سوتولافنارو

بيانات اضافيه [ + ]

رقم العضوية : 51767  تاريخ التسجيل :  09 2015  أخر زيارة : 02-04-2025 (10:20 AM)  المشاركات : 102 [ + ]  التقييم :  10

لوني المفضل : Cadetblue

هل هو إكتئاب أم قلق ام توهم؟

السلام عليكم..

قصتي بإختصار شديد واللي عنده خبرة يقولي وش السالفة:

أنا شخصيتي إيحائية بمعنى سريعة التأثر بالحدث اللي امامي حتى قبل لا اتعرض لاي عارض نفسي.. عشت طفولة ومراهقة طبيعية مافيها تعنيف ولا شي ولا فيه مشاكل تستحق الذكر.. تخرجت من المدرسة بتفوق وخلصت جامعة بتخصص نادر وصعب (جيولوجيا) ومن جامعة صعبة والان انا على راس العمل راتب طيب و وظيفة جميلة ولله الحمد.. يعني المكان اللي بحثت عنه طول عمري والمفروض اني الحين في اسعد لحظات حياتي! وبالفعل اول 9 شهور في الوظيفة بالمعنى العام كنت سعيد وحياتي سهالات..

المشكلة قبل ثلاث شهور من الان تعبت تعب شديد بالمعدة ورحت من الوسوسة قريت عن الاعراض اللي فيني ولقيتها مشابهة جدا لسرطان المعدة ... وهوووب هاتلك نوبة فزع يحبها قلبك وعلطول للمستشفى,, طبعا كالعادة الفحوصات سليمة اللهم آثار جانبية للمضاد الحيوي اللي كنت اكله..
أنا عرفت انه عندي توهم مرضي وبحثت عن علاجاته لقيته يتعالج بادوية الاكتئاب! رحت اقرا عن الاكتئاب وأعراضه وقصصه وخفت وطحت على هالمنتدى الطيب ولقيت فيه ناس بالسنين ولا تعالجوا!! طبعا خفت خوف شديد وجاتني اعراض الاكتئاب كللها! انعدام الشهية كوابيس نوم متقطع ضيقة وفجأة كرهت الشغلنوبة إكتئاب كبرى) استمرت اسبوع و علطول اخذت اجازة قلت اريح شوي..
رديت لاهلي (عايش بعيد عنهم بحكم الشغل) ولا علمت احد ابد.. ظليت على تعبي تقريبا 4 ايام (خلال ال4 ايام تشوفني تقول طبيعي لاني اطلع واروح واجي عادي يعني بس اني متضايق ومو مرتاح).
الزبدة بعد هال4 ايام حسيت اني تشافيت خلاص مع الالتهاء مع الاهل والاقارب ونسيت المرض بكبره ليما خلصت الاجازة ورديت! اول ما رديت شقتي وشفت ادويتي وفراشي تذكرت اليوم الاسود قبل الاجازة ومع كثرة التفكير ردلي المرض.. جلست اسبوعين على هالحالة.. واضطريت اخذ اجازة ثاني مرة.. هالمرة أخبرت أهلي واقترحت عليهم اخذ ادوية وبالفعل اخذني ابوي لطبيب نفسي بالديرة وشخصني بانه اكتئاب شديد ووصفلي سيروكسات 25 ورميرون 15 قبل النوم!.. تحسنت من اليوم الاول (نوم + عودة الشهية نفسيا).. رديت الدوام وليلحيني فيه! وعلى نفس الجرعة! انا الان 90% تحسنت باقي 10% ذكرى المرض وخوف من الانتكاسة!

الشيء اللي يخليني أشك ان اللي معاي اكتئاب التالي:
- أكره العزلة تماما حتى في عز مرضي .. يعني اشوف لا صرت الحالي اضييييق واتوحد مع افكاري واتعب. مهوب معناته لا طلعت استانس مثل قبل بس افضل من لما اكون الحالي.
- ماعندي رهاب ولا وسواس قهري ولا شي.. القي كلمة قدام 1000 شخص ولا علي منهم (بس لازم اكون محضر البرزنتيشن كويس :
- لاحظت من لحظة اخذي لاجازتي الثانية راح 70% من المرض لاني كنت شايل هم شغلي وكفائتي بالشركة وسمعتي عند مديري(وش هالمرض اللي يختفي فجأة)
- الان اتعالج سلوكيا مع معالجي سلوكي يقولي اللي عندك مو اكتئاب.. انت شخصيتك إيحائية تحليلية تتقمص دور ما تتاثر به.
- الان انا قلت دافعيتي وقدرتي على تحمل الضغوط (لاني اخاف الضغط يجيبلي المرض ثاني مرة)..لكني اطلع واداوم واختلط مع الناس ولا حد شاك اني فيني شي... انا اكون طبيعي ورايق لما اختلط مع اصدقائي والتهي بالمواضيع..واصل الى درجة شفاء 100% بس من اتذكر المرض والقصص اللي فهالمنتدى الجميل ينخفض مزاجي كثير ويضيق صدري ويقل تركيزي واخاف جدا من المستقبل واخاف افقد وظيفتي لاني اذا فقدتها افقد اشياء كثير معها!

وش رايكم؟

المصدر: نفساني