اذكر لكم أمثلة حيّة تراها العين
والحمدلله أنا انسان خلوق جداً ومحافظ وكله بفضل الله ثم بتربية والديّ
أكمل لكم سلسلة مواقفهم تجاهنا

أتذكر عمي اللي يسكن بنفس العمارة كان كل مايشوفني مثل أكون رايح البقالة وأنا صغير طبعاً يفرك أذني بدون سبب
مرة أمي شافته من ورا الباب يسوي فيني كذا وبخته وردة فعل طبيعية لكل أم
تفل ع الباب يعني ع أمي !
مرة عمي أخذ والدي للأردن وبقوا هناك أقل من شهر
أول ماطلع أبوي مبلغ التقاعد طار بحلق أبوي ويطلبه 50 ألف وأنها حقته هو اللي دفعها لأبوي ومدري وش طبعاً كلها كذب للأسف وأبوي أعطاه
كان فيه صديق لأبوي .. أبوي مسلفه مبلغ
راح عمي هذا وأخذ المبلغ ! طبعاً فيه حركات كثيرة وهذي وحده منها
كان أبوي رجل خلوق وكريم ومسامح لذلك رغم الإنتهاكات وقلة الأدب اللي تصير منهم أبوي يسكت

العمارة والأرض ملك لأبوي وبالصكوك الشرعية
وأبوي كان مسوي شقة لجدتي وكانت ساكنة فيها عمي طلعها وخلاها تسكن بصندقة فوق السطح عفواً قصدي ملحق من خشب
وكان أبوي مسكن عمي ببلاش رغم الظروف القاهرة ولسنوات طويلة جداً
تخيلوا مرات أبوي يطلبه سيارته لمشوار بسيط زي مستشفى أو سوبر ماركت وكان عمي يرفض! شايفين كمية البجاحة وقلة الخُلق ؟
مرة من المرات كنت امدح عم لي عند أمي تفاجئت إن أمي تبتسم وأنا امدح عم لي إنه حاله حال نفسه
سألت أمي وش فيه ؟ ورتني جوالها ولقيت رسالة من عمي هذا رسالة تهديد وسب وشتم والله ثم والله السميع البصير يا إخوان إنها بدون سبب وبدون سابق إنذار واحنا حالنا حال نفسنا مالنا ومال أحد تخيلوا !
شايفين كمية سوء الأخلاق اللي فيهم ؟ وغرابة أطباعهم ؟

وكان عمي اللي ساكن بنفس العمارة يتصرف تصرفات صبيانية مضحكة بدون سبب وبدون أي مناسبة كان يمسك اخوي الصغير ويقوله روح لأمك وقولها يقولك عمي هذا بيت أبوي (يعني جدي) مو بيت أبوك < شايفين غرابة تصرفاهم وسوء أخلاقهم !
أنا قررت أضع حد لظروفنا الصعبة وكنا ندور الريال الواحد
رحت لجدتي وبيدي هدية وطعام وجلست معها وكلمتها بخصوص لو تكلمين عمي يدفع لنا إيجار وخليه يدفع اللي يقدر عليه < لاحظوا أسلوبي الطيّب رغم كل الإنتهاكات أكرر ومواقفهم السيئة تجاهنا
للأسف كانت ردة فعلها سيئة وقامت تقول هذا مو بيت أبوك لو تثبت إنه بيت أبوك أنا اخلي عمك يطلع واشتكيه بالمحكمة
( كان مستغلين مرض أبوي بكل شيئ )
رحت أنا البيت ورجعت لها وبيدي أورق وصكوك شرعية أصلية تثبت إنه بيت أبوي وإن الأرض أرض أبوي وهم ماحطوا فيه ولا ريال ولا مسمار واحد
قالت خلاص أنا ادفع عن عمك وأنت وانت .... وانت وانت ... وانت وانت
توها تقول لو تثبت إنه بيت أبوك اطلع عمك واشتكيه بنفسي للمحكمة !!

قلت لها جزاك الله خير مابيك تدفعين ولا ريال وطلعت
اذكر من مرة من المرات فكرت وفكرت قلت للأسف مافيه رجال حكيم عاقل يحاول يصلح يحاول يسوي شيئ أنا قلت أنا بنفسي بروح لجدتي وأكلمها وأوصلها فكرة إن ودي أشوف العائلتين (هم وأهلي) يزورون بعض ويسألون عن بعض ويد وحده
ورحت لها وأكلمها بأسلوب طيّب جداً
ردة فعلها : قالت لي انت فيك جني ؟ لابسك جني ؟ وانت وانت ... وانت وانت
وهنا اعترفت بلسانها قالت أنا اللي منعت عيال أعمامك من زيارتك !
اسالكم بالله يا اخوان هل هذا تصرف انسان طبيعي ؟ طبعاً لا
قلت لها جزاك الله خير وطلعت
طبعاً خلاص غسلت يدي إنهم يتغيرون للأحسن ولا يوجد بصيص أمل
راسلت ايميل الشيخ محمد العريفي بخصوص تصرفاتهم وباختصار شديد قال لي الشيخ محمد أو من يقومون بالعمل بالنيابه عنه بالرد على رسائل البريد أنه يجوز عدم زيارتهم للأذى المستمر بدون سبب
أنا أخاف الله ولا أفعل شيئ إلا بإستشارة شيخ ف استشرت الشيخ محمد عبر بريده وقال بهذه الحالة يجوز عدم زيارتهم

كان والدي عندهم يبي يبيّت عند أمه ويرجع لنا
كنت اتصل فيه ويعطيني مشغول .. استغربت !
ارجع اتصل ويقفل بوجهي يعني يعطيني مشغول
واتصل ع جدتي ولا ترد علي ! وأحياناً تعطيني مشغول !
طبعاً مع التنويه لا أملك سيارة وحالنا المادي 50 تحت الصفر يعني سيئ جداً
شوي يتصل ولد عمتي الأصغر مني سناً ( عامل نفسه مطوع )
يقولي ترا أبوك تعبان ومدري ايش قلت له يابن الحلال انا اتصل فيه وانتم تعطوني مشغول
اعترف قال لي ايوة جدتي تصك بوجهك !!
قلت له طيب دامه تعبان ودوه للمستشفى ولا جيبه لي أنا أوديه
قال لي ماقدر اجيبه لك قول لجدتي < شوفوا الحركات كيف !
بعدها فاجئني قال لي ابوك بالمستشفى !!!!
شوي جاني البيت كان يدق الباب وأخوي الصغير يقوله مين ؟
هو بعدين قال ي فلان ي فلان يفلان تعال تعال < يناديني أنا
يحسب أخوي الصغير هو أنا وإني سمعت صوته وماني فاتح الباب شوفوا تفكيرهم كيف مسيطر عليهم سوء الظن وهذا بسبب سواد قلبهم اللي أعمى أبصارهم
استقبلته زين دلالة على حسن التربية والخلق ولله الحمد رغم تجاوزاتهم اللي ماتنتهي
قال لي أبوك بالمستشفى وله بالمستشفى
قلت له طيب ماعندي سيارة توصلني لأبوي ؟ وهو معه سيارة مع العلم انه انسان عاطل باطل قال لي والله عندي اشغال معليش < طبعاً كانت ردة فعله متوقعة وفوق هذا كله مسوي نفسه مطوع
عموماً

.. يتبع