|
نوبات الهلع ( خطوه بخطوه كيف تحصل )
السلام عليكم
وما زلنا في مسلسل فك لغز القلق ، والان الكلام عن نوبات الهلع.
طبعا الشرح للهلع سيكون على شكل خطوات وعلى فترات متقطعه للزمن يعني ماهي خلال ساعه يتم هالشي، بل انه ياخذ ايام او شهور او سنين ثم بعدها تجي نوبات الهلع وهذا هو السر لنوبة الهلع المفاجأه وايضا نوبة الهلع القلقيه.
كثير كتبت مواضيع انا عن اسباب حصول نوبة الهلع بسبب القلق ولكن هالمره بشرح بس ايش يصير في داخلنا بأجسادنا وعقولنا بالضبط. وكالعاده، انا اعطيك الزبده والمقادير وانت اطبخها براحتك هههههههههه
شعاري دائما، اعرف اكثر تجد الحلول
ماهي الخطوات الصحيحه ( مع الاسف الصحيحه ) لحصول نوبة الهلع؟
الجواب
خلينا نحط مثال ان الفكره الي بنحط عليها الخطوات التاليه هي مرض القلب والي تعتبر اشهر شي عندنا هههههههههه
الخطوه الاولى
يبدأ العقل بالتفكير بهذه الفكره والتي غالبا تكون شيئا مخيف او مقلق ويبدأ بالتعمق بتحليل الفكره بشكل كبير ويكون التعمق عادة بجوانب الفكره السلبيه، وهذا التفكير يستمر فترة أي انه ليس دقائق او ساعات قد تستمر ايام او شهور وعلى فترات متقطعه او متواصله
الخطوه الثانيه
مع كثرة التحليل والتفكير بهذه الفكره، فـ يأخذها العقل الباطن ويتم تسجيلها على أنها خطر محتمل وحقيقي، وتصبح الفكره ترسخ بالعقل من فتره الى اخرى
الخطوه الثالثه
مع الخطوتين الاولى والثانيه، تصبح الفكره متكرره ومستثاره. ثم تنقطع ثم تعود ثم تفكر اكثر وثم تنقطع. ثم يصدف مثلا انك تشوف تلفزيون ، وحاط فلم والي بالفلم جته نوبه قلبيه ف ترجع الفكره فجأه براسك و يبدأ هرمون التوتر يسري بجسمك وهنا بتحس بقشعريرة وبروده وعادة تحس برجفه سريعه ( هي الرجفه الي تجينا ونقول بسم الله تذكرونها ؟! )
الخطوه الرابعه
بعد ما عدا الفلم وانتهت القصه، رجعت انت لحياتك الطبيعيه ولكن عقلك الباطن مسجل السوالف كلها الي فوق ف فجأه لنفرض انك عايش حياتك طبيعي ولا فيك شي لكن صار شي انت مو منتبه له ابدا ويتعلق بالقلب ومو شرط مرض، ممكن يكون اي شي. يعني مثلا شفت لوحة اعلانيه بالشارع ( أحب أرز بسمتي ) مثلا. فلما شفتها عاديه عندك لكن العقل الباطن حللها ( حب = قلب ) فـ يحاول يحميك لانه عارف انك خايف من سالفة امراض القلب ف يرسل الهرمون حق الخطر وهنا تجيك نوبة الهلع بشكل مفاجئ !! وطبعا الان عقلك الواعي مو عارف السالفه وانت اصلا ما تشوف خطر ابد وهنا تبدأ المشكله
الخطوه الخامسه
الان خوفك صار موطبيعي، و لأن مافي خطر امامك، ف صرت تتابع الاعراض الجسديه ف تبدأ تفكر فيها وان عندك مشاكل جسديه وهذا سوء الفهم هو الي دخلك دوامه ما عاد تعرف تطلع منها ولكن فجأه الاعراض بدت تهدا اكثر واكثر وتزول
الخطوه السادسه
رح تصير تحلل الان الي جاك وتبدأ تقول انا وش فيني ليكون فيني القلب !! طبعا هنا يبدأ التذكر بالفكره المرضيه وتصير خيف اكثر واكثر والجسم العقل الباطن يزيد الهرمون لانك في خطر حقيقي ( لا يميز العقل هل الشي خيالي او حقيقي اي شي تفكر فيه بالنسبه له حقيقي )
الخطوه السابعه
مع زيادة الهرمون يبدأ معه اعراض القلق والقلق هذا له اعراض جسمانيه اخرى والاعراض هذي مختلفه عن اعراض الهلع الي فوق وطويله ف تدخل بدوامة ان عندك امراض اخرى والخوف يزيد
الخطوة الثامنه
الادرينالين الان صار يضخ عندك بشكل دائم وكبير لان الاعراض عندك صارت دوخه وثقل والامور الكثيره الي نعرفها والعقل الباطن ما يعرف الا انها حقيقيه لانك قاعد تحللها كلها انت والهرمون يزيد اكثر واكثر
الخطوه التاسعه ( الاخيره )
رح تكون محصورة بالخطوتين ( السادسه والثامنه ) ولما يزيدون اكثر ينتهي الموضوع ل نوبة هلع !!
الان تم شرح نوبة الهلع المفاجئه وايضا نوبة الهلع الي تجي عن طريق القلق
عاد اخذتو العلم انتم ،، ابدؤا بعمل الحلول
|