نفساني - عرض مشاركة واحدة - الدواء- خيالات واوهام وكذب (ارجو عدم الرد للقراءه فقط)

21-01-2016, 06:23 PM

تحديث

يجب اعادة هذا الموضوع مره اخرى لانه مهم جدا

اشهر سبب لعدم استخدام الدواء ( زيادة الوزن )

يعني معليش ما عمري سمعت زوج يقول لزوجته ما نبي تحملين عشان ما يزيد وزنك ولا عمري سمعت امرأه تقول انا ما بحمل عشان ما يزيد وزني .... ليش؟ لان ببساطه كل شي يتعدل ويتسيطر عليه بعد الولاده وبمعنى اخر الضنى اهم من كم كيلو يزيد الجسم فيه الي بكل الاحوال بيشيلونه بالرياضه والغذاء.

ما عدا الدوا النفسي ،، سبحان الله صار زيادة الوزن فيه مشكله صراحه .... لا لا لا تقولي استخدم دواء مابي وزني يزيد،، او يجي شخص يقول انا استفدت من الدوا بس وزني زاد ما انصح بالدواء ..... بالله عليك !!!!!!!!!!!!!!!!!!!!!!!!!

يعني معليش .... اذا الشخص الي يبي يتعالج مو قادر يستخدم العلاج عشان زيادة وزن فهذا مو مريض نفسي .... اما انه جاي يطقطق او انه مثلا جاي يخفف على الناس بإدعائه المرض ...... لان الي اعرفه بالمرض النفسي لو ان الشخص قالوله لو كسرت يدك وجبرتها بيروح مرضك النفسي وهذا مثبت علميا بمد له يدي واقول اكسرها ..... اجل كم كيلو زياده موقفه الشخص على العلاج ..... هذا غير منطقي البته.

النقطه الثانيه،، لما يجي شخص مثلا ويقولك الدواء زين لكنه زاد وزني ... ولا انصحك فيه وانا ندمت اني استخدمته ....... يعني صحته النفسيه كويسه بس ان الكيلوات الي زادها خلته لا ينصح بالدواء.... مممممم عجيب.

كل دواء له عوارض جانبيه وللاسف ارتبط زيادة الوزن مع مضادات الاكتئاب ،، وبصراحه لو الكلام هذا صحيح وحتى لو كان صحيح هذا مو سبب يعني عشان الواحد يفضل انه يبقى مريض نفسي ويعاني عشان يكون رشيق. يعني تبي تكون رشيق وانت مريض نفسي عاجبك وضعك .... دام عاجبك ما اعرف ليش تشتكي كثير ،، يعني انت عاجبك كل شي حاليا ف ايش الي مزعلك؟؟ الله اعلم

كلكم تعرفون ان العلاج رح يفيدكم وكلكم لكم اعذاركم وانا اعرف ان زيادة الوزن ماهي منها بس لان خلاص ارتبط هالشي مع مضادات الاكتئاب ف صارت هي الحجه على عدم استخدامها وصارت تتناقل بشكل فظيع ..... انا بموت ، فيني قلق، ما اتحمل نفسي ماني قادر ،، طيب خذ دواء ... لا لا يزيد الوزن ...... عجيييييب

كل شخص مثل ما قلت له اسبابه، قد يكون اهله مو راضيين، قد يكون هو خايف بسبب الاعراض ، قد يكون ما يكون الي هو ..... بس لا تقعد تتحجج بزياده الوزن لان امر سطحي مثل هذا يبين اكيد انك منت مريض نفسي ... بس زهقان او متملل من حياتك او متأرق شوي ومتضايق لا اكثر فتره وتعدي .... اذا كان كذا ف لا تظلم نفسك ولا تنسى ان اغلب الامراض النفسيه قد تأتيك من كثر ما تتجسد على انك مريض ف عقلك الباطن يصدق الشي ذا وفعلا تصير اسير المرض ك نوع من الوسواس القهري.

المهم، ارجع اعيد،، المضادات الاكتئابيه لا تزيد الوزن،، بل تفتح الشهيه ..... نعيدها تفتح الشهيه فقط وانت الي تبلع وتزيد نفسك ،، لو تنتبه ع نوع الاكل انت بخير .... وبعض الناس يجيهم انسداد شهيه يعني العكس

الي يزيد الوزن مضاد الذهان فقط ، وانتم مو ذهانيين ف يا ليت تنتبهو لهالنقطه

مثلها مثل الاشاعه الي صارت على البنادول ،، قالو اقطعوها عشانها تسبب مشاكل صحيه .... وتحولو الناس للفيفادول هههههههههههه والمشكله نفس التركيبه بالضبط شي مضحك

واكتشفو الخدعه ورجعو لبنادول

والادويه النفسيه نفس الشي ... صار يقولك بروزاك يزيد، زيروكسات يزيد، افيكسور ما يزيد وهكذا

يا جماعه كلها ترفع السيروتونين .... السيروتونين اذا ارتفع،، المزاج يتحسن ف شهيتك تتحسن بالتبعيه لان هرمون اسمه ليبتن يبدا يزيد عندك وهو مسؤول عن الجوع.

مضاد الذهان يبطئ عملية الايض بهذا يزيد الوزن بدون اكل

اتمنى ما نجد اعذار مضحكه مره ثانيه، ونكون امة أقرأ بجد مو امة اسمع

يكفي نتناقل امور عجيبه ،، وتذكروا

عَنْ حَفْصِ بْنِ عَاصِمٍ قَالَ قَالَ رَسُولُ اللَّهِ صلى الله عليه وسلم: كَفَى بِالْمَرْءِ كَذِبًا أَنْ يُحَدِّثَ بِكُلِّ مَا سَمِعَ . رواه مسلم

نلقاكم بالتحديث القادم