نفساني - عرض مشاركة واحدة

10-04-2016, 03:47 PM

السلام عليكم ورحمة الله وبركاته.
بحاول ألخص لكم مشكلتي بشكل سريع! مشكلتي أني ما أعرف ماهي مشكلتي بالضبط!
أنا أعاني من كذا شيء ولا قدرت أحدد شو المشكله, اللي أباه أنكم تحددولي مشاكلي مع الحل . . .

انا انثى عمري 23 متخرجه من الجامعه قاعده في البيت وابحث عن وظيفه!
بتكلم شوي عن شخصيتي أنا شخصيه هاديه نوعا ما خجوله اجتماعيه وأحب الناس
شخصيتي دينيا ملتزمه الحمدلله بالصلوات أكيد عندي ذنوب بس أعاني من تأنيب ضمير شديد على أي شي أسويه
أخاف مثلا أنه يكون حرام وأنه يرجع لي يوم من الأيام !
عندي خوف شديد حريصه بشكل كبير على أتفه الأمور مثلا ( هذا أكثر شي أجهل سببه أحتاج حل له )
: لو صار لي موقف ومثلا خفت منه يعني سواء يستاهل أو ما يستاهل أقعد أحلل فيه من كل النواحي وأحط كل الاحتمالات و ممكن تمر شهور وأنا أفكر في نفس الموضوع . . .
هل خوفي منطقي ؟ هل لازم أكون حريصه هالحرص كله هل وضعي طبيعي؟

مع العلم والله أني أخاف من الله كثيرا, وأريد أذكر نقطه من ناحية الخوف ! أنا من النوع اللي ما يحب يشتكي لحد أحس مافي انسان يفهمني وأحس بذل كبير لما افضفض! وفي نقطه مهمه هي أيضا غير هذي الأسباب أحس أنه غلط أشتكي لحد والله موجود و استغفرالله حتى وانا اكتب هالكلام أحس كأني التجأ لحد غير الله؟ هل انا مجنونه استغفرالله هل كلامي صح؟

ودايما عندي خوف لو حد قالي بكلمك أو نتيجة فحص أو أي شيء أحس وراه مشكله !
أعوذ بالله تفكيري صار سلبي بشكل ما تتخيلوونه حياتي كلها أفكار سلبيه !

أبا اسم لحالتي هذي مع الخوف وحل لها حل وماذا أفعل؟(خصوصا موضوع الشكوى هذا لغير الله)!
هذا من ناحية الخوف.

وغير هذا فيني توتر شديييييييييييييد أي شيء يوترني وطولة بالي صفر
بسرعه بسرعه اتوتر !
في شيء ثاني بعد مضايقني هو اني انسانه تفكيري سلبي جدا جدا
يعني كل شي افكر فيه بطريقه سلبيه كل مش زين بالنسبه لي كل شيء يخوفني أخاف من التغير واخاف من الفشل احرم نفسي واوقف حياتي على اشيا ماله من الصحه أساس بس لان نظرتي لها كله خوف و تشاؤم
وعلى كيفي مخي يبرمج الأمور يعني احس انه اتطير من اغلب الأشياء
(لو غصيت ف كم لقمه اترك الاكل- لو اخترب لي شي اكنسل الشي كامل – لو كنت ناويه أقوم باي عمل و صار شي بسيط اتشائم من الموضوع كله )
أبا حل لهذا الشيء . . .

أما من ناحية الوساويس فهي لسته طويله !
عندي وسواس الموت والأمراض و التكرار والنظافه و الصلاه والوضوء وعندي حالات هلع و حاليا حالة اكتئاب!
وأشياء كثير ماعرف ادرجها تحت أي صنف !
عندي هالحالات من كذا سنه يعني الموت و التكرار من الاعداديه (علما اني توي متخرجه من الجامعه) !
التكرار مستمر للان يعني قبل اسكر الليت او أي زر اتم اعد او أقول بسم الله ثلاث مرات يعني أشياء هبلا بس مستفزه !
وسواس الوضوء اشتد عليه قبل فتره بس قاعده اتخلص منه !
وسواس الموت يعني يروح ويرجع بس خف !
وسواس النظافه ماذيني بشكل من كل شي اتقرف و اغسل ايدي مليون مره ودايما اتفل وحالتي حاله استغفرالله !
وفي وسواس الادعيه مثلا يوم اقرا دعاء اعيده وصرت اتعب يوم اقرا الاذكار دايما يخلني اعيدها مليون مره ويوم اقرا فيها كلمه مثلا شر ولا موت في الاذكار أخاف ويحسسني الوسواس انها عني هالكلمات !
وهذا اكثر وسواس متعبني صرت اتكاسل عن القرايه احس يخرب علي كل شي أبا اسويه . . .

مرات اقدر اسيطر ومرات كثيره يغلبني الشيطان !

الشيطان يوسوس لي في كل شيء احبه ! يعني لو فخاطري حلاوا يوسوس لي انه مش زين لو كليت او أي فعل احبه او بسويه او حتى لو بتسبح يقولي بيصير فيكي شييء وهكذا قيسوا ع باقي اموري !

حياتي مع الوسواس تغيرت كثير صرت احرم نفسي من مليون شيء صرت مش عايشه عمري
هذا عن الوساويس!

في موقف صار لي من أسبوع أتمنى أعرف ما هو بالضبط !
انا صار لي شهر أمر بحالة اكتئاب شديده امتنعت من فعل أي شيء أحبه من كثرة الخوف ولا آكل نزل وزني بشكل مخيف
اقسم بالله اني صرت أكل بس لاني أخاف يصير فيني شي لو ما كليت ولا مالي نفس نهائيا ! حالتي ما يعلم بها الا الله !
المهم مره كنت في قمة الحزن والبكاء احس بوحده شديده واحس حياتي حزينه جدا كنت أبا ادعي الله وفجاه انربط لساني كل ما أبا أتكلم ما اقدر ادعي*فقط الدعاء* قمت اسوي حركات غريبه بجسمي امد ايدي ورجولي واحس تبلدت وفجاه فصخت ملابسي بسم الله ماعرف شو جاني المهم قعدت يمكن ساعه الأربع ! وفي نفسي أبا أقوم ادعي قبل المغرب المهم اخر شي لبست ورجع وضعي طبيعي ودعيت بس كان موقف غريب!
حد يعرف ماهو؟

أنا صار لي فتره أمر بحالة اكتئاب و حاليا قاعده أحاول أطلع منها . . .
بس في مشكله كل ما افكر اتغير و لا اعدل من وضعي . احس بنفس انه حد يقولي لا تحاولين اول ما تحاولين تعدلين بينتكس وضعك وهكذا . . .
حد جرب هالشعور؟؟؟

ارجوكم حد يفهمني شو فيني و يعطيني حلول للي انا فيه !
وشكرا مقدما!

المصدر: نفساني